¿Majqui jiñi xʼaltʼan Daniel?
Muʼ bʌ i yʌl jiñi Biblia
Daniel juntiquilʌch xʼaltʼan judío bʌ wen cʌmbil bʌ, tsaʼ chumle cheʼ bʌ anto yom 600 jab miʼ tilel Jesús wʌʼ ti Lum. Dios tsiʼ yʌqʼue i ñaʼtʌbal chaʼan miʼ mejlel i yʌl i sujmlel tac ñajal. Jehová an chuqui tsiʼ pʌsbe tac chaʼan miʼ yʌqʼuen i ñaʼtan chuqui mi caj i yujtel ti talto bʌ qʼuin. Cheʼ jaʼel, tsiʼ cʼʌñʌ i yespíritu chaʼan Daniel miʼ mejlel i tsʼijbun jiñi libro am bʌ tiʼ cʼabaʼ (Daniel 1:17; 2:19).
¿Majqui jiñi Daniel?
Daniel tsaʼ coli ti Judá, jiñi yumʌntel baqui an Jerusalén yicʼot i templo judíojob. Cheʼ ti jabil 617 cheʼ bʌ maxto tilemic Cristo, jiñi rey Nabucodonosor ti Babilonia tsiʼ chʼʌmʌ Jerusalén i tsiʼ pʌyʌ majlel jiñi wiñicob añoʼ bʌ i yeʼtel yaʼ ti país (2 Reyes 24:15; Daniel 1:1). Tajol ti jimbʌ ora Daniel xcolelto, i tsaʼ chujqui majlel jaʼel.
Daniel, Sadrac, Mesac yicʼot Abednego tsaʼ pʌjyiyob majlel yaʼ tiʼ palacio jiñi babiloniojob chaʼan miʼ chʼʌmob ñumen wem bʌ cʌntesʌntel yicʼot chaʼan miʼ melbeñob i yeʼtel jiñi yumʌl ti Babilonia. Daniel yicʼot jiñi uxtiquil i yamigojob chʌn xucʼul tsaʼ ajñiyob, anquese tsaʼ xiqʼuiyob i mel muʼ bʌ i ñusan ti pʼis i mandar Jehová (Daniel 1:3-8). Cheʼ bʌ añix uxpʼejl jab i cajel i cʌntesʌntelob, jiñi rey Nabucodonosor tsiʼ qʼuele chaʼan wen añobix i ñaʼtʌbal yicʼot chaʼan añix cabʌl chuqui yujilob melol, tiʼ subeyob chaʼan 10 i ñumel bajcheʼ jiñi xwujtob, xchʼʌcojelob yicʼot yañoʼ bʌ añoʼ bʌ i ñaʼtʌbal tiʼ yumʌntel. Jin chaʼan, jiñi rey tsiʼ yʌlʌ chaʼan Daniel yicʼot i yamigojob mi caj i chaʼleñob eʼtel yaʼ ti palacio (Daniel 1:18-20).
Cheʼ bʌ Daniel añix 90 i jabilel tsaʼ subenti chaʼan miʼ cʼotel yaʼ tiʼ palacio jiñi rey. Ti jimbʌ ora, Belsasar rey bʌ ti Babilonia, tsiʼ cʼajtibe Daniel chaʼan miʼ suben chuqui i sujmlel jiñi tʼan yaʼ bʌ tsʼijbubil ti pared. Tiʼ coltaya Dios, Daniel tsaʼ mejli i tsictesan i sujmlel jiñi tʼan, chaʼan Medopersia mi caj i chʼʌm Babilonia i cheʼʌch tsaʼ ujti. Ti jin jach bʌ acʼʌlel Medopersia tsiʼ chʼʌmʌ Babilonia (Daniel 5:1, 13-31).
Jiñi rey medopersa tsiʼ yʌqʼue Daniel ñuc bʌ i yeʼtel, i jiñi rey Darío tsaʼto i ñaʼta jaʼel i yʌqʼuen yambʌ ñuc bʌ i yeʼtel (Daniel 6:1-3). Pero jiñi yambʌ xʼeʼtelob maʼañic tsiʼ mulayob. Jin chaʼan tsiʼ ñopo i tsʌnsañob Daniel, tsiʼ yʌcʼʌyob chaʼan miʼ chojquel ochel baqui an león tac, pero Jehová tsiʼ colta Daniel (Daniel 6:4-23). Cheʼ bʌ lʌcʼʌlix mi caj i chʌmel Daniel, juntiquil ángel tsiʼ pʌsbe i bʌ i chaʼyajl tiʼ sube ili tʼan: «Cʼuxbibilet i chaʼan Dios» (Daniel 10:11, 19).
Qʼuele jiñi video Daniel, juntiquilʌch wiñic am bʌ i ñopoñel, tʼoxbil bʌ ti chaʼpʼejl parte.