¿Majqui jiñi arcángel Miguel?

I jacʼbal muʼ bʌ i yʌcʼ jiñi Biblia

Jiñi Biblia miʼ pʌs chaʼan Miguel o «san Miguel», bajcheʼ miʼ yʌl yambʌ ñopbalʌl tac, jiñʌch yambʌ i cʼabaʼ Jesús.a Jiñi Biblia miʼ yʌl chaʼan Miguel tsiʼ chaʼle leto yicʼot Satanás cheʼ bʌ Moisés tsaʼ chʌmi i chaʼan tsiʼ colta juntiquil ángel chaʼan miʼ mejlel tiʼ cʼotel baʼan jiñi xʼaltʼan Daniel (Daniel 10:13, 21; Judas 9). Miguel miʼ coltʌben i yumʌntel Jehová i miʼ contrajin jiñi añoʼ bʌ tiʼ contra Dios. Jin chaʼan weñʌch cheʼ miʼ subentel ti Miguel, yom bʌ i yʌl «¿Majqui Lajal Bʌ Bajcheʼ Dios?» (Daniel 12:1; Apocalipsis 12:7).

Laʼ laj qʼuel chucoch mi la cʌl chaʼan Jesús jiñʌch jiñi arcángel Miguel.

• Miguel jiñʌch «jiñi arcángel» (Judas 9). Jiñi tʼan arcángel yom i yʌl «i yum jiñi ángelob» i ti chaʼpʼejl jach versículo miʼ tilel yaʼ ti Biblia. Ti ili chaʼpʼejl versículo, jiñi tʼan arcángel juntiquil jach majqui woliʼ taj ti tʼan, yom i yʌl, chaʼan maʼañic yambʌ ángel muʼ bʌ i subentel bajcheʼ iliyi. 1 Tesalonicenses 4:16 miʼ yʌl tiʼ tojlel Jesús: «Jiñi lac Yum mi caj i jubel tilel ti panchan yicʼot jumpʼejl tʼan, cheʼʌch i tʼan bajcheʼ juntiquil arcángel i yicʼot i trompeta Dios». Ili versículo miʼ pʌs chaʼan Jesús miʼ chaʼlen tʼan bajcheʼ juntiquil arcángel. Jin chaʼan, miʼ mejlel la cʌl chaʼan Jesús jiñʌch jiñi arcángel Miguel.

• Miguel an tiʼ wenta jiñi ángelob ti panchan. «Miguel yicʼot jiñi i yángelob tsiʼ chaʼleyob guerra yicʼot jiñi dragón» yom i yʌl, jiñi Diablo (Apocalipsis 12:7). An ñuc bʌ i yeʼtel yaʼ ti panchan. Jiñi Biblia miʼ yʌl chaʼan jiñʌch «jiñi ñuc bʌ ángel» (Daniel 10:13, 21; 12:1). Ili yom i yʌl chaʼan lajalʌch bajcheʼ «jiñi comandante i chaʼan jiñi ángelob ti panchan», cheʼʌch miʼ yʌl David Aune, juntiquil muʼ bʌ i wen tsajin jiñi Nuevo Testamento.

  Jiñi Biblia cojach miʼ yʌlben i cʼabaʼ yambʌ juntiquil am bʌ i yeʼtel tiʼ tojlel jiñi ángelob ti panchan. Miʼ yʌl chaʼan «jiñi lac Yum Jesús miʼ tsictiyel yaʼ ti panchan yicʼot jiñi pʼʌtʌl bʌ i yángelob tiʼ yojlil cʼajc» (2 Tesalonicenses 1:7, 8; Mateo 16:27). Cheʼ jaʼel, 1 Pedro 3:21, 22 miʼ yʌl chaʼan Jesús «tsaʼ letsi majlel ti panchan, i tsaʼ aqʼuenti tiʼ wenta ángelob, añoʼ bʌ i yeʼtel yicʼot i pʼʌtʌlel». Cheʼ Dios tsaʼic i waʼchoco chaʼtiquil yumʌlob, Jesús yicʼot Miguel, ¿mach baʼanic mi caj i contrajiñob i bʌ maʼ wʌl? Jin chaʼan, ñumen toj cheʼ mi la cʌl chaʼan Jesús yicʼot Miguel juntiquil jach majqui woliʼ taj ti tʼan.

• Miguel «mi cajel i tsictiyel» o mi caj «i tejchel cheʼ tiʼ yorajlel ñuc bʌ wocol» (Daniel 12:1). Yaʼ ti libro chaʼan Daniel, jiñi tʼan am bʌ ti hebreo «mi caj i tejchel» miʼ yʌjlel cheʼ bʌ juntiquil rey miʼ tejchel cheʼ an chuqui mi caj i mel (Daniel 11:2-4, 21). Jesucristo, muʼ bʌ i subentel bajcheʼ «I Tʼan Dios», mi caj i mel i yeʼtel bajcheʼ «I Rey jiñi reyob» chaʼan miʼ jisan pejtelel i contrajob Dios i miʼ cʌntʌben i tejclum Dios (Apocalipsis 19:11-16). Mi caj i mel ti «i yorajlel cabʌl wocol. Tiʼ tejchibal pañimil cʼʌlʌl ili ora, maʼañic ujtem wocol tac bajcheʼ iliyi, i maʼañic baʼ ora miʼ chaʼ cajel» (Mateo 24:21, 42).