«Lac Yum Dios juntiquil jach»

1, 2. a) ¿Chucoch wen cʌmbil jiñi tʼan am bʌ Deuteronomio 6:4? b) ¿Chucoch tsiʼ yʌlʌ Moisés jiñi tʼan?

AN JUMPʼEJL oración wen ñuc bʌ i chaʼañob jiñi judíojob loqʼuem bʌ ti Deuteronomio 6:4. Ili oración cʌmbil bajcheʼ shemá, come jiñʌch jiñi ñaxam bʌ tʼan miʼ cʼʌjñel ti hebreo ti jiñi versículo. Añix cabʌl jabil, yonlel judíojob miʼ yʌlob jiñi oración cheʼ ti sʌcʼan yicʼot ti icʼajel chaʼan miʼ pʌsob cojach miʼ chʼujutesañob Dios.

² Iliyi tsiʼ yʌlʌ Moisés tiʼ tojlel israelob cheʼ ti jabil 1473 cheʼ maxto tilemic Cristo cheʼ lʌcʼʌlix mi caj i chʌmel. Yaʼ añob ti jiñi lum i chaʼan Moab, chajpʌbilobix chaʼan miʼ cʼaxelob yaʼ ti Jordán jaʼ yicʼot miʼ chʼʌmob jiñi Lum tsaʼ bʌ wʌn Subentiyob (Deuteronomio 6:1). Moisés tsaʼ ajñi 40 jab yicʼotob. I tsiʼ yʌlʌ jiñi tʼan chaʼan miʼ tajob i chʼejlel, chaʼan miʼ ñopob Jehová yicʼot xucʼul miʼ yajñelob tiʼ tojlel. ¿Chucoch? Come Moisés yujil chaʼan mi caj i tajob cabʌl wocol. Jin chaʼan, cheʼ bʌ tsaʼix i subeyob jiñi Lujumpʼejl Mandar yicʼot yan tac bʌ i mandar Jehová, Moisés tsiʼ yʌlʌ jiñi tʼan am bʌ ti Deuteronomio 6:4, 5 (pejcan).

3. ¿Baqui bʌ cʼajtiya tac mi caj lac jacʼ ti ili temaj?

³ Jiñi israelob yujilob chaʼan Jehová Dios «juntiquil jach». I jiñi xucʼuloʼ bʌ juntiquil jach Dios tsiʼ chʼujutesayob, jiñʌch i Dios i ñojteʼelob. Pero, ¿chucoch tsiʼ chaʼ cʼajtesʌbeyob Moisés chaʼan Jehová «juntiquil jach»? ¿Bajcheʼ miʼ taj i bʌ ili tʼan yicʼot cheʼ mi laj cʼuxbin Dios tiʼ pejtelel lac pusicʼal, laj cuxtʌlel yicʼot lac pʼʌtʌlel? ¿I chucoch wen ñuc i cʼʌjñibal chaʼañonla jiñi tʼan am bʌ ti Deuteronomio 6:4, 5?

JEHOVÁ JIÑI LAC DIOS «JUNTIQUIL JACH»

4, 5. a) ¿Chuqui yom i yʌl jiñi tʼan «juntiquil jach»? b) ¿Chucoch mach lajalic Jehová bajcheʼ yambʌ dios tac?

⁴ Jehová jiñʌch cojach bʌ. Jiñi tʼan «juntiquil jach» cabʌl i sujmlel. Junchajp, jin cheʼ Jehová jiñʌch cojach bʌ, maʼañic yambʌ lajal bʌ o muʼ bʌ i mejlel i lajin. ¿Chucoch tsiʼ yʌlʌ Moisés ili tʼan? Mach jiñic tsiʼ taja ti tʼan jiñi mach bʌ isujmic cʌntesʌntel chaʼan jiñi uxtiquil bʌ dios. Jehová tsiʼ mele panchan yicʼot Pañimil. Jiñʌch jiñi isujm bʌ Dios yicʼot yumʌl bʌ ti panchan yicʼot ti pañimil (mulawil). Maʼañic yambʌ dios lajal bʌ bajcheʼ Jehová (2 Samuel 7:22). Jin chaʼan, Moisés tsiʼ yʌlʌ jiñi tʼan «juntiquil jach» chaʼan miʼ cʼajtesʌben jiñi israelob chaʼan cojach majqui yom miʼ chʼujutesañob. Mach yomic miʼ chʼujutesañob yambʌ diosteʼ tac cheʼ bajcheʼ jiñi tejclum tac añoʼ bʌ tiʼ tʼejl. Jiñi wiñicob xʼixicob (quixtañujob) tsiʼ ñopoyob chaʼan jiñi i diosob añob tiʼ pʼʌtʌlel chuqui tac an ila ti pañimil yicʼot ti panchan.

⁵ Jumpʼejl ejemplo, jiñi egipciojob tsiʼ chʼujutesayob jiñi dios Ra, i chaʼan bʌ Qʼuin, jiñi dios Nut, i chaʼan bʌ panchan, jiñi dios Geb, i chaʼan bʌ ili Lum, yicʼot jiñi dios Hapi, i chaʼan jiñi colem jaʼ Nilo. Tsiʼ chʼujutesayob jaʼel cabʌl añimal. Pero Jehová tsiʼ pʌsʌ chaʼan jiñʌch ñumen pʼʌtʌl bʌ cheʼ bʌ tsiʼ yʌcʼʌ jiñi lujunchajp wocol. Jiñi dios Baal jiñʌch ñumen ñuc bʌ tiʼ tojlel cananeojob. Tsiʼ ñopoyob chaʼan jiñʌch muʼ bʌ i yʌqʼueñob i cuxtʌlel, chaʼan jiñʌch i dios jiñi panchan, jaʼal yicʼot chajc. Cabʌl tejclum tsiʼ ñopo chaʼan mi caj i coltʌntelob ti Baal (Números 25:3). Pero yom bʌ miʼ cʼajtesañob jiñi israelob jiñʌch chaʼan jiñi Dios «juntiquil jach», i «maʼanic yambʌ» (Deuteronomio 4:35, 39).

6, 7. a) ¿Chuqui yambʌ yom i yʌl jiñi tʼan «jiñi jiñʌch cojach bʌ Jehová»? b) ¿Bajcheʼ tsiʼ pʌsʌ Jehová chaʼan «juntiquil jach»?

⁶ Jehová mach yujilic qʼuextʌyel yicʼot xucʼul. Jiñi tʼan bajcheʼ tsaʼ mero tsʼijbunti wajali cheʼʌch bajcheʼ iliyi: «Jiñi jiñʌch cojach bʌ Jehová», i miʼ chaʼlentel ti traducir bajcheʼ «juntiquil jach Jehová» (Deuteronomio 6:4, TNM). Ili yom i yʌl chaʼan tiʼ pejtelel ora miʼ mejlel lac ñop muʼ bʌ i yʌl Jehová yicʼot miʼ tsʼʌctesan i tʼan. Mach wis yujilic qʼuextʌyel yicʼot maʼañic chuqui miʼ muc. Xucʼul yicʼot isujm chuqui miʼ yʌl. ¿Bajcheʼ tsiʼ pʌsʌ? Jumpʼejl ejemplo, tsiʼ sube Abraham chaʼan jiñi i pʼolbalob mi caj i chumtʌlob ti jiñi Lum tsaʼ bʌ wʌn subentiyob. Jehová maʼañic tsiʼ wis qʼuexta tsaʼ bʌ i ñaʼta i mel, i tsiʼ mele cabʌl milagro chaʼan miʼ tsʼʌctesan i tʼan cheʼ añix ñumen 430 jab (Génesis 12:1, 2, 7; Éxodo 12:40, 41).

⁷ Ti wiʼil, cheʼ ñumeñix cabʌl jabil, Jehová tsiʼ yʌlʌ chaʼan jiñi israelob i testigojobʌch i tsiʼ subeyob: «[Yom] mi laʼ wen ñaʼtan maʼanic yambʌ tiʼ pejtelel ora mi ti wajali mi ti tal to bʌ ora. Joñon jach laʼ Yumon laʼ Dioson». Jehová wen tsiquil tsiʼ pʌsʌ jaʼel chaʼan maʼañic miʼ qʼuextʌyel chuqui miʼ ñaʼtan i mel cheʼ bʌ tsiʼ yʌlʌ: «Chʌn joñon jach tiʼ pejtelel ora» (Isaías 43:10, 13, TNM; 44:6; 48:12). Jiñʌch wen ñuc bʌ tiʼ tojlel jiñi israelob cheʼ bʌ tsiʼ chʼujutesayob juntiquil Dios mach bʌ yujilic qʼuextʌyel yicʼot muʼ bʌ i mejlel i ñopob. I cheʼʌch lajal ti lac tojlel jaʼel (Malaquías 3:6; Santiago 1:17).

8, 9. a) ¿Chuqui yom Jehová chaʼan mi lac mel? b) ¿Chuqui tsiʼ yʌlʌ Jesús tsaʼ bʌ i yʌcʼʌ ti ñuc i tʼan Moisés?

⁸ Tsaʼ bʌ i yʌlʌ Moisés tiʼ tojlel jiñi israelob tsiʼ cʼajtesʌbeyob jaʼel chaʼan Jehová tiʼ pejtelel ora mi caj i cʼuxbiñob yicʼot i cʌntañob. Pero Jehová yom tsiʼ yʌlʌ jaʼel chaʼan cojach miʼ chʼujutesañob yicʼot miʼ cʼuxbiñob tiʼ pejtelelob i pusicʼal, i cuxtʌlel yicʼot i pʼʌtʌlel (qʼuele jiñi recuadro «¿Chuqui yom i yʌl?»). Cheʼ jaʼel, jiñi tatʌlob yom miʼ cʌntesañob i yalobil tiʼ chaʼan bʌ Jehová tiʼ pejtelel ora. Jiñi xcolelob cojach Jehová mi caj i chʼujutesañob jaʼel (Deuteronomio 6:6-9).

⁹ Jehová yom chaʼan lajal mi lac mel bajcheʼ israelob come maʼañic baqui ora miʼ qʼuextʌyel muʼ bʌ i ñaʼtan i mel. Mi la com miʼ qʼuel ti ñuc lac chʼujutesaya, cojach yom mi lac chʼujutesan yicʼot mi laj cʼuxbin tiʼ pejtelel lac pusicʼal, lac ñaʼtʌbal yicʼot lac pʼʌtʌlel. Jesús tsiʼ yʌlʌ chaʼan jiñʌch jiñi ñuc bʌ mandar yicʼot cheʼʌch tsiʼ pʌsʌ chaʼan i cʼʌjñibalʌch tsaʼ bʌ i yʌlʌ Moisés (pejcan Marcos 12:28-31). Wʌle laʼ laj qʼuel bajcheʼ miʼ mejlel lac pʌs chaʼan mucʼʌch lac ñop cheʼ Jehová «juntiquil jach».

COJACH YOM MI LAC CHʼUJUTESAN JEHOVÁ

10, 11. a) ¿Chuqui yom i yʌl cheʼ cojach yom mi lac chʼujutesan Jehová? b) ¿Bajcheʼ tsiʼ pʌsʌ chʌntiquil xcolelob hebreojoʼ bʌ chaʼan cojach miʼ chʼujutesañob Jehová?

¹⁰ Jehová jiñʌch jiñi cojach bʌ Dios muʼ bʌ lac chʼujutesan. Mach yomic mi lac chʼujutesan yambʌ dios tac mi yomic to mi la cotsan cʌntesʌntel o melbal tac mach bʌ isujmic cheʼ mi lac chʼujutesan Jehová. Jiñʌch jiñi isujm bʌ Dios, mach cojach wen ñuc yicʼot wen pʼʌtʌl. Jin chaʼan, jin jach yom mi lac chʼujutesan (pejcan Apocalipsis 4:11).

¹¹ Yaʼ ti libro i chaʼan Daniel miʼ yʌjlel chaʼan chʌntiquil xcolelob hebreojoʼ bʌ i cʼabaʼ Daniel, Ananías, Misael yicʼot Azarías. ¿Bajcheʼ tsiʼ pʌsʌyob chaʼan cojach miʼ chʼujutesañob Jehová? Maʼañic tsiʼ jacʼʌyob i cʼux jiñi bʌlñʌcʼʌl tac mach bʌ yomic miʼ cʼux jiñi i wiñicob Dios. Jiñi uxtiquil i yamigojob Daniel maʼañic tsaʼ ñocleyob i chʼujutesan i yejtal jiñi rey Nabucodonosor melbil bʌ ti oro. Yujilob chaʼan cojach yom miʼ chʼujutesañob Jehová. Jin chaʼan xucʼul tsaʼ ajñiyob (Daniel 1:1–3:30).

12. Mi cojach la com lac chʼujutesan Jehová, ¿chuqui yom mi lac mel?

¹² Majqui ñaxam bʌ yom mi laj cʌcʼ ti laj cuxtʌlel jiñʌch Jehová. Yom mi laj cʌntan lac bʌ chaʼan maʼañic chuqui yambʌ miʼ mʌctañonla mi cojach la com lac chʼujutesan. ¿Baqui tac yom mi laj cʌntan lac bʌ? Ti jiñi Lujumpʼejl mandar, Jehová tsiʼ yʌlʌ chaʼan maʼañic miʼ mejlel i chʼujutesañob yambʌ dios tac. Mach yomic miʼ wis otsañob i bʌ tiʼ chʼujutesʌntel diosteʼ tac (Deuteronomio 5:6-10). Ili ora cabʌl bajcheʼ miʼ mejlel ti chʼujutesʌntel yambʌ dios tac, an wocol bʌ ti ñaʼtʌntel. Pero Jehová maʼañic qʼuextʌyem yicʼot woli (choncol) i pijtan mi laj cʌy i chʼujutesʌntel yambʌ dios tac. Tiʼ pejtelel ora Jehová «juntiquil jach». Laʼ laj qʼuel bajcheʼ miʼ mejlel laj cʌntan lac bʌ tiʼ chʼujutesʌntel yambʌ dios tac.

13. ¿Chuqui miʼ mejlel i ñajtʼesañonla ti Jehová?

¹³ Muʼ bʌ i mejlel i ñajtʼesañonla ti Jehová jin tac muʼ bʌ i yʌjlel ti Colosenses 3:5 (pejcan). Ili versículo miʼ tsictesan chaʼan i cʌlʌx mulʌntel chuqui tac an jiñʌch junchajp i chʼujutesʌntel diosteʼ tac. ¿Chucoch? Come cheʼ miʼ cʼotel lac wen mulan chubʌʼañʌl tac o taqʼuin, miʼ mejlel ti sujtel ti lac dios. Jiñi mulil tac muʼ bʌ i yʌjlel ti Colosenses 3:5 miʼ taj i bʌ yicʼot jiñi i cʌlʌx mulʌntel chuqui tac an. Mi wen la com ili tac, tajol jin jax mi caj laj cʼuxbin, i mach jiñic Dios. Lajalʌch bajcheʼ woli (yʌquel) lac chʼujutesan yambʌ diosteʼ tac. Mach «juntiquil jach» mi caj lac chʌn qʼuel Jehová. Mach cheʼic yom mi la cujtel.

14. ¿Chuqui bʌ ticʼojel tsiʼ yʌcʼʌ jiñi apóstol Juan?

¹⁴ Jiñi apóstol Juan lʌcʼʌ lajal tsaʼ bʌ i yʌlʌ. Tsiʼ taja ti tʼan jiñi «i colosojlel [tsuculel] lac pusicʼal yicʼot i tsʼiʼlel lac wut, yicʼot i chañʼesʌntel lac bʌ». Tsiʼ yʌlʌ jaʼel chaʼan mi an majqui miʼ cʼuxbin am bʌ ila ti mulawil, «maʼanic miʼ cʼuxbin lac Tat» (1 Juan 2:15, 16). Jin chaʼan, ti bele ora yom mi lac wen qʼuel bajcheʼ yilalonla. Tajol miʼ cʼotel laj cʌn chaʼan mi lac mulan ñusaqʼuin tac am bʌ ila ti pañimil, bajcheʼ yilal jiñi quixtañujob, bajcheʼ miʼ xojob i pislel yicʼot miʼ chʼʌlob i bʌ. O tajol mi lac mulan majlel ti universidad chaʼan mi lac taj chuqui tac an (Jeremías 45:4, 5). Pero lʌcʼʌlix jiñi tsijiʼ bʌ pañimil. Jin chaʼan, yom mi laj cʼajtesan tsaʼ bʌ i yʌlʌ Moisés. Mi mucʼʌch lac chʼʌmben isujm yicʼot mi lac ñop chaʼan Jehová «juntiquil jach», cojach mi caj lac chʼujutesan yicʼot mi caj lac melben i yeʼtel (troñel) cheʼ bajcheʼ yom (Hebreos 12:28, 29).

LAʼ LAJ CɅNTAN I MUCHʼTɅLEL JIÑI CONGREGACIÓN

15. ¿Chucoch tsiʼ cʼajtesʌbeyob Pablo jiñi xñoptʼañob chaʼan Jehová «juntiquil jach»?

¹⁵ Jiñi tʼan «juntiquil jach» miʼ cʼajtesʌbeñonla chaʼan Jehová yom cheʼ juntemel mi la cajñel yicʼot junlajal chuqui la com bʌ lac taj. Tiʼ yorajlel jiñi ñaxam bʌ xñoptʼañob, an cabʌl judíojoʼ bʌ, griegojoʼ bʌ, romanojoʼ bʌ o chʼoyoloʼ bʌ ti yambʌ país. Mach lajalobic i cultura, chuqui ñʌmʌl bʌ i melob yicʼot bajcheʼ mucʼob ti pensar. Jin chaʼan, an wocol bʌ tsiʼ yubiyob ti jacʼol tsaʼ bʌ i cʌñʌyob o chaʼan miʼ cʌyob i lecoj melbal. I jiñi apóstol Pablo tsiʼ cʼajtesʌbeyob chaʼan juntiquil jach lac Dios, jiñʌch Jehová (pejcan 1 Corintios 8:5, 6).

16, 17. a) ¿Baqui bʌ profecía woli ti tsʼʌctiyel ili ora, i bajcheʼ woli ti ujtel? b) ¿Chuqui miʼ mejlel i yʌcʼ chaʼan mach temelix mi caj la cajñel?

¹⁶ ¿Ixcu jiñi congregación tac ili ora? Jiñi xʼaltʼan Isaías tsiʼ yʌlʌ chaʼan «ti jini tal to bʌ qʼuin» cabʌlob mi caj i chʼujutesañob Jehová. Mi caj i yʌlob: «[Jiñʌch] miʼ pʌsbeñonla toj bʌ i bijlel, chaʼan miʼ mejlel lac tsajcan majlel» (Isaías 2:2, 3). Tijicña mi la cubin cheʼ wolʌch laj qʼuel ti tsʼʌctiyel ili profecía. Jiñi la quermañojob chʼoyolob ti cabʌl tejclum, yujilob yan tac bʌ tʼan yicʼot mach junlajalobic i cultura. I juntemel mi lac chʼujutesan Jehová. Pero ili mach yomic i yʌl chaʼan maʼañic wocol ti lac tojlel.

¹⁷ Jumpʼejl ejemplo, ¿bajcheʼ yilal mi laj qʼuel jiñi la quermañojob ñajt bʌ chʼoyolob? Tajol yambʌlob i tʼan, bajcheʼ miʼ lʌpob i pislel, i costumbre o bajcheʼ yilal chuqui miʼ cʼuxob. ¿Cojach ba mi lac ñochtañob lajaloʼ bʌ i cultura yicʼot ñʌmʌloʼ bʌ bajcheʼ joñonla, pero jiñi yañoʼ bʌ maʼañic? ¿Bajcheʼ yilal mi laj qʼuel jiñi ancianojob ñumen xcolelob to bʌ o yambʌloʼ bʌ i colorlel i pʌchʌlel? Mi maʼañic mi laj cʌntan lac bʌ, miʼ mejlel i yotsañonla ti wocol yicʼot mach chʌn temelix mi la cajñel.

18, 19. a) ¿Chuqui ti ticʼojel mi lac taj ti Efesios 4:1-3? b) ¿Chuqui miʼ mejlel lac mel chaʼan chʌn temel miʼ yajñel jiñi congregación?

¹⁸ Chaʼan maʼañic mi la cotsan lac bʌ ti wocol, ¿chuqui yom mi lac mel? Yom mi lac jacʼ i ticʼojel Pablo tsaʼ bʌ i yʌqʼue jiñi xñoptʼañob ti Éfeso, jumpʼejl tejclum baqui cabʌl chuqui an yicʼot mach bʌ junlajalobic i cultura (pejcan Efesios 4:1-3). Pablo tsiʼ taja ti tʼan melbalʌl tac bajcheʼ lac pecʼlel, la cutslel, cheʼ la cujil pijt yicʼot cʼuxbiya. Ili tac lajalʌch bajcheʼ wen tsʌts tac bʌ i yoyel otot. Pero yom tsʌts bʌ eʼtel chaʼan chʌn wen miʼ yajñel jumpʼejl otot. Jin chaʼan, Pablo tsiʼ sube jiñi xñoptʼañob ti Éfeso chaʼan miʼ chaʼleñob wersa chaʼan chʌn temel miʼ yajñelob.

¹⁹ Ti lac pejtelel yom mi lac chaʼlen wersa chaʼan chʌn temel miʼ yajñel jiñi congregación. ¿Chuqui miʼ mejlel lac mel? Ñaxan, mi lac pʌs jiñi melbalʌl tac tsaʼ bʌ i yʌlʌ Pablo, bajcheʼ lac pecʼlel, la cutslel, cheʼ la cujil pijt yicʼot cʼuxbiya. I chaʼpʼejlel, mi lac chaʼlen wersa chaʼan ñʌchʼʌl mi la cajñel. Jiñi leto yicʼot yambʌ hermanojob ti congregación lajalʌch bajcheʼ i jajweñal jumpʼejl otot. Jiñi leto miʼ mejlel i jisan jiñi lac muchʼtʌlel. Jin chaʼan yom mi lac lajmesan. Cheʼʌch mi caj lac tem ajñel ti lac ñʌchʼtʌlel.

20. ¿Bajcheʼ mi lac pʌs chaʼan mi lac chʼʌmben isujm chaʼan «Lac Yum Dios juntiquil jach»?

²⁰ «Lac Yum Dios juntiquil jach». Ili mucʼʌch i pʼʌtʼesañonla. Tsiʼ yʌqʼue i pʼʌtʌlel jiñi israelob chaʼan miʼ ñusañob jiñi wocol tsaʼ bʌ i tajayob cheʼ bʌ tsaʼ ochiyob ti jiñi Lum tsaʼ bʌ wʌn Subentiyob. Miʼ mejlel lac taj lac pʼʌtʌlel jeʼel chaʼan mi lac ñusan jiñi ñuc bʌ wocol yicʼot chaʼan mi lac tem ajñel ti lac ñʌchʼtʌlel yaʼ ti Paraíso. ¿Muʼ ba lac chʼʌmben isujm chaʼan jiñi «Lac Yum Dios juntiquil jach»? Mi cheʼʌchi, i bajñel jach yom mi lac chʼujutesan. Laʼ lac chʌn cʼuxbin yicʼot lac melben i yeʼtel tiʼ pejtelel lac pusicʼal, lac ñaʼtʌbal yicʼot lac pʼʌtʌlel. Laʼ lac bej chaʼlen wersa chaʼan temel mi la cajñel la quicʼot la quermañojob yicʼot ti ñʌchʼtʌlel. Mi cheʼʌch mi lac mel, Jesús mi caj i qʼuelonla bajcheʼ tiñʌmeʼ yicʼot mi caj i subeñonla: «Laʼ cu la, ochemet bʌ la tiʼ yutslel c Tat. Chʼʌmʌ laʼ yumʌntel chajpʌbebiletla cʼʌlʌl tiʼ cajibal pañimil» (Mateo 25:34).