¿Cʼajal baʼ chaʼan?
¿Wen pejcʌbilix baʼ chaʼan jiñi tema tac maxto bʌ wen jalic loqʼuem ti Lac Tsictesʌbentel? Qʼuele mi mucʼʌch i mejlel a jacʼ ili cʼajtiya tac:
¿Chuqui yom mi lac mel chaʼan mi lac tsijibtesan lac ñaʼtʌbal? (Rom. 12:2).
Mach jasʌlic cheʼ mi lac mel chuqui tac wem bʌ. Yomʌch mi lac tsajin chuqui an ti lac pusicʼal yicʼot mi laj qʼuextan lac bʌ chaʼan cheʼʌch mi lac chumtʌl cheʼ bajcheʼ miʼ yʌl Jehová (w23.01, página 8 yicʼot 9).
¿Chuqui yom mi lac mel chaʼan mach ñumeñic ti pʼis bajcheʼ yilal mi laj qʼuel muʼ tac bʌ i yujtel ti pañimil?
I tilelʌch cheʼ la com lac ñaʼtan jiñi woli tac bʌ i yujtel ti pañimil yicʼot bajcheʼ woliʼ tsʼʌctesan profecía tac. Pero mach la comic la cʌl muʼ bʌ lac bajñel ñaʼtan mejl bʌ i tʼox jiñi congregación, pejtelel muʼ bʌ la cʌl yom chucul ti muʼ bʌ i yʌl jiñi i yorganización Jehová (1 Cor. 1:10) (w23.02, página 16).
¿Chucoch mach lajalic i chʼʌmjaʼ Jesús yicʼot i chaʼan jiñi xcʌntʼañob i chaʼan?
Jesús maʼañic tsiʼ yʌcʼʌ i bʌ ti Jehová come tsiʼ yila pañimil ti jumpʼejl tejclum i chaʼañix bʌ Dios. Jesús tojʌch, jin chaʼan maʼañic i mul (w23.03, página 5).
¿Chuqui miʼ mejlel lac mel chaʼan jiñi yambʌ hermanojob miʼ mejlel i yʌcʼob i comentario?
Mach wen tamic yom jiñi laj comentario tac chaʼan jiñi yambʌ la quermañujob miʼ yʌcʼob i comentario. Cheʼ jaʼel, mach yomic mi lac luʼ otsan muʼ bʌ i yʌjlel ti párrafo chaʼan jiñi yañoʼ bʌ an chuqui miʼ taj i yʌlob (w23.04, página 23).
¿Chuqui jiñi «Chʼujul bʌ bij» muʼ bʌ i yʌjlel ti Isaías 35:8?
Tiʼ tojlel jiñi judíojob jiñʌch jiñi bij am bʌ ti Babilonia muʼ bʌ i cʼʌlʌl majlel ti Israel. ¿Ixcu ili ora? Cʼʌlʌl ti 1919 tsaʼ caji ti chajpʌntel jiñi bij, jumpʼejl ejemplo tsaʼ chaʼlenti ti imprimir yicʼot ti traducir jiñi Biblia. Jiñi «Chʼujul bʌ bij» miʼ coltañonla lac chʼujutesan Jehová ili ora i chaʼan ti talto bʌ qʼuin mi lac taj jiñi bendición tac muʼ bʌ caj i chʼʌm tilel jiñi i Yumʌntel (w23.05, página 15 cʼʌlʌl 19).
¿Majqui jiñi chaʼtiquil xʼixicob muʼ bʌ i yʌjlelob yaʼ ti capítulo 9 chaʼan Proverbios?
Proverbios miʼ taj ti tʼan jiñi tonto bʌ xʼixic, i miʼ yʌl chaʼan jiñi muʼ bʌ i jacʼbeñob i tʼan mi caj i chʌmelob. Pero miʼ yʌl jaʼel tiʼ tojlel jiñi xʼixic am bʌ i ñaʼtʌbal, i chaʼan jiñi muʼ bʌ i jacʼbeñob i tʼan miʼ tajob i ñaʼtʌbal yicʼot i cuxtʌlel (Pr. 9:1, 6, 13, 18) (w23.06, página 22 cʼʌlʌl 24).
¿Bajcheʼ tsiʼ pʌsʌ i pecʼlel Jehová yicʼot chaʼan mach tsʌtsic tsiʼ mele i bʌ tiʼ tojlel Lot?
Jehová tiʼ sube Lot chaʼan miʼ putsʼel majlel yaʼ ti wits tac. Lot maʼañic tsiʼ jacʼʌ i tsiʼ cʼajti majlel ti Zóar, i Dios tsiʼ mele cheʼ bajcheʼ tsiʼ cʼajti (w23.07, página 21).
¿Chuqui miʼ mejlel i mel juntiquil xʼixic mi jiñi i ñoxiʼal miʼ qʼuel pornografía?
Yom miʼ cʼajtesan chaʼan mach i mulic. Yom miʼ ñumen lʌcʼtesan i bʌ ti Jehová i miʼ ñaʼtan tiʼ tojlel xʼixicob tsaʼ bʌ i yubiyob i chʼijyemlel, pero cheʼ bʌ tiʼ subeyob Jehová bajcheʼ miʼ yubiñob i bʌ tsiʼ chaʼ tajayob i tijicñʌyel. Miʼ mejlel i coltan i ñoxiʼal chaʼan miʼ cʌntan i bʌ chaʼan maʼañic chuqui miʼ ñijcan i chaʼ qʼuel pornografía (w23.08, página 14 cʼʌlʌl 17).
¿Bajcheʼ miʼ coltañonla jiñi lac ñaʼtʌbal chaʼan mi lac pʌs la cutslel cheʼ an chuqui mi laj cʼajtibentel?
Yom mi lac ñaʼtan chaʼan jiñi miʼ mejlel i coltañonla laj qʼuel chuqui añob tiʼ pusicʼal. Jiñi mi caj i coltañonla lac pʌs la cutslel (w23.09, página 17).
¿Chuqui mi laj cʌn ti jiñi tsaʼ bʌ i mele María chaʼan miʼ taj i chʼejlel?
Cheʼ bʌ tsiʼ yubi chaʼan mi caj i sujtel tiʼ mamá jiñi Mesías, tsiʼ cʼajtibe i coltaya jiñi yambʌyob. Gabriel yicʼot Elisabet tsiʼ ñuqʼuesʌbeyob i pusicʼal María. Joñonla mi lac mejlel lac taj laj coltʌntel tiʼ tojlel jiñi hermanojob (w23.10, página 15).
¿Bajcheʼ miʼ jacʼ Jehová jiñi la coración tac?
Jehová miʼ yʌcʼ i tʼan chaʼan mi caj i ñʌchʼtan la coración i mi caj i chʼʌm ti ñuc jiñi ñaʼtʌbil bʌ i chaʼan (Jer. 29:12). Anquese mach junlajalic bajcheʼ miʼ jacʼ jiñi oración tac, tiʼ pejtelel ora mi caj i coltañonla (w23.11, página 21 yicʼot 22).
Mi ti Romanos 5:2 tsaʼix i yʌlʌ chaʼan bʌ jiñi pijtaya, ¿chucoch Pablo tsaʼto i chaʼ taja ti tʼan yaʼ ti versículo 4?
Cheʼ bʌ juntiquil miʼ tech i cʌn muʼ bʌ i yʌl jiñi Biblia, miʼ taj i pijtaya chaʼan miʼ chumtʌl ti jumpʼejl Paraíso tiʼ pejtelel ora. Pero cheʼ bʌ miʼ ñusan wocol i miʼ cuch, yujil chaʼan Jehová utsʼat miʼ qʼuel i jiñi i pijtaya miʼ ñumen pʼʌtʼan i miʼ ñumen ñop chaʼan mucʼʌch caj i tsʼʌctiyel (w23.12, página 12 yicʼot 13).