APÉNDICE
Jesucristo, jiñi Mesías tsaʼ bʌ wʌn ajli
CHAʼAN miʼ cʌñob majqui jiñi Mesías, Jehová Dios tsiʼ yʌqʼue i ñaʼtan cabʌl xʼaltʼañob muʼ bʌ i yʌjlel yaʼ ti Biblia chaʼan miʼ yʌlob baqui mi caj i yilan pañimil, chaʼan i subtʼan yicʼot chaʼan bajcheʼ miʼ cajel ti chʌmel jiñi xColtaya wʌn albil bʌ. Mach wocolic ti ñaʼtʌntel come tsaʼ ajli baqui mi caj i yilan pañimil, baqui miʼ caj ti subtʼan yicʼot chaʼan mi caj i chʌmel. Tiʼ pejtelel jiñi profecía muʼ bʌ i yʌjlel yaʼ ti Biblia tsaʼ tsʼʌctiyi ti Jesucristo. Mi caj laj qʼuel chaʼan isujmʌch tiʼ pejtelel iliyi cheʼ bʌ mi laj qʼuel jiñi tsaʼ bʌ ajli chaʼan bajcheʼ mi caj i yilan pañimil yicʼot cheʼ bʌ chʼiton to.
Jiñi xʼaltʼan Isaías tsiʼ wʌn alʌ chaʼan jiñi Mesías mi caj i tilel tiʼ pʼolbal David (Isaías 9:7). Cheʼʌch tsaʼ ujti bajcheʼ jiñi: Jesús tsaʼ tili yaʼ tiʼ pʼolbal jiñi rey David (Mateo 1:1, 6-17).
Miqueas, yambʌ xʼaltʼan i chaʼan Dios, tsiʼ yʌlʌ chaʼan mi caj i yilan pañimil ti «Belén Efrata» yicʼot chaʼan mi caj i yochel bajcheʼ yumʌl (Miqueas 5:2). Cheʼ bʌ Jesús tsaʼ tili wʌʼ ti Pañimil, yaʼ ti Israel an chaʼpʼejl tejclum i cʼabaʼ Belén. Jumpʼejl yaʼan tiʼ tʼejl Nazaret am bʌ ti norte, jiñi yambʌ an ti Judá, tiʼ tʼejl Jerusalén. Jiñi am bʌ tiʼ tʼejl Jerusalén tsaʼ ñaxan cʌjñi bajcheʼ Efrata. Jiñʌch jiñi tejclum baqui tsiʼ yila pañimil Jesús, cheʼʌch bajcheʼ jiñi tsaʼ tsʼʌctiyi jiñi profecía (Mateo 2:1).
Yambʌ profecía yaʼ ti Biblia tsiʼ yʌlʌ chaʼan Dios mi caj i pʌy loqʼuel i Yalobil «ti Egipto». Cheʼʌch tsaʼ ujti bajcheʼ jiñi, jiñi alʌ Jesús tsaʼ pʌjyi majlel ti Egipto, ti wiʼil, tsaʼ chaʼ sujti majlel tiʼ tejclum come tsaʼix chʌmi jiñi rey Herodes. Cheʼ bajcheʼ jiñi, tsaʼ tsʼʌctiyi jiñi profecía tsaʼ bʌ ajli (Oseas 11:1; Mateo 2:15).
Yaʼ ti recuadro «Profecía tac chaʼan jiñi Mesías», baqui mi yʌl «Profecía», yaʼi miʼ pʌs texto tac tsaʼ bʌ ajli chaʼan tiʼ tojlel Mesías. Mic subeñet lojon chaʼan maʼ qʼuel mi lajalʌch yaʼ baqui mi yʌl «Tsʼʌctiyel». Cheʼ bajcheʼ jiñi, mi caj a ñumen ñaʼtan chaʼan jiñi i Tʼan Dios jiñʌch i sujmlel.
Cheʼ bʌ maʼ wen tsajin jiñi texto tac, mach yomic miʼ ñajʌyel a chaʼan jiñi profecía tac tsaʼ tsʼijbunti cheʼ anto yom cabʌl siglo chaʼan miʼ yilan pañimil Jesús. Jesús tsiʼ yʌlʌ: «Jiñʌch tsaʼ bʌ c subeyetla cheʼ añon to quicʼotetla chaʼan wersa miʼ yujtel pejtelel chuqui tac tsʼijbubil chaʼañon tiʼ mandar Moisés yicʼot tiʼ jun xʼaltʼañob yicʼot ti Salmos» (Lucas 24:44). Cheʼ bajcheʼ tsaʼ qʼuele yaʼ ti a Biblia, tsaʼ laj tsʼʌctiyi tiʼ pejtelel.