¿Bajcheʼ miʼ mejlel a suben jiñi a walobil chaʼan bʌ jiñi piʼleya?

JIÑI WOCOL

Ti wajali, jiñi tatʌlob jiñʌch muʼ bʌ i mejlel i ñaxan subeñob jiñi i yalobilob chaʼan bʌ jiñi piʼleya. Cheʼ jaʼel, cʼunteʼ cʼunteʼ miʼ mejlel i tsictesʌbeñob chaʼan jiñi tema cheʼ bajcheʼ i cʼʌjñibalob i chaʼan yicʼot jaypʼejl i jabilelob jiñi i yalobil.

Ili ora wen qʼuexelix. Jiñi libro The Lolita Effect miʼ yʌl: «Jiñi alʌlob muqʼuix i wen ubiñob chaʼan bʌ jiñi piʼleya cheʼ bʌ ñumen pecʼobto i jabilel, i jiñi programa tac chaʼan alʌlob muqʼuix i ñumen chʼʌm tilel chaʼan bʌ piʼleya». ¿Bajcheʼ miʼ ticʼlañob iliyi?

YOM BɅ MAʼ CɅN

Baqui jachix mi la cubin chaʼan bʌ jiñi piʼleya. Deborah Roffman tiʼ tsʼijbu ti jiñi i libro Talk to Me First: «Cheʼ bʌ miʼ chaʼleñob tʼan jiñi lac piʼʌlob,  jiñi película tac, jiñi libro tac, cʼay tac, anuncio tac, programa tac chaʼan televisión, mensaje tac, alas tac, cartel tac, jiñi teléfono yicʼot computadora tac miʼ chʼʌm tilel foto tac yicʼot tʼan tac chaʼan bʌ piʼleya i tiʼ caj jiñi cabʌl [xcolelob yicʼot alobob] miʼ ñaʼtañob chaʼan jiñi piʼleya jiñʌch [...] jiñi ñumen ñuc bʌ i cʼʌjñibal yom ti laj cuxtʌlel».

Tʼox añʌch i mul jiñi anuncio tac. Jiñi muʼ bʌ i subob chuqui tac miʼ chojñel yicʼot ti jiñi tienda tac miʼ choñob i pislel alʌlob muqʼuix bʌ i pʌsob i bʌcʼtal, tiʼ caj jiñi, jiñi alʌlob miʼ cʌlʌx qʼuelob ti ñuc bajcheʼ yom miʼ melob i bʌ cʼʌlʌl cheʼ bʌ alʌlobto. Jiñi libro So Sexy So Soon miʼ yʌl: «Jiñi xchoñoñelob yujilob chaʼan jiñi alʌlob yomob chaʼan wen miʼ qʼuejlelob tiʼ piʼʌlob, jin chaʼan cheʼʌch miʼ melob. Pejtelel chuqui miʼ pʌsob yicʼot chuqui tac miʼ choñob mach chaʼañic yomob chaʼan miʼ melob tsʼiʼlel jiñi xbiʼtalob, chaʼañʌch yom i yʌqʼueñob i mʌn chuqui tac tsijib».

Mach cojach yom la cujil. Mach lajalic cheʼ la cujil bajcheʼ miʼ cʼʌjñel juncojt carro yicʼot cheʼ wen mi lac ñijcan, cheʼ jaʼel mach lajalic cheʼ la cujil chaʼan bʌ jiñi piʼleya yicʼot cheʼ mi laj cʼʌn jiñi la cujil chaʼan mi lac mel chuqui tac wen.

Jiñi ñumen ñuc bʌ i cʼʌjñibal yom bʌ maʼ mel: Ti ili ora, ñumen ñuc i cʼʌjñibal cheʼ bʌ maʼ coltan jiñi a walobilob chaʼan maʼ cʌntesañob i cʼʌñob ti wen «jiñi i ñaʼtʌbal» «chaʼan miʼ cʌñob chuqui wem bʌ yicʼot chuqui mach bʌ weñic» (Hebreos 5:14).

MUʼ BɅ I MEJLEL A MEL

Chaʼlen tʼan a wicʼot a walobil. Anquese quisinticʌch maʼ wubin chaʼan maʼ suben chaʼan bʌ jiñi piʼleya, yomʌch maʼ mel. A weʼtelʌch (texto ñuc bʌ i cʼʌjñibal: Proverbios 22:6).

Cʼunteʼ suben majlel jiñi a walobil chaʼan bʌ jiñi piʼleya. Chaʼan mach junyaj jach maʼ suben, wen qʼuele baqui tac ora miʼ mejlel a suben chaʼan bʌ jiñi tema, tajol cheʼ woli laʼ majlel ti carro o cheʼ woli laʼ mel jumpʼejl eʼtel yaʼ ti laʼ wotot. Chaʼan jiñi a walobil miʼ yʌl chuqui miʼ ñaʼtan, mach a melben ili cʼajtiya: «¿Muʼ baʼ mulan ili anuncio tac?», tajol miʼ mejlel cʼajtiben: «¿Chucoch miʼ cʼʌñob maʼ wʌl ili foto tac chaʼan an chuqui tac miʼ choñob?». I cheʼ bʌ tsaʼix a ñʌchʼtʌbe bajcheʼ tsiʼ jacʼʌ, miʼ mejlel a cʼajtiben: «¿I chuqui maʼ ñaʼtan jatet?» (texto ñuc bʌ i cʼʌjñibal: Deuteronomio 6:6, 7).

Chʼʌmʌ ti ñuc i jabilel jiñi a walobil. Cheʼ bʌ jiñi alobob maxto añic i jabilelob chaʼan miʼ majlelob ti escuela muqʼuix i mejlel a cʼun subeñob jiñi an tac bʌ i chaʼan wiñic o xʼixic (bajcheʼ jiñi i yat) yicʼot bajcheʼ miʼ mejlel i cʌntañob i bʌ tiʼ tojlel jiñi muʼ bʌ i ñop i ticʼlañob. Cheʼ bʌ woliʼ colelob majlel, miʼ mejlel a subeñob bajcheʼ miʼ tilel juntiquil alʌl. I cheʼ bʌ ñucobix, yomix miʼ ñumen chʼʌmbeñob i sujm ti wen pejtelel chaʼan bʌ jiñi piʼleya.

Pʌsben wem bʌ melbal tac. Ñaxam bʌ, pʌsben cʼʌlʌl cheʼ bʌ alʌlto chaʼan tiʼ pejtelel ora yom miʼ mel chuqui wen, yom xucʼul yicʼot yom miʼ qʼuel ti ñuc yambʌlob. Cheʼ bajcheʼ jiñi, cheʼ baʼ ora maʼ suben chaʼan bʌ jiñi piʼleya, wen jach mi caj i chʼʌm. Cheʼ jaʼel, suben chuqui tac jiñi muʼ bʌ a mulan. Jumpʼejl ejemplo, cheʼ bʌ mach weñic maʼ qʼuel cheʼ bʌ an majquiyob miʼ piʼleñob i bʌ cheʼ bʌ maxto ñujpuñemobic, suben. I tsictesʌben chucoch mach weñic maʼ qʼuel yicʼot baqui tac bʌ i wocolel. Jiñi libro Beyond the Big Talk miʼ yʌl: «Tajol juntiquil xcolel maʼañic mi caj i chaʼlen tsʼiʼlel mi yujil chaʼan jiñi i tat i ñaʼ mach weñic miʼ qʼuelob».

Pʌsʌ jiñi ejemplo. Mele jiñi muʼ bʌ a wʌl. Cʼajtiben a bʌ: «¿Muʼ ba c tseʼtan cheʼ bʌ an majquiyob miʼ chaʼleñob tsucul tʼan? ¿Muʼ ba c lʌp c pislel tsʌts bʌcʼʌl bʌ o muʼ bʌ i pʌs c bʌcʼtal? ¿Muʼ ba c mulan c mutsʼ wutin yambʌlob?». Mi cheʼ maʼ mel bajcheʼ jiñi, mi caj a pʌs chaʼan mach ñuc i cʼʌjñibal a chaʼan jiñi woli bʌ a ñop a pʌsben jiñi a walobilob (texto ñuc bʌ i cʼʌjñibal: Romanos 2:21).

Subeñob chuqui wem bʌ. Jiñi piʼleya jumpʼejlʌch majtañʌl tsaʼ bʌ i yʌqʼue Dios jiñi ñujpuñemoʼ bʌ, muʼ bʌ i mejlel i yʌqʼueñob cabʌl i tijicñʌyel (Proverbios 5:18, 19, TNM). Suben jiñi a walobil chaʼan ti jumpʼejl bʌ qʼuin mi caj i mejlel i ñusan i bʌ ti jiñi majtañʌl, i maʼañic mi caj i tajob jiñi wocol tac muʼ bʌ i yubiñob jiñi muʼ bʌ i chaʼleñob piʼleya cheʼ bʌ maxto ñujpuñemobic (1 Timoteo 1:18, 19).