¿Bajcheʼ miʼ coltañonla Jesús?
I jacʼbal muʼ bʌ i yʌcʼ jiñi Biblia
Jesús tsiʼ coltayonla cheʼ bʌ tsiʼ yʌcʼʌ i bʌ ti chʌmel (Mateo 20:28). Jin chaʼan jiñi Biblia miʼ yʌl chaʼan Jesús jiñʌch «xcoltaya i chaʼan jiñi pañimil» (1 Juan 4:14). I chaʼan «maʼañic laj coltʌntel tiʼ tojlel yambʌ, come maʼañic yambʌ cʼabaʼʌl tiʼ yebal panchan tsaʼ bʌ aqʼuenti jiñi wiñicob chaʼan miʼ mejlel lac taj laj coltʌntel» (Hechos 4:12).
Jesús tsaʼ chʌmi chaʼan miʼ coltan pejtelel jiñi muʼ bʌ i ñopob (Hebreos 2:9; Juan 3:16). Cheʼ jiñi Dios tsiʼ teche chʼojyel yaʼ baqui an jiñi chʌmeñoʼ bʌ, i tsaʼ chaʼ majli ti panchan bajcheʼ espíritu (Hechos 3:15). Jesús yaʼix an ti panchan, i miʼ mejlel i «coltan jiñi muʼ bʌ i lʌcʼtesan i bʌ ti Dios tiʼ coltaya, come cuxul tiʼ pejtelel ora chaʼan miʼ cʼajtiben Dios chaʼan miʼ coltañob» (Hebreos 7:25).
¿Chucoch la com chaʼan Jesús miʼ cʼajtiben Dios chaʼan miʼ coltañonla?
Come ti lac pejtelel xmulilonla (Romanos 3:23). Tiʼ caj jiñi mulil mi lac chʌmel i ñajt añonla tiʼ tojlel Dios (Romanos 6:23). Pero Jesús juntiquilʌch «la caj coltaya» cheʼ mucʼʌch lac ñop cheʼ tsiʼ yʌcʼʌ i cuxtʌlel (1 Juan 2:1). Come Jesús tsiʼ yʌcʼʌ i cuxtʌlel ti lac tojlel miʼ mejlel i chaʼlen tʼan yicʼot Dios chaʼan miʼ ñʌchʼtan jiñi la coración yicʼot chaʼan miʼ ñusan jiñi lac mul (Mateo 1:21; Romanos 8:34). Dios mucʼʌch i jacʼben i tʼan Jesús come lajalʌch chuqui muʼ bʌ i ñaʼtañob. Dios tsiʼ choco tilel Jesús ila ti Pañimil chaʼan jiñi lac piʼʌlob miʼ coltʌntelob tiʼ tojlel (Juan 3:17).
¿Pero jin jach ba mi caj i coltañonla cheʼ mucʼʌch lac ñop Jesús?
Maʼañic. Yomʌch mi lac ñop, pero anto chuqui yambʌ yom bʌ mi lac mel chaʼan mi lac taj la cuxtʌlel (Hechos 16:30, 31). Jiñi Biblia miʼ yʌl: «Jiñi lac bʌcʼtal chʌmeñix cheʼ bʌ maʼañic jiñi pʼʌtʌlel muʼ bʌ i yʌcʼ cuxtʌlel, cheʼʌch miʼ yujtel jaʼel yicʼot jiñi lac ñopoñel, chʌmeñix mi maʼañic mi lac mel chuqui tac wen» (Santiago 2:26). Chaʼan mi lac taj laj cuxtʌlel:
Yom mi lac ñop Jesús yicʼot i Tat, Jehová (Juan 17:3).
Yom mi lac ñop tiʼ tojlelob (Juan 12:44; 14:1).
Mi lac pʌs chaʼan mucʼʌch lac ñop cheʼ mi lac jacʼ jiñi mandar (Lucas 6:46; 1 Juan 2:17). Jesús tsiʼ yʌlʌ chaʼan mach tiʼ pejtelelic muʼ bʌ i yʌlob «C Yum» mi caj i tajob i coltʌntel, cojach jiñi muʼ bʌ i melob chuqui yom i Tat (Mateo 7:21).
Mi lac bej pʌs chaʼan mucʼʌch lac ñop anquese an wocol tac. Jesús tsiʼ yʌlʌ: «Pero jiñi muʼ bʌ i lʌtʼ cʼʌlʌl tiʼ yujtibal mi caj i coltʌntel» (Mateo 24:13).