Tsʌts tac bʌ yujquel: ¿Am ba chuqui miʼ yʌl jiñi Biblia chaʼan jiñi?
Jujumpʼejl jab miʼ ñumel cabʌl yujquel. An mach bʌ wen tsʌtsic, pero an wen tsʌts bʌ muʼ bʌ i yʌcʼ cabʌl wocol, miʼ tsʌnsan cabʌl lac piʼʌlob yicʼot miʼ jisan pejtelel chuqui an. An i tajol jiñi yujquel miʼ yʌcʼ ti tejchel tsunami, i miʼ jisan pejtelel chuqui miʼ taj yicʼot miʼ tsʌnsan lac piʼʌlob. ¿Tsaʼ ba i wʌn alʌ jiñi Biblia chaʼan jiñi yujquel tac?
Ti ili tema mi caj laj qʼuel:
¿Woli ba i tsʼʌctesan jumpʼejl profecía jiñi yujquel tac ili ora?
Muʼ bʌ i ñaʼtan jiñi lac piʼʌlob chaʼan jiñi profecía tac yicʼot jiñi yujquel tac
¿Tsaʼ ba i wʌn alʌ jiñi Biblia chaʼan miʼ cajel yujquel?
Jesús tsiʼ wʌn taja ti tʼan jiñi yujquel ti jumpʼejl profecía am bʌ ti Biblia. Miʼ mejlel lac pejcan ti ili uxpʼejl libro:
«Mi caj i contrajin i bʌ jumpʼejl tejclum yicʼot yambʌ, jumpʼejl yumʌntel yicʼot yambʌ, miʼ cajel wiʼñal yicʼot yujquel lum ti cabʌl tejclum» (Mateo 24:7).
«Mi caj i contrajin i bʌ jumpʼejl tejclum yicʼot yambʌ, jumpʼejl yumʌntel yicʼot yambʌ, miʼ cajel yujquel lum ti cabʌl tejclum, miʼ cajel wiʼñal jaʼel» (Marcos 13:8).
«Miʼ cajel ñuc tac bʌ yujquel lum i ti cabʌl tejclum miʼ cajel wiʼñal yicʼot baqui jach bʌ cʼamʌjel» (Lucas 21:11).
Jesús tsiʼ yʌlʌ chaʼan baqui jach miʼ cajel «ñuc tac bʌ yujquel lum», guerra, wiʼñal yicʼot cʼamʌjel. Pejtelel ili miʼ pʌs chaʼan «lʌcʼʌlix i yorajlel i jilibal pañimil» o chaʼan añoñixla ti «jiñi cojix tac bʌ qʼuin» (Mateo 24:3; 2 Timoteo 3:1). Jiñi Biblia miʼ pʌs chaʼan «jiñi cojix tac bʌ qʼuin» tsaʼ tejchi ti 1914 i maxto ujtemic.
¿Woli ba i tsʼʌctesan jumpʼejl profecía jiñi yujquel tac ili ora?
Wolʌch. Jiñi profecía tsaʼ bʌ i yʌlʌ Jesús, baqui tsiʼ taja ti tʼan jaʼel chaʼan jiñi yujquel tac, miʼ taj i bʌ yicʼot woli bʌ i yujtel ti ili ora. Cʼʌlʌl ti 1914 an ujtem mil 950 tsʌts bʌ yujquel am bʌ i tsʌnsa ñumen ti 2 millón lac piʼʌlob.a Laʼ laj qʼuel chaʼpʼej uxpʼejl ejemplo chaʼan jiñi yujquel tac am bʌ ujtem ti ili 20 jab ñumen bʌ tilel.
Océano Índico (2004). Jumpʼejl yujquel am bʌ i tsʌtslel 9.1 tsiʼ teche jumpʼejl tsunami tsaʼ bʌ cʼoti ti cabʌl país i tiʼ tsʌnsa ñumen ti 225 mil lac piʼʌlob.
China (2008). Jumpʼejl yujquel am bʌ i tsʌtslel 7.9 tsiʼ jisa cabʌl tejclum tac. Miʼ ñaʼtʌntel chaʼan tsaʼ chʌmi 90 mil lac piʼʌlob, an cheʼ bʌ 375 mil tsaʼ bʌ lojwiyob yicʼot cabʌl mach bʌ añobic i yotot tsaʼ cʌyleyob.
Haití (2010). Jumpʼejl yujquel am bʌ i tsʌtslel 7.0 tiʼ tsʌnsa ñumen ti 300 mil lac piʼʌlob i ñumen ti 1 millón maʼañic i yotot tsaʼ cʌyleyob.
Japón (2011). Jumpʼejl yujquel am bʌ i tsʌtslel 9.0 yicʼot cabʌl tsunami tiʼ tsʌnsa lʌcʼʌ 18 mil 500 lac piʼʌlob, i yonlel tsaʼ loqʼuiyob tiʼ yotot. I tsiʼ yʌsi jaʼel jiñi centro nuclear chaʼan Fukushima. Cheʼ tsaʼ ñumi 10 jab, jiñi 40 mil lac piʼʌlob tsaʼ bʌ chumleyob tiʼ tʼejl jiñi planta nuclear maʼañic tsaʼ chaʼ mejliyob ti sujtel tiʼ yotot tiʼ caj wen an radiación.
¿Chuqui miʼ pʌsbeñonla jiñi profecía tac?
Muʼ bʌ i yʌl jiñi Biblia chaʼan jiñi yujquel miʼ pʌsbeñonla chuqui mi caj i yujtel ti lʌcʼʌl. Jesús tsiʼ yʌlʌ: «Cheʼ bʌ mi laʼ qʼuel woliʼ yujtel tac iliyi, ñaʼtanla chaʼan lʌcʼʌlix jiñi i Yumʌntel Dios» (Lucas 21:31).
Jiñi Biblia miʼ yʌl chaʼan jiñi i Yumʌntel Dios jiñʌch jumpʼejl yumʌntel am bʌ ti panchan i jiñi Rey jiñʌch Jesucristo. Jesús tsiʼ cʌntesa jiñi xcʌntʼañob i chaʼan chaʼan miʼ cʼajtiñob ti oración ili Yumʌntel (Mateo 6:10).
Cheʼ bʌ jiñi i Yumʌntel Dios miʼ chʼʌm tiʼ wenta ili Pañimil, Dios maʼañix mi caj i yʌcʼ chaʼan jiñi lac piʼʌlob miʼ ñusañob wocol tiʼ caj jiñi yujquel o yan tac bʌ wocol (Isaías 32:18). I cheʼ jaʼel, mi caj i tojʼesan chuqui jach bʌ wocol tsiʼ cʌyʌ jiñi yujquel tiʼ tojlel jiñi lac piʼʌlob (Isaías 65:17; Apocalipsis 21:3, 4). Mi a womto a ñumen cʌn, qʼuele jiñi tema «¿Qué cosas logrará el Reino de Dios?».
a Pejtelel jiñi información tsaʼ locʼsʌnti ti Global Significant Earthquake Database, i tsiʼ taja jiñi información jaʼel yaʼ ti Centro Nacional de Datos Geofísicos chaʼan Estados Unidos.