Cheʼ bʌ jiñi rey Josías 26 i jabilel, tsiʼ yʌcʼʌ i tʼan chaʼan miʼ tojʼesʌntel jiñi templo. Ti jimbʌ ora tsaʼ tajle jiñi «jun baʼ tsʼijbubil i tʼan lac Yum tsaʼ bʌ aqʼuenti Moisés». Cheʼ bʌ tsaʼ pejcʌbenti jiñi rey, ti orajach tsiʼ jacʼʌ muʼ bʌ i yʌjlel yaʼ ti Mandar (2 Cr. 34:​14, 19-21). ¿Muʼ baʼ pejcan jiñi Biblia tiʼ pejtelel ora? Mi wolʌch a chaʼlen wersa a mel, ¿mucʼʌch baʼ mulan? ¿Chuqui miʼ mejlel a mel chaʼan maʼañic miʼ ñajʌyel a chaʼan jiñi versículo tac muʼ bʌ a mulan? Cheʼ bʌ Josías 39 i jabilel, tsiʼ mele mach bʌ weñic i tiʼ sʌtʌ i cuxtʌlel. Tsiʼ bajñel qʼuele i bʌ ti ñuc i maʼañic tsiʼ cʼajtibe i coltaya Jehová (2 Cr. 35:​20-25). ¿Chuqui mi laj cʌn? Chaʼan yom mi lac chʌn sʌclan laj coltʌntel ti Jehová mach yʌlʌyic jaypʼejl lac jabilel. Jin chaʼan yom mi lac jacʼben i Tʼan, mi lac pejcan jiñi Biblia yicʼot mi lac ñʌchʼtan chuqui miʼ yʌl jiñi hermanojob añobix bʌ i ñaʼtʌbal. Cheʼ bajcheʼ jiñi, mi caj lac wen ñaʼtan chuqui muʼ bʌ lac mel i tijicña mi caj la cajñel (Sant. 1:25). w23.09 12 párr. 15, 16

Yaʼ ti Biblia miʼ yʌjlel cabʌl xʼixicob tsaʼ bʌ i melbeyob i yeʼtel Jehová yicʼot tsiʼ wen cʼuxbiyob. Ili xʼixicob pʼisbilob jach ti chuqui miʼ melob yicʼot xucʼulob tiʼ pejtelel (1 Tim. 3:11). Tajol yaʼ ti a congregación an hermanajob wen añobix bʌ i ñaʼtʌbal i cabʌl chuqui miʼ mejlel a cʌn tiʼ tojlelob. Xchʼocob, ñaʼtanla majqui bʌ hermanajob wen bʌ ejemplo chaʼañetla i ñopo laʼ lajiñob. Qʼuelela jiñi wem bʌ i melbalob i ñaʼtanla chuqui miʼ mejlel la mel chaʼan mi laʼ pʌs jaʼel jiñi melbalʌl. Juntiquil hermana am bʌ i pecʼlel lʌcʼʌl an yicʼot Jehová i wen miʼ yajñel yicʼot yambʌlob. Come jiñi hermana miʼ cʼuxbin Jehová yicʼot miʼ pʌs i pecʼlel, miʼ qʼuel ti ñuc jiñi principio tsaʼ bʌ i yʌcʼʌ Jehová chaʼan majqui añoʼ bʌ i yeʼtel ti congregación yicʼot ti jumpʼejl familia (1 Cor. 11:3). w23.12 18, 19 párr. 3-5

Jehová miʼ pijtan chaʼan jiñi ñoxiʼalʌl miʼ cʼuxbin i yijñam yicʼot miʼ coltan chaʼan chʌn lʌcʼʌl miʼ yajñel ti Jehová, chaʼan miʼ taj chuqui i cʼʌjñibal i chaʼan yicʼot chaʼan chʌn tijicña miʼ yajñel. Jin chaʼan, cheʼ maʼ cʼʌn ti wen a pensar, maʼ qʼuel ti ñuc jiñi xʼixicob yicʼot maʼ tsʼʌctesan chuqui maʼ subentel a mel, mi caj i coltañet chaʼan wem bʌ ñoxiʼalet. Mi tsaʼ ñujpuñiyet miʼ mejlel ti tilel laʼ walobil. Jin chaʼan, jiñi ejemplo chaʼan Jehová miʼ mejlel i coltañet chaʼan maʼ qʼuel bajcheʼ yilal juntiquil wem bʌ tatʌl (Efes. 6:4). Jehová maʼañic tsiʼ quisñi i suben jiñi i yalobil chaʼan miʼ cʼuxbin yicʼot chaʼan utsʼat miʼ qʼuel (Mar. 1:11). Mi tsaʼ taja a walobil yom maʼ ñʌmtesan a bʌ chaʼan maʼ suben wen tac bʌ tʼan muʼ bʌ i tijicñesʌben i pusicʼal yicʼot maʼ suben chaʼan maʼ cʼuxbin. Jiñi tatʌlob muʼ bʌ i lajiñob Jehová miʼ coltañob i yalobilob chaʼan miʼ tajob majlel i colel. ¿Bajcheʼ miʼ mejlel a chajpan a bʌ chaʼan maʼ sujtel ti wem tatʌl? Jiñʌch cheʼ wen bajcheʼ maʼ mel a wicʼot a familia, tiʼ tojlel jiñi hermanojob yicʼot cheʼ maʼ subeñob chaʼan maʼ cʼuxbiñob yicʼot maʼ qʼuelob ti ñuc (Juan 15:9). w23.12 28, 29 párr. 17, 18