Ticʼojel tac chaʼan tijicña jiñi familia

Cʼuxbin a wijñam

«Jiñi wiñicob yom miʼ cʼuxbiñob i yijñam cheʼ bajcheʼ miʼ bajñel cʼuxbiñob i bʌcʼtal. Jiñi wiñic muʼ bʌ i cʼuxbin i yijñam woliʼ cʼuxbin i bʌ, come maʼañic majqui tsʼaʼlebil i chaʼan i bʌcʼtal, miʼ weʼsan i miʼ cʌntan yicʼot cʼuxbiya» (EFESIOS 5:28, 29).

Jiñi wiñic jiñʌch i jol jiñi familia (Efesios 5:23). Juntiquil wem bʌ ñoxiʼal mach tsʌtsic tiʼ tojlel i yijñam yicʼot maʼañic miʼ xicʼ. Miʼ qʼuel ti ñuc i yijñam, miʼ yʌqʼuen i tijicñʌyel yicʼot chuqui i cʼʌjñibal i chaʼan. Jin chaʼan mucʼʌch i chaʼlen wersa chaʼan miʼ mel jiñi, i mach jiñic jach muʼ bʌ i bajñel ñaʼtan (Filipenses 2:4). Cheʼ bʌ miʼ chaʼlen tʼan yicʼot i yijñam, miʼ suben bajcheʼ yubil miʼ yubin yicʼot chuqui miʼ ñaʼtan. Cheʼ jaʼel, mucʼʌch i ñʌchʼtan chuqui miʼ yʌl i yijñam. Maʼan miʼ cʌlʌx michʼan yicʼot, maʼañic miʼ low yicʼot mi muqʼuic i low tiʼ tʼan (Colosenses 3:19).

Qʼuele ti ñuc a ñoxiʼal

«Jiñi ijñamʌl yom miʼ wen qʼuel ti ñuc i ñoxiʼal» (EFESIOS 5:33).

Cheʼ bʌ jiñi ijñamʌl miʼ qʼuel ti ñuc i ñoxiʼal yicʼot miʼ chʼʌm ti ñuc muʼ bʌ i yʌl, miʼ chaʼlen coltaya chaʼan an ñʌchʼtʌlel yaʼ ti familia. Mi tsiʼ mele mach bʌ ñoj weñic maʼañic miʼ yʌcʼ ti wajlentel, miʼ bej qʼuel ti ñuc i maʼañic miʼ michʼan (1 Pedro 3:4). Cheʼ bʌ yom miʼ tojʼesʌntel jumpʼejl wocol, miʼ sʌclan i yorajlel chaʼan miʼ suben, i wen jach bajcheʼ miʼ mel (Eclesiastés 3:7).

Mach a lotin a ñoxiʼal o a wijñam

«Jini chaʼan winicob [...]. Miʼ chʌn ajñelob yicʼot i yijñam. Jini chaʼtiquil miʼ yochelob ti juntiquil jach» (GÉNESIS 2:24).

Cheʼ bʌ juntiquil wiñic yicʼot juntiquil xʼixic miʼ ñujpuñelob, ñumen temelix miʼ yajñelob. Jin chaʼan tiʼ chaʼticlelob yomʌch miʼ chaʼleñob wersa chaʼan chʌn temelʌch miʼ yajñelob. ¿Bajcheʼ? Jiñʌch cheʼ maʼañic miʼ lotiñob i bʌ tiʼ tʼan, i cheʼ jaʼel miʼ melob chuqui tac wem bʌ tiʼ tojlelob. Maʼañic baqui ora yom miʼ piʼlen mach bʌ i ñoxiʼalic o mach bʌ i yijñamic. Cheʼ bʌ an majqui miʼ mel iliyi woli (choncol) i ticʼlan jiñi i piʼʌl come maʼañix mi caj i ñopbeñob i bʌ i tʼan i miʼ jem jiñi familia (Hebreos 13:4).

Tatʌlob, cʌntesanla ti wen laʼ walobilob

«Cʌntesan alʌlob ti jini bij yom bʌ miʼ xʌñob majlel. Cheʼ ñoxobix maʼanic mi caj i cʌyob» (PROVERBIOS 22:6).

Dios an yʌqʼue jiñi tatʌlob chaʼan miʼ cʌntesañob jiñi i yalobilob, yaʼ ochem cheʼ bʌ miʼ pʌsbeñob wem bʌ melbalʌl (chaʼlibal) yicʼot miʼ yʌqʼueñob wem bʌ ejemplo (Deuteronomio 6:6, 7). Mi jiñi xbiʼtalob an chuqui mach bʌ weñic miʼ melob, jiñi uts bʌ tatʌlob mach ti orajic yom miʼ jacʼob yicʼot mach ti orajic yom miʼ michʼañob (Santiago 1:19). Mi jiñi tatʌlob tsiʼ ñaʼtayob chaʼan yomʌch miʼ chʼʌm castigo jiñi i yalobil, mi caj i melob chaʼañʌch miʼ cʼuxbiñob i mach chaʼañic michʼob.

Alpʼeñelob, jacʼbenla i tʼan laʼ tat laʼ ñaʼ

«Alobob, jacʼbenla i tʼan laʼ tat laʼ ñaʼ [...]. ‹Qʼuele ti ñuc a tat yicʼot a ñaʼ›» (EFESIOS 6:1, 2).

Jiñi alobob yom miʼ jacʼbeñob i tʼan i tat i ñaʼ yicʼot miʼ wen qʼuelob ti ñuc. Cheʼ bʌ mucʼʌch i melob, an ñʌchʼtʌlel ti jiñi familia yicʼot tijicñayob. Cheʼ bʌ tsaʼix i tajayob i colel, miʼ pʌsob chaʼan mucʼʌch i qʼuelob ti ñuc i tat i ñaʼ cheʼ bʌ miʼ cʌntañob ti wen. Jumpʼejl ejemplo, jiñʌch cheʼ miʼ qʼuelob mi weñʌch an baqui chumulob yicʼot miʼ coltañob ti taqʼuin (1 Timoteo 5:3, 4).