Maʼañix miʼ ñopbentelob i tʼan jiñi políticojob | ¿Chuqui miʼ yʌl jiñi Biblia?

Ti ili jabil 2024, tiʼ petol pañimil miʼ ñumen cajel votación maʼañic bʌ baʼ ujtem ti jumpʼejl jab. Pero yonlel lac piʼʌlob maʼañix miʼ ñopob tiʼ tojlel jiñi políticojob.

• Ti jumpʼejl encuesta tsaʼ bʌ mejli ti Estados Unidos, cabʌl lac piʼʌlob tsiʼ yʌlʌyob chaʼan jiñi «políticojob i bajñel wenlel jach miʼ sʌclañob», mach tiʼ sujmic yom i coltañob lac piʼʌlob (centro de investigación Pew Research Center, 19 de septiembre de 2023).a

Cabʌl xcolelob maʼañix miʼ ñopbeñob i tʼan jiñi políticojob.

• «Cabʌl xcolelob miʼ bajñel sʌclañob bajcheʼ miʼ mejlel i tojʼesañob jiñi ñuc tac bʌ wocol, pero ti jiñi encuesta tac miʼ yʌl chaʼan jiñi políticojob maʼañic miʼ coltañob» (The New York Times, 29 de enero de 2024).

• «Ti jumpʼejl encuesta tsiʼ yʌlʌ chaʼan jiñi xcolelob miʼ ñumen ñopbeñob i tʼan jiñi youtubers i mach jiñix jiñi políticojob» (The Korea Times, 22 de enero de 2024).

Cheʼ jiñi, ¿muʼ ba caj i mejlel i tojʼesañob pañimil jiñi políticojob? ¿Majqui miʼ mejlel lac ñopben i tʼan?

Wen qʼuele majqui maʼ ñopben i tʼan

Mach yomic majqui jach mi lac waʼ ñopben i tʼan. Jiñi Biblia miʼ yʌl: «Jini mach bʌ cʌntesʌbilic miʼ ñop pejtel chuqui miʼ yʌlob winicob. Jini cʌntesʌbil bʌ miʼ wen tsajin i bijlel» (Proverbios 14:15).

• Mi a wom a ñaʼtan bajcheʼ miʼ mejlel a cʌn miʼ sujmʌch o mach i sujmic muʼ bʌ i yʌjlel, pejcan jiñi tema «¿Bajcheʼ miʼ mejlel laj cʌntan lac bʌ chaʼan maʼañic mi lac lotintel?».

Cheʼ jaʼel, anquese an políticojob yomobʌch bʌ i mel chuqui wem bʌ, añʌch chuqui tac maʼañic bʌ miʼ mejlel i melob. Jin chaʼan, jiñi Biblia miʼ yʌqʼueñonla ili ticʼojel:

• «Mach mi laʼ wʌcʼ laʼ pusicʼal yicʼot jini yumʌlob ti pañimil, come winicob jach. Mach muqʼuic i coltañonla» (Salmo 146:3).

Juntiquil Yumʌl mach bʌ yujilic lot

Jiñi Biblia miʼ tsictesan chaʼan Dios tsiʼ waʼchoco Jesucristo bajcheʼ Yumʌl, jiñʌch jiñi Yumʌl ñumen wem bʌ i mach yujilic lot (Lucas 1:32, 33). Jesús jiñʌch jiñi Rey chaʼan i Yumʌntel Dios yaʼ ti panchan (Mateo 6:10).

• Cʌñʌ chucoch miʼ mejlel lac ñop tiʼ tojlel Jesús yicʼot chuqui mi caj i mel chaʼan miʼ tojʼesan jiñi wocol tac woli bʌ lac ñusan. Pejcan jiñi tema tac «¿Majqui mi caj i yajñel bajcheʼ Rey tiʼ Yumʌntel Dios?» yicʼot «¿Chuqui mi caj i mel jiñi i Yumʌntel Dios?».