¿Chucoch Dios maʼañic miʼ ñʌchʼtan tiʼ pejtelel jiñi oración?
Jehová jiñi lac Tat am bʌ ti panchan, miʼ mulan i ñʌchʼtan la coración loqʼuem bʌ ti lac pusicʼal. Pero Dios mach tiʼ pejtelel jiñi oración miʼ jacʼ. ¿Chucoch? ¿Chuqui yom mi lac chʼʌm ti ñuc cheʼ bʌ mi lac mel oración? Qʼuele muʼ bʌ i yʌl jiñi Biblia.
«Cheʼ mi laʼ chaʼlen oración, mach mi laʼ chʌn taj lajal bʌ tʼan» (Mateo 6:7).
Jehová mach yomic cheʼ jin jach mi la cʌl jiñi wʌn ñaʼtʌbilix bʌ lac chaʼan o mi lac pejcan ti jumpʼejl libro jiñi oración. Yom cheʼ loqʼuem ti lac pusicʼal jiñi muʼ bʌ lac suben. ¿Muʼ ba a mulan cheʼ bʌ juntiquil a wamigo jin jach miʼ chʌcʌ subeñet tsaʼix bʌ i subeyet? Jiñi wem bʌ amigojob miʼ subeñob i bʌ añoʼ bʌ tiʼ pusicʼal i maʼañic miʼ lotiñob i bʌ. Cheʼ bʌ mi lac suben Dios loqʼuem bʌ ti lac pusicʼal, mi lac pʌs chaʼan mi laj qʼuel bajcheʼ la camigo.
«An chuqui tac mi laʼ cʼajtiben pero maʼanic mi laʼ taj, come sajtem bajcheʼ mi laʼ cʼajtin» (Santiago 4:3).
Dios maʼañic mi caj i jacʼbeñonla la coración mi woli laj cʼajtiben maʼañic bʌ miʼ mulan. Jumpʼejl ejemplo, ñaʼtancu chaʼan juntiquil miʼ caj ti alas taqʼuin i miʼ cʼajtiben i coltaya Dios chaʼan jin miʼ mʌl. ¿Muʼ ba caj i jacʼ Jehová jiñi oración cheʼ jamʌ tsiquilix an i yʌlʌ chaʼan mach yomic cheʼ mi lac mulan cabʌl chubʌʼañʌl? Maʼañic (Isaías 65:11; Lucas 12:15). Chaʼan Dios miʼ jacʼ jiñi la coración, yom chaʼan jiñi muʼ bʌ laj cʼajtin jiñʌch muʼ bʌ i yʌl yaʼ ti Biblia.
«Jini mach bʌ anic miʼ ñoj jacʼ i cʌntesʌntel mux i tsʼaʼlibentel i yoración jaʼel» (Proverbios 28:9).
Ti wajali, Dios maʼañic tsiʼ ñʌchʼtʌbe i yoración jiñi mach bʌ añic miʼ jacʼben i mandar, i cʼʌlʌl ili ora maʼañic qʼuextʌyem i pensar (Isaías 1:15, 16; Malaquías 3:6). Mi la com chaʼan Dios miʼ jacʼbeñonla la coración, yom mi lac jacʼ jiñi i mandar tac. ¿Ixcu mi an chuqui tsaʼ lac mele ti wajali? ¿Mucʼʌch ba caj i ñʌchʼtan la coración? Mucʼʌch. Jehová miʼ ñusʌben jiñi muʼ bʌ i cʌy i mul yicʼot muʼ bʌ i tech i mel muʼ bʌ i mulan (Hechos 3:19).