• Jehová miʼ cʼuxbin jiñi mucʼoʼ bʌ ti subtʼan tiʼ xucʼtʌlel
    Lac Tsictesʌbentel (chaʼan bʌ estudio) 2018 | mayo

    • 7. a) ¿Majqui woliʼ taj ti tʼan jiñi acʼ, jiñi xpora yicʼot i cʼʌb jiñi acʼ? b) ¿Chuqui ti cʼajtiya yom mi lac jacʼ?

      7 (Pejcan Juan 15:1-5, 8). Jesús tiʼ tsictesa: «Joñon jini Isujm bʌ Acʼon. C Tat jiñʌch Xpora». Jiñi xcʌntʼañob i chaʼan lajalobʌch bajcheʼ i ‹cʼʌb› jiñi acʼ. Ti wiʼil, Jesús tiʼ sube jiñi i yapóstolob: «Miʼ caj ti pʌstʌl i ñuclel c Tat, cheʼ mi laʼ wʌcʼ cabʌl laʼ wut. Cheʼ jini, xcʌntʼañetla c chaʼan».b Jin chaʼan, ¿chuqui yom i yʌl cheʼ mi la cʌcʼ lac wut? Ti ili lajiya, Jesús maʼañic tiʼ tsictesa chuqui yom i yʌl, pero añʌch chuqui tsiʼ yʌlʌ muʼ bʌ i coltañonla lac ñaʼtan.

      8. a) ¿Bajcheʼ la cujil chaʼan cheʼ mi lac chaʼlen wut mach jiñic yom i yʌl cheʼ mi lac sutqʼuin ti xcʌntʼan yambʌlob? b) ¿Bajcheʼ yilal chuqui miʼ cʼajtin Dios?

      8 Jesús tsiʼ yʌlʌ tiʼ tojlel i Tat: «Jini miʼ tsep loqʼuel pejtelel j cʼʌb mach bʌ anic miʼ yʌcʼ i wut». Ili yom i yʌl chaʼan yom mi la cʌcʼ lac wut mi la com chaʼan Jehová miʼ qʼuelonla tiʼ wiñic (Mt. 13:23; 21:43). Jin chaʼan, cheʼ yom mi la cʌcʼ lac wut miʼ yʌl jiñi texto, mach jiñic yom i yʌl cheʼ mi lac sutqʼuin ti xcʌntʼan yañoʼ bʌ (Mt. 28:19). ¿Chucoch? Come mi cheʼ bajcheʼ jiñi, jiñi yambʌ hermanojob maʼañic bʌ miʼ mejlel i sutqʼuiñob ti xcʌntʼan yambʌlob tiʼ caj maʼañic miʼ wen ñʌchʼtʌntelob yaʼ baqui mucʼob ti subtʼan, lajalob yubil bajcheʼ jiñi tsaʼ bʌ i yʌlʌ Jesús maʼañic bʌ miʼ yʌcʼob i wut. Pero iliyi mach cheʼiqui come maʼañic majqui miʼ mejlel lac wersa xicʼ chaʼan miʼ jacʼ jiñi wen tʼan. Cheʼ jaʼel, Jehová miʼ cʼuxbiñonla i maʼañic miʼ choconla tiʼ cajach maʼañic mi lac taj chuqui mach bʌ mejlic lac mel. Maʼañic miʼ cʼajtibeñonla chuqui mach mejlic lac taj (Dt. 30:11-14).

      9. a) ¿Chuqui ti eʼtel yom mi lac mel chaʼan mi lac chaʼlen wut? b) ¿Baqui bʌ lajiya mi caj laj qʼuel wʌleʼli, i chucoch?

      9 Cheʼ jiñi, ¿chuqui yom i yʌl cheʼ mi lac chaʼlen wut? Iliyi jiñʌch muʼ bʌ i mejlel lac mel ti lac pejtelel. ¿Chuqui ti eʼtel aqʼuebil i chaʼan i wiñicob Jehová? Jiñʌch i subol jiñi wen tʼan chaʼan i Yumʌntel (Mt. 24:14).c Muʼ bʌ i coltañonla lac ñaʼtan iliyi jiñʌch jiñi lajiya tsaʼ bʌ i yʌcʼʌ Jesús chaʼan juntiquil xpacʼ. Laʼ laj qʼuel iliyi.