7 ¿Muʼ ba i ñʌchʼtan Dios jiñi la coración tac?

ILI jiñʌch muʼ bʌ i wen cʼajtibeñob i bʌ jiñi lac piʼʌlob. Tsaʼix laj qʼuele chaʼan Dios mucʼʌch i ñʌchʼtan jiñi oración tac, pero mach tiʼ pejtelelic. Jin chaʼan, ¿muʼ ba i ñʌchʼtan la coración? Yaʼʌch ñopol bajcheʼ mi lac mel.

Jesús tiʼ sube jiñi ñucoʼ bʌ i yeʼtel ti ñopbalʌl ti jimbʌ ora chaʼan maʼañic i cʼʌjñibal jiñi oración muʼ bʌ i melob, come yomob jach chaʼan jiñi lac piʼʌlob miʼ qʼuelob ti ñuc. Jin chaʼan, Jesús tiʼ subeyob chaʼan «tsaʼix i tajayob pejtelel i chobejtʌbal». Yomob jach bʌ jiñʌch chaʼan miʼ qʼuejlelob ti ñuc, mach chaʼañic Dios miʼ ñʌchʼtañob, i jin jach tsaʼ bʌ i tajayob (Mateo 6:5). Cheʼʌch miʼ yujtel jaʼel ili ora. Cabʌl lac piʼʌlob miʼ melob oración i jin jach miʼ ñaʼtañob i bʌ, mach jiñic miʼ ñaʼtañob Dios. I come maʼañic miʼ jacʼob jiñi principio tac am bʌ ti Biblia, bajcheʼ tsaʼix bʌ laj qʼuele ti yan tac bʌ tema, maʼañic miʼ jacʼbentelob i yoración.

¿Ixcu jiñi la coración tac muʼ bʌ lac mel? Chaʼan Jehová miʼ jacʼ la coración, mach jiñic miʼ qʼuel bajcheʼ yilal i colorlel lac pʌchʌlel, baqui bʌ lac lumal o chuqui miʼ ñaʼtʌntel ti lac tojlel. Jiñi Biblia miʼ yʌl: «Dios junlajal miʼ qʼuel pejtelel lac piʼʌlob, miʼ chʼʌm pejtelel muʼ bʌ i bʌcʼñan yicʼot muʼ bʌ i mel chuqui wen, mach yʌlʌyic baqui chʼoyol» (Hechos 10:34, 35). Juntiquil «muʼ bʌ i bʌcʼñan» Dios miʼ wen qʼuel ti ñuc i mach yomic i mel maʼañic bʌ miʼ mulan. I jiñi «muʼ bʌ i mel chuqui wen» miʼ chaʼlen wersa chaʼan miʼ mel chuqui yom Dios, mach jiñic chuqui bajñel yom o chuqui yom yambʌ lac piʼʌl. Pero mi la com chaʼan Jehová miʼ ñʌchʼtan la coración, yom mi lac mel muʼ bʌ i yʌl i Tʼan.a

I sujmʌch, cabʌl lac piʼʌlob miʼ pijtañob chaʼan Dios miʼ mel jumpʼejl milagro chaʼan miʼ jacʼbeñob i yoración. Pero ti wajali, Dios mach tiʼ pejtelelic ora cheʼ tsiʼ mele bajcheʼ jiñi. Ti jiñi relato am bʌ ti Biblia miʼ pʌs chaʼan an i tajol muʼto i jalʼan cabʌl jabil chaʼan Dios miʼ mel yambʌ milagro. Jiñi Biblia miʼ yʌl chaʼan cheʼ bʌ tsaʼ chʌmiyob pejtelel jiñi apóstolob maʼañix tsaʼ caji ti mejlel milagro tac (1 Corintios 13:8-10). Pero ili mach yomic i yʌl chaʼan Jehová maʼañic miʼ jacʼ la coración tac. Laʼ laj qʼuel ejemplo tac chaʼan bajcheʼ miʼ jacʼ ili ora.

Miʼ yʌqʼueñonla lac ñaʼtʌbal. Dios jiñʌch jiñi maʼañic bʌ i pʼisol i ñaʼtʌbal, i miʼ yʌqʼueñonla tiʼ yutslel i pusicʼal mi mucʼʌch laj cʼajtiben i coltaya yicʼot mi lac chaʼlen wersa lac jacʼben i tʼan (Santiago 1:5).

Miʼ yʌqʼueñonla chʼujul bʌ i yespíritu. Jiñi chʼujul bʌ espíritu jiñʌch jiñi i pʼʌtʌlel Dios, i maʼañic chuqui miʼ mejlel i laj i bʌ yicʼot. Miʼ coltañonla lac lʌtʼ jiñi wocol tac, miʼ yʌqʼueñonla lac ñʌchʼtʌlel cheʼ an chuqui woli lac pensarin yicʼot miʼ coltañonla lac taj wen tac bʌ lac melbal (Gálatas 5:22, 23). Cheʼ jaʼel, Jesús tsiʼ yʌcʼʌ i tʼan chaʼan Dios mi caj i yʌqʼueñonla i yespíritu jiñʌch bajcheʼ cʼamel i cʼʌjñibal lac chaʼan (Lucas 11:13).

Miʼ coltan jiñi woliʼ bʌ i sʌclan i sujmlel. Cheʼ bajcheʼ miʼ yʌl Hechos 17:26, 27, cabʌl lac piʼʌlob miʼ sʌclañob Dios. Yomob i cʌmben i cʼabaʼ, chuqui yom Dios chaʼan ili Pañimil yicʼot joñonla, i bajcheʼ miʼ mejlel i lʌcʼtesañob i bʌ tiʼ tojlel (Santiago 4:8). Jiñi i testigojob Jehová miʼ tajob cabʌl lac piʼʌlob yomoʼ bʌ i cʌn Dios i miʼ pʌsbeñob yaʼ ti Biblia jiñi i jacʼbal i cʼajtiyajob.

¿Jimba chaʼan woli a pejcan ili revista? ¿Woli baʼ sʌclan Dios? Mi cheʼʌchi, tajol ili jiñʌch i jacʼbal a woración.