Jiñi wen tʼan chaʼan bʌ Yumʌntel mi caj i sujbel
«Jiñi wen tʼan chaʼan bʌ Yumʌntel mi caj i sujbel tiʼ pejtelel pañimil chaʼan miʼ yubiñob jiñi tejclum tac, cheʼ jiñi mi caj i tilel jiñi i jilibal» (MATEO 24:14).
¿Chuqui yom i yʌl Jesús? Jiñi Evangelio chaʼan Lucas miʼ yʌl chaʼan «Jesús tsaʼ majli i sub jiñi wen tʼan chaʼan i Yumʌntel Dios ti jujumpʼejl tejclum yicʼot ti jujumpʼejl alʌ tejclum tac» (Lucas 8:1). Jesús tsiʼ yʌlʌ: «Yom mic subeñob wen tʼan chaʼan jiñi i Yumʌntel Dios jiñi yambʌ tejclum tac jaʼel come jin chaʼan tsaʼ chojquiyon tilel» (Lucas 4:43). Ti ñaxan, Jesús tiʼ sube jiñi xcʌntʼañob i chaʼan chaʼan miʼ subob jiñi wen tʼan ti jiñi tejclum tac lʌcʼʌl bʌ an, pero ti wiʼil tiʼ subeyob: «Mi caj laʼ sujtel tic testigo [...] cʼʌlʌlto ti ñajt bʌ pañimil» (Hechos 1:8; Lucas 10:1).
Jiñi ñaxam bʌ xñoptʼañob tiʼ subuyob jiñi wen tʼan. Jiñi xcʌntʼañob i chaʼan Jesús ti orajach tsaʼ cajiyob ti subtʼan. Ti Hechos 5:42 miʼ yʌl: «Ti jujumpʼejl qʼuin, maʼañobic i cʼaj o, tsiʼ chʌn chaʼleyob cʌntesa yicʼot tiʼ subuyob jiñi wen tʼan tac tiʼ tojlel Cristo». Mach yajcʌbilic jach majqui tsiʼ chaʼleyob subtʼan, tiʼ pejtelelob tsiʼ meleyob. Jiñi historiador August Neander miʼ yʌl chaʼan Celso, jiñi ñaxam bʌ tsiʼ teche tʼan tiʼ contra jiñi xñoptʼañob, miʼ wajlen cheʼ jiñi xñoptʼañob wen chʼejloʼ bʌ ti subtʼan ya jiñob jachix jiñi pʼumpʼuñoʼ bʌ, mach bʌ añic chuqui wen yujilob yicʼot mach bʌ wen tsajñobic ti escuela. Jean Bernardi, tsaʼ bʌ i tsʼijbu jiñi libro Les premiers siècles de L’Église (Los primeros siglos de la Iglesia), miʼ yʌl chaʼan jiñi xñoptʼañob baqui jach yom «miʼ chaʼleñob subtʼan yicʼot tiʼ pejtelel pañimil. Ti bij yicʼot ti tejclum tac. Baqui an cabʌl lac piʼʌlob yicʼot ti ototʌl tac. Cheʼ bʌ an wocol yicʼot cheʼ bʌ maʼañic». Tsiʼ yʌlʌ chaʼan jiñi xñoptʼañob yomʌch miʼ cʼotelob cʼʌlʌl ti jiñi ñajt bʌ pañimil.
¿Majqui miʼ chaʼleñob subtʼan ili ora? David Watson, juntiquil am bʌ i yeʼtel ti Iglesia, miʼ yʌl chaʼan cabʌl lac piʼʌlob ili ora mach lʌcʼʌlic añob ti Dios come jiñi Iglesia maʼañic miʼ wen chaʼleñob subtʼan yicʼot cʌntesa. Ti jiñi libro ¿Por qué se van los católicos?, tsaʼ bʌ i tsʼijbu José Luis Pérez Guadalupe miʼ tsictesan chaʼan jiñi i testigojob Jehová «ti jujumpʼejl otot miʼ chaʼleñob subtʼan ñumel», mach cheʼobic bajcheʼ jiñi evangélicojob, adventistajob yicʼot yan tac bʌ ñopbalʌl.
Jonathan Turley tsiʼ yʌlʌ ti jumpʼejl informe: «Jiñi lac piʼʌlob jasʌl miʼ yubiñob cheʼ miʼ yʌjlel i testigojob Jehová i miʼ ñaʼtañob jiñi xsubtʼañob muʼ bʌ i ñumelob tiʼ tiʼ i yotot cheʼ bʌ mach pijtʌbilic i chaʼañob. Cheʼ bʌ jiñi Testigojob miʼ ñumelob ti subtʼan ti jujumpʼejl otot mach chaʼañic jach miʼ yʌcʼob ti cʌjñel i ñopbal, chaʼañʌch miʼ wen ñopob Dios» (Cato Supreme Court Review, 2001-2002).
[Recuadro]
¿Tsaʼix baʼ ñaʼta majqui jiñi i sujm bʌ xñoptʼañob?
Cheʼ bajcheʼ tsaʼix laj qʼuele tilel, jiñi Biblia miʼ pʌs majquiyob jiñi i sujm bʌ xñoptʼañob. ¿Muʼ baʼ ñaʼtan majquiyob? I sujmʌch, an cabʌl ñopbalʌl muʼ bʌ i yʌlob chaʼan miʼ ñopob Cristo. Pero cʼajtesan jiñi ticʼojel tsaʼ bʌ i yʌlʌ Jesús: «Mach tiʼ pejtelelic muʼ bʌ i subeñoñob: ‹C Yum, c Yum› mi caj i yochelob tiʼ Yumʌntel panchan. Cojach jiñi muʼ bʌ i melob chuqui yom jiñi c Tat am bʌ ti panchan» (Mateo 7:21). Chaʼan maʼ taj jiñi bendición tac muʼ bʌ caj i chʼʌm tilel jiñi i Yumʌntel Dios yomʌch maʼ cʌn majquiyob jiñi i sujm bʌ xñoptʼañob, jiñi muʼ bʌ i melob chuqui yom Dios, i maʼ tem a bʌ a wicʼotob. ¿Muʼ baʼ mulan a ñumen cʌn chaʼan jiñi i Yumʌntel Dios yicʼot jiñi wenlel tac muʼ bʌ caj i chʼʌm tilel? (Lucas 4:43). Pejcan jiñi i testigojob Jehová.