Jiñi xpejcaya juñob miʼ cʼajtibeñob i bʌ

¿Majqui ochemob ti jiñi policíajob i chaʼan templo, i chuqui i yeʼtelob?

Chaʼtiquil uxtiquil levitajob mach bʌ motomajobic añob yambʌ i yeʼtel yaʼ ti templo, bajcheʼ policíajob. Jiñi capitán i chaʼan templo an tiʼ wenta chaʼan miʼ qʼuelob. Juntiquil xtsʼijbaya judío bʌ i cʼabaʼ Filón miʼ tsictesan chuqui miʼ melob: «An muʼ bʌ i yajñelob bajcheʼ xcʌntajayob tiʼ tiʼ jiñi templo. Yambʌlob miʼ yajñelob tiʼ mal, tiʼ tojel jiñi chʼujul bʌ ajñibʌl, chaʼan maʼañic miʼ yochel jiñi quixtañujob mach bʌ mejlicob ti ochel, mi jiñicto mach bʌ i ñaʼtayobic. Yambʌlob miʼ ñumel i joy qʼuelob jiñi templo cheʼ ti qʼuiñil yicʼot ti acʼʌlel, cheʼ bajcheʼ yajcʌbilob».

Jiñi Sanedrín miʼ mejlel i cʼajtibeñob i coltaya ili junmojt policíajob. Cojach ili junmojt tsaʼ bʌ aqʼuenti permiso ti jiñi yumʌl i chaʼan Roma chaʼan miʼ cuchob espada.

Jiñi wen yujil bʌ chaʼan bʌ Biblia i cʼabaʼ Joachim Jeremias, miʼ tsictesan chaʼan cheʼ bʌ jiñi policíajob tsiʼ chucuyob Jesús, Jesús tsaʼʌch i cʼajtibeyob chucoch maʼañic tsiʼ chucuyob yaʼ ti templo cheʼ bʌ woliʼ cʌntesan jiñi quixtañujob. Ili cʼajtiya tsaʼʌch mejli i mel Jesús come jiñi wiñicob ochemob bajcheʼ policíajob yaʼ ti templo (Mt. 26:55). Miʼ yʌl jaʼel chaʼan jiñobʌch ili policíajob colel bʌ i chucob Jesús ti jumpʼejl bʌ qʼuin (Jn. 7:32, 45, 46). Cheʼ ñumeñix ora, jiñi capitán yicʼot i policíajob tsaʼ majli i chucob jiñi xcʌntʼañob i chaʼan Jesús chaʼan miʼ pʌyob majlel baʼan jiñi Sanedrín. Tajol jiñobʌch jaʼel ili policíajob tsaʼ bʌ i tujcʼayob loqʼuel Pablo yaʼ ti templo (Hch. 4:1-3; 5:17-27; 21:27-30).