I referenciajlel jiñi Jun chaʼan lac tempa bʌ I Subtʼan yicʼot i Melbal jiñi xÑoptʼan

5-11 I CHAʼAN AGOSTO

ÑUC TAC BɅ I CʼɅJÑIBAL TI BIBLIA | 2 TIMOTEO 1-4

«Dios machʼan ti yʌqʼueyonla lac bʌqʼuen»

(2 Timoteo 1:7, Jini wen bʌ tʼan [WT]) Como Dios machʼan ti yʌqʼueyonla lac bʌqʼuen. Pero ti yʌqʼueyonla i pʼʌtyʌlel lac pusicʼal. Ti yʌqʼueyonla jeʼel lac pʼuntyan lac bʌ. Ti yʌqʼueyonla wen bʌ lac ñaʼtyʌbal.

w09-S 15/5 15 párr. 9

xColel, pʌsʌ chaʼan wolʌch a taj a colel tiʼ chaʼan bʌ Dios

⁹ Chaʼan miʼ mejlel ti coltʌntel jiñi Timoteo, Pablo tsiʼ cʼajtesʌbe: «Dios machʼan ti yʌqʼueyonla lac bʌqʼuen. Pero ti yʌqʼueyonla i pʼʌtyʌlel lac pusicʼal. Ti yʌqʼueyonla jeʼel lac pʼuntyan lac bʌ. Ti yʌqʼueyonla wen bʌ lac ñaʼtyʌbal» (2 Ti. 1:7, WT). Jiñi «wen bʌ lac ñaʼtyʌbal» jiñʌch muʼ bʌ i yʌqʼueñonla lac wen tsajin chuqui muʼ bʌ lac mel. Ili melbalʌl mi caj i coltañet a tojʼesan ti wen jiñi wocol tac muʼ bʌ caj i tilel ti a tojlel anquese wen tsʌts chuqui maʼ ñusan. Chʼijiyem ti alol pero an xcolelob mach bʌ yujilobic bajcheʼ miʼ tojʼesañob i wocol yicʼot maʼañic miʼ pʌsob i chʼejlel. An maʼañix bʌ miʼ chʼojyelob tiʼ wʌyib, miʼ wen qʼuelob televisión, miʼ cʼʌñob droga, miʼ japob lembal, miʼ majlelob ti qʼuiñijel tac o miʼ melob tsʼiʼlel chaʼan miʼ lon ñop i putsʼtañob jiñi wocol tac. Pero jiñi xñoptʼañonbʌla mi lac subentel «chaʼan mi laj cʌy pejtelel chuqui mach tojic, yicʼot i colosojlel lac pusicʼal yicʼot i chaʼan bʌ pañimil, chaʼan mi lac wen ñaʼtan chuqui yom, chaʼan toj mi la cajñel ti ili ora cheʼ bajcheʼ i chaʼañoʼ bʌ Dios» (Tito 2:12).

(2 Timoteo 1:8, WT) Mach a quisnin a sub i tʼan lac Yum. Mach a quisniñon cheʼ cʌchʌlon chaʼan ti caj mic sub i tʼan. Pero mach a bʌcʼñan a ñusan wocol jeʼel chaʼan ti caj jini tʼan chaʼan laj cotyʌntyel. Como mux i yʌqʼueñonla jeʼel i pʼʌtyʌlel lac ñusan wocol.

w03-S 1/3 9 párr. 7

Yom pʼʌtʌlonla yicʼot chʼejlonla

⁷ Pablo tiʼ sube Timoteo: «Dios machʼan ti yʌqʼueyonla lac bʌqʼuen. Pero ti yʌqʼueyonla i pʼʌtyʌlel lac pusicʼal. [...] Mach a quisnin a sub i tʼan lac Yum» (2 Timoteo 1:7, 8, WT; Marcos 8:38). Cheʼ bʌ mi lac pejcan ili tʼan tac, yom mi laj cʼajtiben lac bʌ: «¿Muʼ ba c chaʼlen quisin chaʼan i testigojon Jehová o muʼ ba c pʌs c chʼejlel? ¿Muʼ ba c suben jiñi c piʼʌlob ti eʼtel o jiñi c piʼʌlob ti escuela chaʼan i testigojon Jehová o mic muc? ¿Muʼ ba cubin c chʼijiyemlel chaʼan yʌñʌlon bajcheʼ yambʌlob o tijicña ba mi cubin c bʌ chaʼan i testigojon Jehová?». Mi an majqui miʼ chaʼlen bʌqʼuen cheʼ miʼ sub jiñi wen tan o maʼañic miʼ yʌcʼ i bʌ ti cʌjñel chaʼan i testigojʌch Jehová, yom miʼ cʼajtesan jiñi ticʼojel tsaʼ bʌ aqʼuenti Josué ti Jehová: «Yom maʼ pʼʌtesan a bʌ. Yom chʼejlet». Yom bʌ mi lac chʼʌm ti ñuc mach jiñic bajcheʼ yilal miʼ qʼuelonla jiñi lac piʼʌlob ti troñel o ti clase, jiñʌch bajcheʼ yilal miʼ qʼuelonla Jehová yicʼot Jesucristo (Gálatas 1:10).

Laʼ lac sʌclan ñuc tac bʌ i cʼʌjñibal

(2 Timoteo 2:23, I tʼan Dios [ITD]) Mach maʼ ñichʼtʌbeñob i tʼan jini sajtemoʼ bʌ muʼ bʌ i cʌlʌx pejcañob i bʌ ti lolom tʼan mach bʌ anic i sujmlel. Sojquem jax i tʼan. A wujil miʼ tech leto.

w14-S 15/7 14 párr. 10

Jiñi i wiñicob Jehová miʼ cʌyob i jontolil

¹⁰ Ti ili ora, jiñi i wiñiconbʌla Jehová maʼañix mi lac wen ñusan wocol tiʼ caj i cʌntesa jiñi muʼ bʌ cʌyob i ñopob Dios yaʼ ti congregación. Jin chaʼan, mi tsaʼ lac taja jumpʼejl cʌntesa mach bʌ loqʼuemic ti Biblia mach yomic mi lac jacʼ i mach yʌlʌyic baqui loqʼuem tilel. Mach weñic cheʼ mi lac chaʼlen leto la quicʼot jiñi tsaʼix bʌ i cʌyʌyob i sujmlel, mi jiñicto yaʼ baqui miʼ mejlel lac tsʼijbun cʌytʌl lac tʼan ti Internet. Anquese la comʌch laj coltan ili quixtañujob pero cheʼ mi lac pejcañob maʼañic woli lac jacʼ jiñi principio am bʌ ti Biblia. Jiñi i wiñiconbʌla Jehová maʼañic mi lac ñopbeñob i cʌntesa jiñi tsaʼix bʌ i cʌyʌyob i ñop Dios.

12-18 I CHAʼAN AGOSTO

ÑUC TAC BɅ I CʼɅJÑIBAL TI BIBLIA | TITO 1-FILEMÓN

Laʼ lac sʌclan ñuc tac bʌ i cʼʌjñibal

(Tito 1:12, ITD) Juntiquil xʼaltʼan loqʼuem bʌ tiʼ tojlelob tsiʼ yʌlʌ: «Xlotob tiʼ pejtelel ora jini añoʼ bʌ ti Creta. Lajalob bajcheʼ jontol bʌ bʌteʼel. Stsʼuʼlel, xwoʼlelob».

w89-S 15/5 31 párr. 5

Jiñi xpejcaya juñob miʼ cʼajtibeñob i bʌ

Maʼañic woliʼ yʌl chaʼan woliʼ wajlen o woliʼ tsʼaʼlen jiñi añoʼ bʌ Creta. Miʼ mejlel lac ñop ili come Pablo yujilix chaʼan yaʼ ti Creta añʌch wem bʌ xñoptʼañob wem bʌ tsaʼ qʼuejliyob ti Dios yicʼot tsaʼ bojñiyob ti chʼujul bʌ espíritu (Hechos 2:5, 11, 33). Añʌch cabʌl xñoptʼañob muʼ bʌ i wen ñopob Dios «ti jujumpʼejl tejclum» chaʼan miʼ mejlel ti waʼchocontel jiñi congregación tac. Anquese ili xñoptʼañob mach tojobic pero mucʼʌch i mejlel lac ñaʼtan chaʼan mach xlotobic, mach tsʼulelobic yicʼot mach xwolelobic come wen tsaʼ qʼuejliyob ti Dios (Filipenses 3:18, 19; Apocalipsis 21:8). Cheʼ bajcheʼ miʼ yujtel ili ora ti yan tac bʌ tejclum, yaʼ ti Creta tajol añʌch quixtañujob weñoʼ bʌ i pusicʼal muʼ bʌ i cʼojoʼtañob chaʼan an cabʌl mach bʌ weñic melbalʌl pero yomʌch i ñʌchʼtañob jiñi wen tʼan (Ezequiel 9:4; laja yicʼot Hechos 13:48, TNM).

(Filemón 15, 16, ITD) Ticʼʌl mi tsiʼ poj cʌyʌyet Onésimo chaʼan maʼ junyajlel pʌy ochel tiʼ pejtelel ora. ¹⁶ Mach jinic jach a winic wʌle pero ñumen an i cʼʌjñibal, come cʼuxbibil bʌ hermanojix ti Cristo. Mic wen cʼuxbin, pero ñumen yom maʼ cʼuxbin jatet come a waj eʼtelʌch. A wermanojix ti lac Yum jaʼel.

w08-S 15/10 31 párr. 5

Ñuc tac bʌ cʌntesʌntel am bʌ Tito, Filemón yicʼot Hebreos

15, 16. ¿Chucoch Pablo maʼañic tiʼ sube Filemón chaʼan miʼ yʌcʼ ti libre jiñi Onésimo? Yom jach bʌ i mel Pablo jiñʌch miʼ sub i sujmlel chaʼan i Yumʌntel Dios yicʼot miʼ cʌntesañob tiʼ chaʼan bʌ Jesucristo. Jin chaʼan, maʼañic tsiʼ yotsa i bʌ chaʼan miʼ tojʼesan yan tac bʌ wocol lajal bajcheʼ jiñi i coltʌntel jiñi muʼ bʌ i chaʼleñob toʼol eʼtel (Hch. 28:31).

19-25 I CHAʼAN AGOSTO

ÑUC TAC BɅ I CʼɅJÑIBAL TI BIBLIA | HEBREOS 1-3

«Laʼ laj cʼuxbin chuqui toj i laʼ lac tsʼaʼlen jontolil»

(Hebreos 1:8, Traducción del Nuevo Mundo [TNM]) Pero tsiʼ yʌlʌ tiʼ tojlel i Yalobil: «Dios jiñʌch a buchlib tiʼ pejtelel ora, i jiñi a teʼ chaʼan bʌ a yumʌntel jiñʌch i teʼel chuqui toj bʌ.

w14-S 15/2 5 párr. 8

¡Laʼ la cʌqʼuen i ñuclel Cristo, jiñi ñuc bʌ Rey!

⁸ Jehová tsiʼ waʼchoco i Yalobil bajcheʼ Rey cheʼ ti 1914. Jiñi i ‹teʼ chaʼan bʌ i yumʌntel jiñʌch i teʼel chuqui toj bʌ›, jin chaʼan yaʼ tiʼ yumʌntel añʌch tojel yicʼot mach yajcʌbilic majqui miʼ qʼuel. Weñʌch bajcheʼ tsaʼ waʼchoconti tiʼ yeʼtel come «Dios jiñʌch [i] buchlib», ili yom i yʌl chaʼan i yumʌntel yaʼʌch chucul ti Jehová. Cheʼ jaʼel, i yumʌntel Jesús mi caj i yajñel «tiʼ pejtelel ora». ¿Mach ba tijicñayic maʼ wubin cheʼ maʼ melben i yeʼtel Jehová i maʼ jacʼben i tʼan jiñi Rey waʼchocobil bʌ i chaʼan?

(Hebreos 1:9, ITD) Tsaʼ mulaj chuqui toj. Tsaʼ tsʼaʼle jontolil. Jini chaʼan joñon, a Dios, tsaʼix c ñumen aqʼueyet i tijicñʌyel a pusicʼal bajcheʼ yañoʼ bʌ».

w14-S 15/2 4 párr. 7

¡Laʼ la cʌqʼuen i ñuclel Cristo, jiñi ñuc bʌ Rey!

⁷ (Pejcan Salmo 45:6, 7, TNM). Come Jesús miʼ cʼuxbin chuqui toj bʌ i miʼ tsʼaʼlen pejtelel muʼ bʌ i mejlel i bibʼesʌben i cʼabaʼ i Tat, jin chaʼan Jehová tsiʼ waʼchoco bajcheʼ Rey ti jiñi i Yumʌntel. Tsaʼix i mulu «ti aceite chaʼan bʌ tijicñʌyel» ñumento bajcheʼ i «piʼʌlob», ili jiñʌch jiñi reyob ti Judá tilemoʼ bʌ tiʼ pʼolbal David. ¿Chucoch yʌñʌl bajcheʼ tsaʼ bojñi? Come Jehová jiñʌch tsaʼ bʌ i boño i mach cojach tsiʼ boño bajcheʼ Rey, tsaʼʌch i waʼchoco bajcheʼ Ñuc bʌ motomaj (Sal. 2:2; He. 5:5, 6). Cheʼ jaʼel, Jesús maʼañic tsaʼ bojñi ti yoque aceite, tsaʼ bojñi ti chʼujul bʌ espíritu. I jiñi i yumʌntel yaʼʌch an ti panchan i mach wʌʼic ti Lum.

Laʼ lac sʌclan ñuc tac bʌ i cʼʌjñibal

(Hebreos 1:3, Jini wen bʌ tʼan [WT]) Lajal ñoj wen, ñoj ñuc i Yalobil Dios cheʼ bajcheʼ Dios. I tsictisʌntyelʌch Dios jini i Yalobil. Jini i Yalobil Dios ti i pʼʌtyʌlel jach i tʼan mi yʌcʼ ti xucʼtyʌl tiʼ pejtyelel chʌ bʌ yes an ti mulawil. Cheʼ ñac ti ujti i xotʼeʼ lac mul chaʼan anic lac sʌc isʌntyel, tiʼ buchle yaʼ tiʼ ñoj Dios am bʌ ti panchan chaʼan tsiquil an i ñuclel Cristo.

it-1-S 1211

I yejtal

¿Tsaʼ ba i pʌsʌ Jesús tiʼ pejtelel ora chaʼan lajalʌch yicʼot i Tat?

Jesús, cʌmbil bʌ bajcheʼ ñaxam bʌ i Yalobil Dios, i yejtalʌch i Tat (2 Co. 4:4). Cheʼ bʌ Dios tsiʼ yʌlʌ: «Laʼ lac mel winic ti la quejtal» jiñʌch tiʼ sube i Yalobil, jin chaʼan jiñi i Yalobil lajalʌch bajcheʼ i Tat cʼʌlʌl cheʼ bʌ tsaʼ mejli (Gn. 1:26; Jn. 1:1-3; Col. 1:15, 16). Cheʼ bʌ Jesús tsaʼ ajñi ila ti Lum bajcheʼ toj bʌ wiñic, tsaʼʌch i chaʼle wersa i pʌs i melbal lajal bajcheʼ i chaʼan i Tat, jin chaʼan tsiʼ yʌlʌ: «Jini tsaʼ bʌ i qʼueleyon, tsaʼix i qʼuele c Tat» (Jn. 14:9; 5:17, 19, 30, 36; 8:28, 38, 42). I tsaʼ pʌsle chaʼan lajalʌch i yejtal bajcheʼ i Tat cheʼ bʌ tsaʼ chaʼ tejchisʌnti i tsaʼ aqʼuenti i cuxtʌlel bajcheʼ espíritu. Jehová tsiʼ yʌqʼue i «pʼʌtʌlel [...] ti panchan yicʼot ti pañimil» (Mt. 28:18; 1 P. 3:18). Come Dios tsiʼ yʌqʼue Jesús «cʼax cabʌl i ñuclel», jin chaʼan tsaʼ cʼoti i ñumen pʌs i ñuclel i Tat ñumento cheʼ bʌ maxto jubeñic tilel ila ti Lum (Fil. 2:9; He. 2:9). Ili ora «i tsictisʌntyelʌch Dios» (He. 1:3, WT; 1:2,4).

26 I CHAʼAN AGOSTO-1 I CHAʼAN SEPTIEMBRE

ÑUC TAC BɅ I CʼɅJÑIBAL TI BIBLIA | HEBREOS 4-6

«Laʼ lac chaʼlen wersa chaʼan mi la cochel tiʼ cʼaj o Dios»

(Hebreos 4:1, ITD) Woli to i pʌyonla Dios chaʼan miʼ yʌqʼueñonla laj cʼaj la co. Jini chaʼan yom tsajilonla ame anic ti laʼ tojlel majqui maʼanic miʼ cʼaj i yo ti lac Yum.

(Hebreos 4:4, ITD) Come an baʼ tsʼijbubil jini tʼan chaʼan i wucpʼejlel qʼuin: «Tiʼ wucpʼejlel qʼuin Dios tsiʼ cʼaja i yo cheʼ ujtemix pejtel i yeʼtel».

w11-S 15/7 24 párr. 3-5

¿Chuqui jiñi i cʼaj o Dios?

³ Añʌch chaʼchajp muʼ bʌ i yʌqʼueñonla lac ñaʼtan chaʼan cheʼ ti ñaxam bʌ siglo maxto añic jilen jiñi i qʼuiñilel cʼaj o. Jiñi ñaxam bʌ yaʼʌch mi lac taj ti jiñi i jacʼbal tsaʼ bʌ i yʌcʼʌ Jesús cheʼ bʌ tiʼ subeyob chaʼan maʼañic woliʼ qʼuel ti ñuc jiñi i qʼuiñilel cʼaj o. Ili quixtañujob miʼ yʌlob chaʼan cheʼ bʌ an majqui miʼ chaʼlen tsʼʌcaya lajal bajcheʼ woli ti eʼtel, i jiñi ticʼbil tiʼ mandar Moisés. Laʼ laj qʼuel bajcheʼ tsiʼ jacʼʌ Jesús: «Cʼʌlʌl wʌle miʼ chaʼlen eʼtel c Tat. Joñon jaʼel mic chaʼlen eʼtel» (Juan 5:16, 17). Cheʼ bʌ tsiʼ yʌlʌ: «Cʼʌlʌl wʌle miʼ chaʼlen eʼtel c Tat», tsiʼ yʌcʼʌ ti ñaʼtʌntel chaʼan mach i sujmic woli bʌ i yʌlob tiʼ tojlel. Lajal bajcheʼ tsiʼ yʌlʌ: «Joñon quicʼot c Tat woli c lajal mel lojon jiñi jach bʌ eʼtel. Jiñi c Tat woliyʌch ti eʼtel cheʼ tiʼ yorajlel i cʼaj o, jin chaʼan maʼañic i wocolel cheʼ mic chaʼlen eʼtel jaʼel». Jesús tsaʼ yʌcʼʌ ti ñaʼtʌntel chaʼan ila ti Lum maxto añic jilen jiñi i cʼaj o Dios.

⁴ Jiñi i chaʼpʼejlel yaʼʌch mi lac taj ti jiñi tsaʼ bʌ i yʌlʌ jiñi apóstol Pablo. Cheʼ bʌ tsiʼ taja ti tʼan Génesis 2:2 baqui miʼ yʌl chaʼan i cʼaj o Dios, jiñi apóstol tiʼ tsʼijbu yicʼot i coltaya jiñi chʼujul bʌ espíritu: «Joñonla muʼ bʌ lac ñop Dios, ochemonla baʼ mi laj cʼaj la co» (He. 4:3, 4, 6, 9). Iliyi miʼ yʌqʼueñonla lac ñaʼtan chaʼan cheʼ tiʼ yorajlel jiñi apóstol jiñi i qʼuiñilel cʼaj o maxto ujtemic. ¿Jala mi caj i yujtel jiñi i qʼuiñilel cʼaj o?

⁵ Chaʼan mi lac ñaʼtan jala mi caj i yujtel, yom mi lac ñaxan ñaʼtan chucoch Dios tsiʼ yʌcʼʌ jiñi cʼaj o. Génesis 2:3 miʼ yʌl chaʼan Dios utsʼat tsiʼ qʼuele jiñi i «wucpʼejlel qʼuin. Tsiʼ qʼuele ti chʼujul». Jehová tsiʼ qʼuele ti chʼujul ili qʼuin cheʼ bʌ tsiʼ yajca chaʼan miʼ tsʼʌctesan chuqui ñaʼtʌbil i chaʼan ila ti Lum. ¿Chuqui jiñi ñaʼtʌbil bʌ i chaʼan? Jiñʌch miʼ butʼ ili pañimil ti quixtañujob muʼ bʌ i jacʼbeñob i tʼan chaʼan miʼ cʌntañob ili lum yicʼot tiʼ pejtelel chuqui an (Gn. 1:28). Jin chaʼan, «cʼʌlʌl wʌle miʼ chaʼlen eʼtel» Jehová yicʼot Jesús, i yaʼ ti Biblia cʌmbil jaʼel bajcheʼ i «Yumʌch jini qʼuin cheʼ mi laj cʼaj la co» (Mt. 12:8). Jiñi i qʼuiñilel cʼaj o mi caj i jilel cheʼ bʌ miʼ laj tsʼʌctiyel chuqui ñaʼtʌbil i chaʼan Dios ila ti pañimil. ¿Jala miʼ cajel iliyi? Jiñʌch cheʼ tiʼ yujtibal jiñi Mil jab i Yumʌntel Cristo.

(Hebreos 4:6, ITD) Tsiquil mi caj i cʼajob i yo yañoʼ bʌ, come maʼanic tsiʼ cʼajayob i yo jini tsaʼ bʌ subentiyob jini Wen Tʼan ti ñaxan, come xñusa tʼañob.

w11-S 15/7 25 párr. 6

¿Chuqui jiñi i cʼaj o Dios?

⁶ Jehová tsaʼʌch i wen tsictesʌbe Adán yicʼot Eva chuqui jiñi ñaʼtʌbil bʌ i chaʼan, pero maʼañic tsiʼ mulayob i chaʼlen coltaya. Ti ili jabil ñumen bʌ tilel, an cabʌl quixtañujob cheʼʌch bʌ an i meleyob jaʼel. Cheʼʌch tsaʼ ujti tiʼ tojlel jiñi israelob, jiñi tejclum yajcʌbil bʌ i chaʼan Dios. Ti wiʼil, Pablo tiʼ sube jiñi ñaxam bʌ xñoptʼañob chaʼan miʼ mejlelob ti yajlel jaʼel ti ili wocol. Tiʼ tsʼijbubeyob: «Laʼ lac chaʼlen wersa chaʼan mi laj cʼaj la co, ame anic majch miʼ yajlel ti mulil cheʼ bajcheʼ laʼ tatob tsaʼ bʌ i ñusʌbeyob i tʼan» (He. 4:11). Pablo tsaʼʌch i laja cheʼ bʌ maʼañic miʼ jajqʼuel jiñi i tʼan Dios yicʼot cheʼ maʼañic mi la cochel tiʼ cʼaj o Dios. Ili tʼan mucʼʌch i yʌqʼueñonla jumpʼejl ticʼojel. ¿Chuqui miʼ mejlel ti ujtel ti lac tojlel cheʼ maʼañic mi laj coltan chuqui ñaʼtʌbil i chaʼan Dios? ¿Choncol ba la cʌcʼ lac bʌ ti wocol chaʼan maʼañic mi la cochel tiʼ cʼaj o Dios? Yomʌch mi lac wen tsajin ili cʼajtiya tac i mi caj lac bej qʼuel majlel. Pero mi caj lac ñaxan qʼuel chuqui mach bʌ weñic tsiʼ mele jiñi israelob yicʼot chucoch maʼañic tsaʼ ochiyob tiʼ cʼaj o Dios.

(Hebreos 4:9-11, Jiñi tsijiʼ bʌ wen tʼañ chaʼañ estudio [TWT]) Tsiquil cheʼ jiñi, añ to yam bʌ cʼaj o woli to bʌ i pijtañob jiñi i chaʼañoʼ bʌ Dios, ¹⁰ come majqui jach miʼ cʼaj i yoj ti Dios, miʼ cʼaj i yoj ti yeʼtel cheʼ bajcheʼ Dios tsiʼ cʼaja i yoj cheʼ bʌ ujtemix i yeʼtel. ¹¹ Laʼ lac chaʼlen wersa chaʼañ mi laj cʼaj la co, ame añic majch miʼ yajlel ti mulil cheʼ bajcheʼ laʼ tatob tsaʼ bʌ i ñusʌbeyob i tʼañ.

w11-S 15/7 28 párr. 16, 17

¿Chuqui jiñi i cʼaj o Dios?

¹⁶ Ti ili qʼuin, maʼañic majqui miʼ mejlel i taj i coltʌntel tiʼ jacʼol jach i mandar Moisés. Pablo jamʌ tsiquil tsiʼ yʌlʌ yaʼ tiʼ carta i chaʼan Efesios: «Come coltʌbiletla tiʼ yutslel i pusicʼal Dios chaʼan tsaʼ laʼ ñopo. Maʼanic tsaʼ laʼ bajñel colta laʼ bʌ. Laʼ majtan jach tilem bʌ ti Dios. Mach chaʼanic wen bʌ laʼ melbal, ame anic majqui miʼ lon chañʼesan i bʌ» (Ef. 2:8, 9). Cheʼ jiñi, ¿chuqui yom mi lac mel mi la com ochel ti jiñi cʼaj o? Yom mi laj cʼajtesan chaʼan Jehová tsiʼ yʌcʼʌ jiñi i qʼuiñilel cʼaj o chaʼan miʼ tsʼʌctesan chuqui ñaʼtʌbil bʌ i chaʼan ila ti Lum. Jin chaʼan, mi la com ochel tiʼ cʼaj o Jehová yom mi lac jacʼben i tʼan yicʼot mi lac chaʼlen coltaya tiʼ tsʼʌctesʌntel jiñi ñaʼtʌbil bʌ i chaʼan cheʼʌch bajcheʼ miʼ yʌl majlel jiñi organización.

¹⁷ Mach yomic mi lac ñaʼtan chaʼan maʼañic i cʼʌjñibal jiñi ticʼojel tac muʼ bʌ i yʌcʼ jiñi xucʼul bʌ xʼeʼtel i mach yomic mi laj qʼuel ti ñuc jiñi muʼ bʌ lac bajñel ñaʼtan. Mi cheʼ mi lac mel bajcheʼ ili, woli laj contrajin jiñi ñaʼtʌbil bʌ i chaʼan Dios i cheʼ jaʼel maʼañix mi caj lac sujtel tiʼ yamigo. Jin chaʼan, ¿chuqui miʼ mejlel i mʌctañonla chaʼan maʼañic mi lac jacʼben i tʼan Dios? Ti yambʌ temaj miʼ cajel lac tsajin i mi caj laj qʼuel bajcheʼ jiñi muʼ bʌ lac yajcan lac mel miʼ pʌsbeñonla mi ochemoñixla tiʼ cʼaj o Dios.

Laʼ lac sʌclan ñuc tac bʌ i cʼʌjñibal

(Hebreos 4:12, ITD) Come cuxul i tʼan Dios. Wen pʼʌtʌl. Ñumen jay bajcheʼ espada am bʌ i yej tiʼ chaʼwejlel. Miʼ sʌl jecʼ lac pusicʼal yicʼot lac chʼujlel. Miʼ tsictesan chuqui woliʼ yʌl lac pusicʼal yicʼot chuqui yom lac pusicʼal.

w16.09-S 13

Jiñi xpejcaya juñob miʼ cʼajtibeñob i bʌ

¿Chuqui jiñi «i tʼan Dios» muʼ bʌ i yʌl Hebreos 4:12 chaʼan «cuxul» yicʼot «wen pʼʌtʌl»?

▪ Cheʼ bajcheʼ tsiʼ yʌlʌ tilel, yom bʌ i yʌcʼ ti ñaʼtʌntel jiñi apóstol Pablo jiñʌch jiñi ñaʼtʌbil bʌ i chaʼan Dios cheʼ bajcheʼ miʼ yʌl jiñi Biblia.

Yaʼ ti lac jun tac miʼ wen cʼʌjñel Hebreos 4:12 chaʼan miʼ tsictesan chaʼan jiñi Biblia añʌch i pʼʌtʌlel chaʼan miʼ qʼuextʌben i cuxtʌlel jiñi lac piʼʌlob. Weñʌch bajcheʼ miʼ tsictesʌntel. Pero i cʼʌjñibalʌch miʼ tsajintel jiñi Hebreos 4:12 yicʼot jiñi ñaxan tac bʌ versículo. Pablo tiʼ sube jiñi xñoptʼañob hebreojoʼ bʌ chaʼan yomʌch miʼ coltañob chuqui ñaʼtʌbil bʌ i chaʼan Dios. I yaʼʌch mi tajob ti jiñi chʼujul bʌ tsʼijbujel. Jiñi apóstol tsiʼ cʼʌñʌ bajcheʼ ejemplo jiñi israelitajob tsaʼ bʌ locʼsʌntiyob ti Egipto. Ili tejclum tsaʼ subentiyob chaʼan miʼ mejlelob ti ochel ti jiñi Lum tsaʼ bʌ wʌn subentiyob, ti jumpʼejl lum baqui an «cabʌl lech yicʼot chab». Yaʼʌch baqui mi caj i tajob jiñi i sujm bʌ cʼaj o (Éx. 3:8; Dt. 12:9, 10).

Ili jiñʌch jiñi ñaʼtʌbil bʌ i chaʼan Dios tsaʼ bʌ i yʌcʼʌ ti cʌjñel. Pero ti wiʼil, jiñi israelitajob tsaʼ tsʌtsʼayob i pusicʼal i maʼañic tsiʼ pʌsʌyob i ñopoñel. Jin chaʼan, lʌcʼʌ tiʼ pejtelelob maʼañic tsaʼ ochiyob ti jiñi cʼaj o (Nm. 14:30, TNM; Jos. 14:6-10). Pero Pablo tsiʼ yʌlʌ chaʼan Dios ‹woli to i pʌyonla chaʼan miʼ yʌqʼueñonla laj cʼaj la co› (He. 3:16-19; 4:1). Ili miʼ yʌqʼueñonla lac ñaʼtan chaʼan jiñʌch junchajp ñaʼtʌbil bʌ i chaʼan Dios tsaʼ bʌ i yʌcʼʌ ti tsictiyel. Lajal bajcheʼ jiñi xñoptʼañob hebreojoʼ bʌ, joñonla jaʼel miʼ mejlel laj cʌn jiñi ñaʼtʌbil bʌ i chaʼan Dios yicʼot mi lac mel cheʼ bajcheʼ yom. Pablo tsiʼ taja ti tʼan Génesis 2:2 yicʼot Salmo 95:11 chaʼan miʼ yʌcʼ ti cʌjñel chaʼan chuculʌch ti Tsʼijbujel jiñi ñaʼtʌbil bʌ i chaʼan Dios.

Pablo tsiʼ yʌlʌ: «Woli to i pʌyonla Dios chaʼan miʼ yʌqʼueñonla laj cʼaj la co», ili tʼan mucʼʌch i ñijcan lac pusicʼal. Miʼ mejlel lac ñop chaʼan mucʼʌch lac mejlel ti ochel tiʼ cʼaj o Dios muʼ bʌ i taj ti tʼan jiñi Biblia, i woli lac chaʼlen wersa chaʼan mi lac taj. Mach chaʼañic woli lac jacʼben i mandar Moisés mi jiñicto chaʼan utsʼat miʼ qʼuelonla Jehová chaʼan chuqui melbil lac chaʼan. Am bʌ lac mele jiñʌch cheʼ an lac pʌsʌ lac ñopoñel yicʼot cheʼ mucʼʌch laj coltan chuqui ñaʼtʌbil bʌ i chaʼan Dios tsaʼ bʌ i yʌcʼʌ ti tsictiyel i maʼañic mi caj laj cʌy lac mel. Cheʼ bajcheʼ tsaʼ la cʌlʌ ti ñaxan, cabʌl quixtañujob tiʼ petol pañimil tsaʼix i techeyob estudio yicʼot chaʼan miʼ cʌñob jiñi ñaʼtʌbil bʌ i chaʼan Dios. An cabʌlob tsaʼix bʌ i qʼuextayob i melbal, an i pʌsob i ñopoñel yicʼot miʼ chʼʌmob jaʼ. Ili miʼ pʌsbeñonla chaʼan «cuxul i tʼan Dios. Wen pʼʌtʌl». Tsaʼ bʌ i yʌlʌ Dios muʼ bʌ lac taj yaʼ ti Biblia añix i coltayonla ti laj cuxtʌlel i muʼto caj i bej coltañonla.

(Hebreos 6:17, 18, ITD) Dios jaʼel yom i wen tsictesʌbeñonla mach mejlic ti jejmel i tʼan. Pejtel muʼ bʌ i ñopob mi caj i yʌqʼuentelob chuqui albil i chaʼan. Jini chaʼan tsiʼ bajñel taja i cʼabaʼ chaʼan miʼ xucʼchocon i tʼan. ¹⁸ Dios mach mejlic i chaʼlen lot. An chaʼchajp mach bʌ yujilic qʼuextʌyel. Jiñʌch i xucʼtʌlel i pusicʼal yicʼot albil bʌ i tʼan. Jini chaʼan joñonla tsaʼ bʌ lac taja laj coltʌntel ti Dios, mi lac taj i ñuqʼuesʌntel lac pusicʼal chaʼan mi lac chʌn pijtan chuqui subebilonla.

it-1-S 851 párr. 1

Pijtaya

Ili pijtaya muʼ bʌ caj i yʌqʼuentelob jiñi pʌybiloʼ bʌ ‹chaʼan miʼ yajñelob yaʼ ti panchan› wen añʌch baqui chucul i miʼ mejlel ti ñojpel chaʼan mucʼʌch caj i tsʼʌctiyel (He. 3:1, WT). An chaʼchajp muʼ bʌ i coltañonla lac ñaʼtan chaʼan Dios mucʼʌch caj i tsʼʌctesan: Jiñi wʌn albil bʌ i chaʼan yicʼot cheʼ bajcheʼ tsiʼ xucʼchoco i tʼan. Cheʼ jaʼel chucul ti Cristo, i waʼli añix ti panchan i maʼañix baqui ora mi caj i chʌmel. Miʼ yʌjlel jaʼel chaʼan «jini lac pijtaya, jiñʌch muʼ bʌ i tsʌts xucʼchocoñonla. Miʼ yʌcʼonla ti ochel ti junwejl pisil bʌ tsalʌl yilal [cheʼ bajcheʼ miʼ yochel jiñi ñuc bʌ motomaj yaʼ ti Cʼax chʼujul bʌ ajñibʌl cheʼ tiʼ qʼuiñilel i Ñusʌntel mulil] yaʼ ti panchan baʼ tsaʼ ñaxan ochi Jesús chaʼañonla. Tsaʼ ochi ti cʼax ñuc bʌ motomaj tiʼ pejtelel ora waʼchocobil tiʼ motomajil Melquisedec» (He. 6:17-20).