Laʼ laj cʌcʼ chaʼan jiñi i cuchol wocol miʼ ‹tsʼʌctiyel i pʼʌtʌlel›

1, 2. a) ¿Chuqui miʼ pʌsbeñonla chaʼan tsaʼ bʌ i cuchuyob Gedeón yicʼot jiñi 300 i wiñicob? (Qʼuele jiñi dibujo am bʌ tiʼ tejchibal). b) Cheʼ bajcheʼ miʼ yʌl Mateo 24:13, ¿chucoch wen ñuc i cʼʌjñibal cheʼ mucʼʌch laj cuch?

JIÑI juez Gedeón yicʼot i soldadojob woliyob (choncolob) ti guerra, i wen lujbobix. Jumpʼejlix acʼʌlel i cajelob ti ajñel cheʼ bʌ 32 kilómetro chaʼan miʼ jisañob jiñi i contra. ¿Chuqui tsaʼ ujti ti wiʼil? Jiñi Biblia miʼ yʌl: «Tsaʼ chaʼ tili Gedeón ti Jordán. Temel tsaʼ cʼaxi yicʼot jini joʼlujuncʼal i winicob. Wen lujbeñobix». Pero maxto i mʌlʌyob (jotoyob) jiñi guerra come anto 15,000 i contrajob cuxuloʼ bʌ. Jiñiyob cabʌl jabil tsiʼ ticʼlayob jiñi israelob. Jin chaʼan, Gedeón yicʼot i soldadojob maʼañic miʼ mejlelob ti lujbʼan. Tiʼ caj jiñi, maʼañic tsiʼ cʌyʌyob i yajñesan jinto tsiʼ jisayob (Jueces 7:22; 8:4, 10, 28).

² Añonla jaʼel ti wen tsʌts bʌ guerra yicʼot muʼ bʌ i lujbʼesañonla. Laj contrajob jiñʌch Satanás, ili i pañimil (mulawil) yicʼot jiñi mulil. An cabʌlix bʌ ora laj cajel laj contrajin. An mach bʌ junyajl jach mʌlbil lac chaʼan yicʼot i coltaya Jehová. Pero jiñi guerra maxto ujtemic. An i tajol mi caj lac boʼyel ti jiñi guerra o chaʼan mi lac pijtan cheʼ muqʼuix i jilel ili jontol bʌ pañimil. Jesús tsiʼ yʌlʌ chaʼan mi caj la cubin cabʌl wocol yicʼot tsʼaʼlentel ti cojix bʌ qʼuin. Pero tsiʼ yʌlʌ jaʼel chaʼan miʼ mejlel lac mʌl mi mucʼʌch laj cuch (pejcan Mateo 24:13). ¿Chuqui yom i yʌl cheʼ mucʼʌch laj cuch? ¿Chuqui mi caj i coltañonla laj cuch? ¿Chuqui miʼ mejlel laj cʌn tiʼ tojlel tsaʼix bʌ i cuchuyob? Yicʼot, ¿bajcheʼ mi laj cʌy chaʼan miʼ ‹tsʼʌctiyel i pʼʌtʌlel› cheʼ mi laj cuch? (Santiago 1:4).

¿CHUQUI YOM I YɅL CHEʼ MUCʼɅCH LAJ CUCH?

3. ¿Chuqui yom i yʌl cheʼ mucʼʌch laj cuch?

³ Yaʼ ti Biblia mach cojach yom i yʌl cheʼ mi laj cʌy lac bʌ o mi lac lʌtʼ tsʌts bʌ wocol. Yaʼ ochem bajcheʼ yilal mi laj qʼuel jiñi wocol tac. Yom i yʌl chʼejlel, xucʼtʌlel yicʼot cheʼ la cujil pijt. Jumpʼejl libro miʼ yʌl chaʼan jin cheʼ pʼʌtʌl lac ñopoñel (chʼujbiya) yicʼot maʼañic mi laj cʌy lac bʌ cheʼ woli (yʌquel) lac ñusan wocol. Yom i yʌl chʌn xucʼul mi la cajñel anquese wen tsʌts choncol bʌ lac ñusan. Lajal bajcheʼ mi lac mʌl jiñi guerra cheʼ mucʼʌch laj cuch. Jiñi lac pensar yaʼʌch mi caj i yajñel ti jiñi com bʌ lac taj, mach yaʼic ti lac wocol.

4. ¿Chucoch mi la cʌl chaʼan miʼ coltañonla laj cuch wocol jiñi cʼuxbiya?

⁴ Jiñi cʼuxbiya miʼ coltañonla laj cuch (pejcan 1 Corintios 13:4, 7). ¿Chucoch mi la cʌl? Jumpʼejl ejemplo, laj cʼuxbiya ti Jehová miʼ coltañonla laj cuch chuqui jach miʼ yʌcʼ ti ujtel (Lucas 22:41, 42). Jiñi laj cʼuxbiya tiʼ tojlel la quermañojob miʼ coltañonla laj cuchbeñob i sajtemal (1 Pedro 4:8). Yicʼot jiñi cʼuxbiya ti lac ñoxiʼal o la quijñam miʼ coltañonla laj cuch wocol tac, muʼto i coltan jiñi tijicña bʌ chumulob. Miʼ ñumen pʼʌtʼesan lac ñujpuñel (1 Corintios 7:28).

¿CHUQUI MI CAJ I COLTAÑONLA LAJ CUCH?

5. ¿Chucoch cojach Jehová miʼ mejlel i coltañonla laj cuch?

⁵ Mi laj cʼajtiben lac pʼʌtʌlel Jehová. Jiñi Biblia miʼ yʌl chaʼan Jehová miʼ coltañonla laj «cuch wocol» yicʼot «i ñuqʼuesʌntel [lac] pusicʼal» (Romanos 15:5, Cuxul bʌ tʼan). Cojach Jehová miʼ mejlel i coltañonla laj cuch. ¿Chucoch? Come jin jach miʼ wen chʼʌmben isujm chuqui mi lac ñusan, bajcheʼ mi la cubin lac bʌ yicʼot ñusʌbil bʌ lac chaʼan. Wen yujil chuqui miʼ mejlel i coltañonla laj cuch. Jiñi Biblia miʼ yʌl chaʼan Dios mi caj i yʌqʼuen «chuqui yomob jini muʼ bʌ i cʼuxbiñob Dios. Miʼ yubibeñob i tʼan cheʼ miʼ pejcañob. Miʼ coltañob» (Salmo 145:19). Pero ¿bajcheʼ miʼ jacʼ cheʼ mi laj cʼajtiben lac pʼʌtʌlel chaʼan mi laj cuch?

6. Cheʼ bʌ mi lac ñusan jumpʼejl wocol, ¿bajcheʼ miʼ tsʼʌctesan i tʼan Jehová chaʼan miʼ yʌqʼueñonla lac loqʼuib?

⁶ Jehová miʼ yʌcʼ i tʼan chaʼan mucʼʌch caj i yʌqʼueñonla lac loqʼuib mi tsaʼ laj cʼajtibe i coltaya chaʼan mi laj cuch jumpʼejl wocol (pejcan 1 Corintios 10:13). ¿Bajcheʼ miʼ tsʼʌctesan? An i tajol miʼ tʌtsʼ ti lac tojlel. Pero ñumen miʼ yʌqʼueñonla lac pʼʌtʌlel chaʼan mi laj cuch ti lac tijicñʌyel (Colosenses 1:11). Jehová wen yujil jaʼel baqui jaxʌl miʼ mejlel laj cuch cheʼ maʼañic miʼ ticʼlañonla ti lac bʌcʼtal, lac pensar yicʼot ti bajcheʼ mi la cubin lac bʌ. Maʼañic mi caj i wis acʼ chaʼan miʼ ñumen tsʌtsʼan jumpʼejl wocol mach bʌ mejlix laj cuch.

7. Tsictesan chucoch cʼʌñʌl wen uchʼemonla tiʼ chaʼan bʌ Jehová chaʼan mi laj cuch.

⁷ Mi lac pʼʌtʼesan lac ñopoñel ti chʼujul bʌ bʌlñʌcʼʌl. ¿Chucoch ñucʼ i cʼʌjñibal cheʼ wen uchʼemonla ti chʼujul bʌ bʌlñʌcʼʌl? Jumpʼejl ejemplo. Chaʼan juntiquil wiñic miʼ lʌtʼ letsel ti wen chan bʌ wits, ñumen yom miʼ chaʼlen uchʼel cheʼ bajcheʼ cʼamel ñʌmʌl i cʼux ti chaʼpʼejl o uxpʼejl qʼuin. Yom miʼ wen chaʼlen uchʼel chaʼan miʼ lʌtʼ yicʼot miʼ cʼotel tiʼ pam jiñi wits. Cheʼ lajal joñonla mi la com lac lʌtʼ cʼʌlʌl tiʼ yujtibal, cʼʌñʌl wen uchʼemonla tiʼ chaʼan bʌ Jehová. Yom mi lac tʼoxben i yorajlel jiñi estudio ti lac bajñelil yicʼot mi lac chʌn majlel ti tempa bʌ. Cheʼi chʌn pʼʌtʌl mi caj la cajñel (Juan 6:27).

8, 9. a) Cheʼ bajcheʼ miʼ yʌl Job 2:4, 5, ¿chuqui miʼ yochel ti wocol cheʼ bʌ an chuqui woli lac ñusan? b) ¿Chuqui yom mi lac ñaʼtan ti jiñi bʌ ora?

⁸ Mi laj cʼajtesan chaʼan wen xucʼulonla ti Dios. Mucʼʌch lac wen ubin wocol cheʼ bʌ an chuqui woli lac ñusan. Pero laʼ laj cʼajtesan chaʼan miʼ yochel ti wocol lac xucʼtʌlel ti Dios jaʼel. Satanás mach yomic chaʼan Jehová miʼ chaʼlen yumʌntel. Tsiʼ pʼaja cheʼ bʌ tsiʼ yʌlʌ chaʼan mi lac melben i yeʼtel (troñel) Dios tiʼ cajach chuqui wem bʌ miʼ yʌqʼueñonla. Cheʼ tiʼ yorajlel Job, Satanás tsiʼ yʌlʌ: «Junlajal winicob, miʼ bajñel cʼuxbiñob i bʌ». Ti wiʼil tsiʼ yʌlʌ chaʼan Job mi caj i contrajin Dios, mi Dios miʼ yʌqʼuen wocol (Job 2:4, 5). Cheʼ bʌ ñumeñix cabʌl jabil i chojquel loqʼuel Satanás yaʼ ti panchan, tsaʼto i chʌn jopʼbe i mul i wiñicob Dios (Apocalipsis 12:10). Cʼʌlʌl ili ora woliʼ chʌn al chaʼan mi lac chʼujutesan Dios tiʼ caj jach chuqui wem bʌ miʼ yʌqʼueñonla. Woliʼ pijtan mi laj cʌy lac yuman Dios yicʼot mi laj cʌy lac melben i yeʼtel. Jin chaʼan, mi utsʼat mi lac ñusan jumpʼejl wocol woli lac pʌs chaʼan mi laj qʼuel Jehová bajcheʼ isujm bʌ yumʌl ti panchan yicʼot ti pañimil.

⁹ Miʼ mejlel lac ñaʼtan bajcheʼ yilal cheʼ añonla ti jiñi wocol. Satanás yicʼot i xibajob añob ti junwejl, woliʼ qʼueloñobla yicʼot miʼ yʌlob chaʼan mach lac lʌtʼʌc. Ti yambʌ junwejl yaʼan Jehová, Jesucristo, jiñi bombiloʼ bʌ añobix bʌ ti panchan yicʼot yonlel ángelob. Woliʼ qʼueloñobla jaʼel, pero miʼ subeñoñobla chaʼan mucʼʌch i mejlel lac lʌtʼ. Cheʼ miʼ qʼuelob chaʼan xucʼulonla ti Jehová yicʼot mucʼʌch lac lʌtʼ anquese wocol, miʼ tajob i tijicñʌyel. Cheʼ jiñi miʼ subeñonla Jehová: «Yom pʼipʼ a pusicʼal calobil. Ñuqʼuesʌbeñon c pusicʼal. Cheʼ jini utsʼat mi caj i qʼuelon jini tsaʼ bʌ i pʼajayon» (Proverbios 27:11).

10. ¿Bajcheʼ mi lac lajin Jesús cheʼ mi lac ñusan wocol?

¹⁰ Cojach mi lac ñaʼtan jiñi wenlel muʼ bʌ lac taj. Ñaʼtancu tsaʼ loqʼuiyet ti xʌmbal, pero chaʼan maʼ cʼotel baqui a wom yom maʼ xʌn jumpʼejl acʼʌlel i ti yijcʼʌlel to maʼ cʼotel. Wen icʼchʼipan. Pero a wujil chaʼan mucʼʌch caj a cʼotel mi mucʼʌch a xʌn yicʼot mi caj a qʼuel miʼ chaʼ sʌcʼan. Jiñi laj cuxtʌlel lajalʌch bajcheʼ jiñi xʌmbal. Tajol mi lac ñusan tsʌts tac bʌ wocol i miʼ yʌcʼonla ti pensar. Tajol cheʼʌch tsiʼ yubi Jesús. Tsiʼ wen ticʼlayob cheʼ bʌ tsiʼ chʼijiyob (bajayob) ti teʼ. Ili tajol jiñʌch wen wocol bʌ tsiʼ ñusa. ¿Chuqui tsiʼ colta i cuch? Jiñʌch cheʼ «tsiʼ qʼuele jini tijicña bʌ woli bʌ i pijtan» (Hebreos 12:2, 3). Tsiʼ yʌcʼʌ i pensar ti jiñi wenlel tac muʼ bʌ caj i taj mi mucʼʌch i cuch, bajcheʼ jiñi ñumen ñuc bʌ, cheʼ miʼ yʌcʼ ti sʌqʼuesʌntel i cʼabaʼ Dios yicʼot chaʼan cojach yom miʼ chaʼlen yumʌntel. Wen yujil chaʼan mi caj i jilel i wocol tac, pero jiñi i majtan ti panchan maʼañic baqui ora. Joñonla miʼ mejlel lac lajin Jesús cheʼ bʌ woli lac ñusan wocol. ¿Bajcheʼ? Jiñʌch cheʼ mi lac ñaʼtan i wenlel muʼ bʌ lac taj cheʼ mucʼʌch laj cuch yicʼot chaʼan mi caj i jilel jiñi wocol tac.

JIÑI TSAʼ BɅ I «CUCHUYOB WOCOL»

11. ¿Chucoch weñʌch cheʼ mi laj cʌn tiʼ tojlel añix bʌ i «cuchuyob wocol»?

¹¹ Cabʌl xñoptʼañob an i cuchuyob wocol bajcheʼ joñonla. Tiʼ yorajlel jiñi apóstol Pedro, cabʌl majqui tsiʼ cuchu wocol tac tsaʼ bʌ aqʼuentiyob ti Satanás. Jin chaʼan, Pedro tsiʼ subeyob: «Chaʼlenla wersa tiʼ contra xiba. Xucʼul yom laʼ pusicʼal ti Dios. Ñaʼtanla lajal woliʼ yubiñob wocol laʼ wermanojob tiʼ pejtelel pañimil» (1 Pedro 5:9). Jin chaʼan, wen cheʼ muqʼuic laj cʌn tiʼ tojlel jiñi añix bʌ i «cuchuyob wocol». ¿Chucoch? Come miʼ mejlel i coltañonla chaʼan xucʼul mi la cajñel, chaʼan mi lac ñaʼtan mucʼʌch i mejlel laj cuch yicʼot chaʼan Jehová mi caj i yʌqʼueñonla lac majtan mi xucʼuloñʌchla (Santiago 5:11). Laʼ laj qʼuel chaʼan i wiñicob Dios tsaʼ bʌ i cuchuyob^[1] (qʼuele jiñi nota am bʌ tiʼ yujtibal ili temaj).

12. ¿Chuqui mi laj cʌn tiʼ tojlel jiñi querubiñob yaʼ ti Edén?

¹² Jiñi querubiñob. Ángelob wen ñucoʼ bʌ i yeʼtel. Cheʼ bʌ Adán yicʼot Eva tsiʼ chaʼleyob mulil, an querubiñob tsaʼ bʌ aqʼuentiyob jumpʼejl eʼtel wʌʼ ti Pañimil mach bʌ lajalic bajcheʼ aqʼuebiloʼ bʌ ti panchan. Jiñi miʼ cʌntesañonla chaʼan yom mi laj cuch cheʼ mi la cʌqʼuentel jumpʼejl eʼtel wocol bʌ. Jiñi Biblia miʼ yʌl chaʼan «Dios tsiʼ waʼchoco querubín bʌ ángelob am bʌ i chaʼan espada woli bʌ ti lejmel, woli bʌ ti joyjoyñiyel chaʼan miʼ mʌctan i bijlel jini teʼ muʼ bʌ i yʌqʼueñonla laj cuxtilel» (Génesis 3:24)^[2] (qʼuele jiñi nota am bʌ tiʼ yujtibal ili temaj). Jiñi Biblia maʼañic miʼ yʌl chaʼan mach yomobic i mel o chaʼan wen ñucob i yeʼtel, i jin chaʼan maʼañic miʼ mejlel i melob jiñi. Maʼañic miʼ yʌl jaʼel chaʼan tsaʼ cʼojyiyob o chaʼan tsiʼ cʌyʌyob jiñi eʼtel. Tiʼ tsʼʌctesayob jinto tsaʼ ujti jiñi eʼtel. Tajol ñumen ti 1,600 jab tsaʼ ajñiyob yaʼi, jinto tsaʼ tili jiñi Ñuc bʌ butʼjaʼ.

13. ¿Chuqui tsiʼ colta Job chaʼan miʼ cuch i wocol?

¹³ Jiñi xucʼul bʌ Job. Tajol chʼijiyem mi laj cubin tiʼ caj tsiʼ lowoyonla juntiquil la camigo o lac familia. Tajol chaʼan cʼamonla o chaʼan tsaʼ chʌmi juntiquil muʼ bʌ lac wen cʼuxbin. Pero anquese an chuqui woli lac ñusan, miʼ mejlel i pʼʌtʼesañonla tsaʼ bʌ ujti tiʼ tojlel Job (Job 1:18, 19; 2:7, 9; 19:1-3). Job maʼañic tsiʼ ñaʼta chucoch tsaʼ wen tili wocol tiʼ tojlel. Pero maʼañic tsaʼ lujbʼa. ¿Chuqui tsiʼ colta i cuch? Ñaxan, jiñʌch i cʼuxbiya ti Jehová yicʼot cheʼ yom i yʌqʼuen i tijicñʌyel (Job 1:1). Tsiʼ ñaʼta i mel chuqui utsʼat ti Jehová anquese wen o mach weñic chuqui woliʼ ñusan. I chaʼchajplel, jiñʌch cheʼ Jehová tsiʼ cʼajtesʌbe chaʼan cojach jiñi ñumen pʼʌtʌl bʌ cheʼ bʌ tsiʼ sube tiʼ pejtelel chuqui an i mele. Ili tsiʼ colta Job chaʼan miʼ ñop chaʼan Jehová mi caj i jisʌben i wocol cheʼ tiʼ yorajlel (Job 42:1, 2). Cheʼʌch tsaʼ ujti. Jehová tsiʼ jisʌbe i wocol yicʼot chaʼyajl to i ñumelal tsiʼ yʌqʼue tsaʼ bʌ i sʌtʌ. Cheʼ jiñi, tijicña tsaʼ chumle Job jinto tsaʼ chʌmi (Job 42:10, 17).

14. Cheʼ bajcheʼ miʼ yʌl 2 Corintios 1:6, ¿bajcheʼ tsiʼ colta yañoʼ bʌ cheʼ tsaʼʌch i cuchu tsaʼ bʌ i ñusa Pablo?

¹⁴ Jiñi apóstol Pablo. Tajol an muʼ bʌ lac tsʼaʼlentel tiʼ caj mi lac melben i yeʼtel Jehová. O tajol mi lac wen cʼojoʼtan lac bʌ chaʼan cabʌl la queʼtel mi añonla bajcheʼ anciano o superintendente i chaʼan circuito. Mi cheʼʌchi, miʼ mejlel i coltañonla tsaʼ bʌ ujti tiʼ tojlel Pablo. Tsaʼ wen tsʼaʼlenti. Cheʼ jaʼel, tsiʼ wen cʼojoʼta jiñi hermanojob (2 Corintios 11:23-29). Pero maʼañic tsiʼ wis cʌyʌ i bʌ i cheʼʌch tsiʼ colta yañoʼ bʌ chaʼan miʼ cuchob jaʼel (pejcan 2 Corintios 1:6). Mi mucʼʌch laj cuch, mi caj i coltan yambʌ hermanojob chaʼan lajal miʼ melob.

¿MUʼ BA CAJ LAJ CɅY CHAʼAN MIʼ TSʼɅCTIYEL I PʼɅTɅLEL TI LAC TOJLEL CHEʼ MUCʼɅCH LAJ CUCH?

15, 16. a) ¿Chuqui bʌ eʼtel yom miʼ tsʼʌctiyel ti lac tojlel cheʼ mi laj cuch? b) Acʼʌ ejemplo tac chaʼan bajcheʼ miʼ tsʼʌctiyel iliyi.

¹⁵ Jehová tsiʼ sube i tsʼijbun Santiago ili tʼan: «Laʼ tsʼʌctʌyic i pʼʌtʌlel laʼ pusicʼal ti pijt [o cheʼ mi laʼ cuch] chaʼan utsʼat mi laʼ wajñel, chaʼan miʼ tsʼʌctiyel i wenlel laʼ pusicʼal. Cheʼ jini maʼanic chuqui anto yom laʼ chaʼan» (Santiago 1:4). Santiago tsiʼ yʌlʌ chaʼan an chuqui miʼ tsʼʌctiyel ti lac tojlel cheʼ mucʼʌch laj cuch. ¿Chuqui jiñi? Miʼ yʌcʼ ti «tsʼʌctiyel i wenlel [lac] pusicʼal», yom i yʌl chaʼan ñumen wem bʌ xñoptʼañonla mi lac sujtel. Pero ¿bajcheʼ miʼ mel? Cheʼ bʌ an jumpʼejl lac wocol, tajol ñumen yom to laj cujil pijt mi la cubin, mi lac pʌs la cutslel o mi lac ñumen qʼuel ti ñuc jiñi laj coltʌntel. Cheʼ mi laj cuch, mi lac ñumen pʌs wem bʌ lac melbal yicʼot mi lac sujtel ti wem bʌ xñoptʼan. Cheʼ bajcheʼ ili mi la cʌcʼ chaʼan i cuchol wocol miʼ tsʼʌctiyel i pʼʌtʌlel ti lac tojlel.

¹⁶ Cheʼ miʼ cujchel lac chaʼan chuqui jach, miʼ coltañonla chaʼan ñumen wem bʌ xñoptʼañonla, mach lac sʌclan laj coltʌntel baqui mi lac ñusan ti pʼis i mandar Dios. Laʼ la cʌl chaʼpʼejl ejemplo. Laʼ lac ñaʼtan chaʼan woli lac chaʼlen wersa lac locʼ ti lac pensar chuqui mach weñic. Chaʼan maʼañic mi lac yajlel, laʼ laj cʼajtiben Jehová chaʼan miʼ coltañonla lac locʼsan lac tsucul pensar. O juntiquil ti lac familia miʼ mʌctañonla chaʼan i testigojonla Jehová. Mach yomic mi laj cʌcʼ lac bʌ, yom mi lac chʌn melben i yeʼtel Jehová. Iliyi mi caj i coltañonla chaʼan mi lac ñumen ñop. Mi la com chaʼan wen miʼ qʼuelonla Jehová, yom mi laj cuch (Romanos 5:3-5; Santiago 1:12).

17, 18. a) Tsictesan yicʼot jumpʼejl ejemplo chaʼan wen i cʼʌjñibal cheʼ mucʼʌch lac lʌtʼ cʼʌlʌl tiʼ jilibal. b) Come lʌcʼʌlix añonla tiʼ jilibal, ¿chuqui mucʼʌch bʌ lac ñop?

¹⁷ Wen i cʼʌjñibal cheʼ mi laj cuch cʼʌlʌl tiʼ yujtibal, i mach ti jumucʼ jach. Laʼ lac ñaʼtan jumpʼejl barco woli bʌ i sujpʼel ti jaʼ. Mi jiñi yaʼ bʌ añob ti barco mach yomobic chʌmel, yom miʼ chaʼleñob wersa ñuxijel cʼʌlʌl tiʼ tiʼ jaʼ. Cheʼ lajal jaʼel, mi com la chumtʌl ti Paraíso, mach yomic mi lac wis cʌy lac bʌ, yom mi lac lʌtʼ cʼʌlʌl tiʼ jilibal. Cheʼ yom mi la cʌl bajcheʼ jiñi apóstol Pablo: «Maʼanic mic lujbʼan lojon» (2 Corintios 4:1, 16).

¹⁸ Cheʼ bajcheʼ Pablo, mi lac ñop chaʼan Jehová mi caj i coltañonla chaʼan mi lac lʌtʼ cʼʌlʌl tiʼ jilibal. Pablo tiʼ tsʼijbu: «Miʼ wen mʌjlel lac chaʼan, chaʼan tiʼ pʼʌtʌlel Jesús tsaʼ bʌ i cʼuxbiyonla. Come cujil maʼanic chuqui miʼ mejlel i mʌctan i cʼuxbiya Dios cheʼ mi lac chʌmel o cheʼ cuxulon tola, mi ángelob, mi yumʌlob, mi jini pʼʌtʌloʼ bʌ, mi jinic muʼ bʌ i yujtel wʌle, mi jinic muʼ bʌ caj ti ujtel, mi chan tac bʌ, mi jinic am bʌ tiʼ yebal, mi yan tac bʌ melbil tac bʌ. Maʼanic chuqui miʼ mejlel i mʌctan i cʼuxbiya Dios muʼ bʌ lac taj ti lac Yum Cristo Jesús» (Romanos 8:37-39). Tajol añʌch i yorajlel mi lac lujbʼan. Pero laʼ lac mel tsaʼ bʌ i mele Gedeón yicʼot jiñi 300 i wiñicob. Wen lujbeñobix, pero maʼañic tsiʼ cʌyʌyob i bʌ (Jueces 8:4). ¿Cheʼ ba mi caj a mel bajcheʼ jiñi?