¿Chucoch yom mi lac tempan lac bʌ chaʼan mi lac chʼujutesan Dios?

1-3. a) ¿Bajcheʼ miʼ pʌsob chaʼan wen ñuc i cʼʌjñibal i chaʼañob tempa bʌ jiñi xñoptʼañob? (Qʼuele jiñi foto am bʌ tiʼ tejchibal). b) ¿Chuqui mi caj laj qʼuel ti ili temaj?

CHEʼ bʌ 17 i jabilel Corinna, jiñi i ñaʼ tsaʼ pʌjyi majlel ti cárcel ti ñajt chaʼan miʼ yʌjqʼuel ti tsʌts bʌ eʼtel (troñel). Ti wiʼil, Corinna tsaʼ chojqui majlel ti Siberia. Tsiʼ yʌcʼʌyob ti eʼtel baqui miʼ cʌntʌntel tiñʌmeʼ. An i tajol miʼ wersa xijqʼuel ti eʼtel ti jumpat cheʼ bʌ wen an tsʌñal i cheʼ maʼañic wen an i tsuts bujc. Pero Corinna yicʼot yambʌ hermana tsiʼ chaʼleyob wersa chaʼan miʼ majlelob ti tempa bʌ ti jumpʼejl congregación ñajt bʌ cʌlem yaʼ baqui añob.

² Ti icʼan tsaʼ loqʼuiyob majlel yicʼot tsiʼ xʌñʌyob 25 kilómetro cʼʌlʌl baqui miʼ cʼotel jiñi tren. Corinna tsiʼ yʌlʌ: «Wen icʼ to tsaʼ loqʼui jiñi tren, las 2 cheʼ ti sʌcʼajel, 6 ora tsiʼ xʌñʌ. Ti wiʼil, tsaʼ to c xʌñʌ lojon cheʼ bʌ 10 kilómetro chaʼan mi lon j cʼotel». Corinna maʼañic tsiʼ chaʼ ñaʼta i bʌ chaʼan tsiʼ chaʼle ñajt bʌ xʌmbal. Tsiʼ yʌlʌ: «Tsaʼ j qʼuele lojon jiñi revista Lac Tsictesʌbentel yicʼot tsaʼ c chaʼle lon cʼay. Wen utsʼatax tsaʼ lon c ñusa yicʼot tsiʼ pʼʌtʼesa lon c ñopoñel (chʼujbiya) ti Dios». Tiʼ yuxpʼejlel to qʼuin tsaʼ sujtiyob. Jiñi i yum baqui mucʼob tiʼ eʼtel maʼañic tsaʼ cʼoti i ñaʼtan.

³ Jiñi tempa bʌ tac ñucʌch i cʼʌjñibal i chaʼan i wiñicob Dios. Jumpʼejl ejemplo, jiñi ñaxam bʌ xcʌntʼañob tsiʼ wen mulayob i tempan i bʌ chaʼan miʼ chʼujutesañob Jehová yicʼot miʼ cʌñob (Hechos 2:42). Ti lac pejtelel mucʼʌch lac wen mulan jiñi tempa bʌ tac. Pero tajol an wocol bʌ mi la cubin chaʼan maʼañic mi laj cʌy lac bʌ. Tajol cabʌl ora yom mi lac chaʼlen troñel, cabʌl chuqui yom mi lac mel o wen lujbonla. ¿Chuqui mi caj i coltañonla chaʼan maʼañic mi laj cʌy?^[1] (Qʼuele jiñi nota am bʌ tiʼ yujtibal ili temaj). ¿Bajcheʼ miʼ mejlel laj coltañob chaʼan miʼ majlelob ti tempa bʌ jiñi muʼ bʌ laj cʌqʼueñob estudio yicʼot yambʌlob? Ti ili temaj mi caj laj qʼuel uxchajp. Ñaxam bʌ, ¿chucoch weñʌch cheʼ mi lac majlel ti tempa bʌ? I chaʼchajplel, ¿chucoch miʼ coltan yambʌlob cheʼ mi lac majlel ti tempa bʌ? I yuxchajplel, ¿chucoch miʼ mulan Jehová cheʼ mi lac majlel ti tempa bʌ^[2] (qʼuele jiñi nota am bʌ tiʼ yujtibal ili temaj).

¿CHUCOCH WEÑɅCH CHEʼ MI LAC MAJLEL TI TEMPA BɅ?

4. ¿Bajcheʼ miʼ coltañonla lac ñumen cʌn Jehová jiñi tempa bʌ tac?

⁴ Come miʼ cʌntesañonla. Jiñi tempa bʌ tac miʼ coltañonla lac ñumen cʌn Jehová. ¿Bajcheʼ? Jumpʼejl ejemplo, maxto wen jalic, cabʌl congregación tsiʼ qʼueleyob jiñi libro Acerquémonos a Jehová ti jiñi Cʌntesʌntel chaʼan i Tʼan Dios ti Congregación. ¿Bajcheʼ yubil tsaʼ la cubi cheʼ woli (choncol) laj cʌn majlel i melbal tac Dios yicʼot cheʼ bʌ tsaʼ lac ñʌchʼta chuqui miʼ yubin jiñi yambʌ hermanojob tiʼ tojlel? Tsaʼʌch lac ñumen cʼuxbi Jehová. Ti jiñi discurso tac, demostración yicʼot texto tac muʼ bʌ lac pejcan yaʼi, mi lac ñumen cʌn chaʼan jiñi Biblia (Nehemías 8:8). I cheʼ mi lac chajpan lac bʌ ti jujumpʼejl semana chaʼan i pejcʌntel jiñi Biblia yicʼot mi la cubin tsaʼ bʌ i cʌñʌyob jiñi yambʌ hermanojob, mi laj cʌn wen ñuc tac bʌ i cʼʌjñibal.

5. ¿Bajcheʼ an i coltayet ti a subtʼan yicʼot chaʼan maʼ mel bajcheʼ cʌmbil a chaʼan ti Biblia jiñi tempa bʌ tac?

⁵ Jiñi tempa bʌ tac miʼ cʌntesañonla chaʼan mi lac mel bajcheʼ mi laj cʌn ti Biblia (1 Tesalonicenses 4:9, 10). Jumpʼejl ejemplo, tajol tsaʼ laj qʼuele jumpʼejl temaj yaʼ ti Lac Tsictesʌbentel tsaʼ bʌ i ñijcayonla lac ñumen melben i yeʼtel Jehová, lac ñumen weñʼesan la coración o chaʼan mi lac ñusʌben i sajtemal tsaʼ bʌ i mele juntiquil hermano ti lac tojlel. I yaʼ ti tempa bʌ I Subtʼan yicʼot i Melbal jiñi xÑoptʼan mi laj cʌn bajcheʼ mi lac chaʼlen subtʼan yicʼot mi laj cʌntesan yañoʼ bʌ chaʼan i sujmlel tac am bʌ ti Biblia (Mateo 28:19, 20).

6. ¿Bajcheʼ miʼ coltañonla yicʼot miʼ pʼʌtʼesañonla jiñi tempa bʌ tac?

⁶ Come miʼ pʼʌtʼesañonla. Ili pañimil (mulawil) yom i cʼunʼesan lac ñopoñel. Pero jiñi tempa bʌ tac miʼ pʼʌtʼesañonla tiʼ chʌn melol i yeʼtel Jehová (pejcan Hechos 15:30-32). Ti jiñi tempa bʌ tac miʼ wen ajlel bajcheʼ tsʼʌctiyem jiñi profecía tac. Ili miʼ coltañonla lac ñumen ñop chaʼan mucʼʌch caj i tsʼʌctesan albil bʌ i chaʼan Jehová. Cheʼ jaʼel, cheʼ jiñi hermanojob miʼ ñusañob discurso yicʼot demostración tac, yicʼot jaʼel cheʼ bʌ miʼ yʌcʼob i comentario yicʼot tiʼ pejtelelob i pusicʼal miʼ cʼʌyiñob Jehová, miʼ pʼʌtʼesañonla (1 Corintios 14:26). Miʼ pʼʌtʼesañonla jeʼel cheʼ mi lac chaʼlen tʼan yicʼotob cheʼ maxto tejchi tempa bʌ yicʼot cheʼ tsaʼix ujti, come tsiquil chaʼan cabʌl laj camigo muʼ bʌ i chʼʌmoñobla ti ñuc (1 Corintios 16:17, 18).

7. ¿Chucoch wen ñuc cheʼ mi lac chʌn majlel ti lac tempa bʌ tac?

⁷ Come yaʼ ti tempa bʌ tac, miʼ coltañonla Dios ti chʼujul bʌ i yespíritu. Jesús miʼ cʼʌn jiñi chʼujul bʌ espíritu chaʼan miʼ qʼuel jiñi congregación tac. Tsiʼ yʌlʌ chaʼan yom mi la cubiben «i tʼan i yEspíritu Dios muʼ bʌ i suben xñoptʼañob muʼ bʌ i tempañob i bʌ» (Apocalipsis 2:7). Jiñi chʼujul bʌ espíritu miʼ mejlel i coltañonla lac lʌtʼ i ñojpel lac pusicʼal, lac chaʼlen subtʼan yicʼot lac chʼejlel i mi lac ñaʼtan chuqui wem bʌ yom mi lac mel. Jin chaʼan, yom mi lac chaʼlen wersa chaʼan maʼañic mi laj cʌy lac bʌ ti tempa bʌ tac. Cheʼʌch mi caj laj qʼuel i coltaya Dios yicʼot i yespíritu.

¿CHUCOCH MIʼ COLTAN YAMBɅLOB CHEʼ MI LAC MAJLEL TI TEMPA BɅ?

8. Cheʼ bʌ jiñi la quermañojob miʼ qʼueloñobla ti tempa bʌ tac, mi la cʌcʼ laj comentario yicʼot cheʼ mi lac chaʼlen cʼay, ¿bajcheʼ miʼ coltañob? (Qʼuele jaʼel jiñi recuadro «Tiʼ pejtelel ora tijicña miʼ yubin cheʼ sujtelix mucʼ»).

⁸ Come yaʼi miʼ mejlel lac pʌsben jiñi hermanojob chaʼan mi laj cʼuxbiñob. Cabʌl woli (yʌquel) i ñusañob tsʌts tac bʌ wocol. Jiñi apóstol Pablo tiʼ tsʼijbu: «Laʼ laj coltan lac bʌ tiʼ pejtelel chuqui wen» (Hebreos 10:24, 25). Yom bʌ i yʌl Pablo jiñʌch chaʼan yom mi laj qʼuel lac bʌ ti ñuc ti jujuntiquil. Cheʼ mi lac majlel ti tempa bʌ chaʼan mi lac pʼʌtʼesan lac bʌ yicʼot yañoʼ bʌ, jiñʌch junchajp bajcheʼ mi lac mel. Mi lac pʌs chaʼan la comʌch ajñel la quicʼot la quermañojob, chaʼan la com lac pejcañob yicʼot lac ñaʼtan bajcheʼ miʼ yubiñob i bʌ. Cheʼ mi la cʌcʼ laj comentario yicʼot tiʼ pejtelel lac pusicʼal mi laj cʼʌyin Jehová, mi lac pʼʌtʼesañob (Colosenses 3:16).

9, 10. a) Tsictesan chucoch miʼ coltañonla jiñi Juan 10:16 lac ñaʼtan chaʼan ñuc i cʼʌjñibal mi lac majlel ti tempa bʌ tac. b) Cheʼ mi lac majlel ti tempa bʌ, ¿bajcheʼ miʼ coltan jiñi hermanojob chocbiloʼ bʌ tiʼ familia?

⁹ Come mi laj coltan chaʼan temel miʼ yajñel jiñi congregación (pejcan Juan 10:16). Jesús tsiʼ yʌlʌ chaʼan lajalʌch bajcheʼ juntiquil xcʌnta tiñʌmeʼ i jiñi xcʌntʼañob i chaʼan bajcheʼ junmojt tiñʌmeʼ. Junmojt tiñʌmeʼ tiʼ pejtelel ora temel añob yicʼot miʼ tsajcañob jiñi i yum. Mi chaʼcojt añob ti jumpʼejl bujtʌl, yambʌ chaʼcojt ti jumpʼejl joctʌl i juncojt cheʼ jach an ñumel, ¿muʼ ba caj la cʌl chaʼan junmojt añob? Cheʼ lajal joñonla, mi «junmojt jach» la com ajñel woli bʌ lac sajcan «juntiquil Xcʌnta tiñʌmeʼ», tiʼ pejtelel ora yom mi lac majlel ti tempa bʌ tac chaʼan temel mi la cajñel la quicʼot la quermañojob.

¹⁰ Jiñi tempa bʌ tac miʼ coltañonla chaʼan temel añonla yicʼot mi laj cʼuxbin lac bʌ bajcheʼ jumpʼejl familia (Salmo 133:1). An hermanojob chocbiloʼ bʌ tiʼ tat i ñaʼ o tiʼ yerañob come tsaʼ sujtiyob ti Testigo. Pero Jesús tsiʼ yʌlʌ chaʼan mi caj i tajob yambʌ i familia muʼ bʌ caj i cʼuxbiñob yicʼot i cʌntañob (Marcos 10:29, 30). Ili hermanojob mi caj i qʼueloñobla bajcheʼ i tatoñobla o i yerañoñobla yicʼot tijicña mi caj i yubiñob mi maʼañic mi laj cʌy lac bʌ ti tempa bʌ tac. Cheʼ mi lac ñaʼtan iliyi, mi caj lac chaʼlen wersa majlel ti tempa bʌ tac.

¿CHUCOCH MIʼ MULAN JEHOVÁ CHEʼ MI LAC MAJLEL TI TEMPA BɅ?

11. ¿Bajcheʼ miʼ coltañonla jiñi tempa bʌ tac chaʼan mi la cʌqʼuen chuqui yom Jehová?

¹¹ Come yaʼʌch baqui mi la cʌqʼuen chuqui yom Jehová. Come Jehová tsiʼ meleyonla, yom mi la cʌqʼuen wocolix i yʌlʌ, mi laj cʌcʼ ti ñuc yicʼot mi lac chʼujutesan (pejcan Apocalipsis 7:12). Iliyi mi lac mel yaʼ ti tempa bʌ cheʼ mi lac melben oración, cheʼ mi laj cʼʌyin yicʼot mi lac taj ti tʼan. Jiñʌch ñuc bʌ lac majtan cheʼ miʼ mejlel lac chʼujutesan Jehová ti jujumpʼejl semana.

12. ¿Bajcheʼ yubil miʼ yubin Jehová cheʼ mi lac jacʼben i mandar chaʼan mi lac majlel ti tempa bʌ?

¹² Jehová tsiʼ meleyonla, jin chaʼan yom mi lac chʼujbiben i tʼan. Miʼ subeñonla chaʼan tiʼ pejtelel ora mi lac tempan lac bʌ, ñumento cheʼ lʌcʼʌlix jiñi i jilibal. Tijicña miʼ yubin Jehová cheʼ mi lac jacʼ ili mandar (1 Juan 3:22). Yujil chaʼan woliyʌch la cʌcʼ wersa ti majlel ti tempa bʌ yicʼot miʼ qʼuel ti ñuc (Hebreos 6:10).

13, 14. ¿Bajcheʼ miʼ lʌcʼtesañonla ti Jehová yicʼot ti Jesús jiñi tempa bʌ tac?

¹³ Come mi lac pʌsben Jehová chaʼan la com lac ñumen lʌcʼtesan lac bʌ tiʼ tojlel yicʼot i Yalobil. Yaʼ ti tempa bʌ tac mi laj qʼuel jiñi Biblia yicʼot mi laj cʌn chuqui yom Jehová chaʼañonla (Isaías 30:20, 21). Jinto muʼ bʌ i tilelob ti tempa bʌ maʼañic bʌ miʼ melbeñob i yeʼtel Jehová miʼ qʼuelob chaʼan jiñʌch miʼ cʌntesañonla (1 Corintios 14:23-25). Jehová miʼ cʼʌn chʼujul bʌ i yespíritu chaʼan miʼ qʼuel jiñi tempa bʌ tac, jin chaʼan chʼoyolʌch tiʼ tojlel jiñi muʼ bʌ laj cʌn. Cheʼ mucʼʌch lac majlel, miʼ mejlel lac ñʌchʼtan Dios yicʼot la cubin ñuc bʌ i cʼuxbiya. Cheʼʌch mi caj lac ñumen lʌcʼtiyel baʼan.

¹⁴ Jesús jiñʌch muʼ bʌ i qʼuel majlel jiñi congregación. Tsiʼ yʌlʌ: «Come baqui jach an chaʼtiquil uxtiquil tempʌbiloʼ bʌ chaʼan tij cʼabaʼ yʌʼʌch añon quicʼotob» (Mateo 18:20). Jiñi Biblia miʼ pʌsbeñonla chaʼan «jini muʼ bʌ i chaʼlen xʌmbal tiʼ yojlil» congregación tac jiñʌch Jesús (Apocalipsis 1:20–2:1). Ili yom i yʌl chaʼan jiñʌch miʼ qʼuel. Jin chaʼan, mi lac ñumen lʌcʼtiyel ti Jesús cheʼ mi lac majlel ti tempa bʌ. Cheʼ bʌ yaʼʌch añonla ti tempa bʌ tac yaʼʌch añob Jehová yicʼot Jesús la quicʼot i miʼ pʼʌtʼesañoñobla. ¿Bajcheʼ yubil miʼ yubin Jehová maʼ wʌl cheʼ miʼ qʼuel maʼ chaʼlen wersa a lʌcʼtesan a bʌ tiʼ tojlel yicʼot tiʼ Yalobil?

15. ¿Chuqui mi lac pʌsben Jehová cheʼ mi lac majlel ti tempa bʌ tac?

¹⁵ Come mi lac pʌsben Jehová chaʼan la comʌch lac jacʼben i tʼan. Maʼañic miʼ wersa xicʼonla chaʼan mi lac majlel ti tempa bʌ (Isaías 43:23). Jin chaʼan, mi jiñi lac yum ti troñel miʼ wen xicʼonla ti eʼtel i maʼañix mi lac mejlel ti majlel tiʼ pejtelel tempa bʌ, ¿chuqui mi caj lac mel? Mi jiñi yumʌl tsiʼ yʌlʌ chaʼan mi tsaʼ majliyonla ti lac tempa bʌ mi caj lac toj jumpʼejl multa i mi lac majlel ti cárcel o mi lac wen ticʼlʌntel, ¿chuqui mi caj lac mel? ¿Chuqui mi caj lac mel mi an chuqui yom bʌ i yʌqʼueñonla lac sʌt lac tempa bʌ? Yom mi lac wen ñaʼtan chuqui mi caj lac mel (Hechos 5:29). Mi tsaʼ lac ñaʼta lac chʼujbiben i tʼan Jehová i mi lac majlel ti tempa bʌ, mi caj lac pʌs chaʼan mucʼʌch laj cʼuxbin yicʼot mi lac ñop chaʼan cojach muʼ bʌ i mejlel i yʌl chuqui mi lac mel (Romanos 6:17). Mi caj i wen aqʼuen i tijicñʌyel Jehová (Proverbios 27:11).

MACH LAJ CɅY LAC TEMPAN LAC BɅ

16, 17. a) ¿Bajcheʼ la cujil chaʼan jiñi xñoptʼañob ti ñaxam bʌ siglo wen ñuc tsiʼ qʼueleyob jiñi tempa bʌ? b) ¿Bajcheʼ yilal tsiʼ qʼuele tempa bʌ tac jiñi hermano George Gangas?

¹⁶ Cheʼ ñumeñix jiñi qʼuiñijel chaʼan Pentecostés cheʼ ti jabil 33, jiñi xñoptʼañob «temel tsaʼ chʌn ajniyob ti Templo ti jujumpʼejl qʼuin» (Hechos 2:46). Ili yom i yʌl chaʼan tsaʼ chʌn cajiyob ti tempa bʌ chaʼan miʼ chʼujutesañob Jehová. Maʼañic tsiʼ cʌyʌyob anquese tsaʼ tsʼaʼlentiyob ti yumʌl yaʼ ti Roma yicʼot ti jiñi ñaxañoʼ bʌ miʼ yʌcʼob i bʌ tiʼ ñopbal judíojob. Wocolʌch tsiʼ ñusayob, pero tsiʼ chaʼleyob wersa i chʌn tempañob i bʌ.

¹⁷ Ili ora, mi lac wen aqʼuen wocolix i yʌlʌ Jehová jaʼel cheʼ mi lac mejlel lac tempan lac bʌ. Laʼ lac ñaʼtan tsaʼ bʌ ujti tiʼ tojlel jiñi hermano George Gangas, juntiquil tsaʼ bʌ ajñi ñumen ti 22 jab ti jiñi Junmojt muʼ bʌ i pʌsob bij. Tsiʼ yʌlʌ chaʼan miʼ wen pʼʌtʼesan cheʼ miʼ tempan i bʌ yicʼot hermanojob, i chaʼan jiñʌch «jiñi ñumen wem bʌ tiʼ cuxtʌlel». Tiʼ pejtelel ora cheʼ mucʼʌch i mejlel, jin ñaxam bʌ miʼ mulan cʼotel tiʼ Yotlel tempa bʌ yicʼot jin tiʼ yujtibalix bʌ miʼ mulan sujtel. Cheʼ miʼ chaʼlen tʼan yicʼot hermanojob wen tijicña miʼ yubin, i tsiʼ yʌlʌ: «Añon ti cotot yicʼot c familia mi cubin cheʼ añon quicʼot hermanojob, ti chʼujul bʌ paraíso». Yicʼot tsiʼ yʌlʌ chaʼan wen yom bʌ tiʼ pusicʼal jiñʌch miʼ tempan i bʌ yicʼot i yermañojob.

18. a) ¿Chuqui maʼ wubin chaʼan jiñi tempa bʌ tac?

¹⁸ Ixcu jatet, ¿lajal ba maʼ wubin bajcheʼ jiñi hermano Gangas? Mi cheʼʌchi, chʌn chaʼlen wersa chaʼan yaʼañet ti tempa bʌ a wicʼot a wermañojob, anquese an i tajol wocolʌch. Pʌsben Jehová chaʼan cheʼʌch maʼ wubin tiʼ tojlel cheʼ bajcheʼ tsiʼ yubi jiñi rey David, cheʼ tsiʼ yʌlʌ chaʼan miʼ cʼuxbin yaʼ baqui miʼ chʼujutesan Jehová (Salmo 26:8).