Tiʼ pejtelel pañimil (mulawil) jiñi lac piʼʌlob mach junlajalic chuqui miʼ yʌlob chaʼan jiñi lembal. An muʼ bʌ i bixel japob yicʼot i yamigojob. Yambʌlob maʼañic miʼ wis japob, i an muʼ bʌ i japob jinto miʼ yʌcʼañob (qʼuixñañob). ¿Chuqui miʼ yʌl jiñi Biblia chaʼan jiñi i japol lembal?

1. ¿Weñʌch ba cheʼ mi lac jap lembal?

Jiñi Biblia maʼañic miʼ yʌl chaʼan mach weñic cheʼ mi lac jap lembal. Jiñi Biblia miʼ yʌl chaʼan Dios cabʌl chuqui an i yʌqʼueyonla, i junchajp jiñʌch jiñi vino muʼ bʌ i tijicñesan lac pusicʼal (Salmo 104:14, 15). Cheʼ jaʼel, miʼ yʌl chaʼan ti wajali an wiñicob yicʼot xʼixicob xucʼuloʼ bʌ tsaʼ bʌ i japʌyob lembal (1 Timoteo 5:23).

2. ¿Chuqui ti ticʼojel miʼ yʌqʼuen jiñi Biblia jiñi muʼ bʌ i japob lembal?

Jehová mach weñic miʼ qʼuel cheʼ mi laj cʌlʌx jap lembal, mach cojach cheʼ mi lac yʌcʼan (Gálatas 5:21). Jiñi Biblia miʼ yʌl: «Mach a piʼlen jiñi muʼ bʌ i cʌlʌx japob vino» (Proverbios 23:20, TNM). Jin chaʼan, mi tsaʼ la cʌlʌ chaʼan mi caj lac jap lembal ti lac bajñel o cheʼ bʌ yaʼan yambʌlob mach yomic mi laj cʌlʌx jap i mach la cujilix chuqui mi lac mel, chuqui mi la cʌl yicʼot chuqui mi lac pensarin. Cheʼ jaʼel, mach yomic mi laj cʌlʌx jap come miʼ mejlel i cʼamʼesañonla. Mi mach mejlic lac ticʼ lac bʌ, mach lac jap mi cheʼic wistʌl.

3. ¿Bajcheʼ mi lac pʌs chaʼan mi laj qʼuel ti ñuc muʼ bʌ i ñaʼtan i mel yambʌlob?

Jujuntiquil yom miʼ ñaʼtan mi mi caj i jap lembal o maʼañic. Mach yomic cheʼ mach weñic mi laj qʼuel jiñi pʼisbil jach bʌ miʼ jap lembal. Cheʼ jaʼel, mach yomic mi lac wersa suben i jap jiñi tsaʼ bʌ i yʌlʌ chaʼan maʼañic mi caj i jap (Romanos 14:10). I maʼañic mi lac jap mi miʼ yʌcʼ ti yajlel yambʌlob (pejcan Romanos 14:21). Come jiñi xñoptʼañonbʌla maʼañic mi lac bajñel sʌclan lac wenlel, mi lac sʌclʌben i wenlel yambʌlob (pejcan 1 Corintios 10:23, 24).

LAʼ LAC ÑUMEN ÑAʼTAN

4. Ñaʼtan mi mucʼʌch caj a jap o maʼañic

¿Bajcheʼ yilal tsiʼ qʼuele Jesús jiñi i japol lembal? Chaʼan maʼ ñaʼtʌben i jacʼbal, qʼuele jiñi ñaxam bʌ milagro tsaʼ bʌ i mele. Pejcanla Juan 2:1-11 i tem alʌla iliyi:

• ¿Chuqui miʼ pʌsbeñonla ili relato chaʼan bajcheʼ yilal miʼ qʼuel Jesús jiñi lembal yicʼot jiñi muʼ bʌ i japob?

• Come Jesús mach lecojic tsiʼ qʼuele cheʼ miʼ jajpel lembal, ¿chuqui yom miʼ ñaʼtan jiñi xñoptʼan mucʼʌch bʌ caj i jap?

Anquese juntiquil xñoptʼan mucʼʌch i mejlel i jap lembal, mach yomic i yʌl chaʼan tiʼ pejtelel ora yomʌch miʼ mel. Pejcanla Proverbios 22:3 i qʼuelela mi yomʌch maʼ jap lembal cheʼ bʌ...

• woli a ñijcan juncojt carro o jumpʼejl máquina.

• embarazadajet.

• jiñi doctor tiʼ subeyet chaʼan mach yomic maʼ jap lembal.

• wocol maʼ wubin chaʼan maʼ ticʼ a bʌ cheʼ bʌ maʼ jap.

• yaʼ ti a lumal albil chaʼan mach yomic miʼ jajpel lembal.

• yaʼan a wicʼot juntiquil maʼañix bʌ miʼ jap lembal come ti wajali wen yujil japol.

¿Yom ba maʼ wʌcʼ lembal ti jumpʼejl ñujpuñel o ti jumpʼejl convivio? Chaʼan maʼ ñaʼtan mi yomʌch maʼ mel, qʼuelela jiñi VIDEO.

VIDEO: ¿Yom ba mi la cʌcʼ lembal? (2:41)

Pejcanla Romanos 13:13 yicʼot 1 Corintios 10:31, 32. Cheʼ tsaʼix ujti laʼ pejcan jiñi texto tac, tem alʌla iliyi:

• ¿Bajcheʼ miʼ mejlel i coltañet ili principio chaʼan maʼ mel muʼ bʌ i yʌqʼuen i tijicñʌyel Jehová?

5. Ñaʼtan bajcheʼ cʼamel mi caj a jap

Mi tsaʼ ñaʼta chaʼan mi caj a jap lembal, cʼajtesan chaʼan anquese Jehová mach lecojic miʼ qʼuel cheʼ mi lac jap, mach yomic mi lac ñumel ti pʼis. ¿Chucoch? Pejcanla Oseas 4:11, 18 i tem alʌla iliyi:

• ¿Chuqui miʼ mejlel ti ujtel mi juntiquil miʼ ñumel ti pʼis cheʼ miʼ jap?

¿Chuqui miʼ mejlel i coltañonla chaʼan maʼañic mi lac ñumel ti pʼis? Yom mi lac pʌs lac pecʼlel, yom i yʌl, chaʼan yom mi laj cʌn chaʼan an jach bajcheʼ cʼamel miʼ mejlel laj cuch. Pejcanla Proverbios 11:2 i tem alʌla iliyi:

• ¿Chucoch weñʌch cheʼ maʼ ñaʼtan bajcheʼ jach cʼamel mi caj a jap jiñi lembal?

6. Cʌyʌ a jap lembal

VIDEO: «Tsaʼ cʼoti c tsʼaʼlen jiñi c melbal» (6:32)

• ¿Bajcheʼ yilal i melbal Dimitri tiʼ caj jiñi lembal?

• ¿Tsaʼ ba mejli i cʌy cheʼ bʌ tsiʼ ñaxan ñopo?

• ¿Bajcheʼ tsaʼ mejli i junyaj cʌy jiñi jap lembal?

Pejcanla 1 Corintios 6:10, 11 i tem alʌla iliyi:

• ¿Chucoch tsʌts bʌ mulil cheʼ mi lac yʌqʼuesan lac bʌ?

• ¿Chucoch la cujil chaʼan juntiquil wen yujil bʌ jap lembal mucʼʌch i mejlel i cʌy?

Pejcanla Mateo 5:30 i tem alʌla iliyi:

• Cheʼ bʌ Jesús tsiʼ yʌlʌ chaʼan yom mi lac tsep loqʼuel jiñi laj cʼʌb, woliʼ pʌsbeñonla chaʼan añʌch chuqui tac yom mi lac mel chaʼan wen miʼ qʼuelonla Dios. Mi jatet woli a ñop a cʌy jiñi jap lembal, ¿chuqui miʼ mejlel a mel?a

Pejcanla 1 Corintios 15:33 i tem alʌla iliyi:

• ¿Bajcheʼ miʼ mejlel i ticʼlañet cheʼ maʼ ñochtan jiñi muʼ bʌ i wen japob lembal?

TSAʼ BɅ LAJ CɅÑɅ

Jehová tsiʼ yʌcʼʌ jiñi lembal chaʼan mi lac tijicñesan lac bʌ, pero mach weñic miʼ qʼuel cheʼ mi lac yʌqʼuesan lac bʌ yicʼot cheʼ mi lac ñumel ti pʼis.

¿Chuqui tsaʼ cʌñʌ?

• ¿Chuqui miʼ yʌl jiñi Biblia chaʼan i japol jiñi lembal?

• ¿Chuqui ti wocol miʼ mejlel lac taj cheʼ mi laj cʌlʌx jap lembal?

• ¿Bajcheʼ miʼ mejlel lac pʌs chaʼan mucʼʌch laj qʼuel ti ñuc chuqui miʼ ñaʼtan yambʌlob chaʼan jiñi lembal?

CɅÑɅ YAN TAC BɅ

¿Chuqui yom miʼ chʼʌmob ti ñuc jiñi xcolelob mi woliʼ ñaʼtañob mi mucʼʌch caj i japob lembal o maʼañic?

Mach a ñusan wocol tiʼ caj lembal (2:31)

Qʼuele chuqui tac miʼ mejlel a mel chaʼan maʼañic maʼ ñumel ti pʼis tiʼ japol jiñi lembal.

«¿Chuqui miʼ mejlel a mel chaʼan maʼañic maʼ ñumel ti pʼis ti jap lembal?» (Lac Tsictesʌbentel, 1 i chaʼan enero, 2010)

¿Wem ba cheʼ jiñi xñoptʼañob miʼ yʌlob «salud»?

«Jiñi xpejcaya juñob miʼ cʼajtibeñob i bʌ» (Lac Tsictesʌbentel, 15 i chaʼan febrero, 2007)

Pejcan bajcheʼ juntiquil wiñic tsiʼ cʌyʌ jiñi lembal. Qʼuele tsaʼ bʌ ujti tiʼ tojlel ti jiñi temaj «Mic wen cuch jiñi jap lembal».

«Jiñi Biblia tsiʼ qʼuextʌbeyob i pensar» (Lac Tsictesʌbentel, 1 i chaʼan mayo, 2012)

Ti lac pejtelel mi lac mulan lac yajcan bajcheʼ yilal lac pislel la com lac xoj yicʼot bajcheʼ yilal mi lac chʼʌl lac bʌ. Mi caj i mejlel lac lʌp baqui jach bʌ lac pislel la com yicʼot mi caj i mejlel la cʌqʼuen i tijicñʌyel Jehová mi mucʼʌch lac chʼʌm ti ñuc jiñi principio tac am bʌ ti Biblia. Laʼ laj qʼuel chaʼpʼej uxpʼejl.

1. ¿Chuqui mi caj i coltañonla lac ñaʼtan chuqui mi caj lac xoj yicʼot bajcheʼ mi caj lac chʼʌl lac bʌ?

Jiñi xñoptʼan yom miʼ lʌp wem bʌ i pislel, pʼisbil jach yom miʼ chʼʌl i bʌ yicʼot yom miʼ pʌs i ñaʼtʌbal. Cheʼ jaʼel, tiʼ pejtelel ora yom sʌc i pislel chaʼan cheʼ jiñi miʼ pʌs chaʼan miʼ chʼujutesan Dios (1 Timoteo 2:9, 10). Qʼuele ili chʌmpʼejl principio muʼ bʌ lac taj ti ili texto. 1) Yom mi lac lʌp wem bʌ lac pislel. Cheʼ bajcheʼ tsaʼix a qʼuele yaʼ ti tempa bʌ tac, jiñi i wiñicob Dios mach junlajalic chuqui miʼ mulañob, pero ti lon c pislel yicʼot ti bajcheʼ mi lon c xiban lon c jol mic pʌs lojon chaʼan mi lon j qʼuel ti ñuc jiñi Dios muʼ bʌ lon c chʼujutesan. 2) Pʼisbil jach bajcheʼ yom mi lac xoj lac pislel, ili yom i yʌl, chaʼan maʼañic mi caj laj cʌlʌx pʌs lac bʌcʼtal chaʼan jiñi yambʌlob maʼañic miʼ tilelob lecoj bʌ i pensar. 3) Mi lac pʌs lac ñaʼtʌbal cheʼ bʌ maʼañic mi lac waʼ cʼʌn o mi lac waʼ xoj chuqui tac tsijiʼ bʌ miʼ loqʼuel. 4) Jiñi lac pislel yicʼot bajcheʼ yilalonla yom miʼ pʌs tiʼ pejtelel ora chaʼan mi lac chʼujutesan Dios, come cheʼ bajcheʼ jiñi mi lac pʌsbeñob jiñi yambʌlob chaʼan mi lac chʼujutesan jiñi i sujm bʌ Dios (1 Corintios 10:31).

2. ¿Chucoch yom mi lac ñaʼtan jiñi la quermañujob cheʼ bʌ woli lac yajcan baqui bʌ lac pislel mi caj lac xoj?

I sujmʌch chaʼan joñonla la cujil bajcheʼ yilal bʌ lac pislel mi caj lac xoj, pero yom mi lac ñaʼtan bajcheʼ yilal mi caj i qʼuelob jiñi yambʌlob. Mi lac chaʼlen wersa chaʼan jiñi yambʌlob mach lecojic miʼ qʼueloñobla. Mi lac jacʼ ili ticʼojel: «Ti jujuntiquilonla laʼ lac mel muʼ bʌ i yʌqʼuen i wenlel lac piʼʌl i laʼ lac mel chuqui wen chaʼan mi lac pʼʌtʼesan» (pejcan Romanos 15:1, 2).

3. ¿Bajcheʼ miʼ mejlel i ñijcʌbeñob i pusicʼal jiñi yambʌlob chaʼan miʼ cʌñob Jehová cheʼ bajcheʼ yilal lac pislel?

Tiʼ pejtelel ora mi lac chaʼlen wersa chaʼan mi lac xoj wem bʌ lac pislel, ñumento cheʼ bʌ mi lac majlel ti tempa bʌ yicʼot cheʼ mi lac loqʼuel ti subtʼan. La com chaʼan jiñi yambʌlob miʼ yʌcʼob i pensar ti jiñi wen tʼan, i mach jiñic ti bajcheʼ la quilal. La com chaʼan jiñi yambʌlob miʼ mulañob i cʌn jiñi i sujmlel yicʼot la com lac chʼʌlben «i cʌntesa tac jiñi la caj Coltaya» (Tito 2:10).

LAʼ LAC ÑUMEN ÑAʼTAN

4. Mi lac pʌs chaʼan mi laj qʼuel ti ñuc Jehová cheʼ wen bajcheʼ mi lac lʌp lac pislel

¿Chucoch yomʌch mi lac wen chʼʌm ti ñuc bajcheʼ yilal lac pislel muʼ bʌ lac lʌp? Pejcanla Salmo 47:2 i tem alʌla iliyi:

• Come la cujil chaʼan i wiñiconla Jehová, ¿bajcheʼ yilal jiñi lac pislel yom bʌ mi lac lʌp?

• ¿Weñʌch ba maʼ wʌl cheʼ yom mi lac wen qʼuel bajcheʼ yilal mi caj lac chʼʌl lac bʌ cheʼ mi caj lac majlel ti tempa bʌ yicʼot cheʼ mi caj lac loqʼuel ti subtʼan? ¿Chucoch cheʼ maʼ ñaʼtan bajcheʼ jiñi?

5. ¿Bajcheʼ miʼ mejlel lac yajcan ti wen chuqui mi caj lac lʌp yicʼot bajcheʼ mi caj lac chʼʌl lac bʌ?

Qʼuelela jiñi VIDEO.

VIDEO: «Laj melela chaʼan i ñuclel Dios» (10:18)

Mach yʌlʌyic jaypʼejl i tojol jiñi lac pislel, ñuc bʌ i cʼʌjñibal jiñʌch cheʼ sʌc yicʼot cheʼ wen. Pejcanla 1 Corintios 10:24 yicʼot 1 Timoteo 2:9, 10. Cheʼ jiñi tem alʌla chucoch maʼañic mi lac lʌp lac pislel...

• ñoj lecojax bʌ ti qʼuelol.

• tsʌts ñʌpʼʌl bʌ ti lac bʌcʼtal, ajpan tsiquilix bʌ miʼ cʌy lac bʌcʼtal o muʼ bʌ i techben lecoj bʌ i pensar yambʌ lac piʼʌl.

Anquese jiñi xñoptʼañonbʌla maʼañix mi lac jacʼ jiñi Mandar tsaʼ bʌ aqʼuenti Moisés, mucʼʌch i coltañonla chaʼan mi laj cʌmben i pensar Jehová. Pejcanla Deuteronomio 22:5 i tem alʌla iliyi:

• ¿Chucoch mach weñic cheʼ juntiquil wiñic miʼ lʌp i pislel yicʼot miʼ chʼʌl i bʌ bajcheʼ juntiquil xʼixic, i cheʼ jiñi xʼixic cheʼ miʼ mel jaʼel?

Pejcanla 1 Corintios 10:32, 33 yicʼot 1 Juan 2:15, 16, i tem alʌla iliyi:

• ¿Yom ba mi lac chʼʌm ti ñuc mi jiñi lac pislel yicʼot bajcheʼ mi lac chʼʌl lac bʌ mach weñic miʼ qʼuelob jiñi lac piʼʌlob yaʼ baqui chʼoyolonla o jiñi hermanojob ti congregación? ¿Chucoch?

• ¿Bajcheʼ yilalob i pislel yicʼot bajcheʼ yilal miʼ chʼʌlob i bʌ jiñi lac piʼʌlob yaʼ baqui chʼoyolet?

• ¿Mach ba weñic maʼ wʌl cheʼ juntiquil xñoptʼan cheʼ miʼ lʌp i pislel yicʼot miʼ chʼʌl i bʌ cheʼ bajcheʼ jiñi? ¿Chucoch cheʼ maʼ ñaʼtan bajcheʼ jiñi?

TSAʼ BɅ LAJ CɅÑɅ

Cheʼ wen mi lac yajcan jiñi lac pislel yicʼot bajcheʼ mi lac chʼʌl lac bʌ, mi lac pʌs chaʼan mi laj qʼuel ti ñuc Jehová yicʼot jiñi yambʌlob.

¿Chuqui tsaʼ cʌñʌ?

• ¿Chucoch ñuc i cʼʌjñibal miʼ qʼuel Jehová bajcheʼ yilal mi lac chʼʌl lac bʌ?

• ¿Baqui bʌ jiñi principio tac muʼ bʌ i mejlel i coltañonla lac ñaʼtan bajcheʼ yom mi lac chʼʌl lac bʌ?

• Cheʼ bajcheʼ yilalonla, ¿muʼ ba i mejlel i coltan o i ticʼlan bajcheʼ yilal miʼ qʼuelob jiñi i sujm bʌ chʼujutesaya jiñi lac piʼʌlob? ¿Bajcheʼ?

CɅÑɅ YAN TAC BɅ

Qʼuele chuqui maʼ wʌcʼ ti ñaʼtʌntel cheʼ bajcheʼ yilal jiñi a pislel.

«¿Chuqui mi cʌcʼ ti ñaʼtʌntel?» (Tema am bʌ ti jw.org)

Qʼuele chucoch yom maʼ ñaxan wen ñaʼtan mi a wom a wʌcʼ ti melol a tatuaje.

«¿Am ba i wocolel mi tsaʼ c mele c tatuaje?» (Tema am bʌ ti jw.org)

Qʼuele yambʌ principio tac muʼ bʌ mejlel i coltañet a ñaʼtan chuqui yom maʼ mel.

«¿Muʼ ba i yʌqʼuen i ñuclel Dios cheʼ bajcheʼ yilal lac pislel?» (Lac Tsictesʌbentel, septiembre i chaʼan 2016)

¿Chuqui tsiʼ colta juntiquil xʼixic chaʼan mach ñumeñic ti pʼis miʼ ñaʼtan bajcheʼ yom miʼ chʼʌl i bʌ jiñi yambʌlob?

«Wocol tsaʼ cubi chaʼan mic chʼʌmben i sujm bajcheʼ yom mi lac chʼʌl lac bʌ» (¡Jamʌx a wut!, 22 i chaʼan diciembre, 2003)