¡YOM CHɅN YɅXɅL LA CO!
Woliʼ jisʌntel jiñi Pañimil | ¿Chuqui miʼ yʌl jiñi Biblia?
«Ti orajach woliʼ jisʌntel jiñi Pañimil: An butʼjaʼ ti ñuqui tejclum tac. Tsʌtsle ticwal. Icʼ jaʼal. Woliʼ jilel jiñi jaʼ. Woliʼ jilel yonlel teʼ tac yicʼot añimal tac. Mach lotic jach woli bʌ cʌl yicʼot mach ñumeñic ti pʼis. Jiñi ciencia miʼ yʌl chaʼan woliʼ yujtel pejtelel iliyi come jiñi yumʌlob maʼañic miʼ qʼuextañob bajcheʼ woliʼ cʼʌjñel an tac bʌ ti Pañimil» (Tsaʼ bʌ i yʌlʌ António Guterres, secretario general de las Naciones Unidas, cheʼ bʌ tsiʼ jacʼʌ jiñi informe tsaʼ bʌ i yʌcʼʌ jiñi Grupo Intergubernamental de Expertos sobre el Cambio Climático ti 4 de abril, 2022).
«Jiñi científicojob miʼ yʌlob chaʼan ti jiñi jabil tac talto bʌ jiñi 423 parque am bʌ ti Estados Unidos miʼ mejlel ti jilel tiʼ caj jiñi wocol tac chaʼan bʌ cambio climático. Jiñi muʼ bʌ i mejlel i jisan jiñʌch: Tojcʌlel, butʼjaʼ, cheʼ miʼ yulmʌn jiñi hielo, miʼ ñumen ochel ti jaʼ jiñi pañimil yicʼot tsʌtsle ticwal» («Flooding Chaos in Yellowstone, a Sign of Crises to Come» [Caóticas inundaciones en Yellowstone, un aviso de las crisis que vendrán], The New York Times, 15 de junio, 2022).
¿Muʼ ba i mejlel tiʼ tojʼesʌntel ili wocol tac? Mi mucʼʌch, ¿bajcheʼ? Qʼuele chuqui miʼ yʌl jiñi Biblia.
Jiñi Biblia tsiʼ wʌn alʌ chuqui miʼ caj i yujtel tiʼ tojlel ili Pañimil
Ti Biblia miʼ yʌl chaʼan Dios mi caj i «jisañob jiñi woli bʌ i jisañob pañimil» (Apocalipsis 11:18) An uxchajp chuqui miʼ pʌsbeñonla ili versículo:
1. Jiñi lac piʼʌlob mi caj i jisañob ili Pañimil.
2. Mucʼʌch i mejlel ti tojʼesʌntel ili wocol.
3. Dios jiñʌch muʼ bʌ caj i tojʼesan ili wocol, mach jiñic lac piʼʌlob.
Ti talto bʌ qʼuin maʼañix chuqui mi caj i chaʼlen ili Pañimil
Jiñi Biblia miʼ yʌl chaʼan «jiñi lum an tiʼ pejtelel ora» (Eclesiastés 1:4) Tiʼ pejtelel ora mi caj i chumtʌl lac piʼʌlob.
«Mi caj i yʌqʼuentelob jini pañimil jini tojoʼ bʌ. Mi caj i yajñelob tiʼ pejtelel ora» (Salmo 37:29).
Mi caj i tojʼesʌntel jiñi Pañimil i utsʼatax mi caj i sujtel.
«Ti jim bʌ ora jini tiquin bʌ lum mi caj i yubin i tijicñʌyel. Miʼ caj ti nich yaʼ baʼ jochol jini lum» (Isaías 35:1).