Jumpʼejl pijtaya

«Ti jiñi cojix tac bʌ qʼuin wen wocol miʼ cajel yicʼot bʌbʌqʼuen» (2 TIMOTEO 3:1).

¿AM BAʼ QʼUELE ili wocol tac?

● Jumpʼejl tsʌts bʌ cʼamʌjel miʼ tsʌnsan yonlel lac piʼʌlob.

● Jiñi wiʼñal miʼ yʌcʼ ti chʌmel cabʌlob.

● Tiʼ caj jumpʼejl yujquel lum yonlel lac piʼʌlob miʼ chʌmelob i yonlelob maʼañix i yotot miʼ cʌyleyob.

Ti ili revista mi caj a pejcan chaʼan ili wocol tac wolʌch i yujtel. Jatet mi caj a qʼuel chaʼan jiñi Biblia tsaʼʌch i wʌn alʌ chaʼan ili wocol tac mi caj i yujtel cheʼ ti «cojix tac bʌ qʼuin».

Ti ili tema tac muʼ bʌ caj i tilel mach yomic jach i subeñet chaʼan chumulonla ti jumpʼejl pañimil wen wocol jax bʌ come jiñi la cujilix, yom jach i yʌqʼueñet jumpʼejl pijtaya. Mi caj i coltañet a qʼuel chaʼan cheʼ wolix i tsʼʌctiyel 6 profecía woliʼ pʌs chaʼan tsʼitaʼ jachix yom chaʼan miʼ yujtel «jiñi cojix tac bʌ qʼuin». Cheʼ jaʼel, mi caj laj qʼuel chaʼan mach tiʼ pejtelelic jiñi lac piʼʌlob miʼ ñopob chaʼan chumuloñixla ti jiñi cojix tac bʌ qʼuin yicʼot chucoch mucʼʌch mejlel lac ñop chaʼan weñix mi caj lac chumtʌl ti talto bʌ qʼuin.

1. Yujquel lum

«Miʼ cajel ñuc tac bʌ yujquel lum» (LUCAS 21:11).

● Jumpʼejl equipo chaʼan noticia yaʼ bʌ an yaʼ baqui tsaʼ ujti yujquel lum ti Haití tsaʼ caji i yubiñob chaʼan an majqui woliʼ sub i bʌ. Jiñʌch Winnie, juntiquil alʌ xchʼoc an jaxto bʌ i chaʼan jumpʼejl jab yicʼot ojlil, tsaʼʌch bʌ coltʌnti. Jiñi alʌ xchʼoc cuxul tsaʼ cʌyle, pero jiñi i papá i mamá tsaʼ chʌmiyob.

¿CHUQUI AN QʼUEJLI? Ti jiñi yujquel lum tsaʼ bʌ ujti ti Haití cheʼ ti enero i chaʼan 2010, ñumen ti 300 mil lac piʼʌlob tsaʼ chʌmiyob i 1 millón 300 mil maʼañobix i yotot tsaʼ cʌyleyob. Anquese ili yujquel lum tsaʼʌch i cʌyʌ cabʌl wocol, mach jiñic jach jiñi tsaʼ bʌ ñumi. Ti abril chaʼan 2009 cʼʌlʌl ti abril chaʼan 2010 cheʼ bʌ 18 ñuc bʌ yujquel lum tsaʼ ñumi ti yan tac bʌ pañimil.

MUʼ BɅ I YɅLOB. Mach cʌlʌxic woliʼ yujtel yujquel lum cheʼ bajcheʼ ti wajali. Chaʼan jach jiñi tecnología ñumen weñix miʼ pʌs bajcheʼ cʼamel miʼ yujtel jiñi yujquel lum.

¿I SUJMɅCH BA MUʼ BɅ I YɅLOB? Jiñi Biblia maʼañic miʼ yʌl jaypʼejl yujquel lum mi caj i ñumel ti jiñi cojix tac bʌ qʼuin. Cojach miʼ yʌl chaʼan miʼ cajel «ñuc tac bʌ yujquel lum» yicʼot «ti cabʌl tejclum», i jin chaʼan jiñʌch wen ñuc bʌ mi caj i qʼuejlel (Marcos 13:8; Lucas 21:11).

¿CHUQUI MAʼ WɅL? ¿Wolʌch ba i yujtel ñuc tac bʌ yujquel lum cheʼ bajcheʼ tsiʼ yʌlʌ jiñi Biblia?

Jiñi yujquel lum tac tajol mach jin jach muʼ bʌ i pʌs chaʼan chumuloñixla ti jiñi cojix tac bʌ qʼuin, pero mucʼʌch i pʌs chaʼan woliʼ tsʼʌctiyel jumpʼejl profecía. Laʼ laj qʼuel yambʌ.

[Comentario]

«[Jiñi geofísicojon bʌ lojon] mi lon c suben iliyi bajcheʼ ñuc bʌ yujquel lum tac. Pero chaʼan jiñi lac piʼʌlob cheʼ jach bajcheʼ wen bʌbʌqʼuen jax bʌ». (KEN HUDNUT, SERVICIO GEOLÓGICO CHAʼAN ESTADOS UNIDOS)

[Reconocimiento]

© William Daniels/Panos Pictures

2. Wiʼñal

«Miʼ cajel wiʼñal» (MARCOS 13:8).

● Juntiquil wiñic miʼ cʼotel ti jumpʼejl tejclum yaʼ ti Nigeria come yom i taj i bʌl i ñʌcʼ. Jiñi i primojob yicʼot i yijtsʼiñob tsaʼ cʼotiyob jaʼel chaʼan miʼ putsʼtañob jiñi wiʼñal. Jiñi wiñic miʼ cʼotel i choc i bʌ ti lum. ¿Chucoch? «Come maʼañic miʼ mejlel i yʌqʼuen chuqui miʼ cʼux [jiñi i familia], i maʼañic miʼ mejlel i qʼuelob tiʼ wut miʼ yubin», cheʼ miʼ yʌl Sidi, i yum jiñi tejclum.

¿CHUQUI AN QʼUEJLI? Lʌcʼʌ ti 690 millón lac piʼʌlob miʼ yubiñob wiʼñal, ti jiñi 690 millón, 235 millón yaʼañob ti África. Ili mach número jach, laʼcu lac ñaʼtan juntiquil wiñic yicʼot i yijñam yicʼot juntiquil i yalobil. Mi mach jasʌlobic jiñi i bʌl i ñʌcʼ, ¿majqui mi caj i ñusan wiʼñal: Jiñi tatʌl o jiñi ñaʼʌl? Cabʌl familiajob jiñʌch yom bʌ miʼ ñaʼtañob ti jujumpʼejl qʼuin.

MUʼ BɅ I YɅLOB. Ili Lum cabʌlix miʼ yʌcʼ i bʌl lac ñʌcʼ, cojach yom miʼ wen qʼuejlel chaʼan ti lac pejtelel mi lac taj jiñi bʌlñʌcʼʌl.

¿I SUJMɅCH BA MUʼ BɅ I YɅLOB? I sujmʌch chaʼan ili ora añix cabʌl bʌlñʌcʼʌl. I jiñi yumʌlob miʼ mejlel i cʼʌñob chaʼan miʼ jisañob jiñi wiʼñal am bʌ tiʼ pejtelel pañimil, pero anquese an i chaʼleyob wersa maʼañic an mejlem i jisañob.

¿CHUQUI MAʼ WɅL? ¿I sujmʌch ba muʼ bʌ i yʌl Marcos 13:8? Anquese ñumen weñix jiñi tecnología, ¿machʌch ba añix majqui woliʼ yubin wiʼñal?

Jiñi yujquel lum yicʼot jiñi wiʼñal miʼ tech yambʌ wocol tsaʼ bʌ wʌn ajli ti Biblia.

[Comentario]

«Cabʌl alobob muʼ bʌ i chʌmelob tiʼ caj neumonía, jaʼtaʼ yicʼot yan tac bʌ cʼamʌjel cuxulob miʼ mejlelob ti ajñel cheʼ muqʼuic i wen tajob chuqui miʼ cʼuxob». (ANN M. VENEMAN, EX DIRECTORA EJECUTIVA CHAʼAN UNICEF)

[Reconocimiento]

© Paul Lowe/Panos Pictures

3. Cʼamʌjel tac

«Miʼ cajel [...] baqui jach bʌ cʼamʌjel» (LUCAS 21:11).

● Bonzali, juntiquil wiñic tsaʼ bʌ i chaʼle eʼtel yaʼ ti centro de salud ti jumpʼejl país am bʌ ti África baqui tsaʼ wen ujti guerra, tsiʼ chaʼle wersa chaʼan miʼ tsʼʌcan jiñi minerojob chumuloʼ bʌ yaʼ tiʼ lumal, tsaʼ bʌ cajiyob ti chʌmel tiʼ caj jiñi virus de Marburgo.a Tiʼ cʼajti coltʌntel ti jiñi xʼeʼtelob añoʼ bʌ ti jumpʼejl ñuqui tejclum pero maʼañic tsaʼ seb jacʼbenti, tsaʼ ñumi chʌmpʼejl uw. Tsaʼʌch wiʼil cʼotiyob, pero Bonzali chʌmeñix. Tsiʼ toyo jiñi virus añoʼ bʌ i chaʼan jiñi tsaʼ bʌ i ñopo i tsʼʌcañob.

¿CHUQUI AN QʼUEJLI? Cʼamʌjel tac bajcheʼ jiñi neumonía, jiñi jaʼtaʼ, jiñi sida, jiñi tuberculosis yicʼot jiñi paludismo miʼ tsʌnsan cabʌl lac piʼʌlob ti jujumpʼejl jab. Ili joʼpʼejl cʼamʌjel an i tsʌnsa lʌcʼʌ ti 11 millón lac piʼʌlob cheʼ ti 2004, yom i yʌl, chaʼan ti uʼuxpʼejl segundo an majqui tsaʼ chʌmi.

MUʼ BɅ I YɅLOB. Woliʼ bej pʼojlelob jiñi xchumtʌlob ila ti Pañimil, jin chaʼan wolʌch i cʼamʼan cabʌl lac piʼʌlob.

¿I SUJMɅCH BA MUʼ BɅ I YɅLOB? Anquese cabʌloñixla jiñi chumulonbʌla ila ti pañimil, cheʼ jaʼel orajix miʼ mejlel lac ñaʼtan chuqui ti cʼamʌjel an lac chaʼan i añix tsʼac tac. ¿Mach ba yomic cheʼ jiñi chaʼan maʼañix mi lac wis cʼamʼan? Pero mach cheʼic woliʼ yujtel.

¿CHUQUI MAʼ WɅL? ¿Wolʌch ba i tajob ili ora tsʌts bʌ cʼamʌjel tac jiñi lac piʼʌlob, cheʼ bajcheʼ tsiʼ wʌn alʌ jiñi Biblia?

Jiñi yujquel lum, jiñi wiʼñal yicʼot jiñi cʼamʌjel tac an i yʌqʼue i yubin wocol cabʌl lac piʼʌlob. Cheʼ jaʼel, yonlelob miʼ ñusañob wocol come miʼ ticʼlʌntelob ti jiñi i cʌñʌyoʼ bʌ, i wentʌlel bʌ jin miʼ cʌntañob. Qʼuele chuqui tac miʼ yʌl jiñi profecía tac am bʌ ti Biblia chaʼan jiñi.

[Nota]

[Comentario]

«Wen bʌbʌqʼuen cheʼ bʌ juncojt bajlum o yambʌ añimal miʼ cʼuxet, pero cheʼ jaʼel bʌbʌqʼuen jax cheʼ bʌ jumpʼejl tsʌts bʌ cʼamʌjel woliʼ tsʌnsañet yicʼot cheʼ maʼ qʼuel chaʼan yonlelob woliʼ chʌmelob tiʼ caj jiñi cʼamʌjel». (MICHAEL OSTERHOLM, EPIDEMIÓLOGO)

[Reconocimiento]

© William Daniels/Panos Pictures

4. Jiñi lac piʼʌlob maʼañic mi caj i cʼuxbiñob jiñi añoʼ bʌ tiʼ familia

«Jiñi lac piʼʌlob [...] maʼañic mi caj i cʼuxbiñob añoʼ bʌ tiʼ familia» (2 TIMOTEO 3:1-3).

● Chris, muʼ bʌ i chaʼlen eʼtel ti jumpʼejl grupo am bʌ tiʼ nortejlel Gales, muʼ bʌ i coltan jiñi muʼ bʌ i ticʼlʌntelob tiʼ yototob, miʼ yʌl: «Ti jumpʼejl bʌ qʼuin tsaʼ tili juntiquil xʼixic tsaʼ bʌ wen jajtsʼi i maʼañic tsaʼ mejli j cʌn majqui. I an yambʌ xʼixicob muʼ bʌ i tilelob ilayi tsaʼix bʌ wen ticʼlʌntiyob, jin chaʼan maʼañix i cʼʌjñibal miʼ yubiñob i bʌ i maʼañix miʼ qʼuelob i ñiʼ a wut».

¿CHUQUI AN QʼUEJLI? Ti jumpʼejl país ti África cabʌl xʼixicob an wen ticʼlʌntiyob cheʼ bʌ chutobto. Jumpʼejl encuesta tsaʼ bʌ mejli yaʼ ti país tsiʼ pʌsʌ chaʼan cabʌl wiñicob miʼ yʌlob chaʼan maʼañic i wocolel cheʼ miʼ jatsʼob jiñi i yijñam. Pero mach jiñic jach jiñi xʼixicob muʼ bʌ i ticʼlʌntelob yaʼ tiʼ yotot. Ti Canadá, an wiñicob am bʌ ticʼlʌntiyob yicʼot an jajtsʼiyob tiʼ yijñamob.

MUʼ BɅ I YɅLOB. Tiʼ pejtelel jachix ora añʌch majqui an ticʼlʌnti tiʼ yotot, pero ili ora muqʼuix i wen tajtʌl ti tʼan.

¿I SUJMɅCH BA MUʼ BɅ I YɅLOB? I sujmʌch chaʼan jiñi lac piʼʌlob muqʼuix i wen alob jiñi muʼ bʌ i ticʼlʌntelob tiʼ yototob, pero ¿am ba i colta jiñi chaʼan maʼañix majqui miʼ ticʼlʌntel? Maʼañic. Cabʌlobix maʼañix bʌ miʼ cʼuxbiñob añoʼ bʌ tiʼ familia.

¿CHUQUI MAʼ WɅL? ¿Wolʌch ba i tsʼʌctiyel muʼ bʌ i yʌl 2 Timoteo 3:1-3? ¿Cabʌlobix ba jiñi maʼañic bʌ miʼ cʼuxbiñob añoʼ bʌ tiʼ familia?

Jiñi i joʼpʼejlel profecía woli bʌ i tsʼʌctiyel jiñʌch i chaʼan bʌ ili Pañimil. Laʼ laj qʼuel muʼ bʌ i yʌl jiñi Biblia.

[Comentario]

«Jiñi muʼ bʌ i ticʼlʌntelob tiʼ yotot jiñʌch maʼañic bʌ miʼ wen sujbel ti policía. Juntiquil xʼixic jinto cheʼ cabʌlix an wen ticʼlʌnti miʼ majlel i sub yaʼ ti policía». (PORTAVOZ DEL SERVICIO DE AYUDA CONTRA EL MALTRATO DOMÉSTICO DE GALES)

5. I Jisʌntel jiñi lum

«[Dios mi caj i] jisañob jiñi woli bʌ i jisañob pañimil» (APOCALIPSIS 11:18).

● Pirri miʼ chon vino melbil bʌ ti palmera yaʼ ti Kpor (Nigeria), pero maʼañix miʼ mel come tsaʼix asiyi jiñi palmera tac tiʼ caj jiñi petróleo muʼ bʌ i wen bejqʼuel yaʼ ti Níger. Miʼ yʌl: «Miʼ laj tsʌnsan jiñi chʌy, miʼ cʼamʼesan lac pʌchʌlel yicʼot miʼ bibʼesan jiñi jaʼ tac. Maʼañic yambʌ eʼtel muʼ bʌ mejlel c mel».

¿CHUQUI AN QʼUEJLI? Jiñi expertojob miʼ yʌlob chaʼan ti jujumpʼejl jab miʼ chojquel ochel basura ti mar 6 millón tonelada yicʼot ojlil. Yonlel jiñi basura plástico i cabʌl jab miʼ ñumel chaʼan miʼ yʌsiyel. Cheʼ jaʼel, mach cojach woliʼ bibʼesañob, ti orajach woliʼ luʼ jisañob chuqui tac am bʌ ila ti Lum. Jiñi expertojob miʼ yʌlob chaʼan jiñi Lum i cʼʌjñibal i chaʼan jumpʼejl jab yicʼot joʼpʼejl uw chaʼan miʼ chaʼ tajben i qʼuexol jiñi muʼ bʌ laj cʼʌn ti jumpʼejl jab. Jiñi periódico chaʼan Australia Sydney Morning Herald miʼ yʌl: «Mi mucʼʌch i bej pʼojlel jiñi xchumtʌlob yicʼot mi lac bej cʼʌn chuqui tac an cheʼ bajcheʼ ili ora, ti jabil 2035 i cʼʌjñibal lac chaʼan miʼ cajel chaʼpʼejl Lum chaʼan mi lac taj chuqui i cʼʌjñibal lac chaʼan».

MUʼ BɅ I YɅLOB. Joñonla wen an lac ñaʼtʌbal yicʼot miʼ mejlel lac tojʼesan jiñi wocol i mi laj coltan ili Lum.

¿I SUJMɅCH BA MUʼ BɅ I YɅLOB? Cabʌl lac piʼʌlob woliʼ chaʼleñob wersa chaʼan maʼañix miʼ bej ujtel jiñi contaminación. Pero anquese woliyob ti wersa, bej cabʌlixto jiñi contaminación.

¿CHUQUI MAʼ WɅL? ¿I cʼʌjñibalʌch ba cheʼ Dios miʼ coltan ili Lum, cheʼ bajcheʼ an i yʌlʌ?

Jiñi Biblia mach cojach miʼ taj ti tʼan jiñi joʼpʼejl profecía tsaʼix bʌ laj qʼuele, miʼ yʌl jaʼel chuqui wen tac bʌ mi caj i yujtel ti jiñi cojix tac bʌ qʼuin. Laʼ laj qʼuel jumpʼejl.

[Comentario]

«Ti ñaxan wen utsʼatax wʌʼ baqui chumulon, pero wʌle lajal bajcheʼ i yajñib basura». (JIÑɅCH TSAʼ BɅ I YɅLɅ ERIN TAMBER, CHUMUL BɅ YAʼ TI COSTA SUR CHAʼAN ESTADOS UNIDOS, CHEʼ BɅ TSAʼ BEJQʼUI JIÑI PETRÓLEO TI 2010 YAʼ TIʼ GOLFO MÉXICO)

[Recuadro]

¿I mul ba Dios?

Come jiñi Biblia tsiʼ wʌn alʌ jiñi wocol tac muʼ bʌ caj lac ñusan, ¿yom ba i yʌl iliyi chaʼan i mul Dios cheʼ woli lac ñusan wocol? Mi caj a tajben i jacʼbal yaʼ ti cʌntesʌntel 11 ti jiñi libro ¿Chuqui miʼ cʌntesañonla jiñi Biblia?, melbil bʌ i chaʼan i testigojob Jehová.

[Reconocimiento]

U.S. Coast Guard photo

6. Subtʼan tiʼ pejtelel Pañimil

«Jiñi wen tʼan chaʼan bʌ Yumʌntel mi caj i sujbel tiʼ pejtelel pañimil» (MATEO 24:14).

● Vaiatea chumul ti jumpʼejl alʌ isla ñajt bʌ cʌylem yaʼ ti océano Pacífico, i mach wen cabʌlobic xchumtʌl. Pero jiñi i testigojob Jehová añʌch cʼotemob i julaʼtan jiñi Vaiatea yicʼot jiñi yaʼ bʌ chumulob. ¿Chucoch an cʼotemob cʼʌlʌl yaʼi? Come yomob i subeñob wen tʼan pejtelel lac piʼʌlob mach yʌlʌyic baqui añob.

¿CHUQUI AN QʼUEJLI? Jiñi wen tʼan chaʼan i Yumʌntel Dios an ubinti tiʼ pejtelel Pañimil. Cheʼ ti 2010, jiñi Testigojob tsiʼ chaʼleyob subtʼan ñumen ti mil 600 millón hora ti 236 país yicʼot territorio tac, yom i yʌl, chaʼan jujuntiquil Testigo miʼ chaʼlen subtʼan cheʼ bʌ media hora ti jujumpʼejl qʼuin. Ti jiñi 10 jab tsaʼ bʌ ñumi tsiʼ meleyob yicʼot tsiʼ pucuyob ñumen ti 20 mil millón jun tac tsaʼ bʌ i cʼʌñʌyob ti subtʼan.

AN MUʼ BɅ I YɅLOB. Añix cabʌl jab i cajel jiñi subtʼan.

¿I SUJMɅCH BA MUʼ BɅ I YɅLOB? I sujmʌch chaʼan an lac piʼʌlob am bʌ i ñopoyob subtʼan. Pero mach tiʼ pejtelelic ora miʼ melob yicʼot maʼañic miʼ chaʼleñob subtʼan ti yan tac bʌ parte. Pero jiñi i testigojob Jehová miʼ chaʼleñob subtʼan tiʼ pejtelel pañimil chaʼan yonlel lac piʼʌlob miʼ yubiñob jiñi wen tʼan. I maʼañic an i cʌyʌyob subtʼan anquese an contrajintiyob ti pʼʌtʌl bʌ yicʼot jontol bʌ organización tac (Marcos 13:13).a Cheʼ jaʼel, jiñi Testigojob miʼ yʌqʼueñob i yorajlel chaʼan miʼ chaʼleñob subtʼan yicʼot chaʼan miʼ pucob jun tac loqʼuem bʌ ti Biblia, i mach luʼ tojbilic. Ili eʼtel miʼ mejlel yicʼot donación tac muʼ bʌ i yʌcʼob loqʼuem bʌ tiʼ pusicʼalob.

¿CHUQUI MAʼ WɅL? ¿Woli ba i sujbel «jiñi wen tʼan chaʼan bʌ Yumʌntel» tiʼ pejtelel pañimil? ¿Woli ba i pʌs ili profecía chaʼan weñix mi caj lac chumtʌl ti talto bʌ qʼuin?

[Nota]

[Comentario]

«Mi cheʼʌch yom Jehová, mi caj lac bej sub jiñi wen tʼan yicʼot lac tijicñʌyel i mi caj laj cʼʌn jin jach chuquiyes chaʼan mi lac taj jiñi lac piʼʌlob». (ANUARIO DE LOS TESTIGOSDE JEHOVÁ 2010)

Weñix mi caj lac chumtʌl

«Mach jalix [...] mi caj a qʼuel jini xjontolil mach yaʼix an. Jini utsoʼ bʌ i pusicʼal mi caj i yʌqʼuentelob i wenlel.Tijicña mi caj i yubiñob cheʼ ñʌchʼʌlob i pusicʼal» (SALMO 37:10, 11).

¿A WOM baʼ qʼuel miʼ tsʼʌctiyel ili profecía? Tajol a womʌch. Añʌch chucoch miʼ mejlel lac ñop chaʼan lʌcʼʌlix mi caj i tsʼʌctiyel.

Jiñi tema tac tsaʼix bʌ laj qʼuele tsaʼ jach i pʌsʌ chaʼpʼej uxpʼejl profecía tac muʼ bʌ i jamʌ pʌs chaʼan chumuloñixla «ti jiñi cojix tac bʌ qʼuin» (2 Timoteo 3:1-5). Dios tsiʼ colta tsaʼ bʌ i tsʼijbuyob jiñi Biblia chaʼan miʼ yʌlob profecía tac muʼ bʌ i yʌqʼueñonla lac pijtaya (Romanos 15:4). Cheʼ woliʼ tsʼʌctiyel ili profecía tac miʼ pʌs chaʼan jiñi wocol tac am bʌ lac chaʼan ili ora tsʼitaʼ jachix yom chaʼan mi caj i jilel.

¿Chuqui mi caj i yujtel cheʼ bʌ tsaʼix ñumi jiñi cojix tac bʌ qʼuin? Jiñi i Yumʌntel Dios mi caj i yuman ili pañimil (Mateo 6:9, 10). Qʼuelecu bajcheʼ miʼ tsictesan jiñi Biblia:

● Maʼañix miʼ cajel wiʼñal. «Mi caj i yʌcʼ cabʌl i cuch jini cholel yaʼ ti joctʌl cʼʌlʌl ti pam tac jini wits» (Salmo 72:16).

● Maʼañix miʼ cajel cʼamʌjel. «Maʼanix mi juntiquilic muʼ bʌ caj i yʌl: ‹Cʼamon›» (Isaías 33:24).

● Mi caj i tojʼan jiñi Lum. «Ti jim bʌ ora jini tiquin bʌ lum mi caj i yubin i tijicñʌyel. Miʼ caj ti nich yaʼ baʼ jochol jini lum» (Isaías 35:1).

Ili woli jach i pʌs jiñi profecía tac tsʼitaʼ jax bʌ yom chaʼan miʼ tsʼʌctiyel muʼ bʌ i ñuqʼuesan lac pusicʼal. Mi a wom a ñumen ñaʼtan, cʼajtiben juntiquil i testigo Jehová chaʼan miʼ tsictesʌbeñet chucoch mucʼʌch mejlel lac ñop chaʼan ñumen weñix mi caj lac chumtʌl ti talto bʌ qʼuin.