I referenciajlel jiñi Jun chaʼan lac tempa bʌ I Subtʼan yicʼot i Melbal jiñi xÑoptʼan
1-7 I CHAʼAN MARZO
ÑUC TAC BɅ I CʼɅJÑIBAL TI BIBLIA | NÚMEROS 7, 8
«¿Chuqui miʼ cʌntesañonla cheʼ bajcheʼ añob jiñi israelitajob ti wajali?»
it-1 523 párr. 7
Congregación
Yaʼ ti tejclum Israel, jiñi «añoʼ bʌ i yeʼtel» jiñʌch muʼ bʌ i chaʼleñob tʼan tiʼ wentʌlel jiñi tejclum (Esd. 10:14). Jin chaʼan, «jini yumʌlob» ti jiñi tribu tac, tsiʼ yʌcʼʌyob majtañʌl tac cheʼ bʌ tsaʼ mejli jiñi tabernáculo (Nm. 7:1-11). Cheʼ tiʼ yorajlel Nehemías, jiñi sacerdotejob, jiñi levitajob yicʼot jiñi añoʼ bʌ i yeʼtel jiñʌch tsaʼ bʌ i chaʼleyob tʼan tiʼ wentʌlel jiñi tejclum cheʼ bʌ tsiʼ waʼchocoyob i tʼan (Neh. 9:38-10:27). Cheʼ bʌ jiñi israelitajob añob ti jiñi tiquin bʌ lum, jiñi 250 wiñicob «ñuc tacoʼ bʌ i yeʼtel tiʼ tojlel israelob», tsiʼ coltayob Coré, Datán, Abiram yicʼot On chaʼan miʼ contrajiñob Moisés yicʼot Aarón (Nm. 16:1-3). Dios tiʼ sube Moisés chaʼan miʼ yajcan 70 ancianojob yaʼ ti tejclum Israel chaʼan miʼ tem coltañob jiñi tejclum come Dios tsiʼ qʼuele chaʼan Moisés wocol woliʼ bajñel ubin (Nm. 11:16, 17, 24, 25). Ti Levítico 4:15 miʼ taj ti tʼan jiñi «xñoxob yaʼ ti tejclum», jin chaʼan jiñi ancianojob añoʼ bʌ tiʼ wenta jiñi tejclum, jiñi tatʌlob ti Israel, jiñi juezob yicʼot jiñi waʼchocobiloʼ bʌ jiñʌch muʼ bʌ i chaʼleñob tʼan tiʼ wenta jiñi tejclum (Nm. 1:4, 16; Jos. 23:2; 24:1).
it-2 874 párr. 1
Rubén
Yaʼ ti tejclum Israel, jiñi tribu i chaʼan Rubén tsaʼʌch ajñiyob tiʼ surjlel jiñi tabernáculo, i yaʼ tiʼ tʼejl tsaʼʌch ajñiyob jiñi i pʼolbalob Simeón yicʼot Gad. Cheʼ bʌ miʼ subentelob jiñi tejclum chaʼan miʼ tempañob jiñi i chubʌʼan chaʼan miʼ chaʼ xʌñob majlel, jiñʌch jiñi uxpʼejl tribu ñaxam bʌ miʼ majlel, i ti wiʼil yaʼ miʼ tilel jiñi tribu i chaʼan Judá, Isacar yicʼot Zabulón (Nm. 2:10-16, TNM; 10:14-20). I cheʼʌch belecña tsaʼ cʼaxiyob jaʼel chaʼan miʼ yʌcʼob majtañʌl tac cheʼ bʌ tsaʼ ujti ti mejlel jiñi tabernáculo (Nm. 7:1, 2, 10-47).
w04 1/8 25 párr. 1
Ñuc tac bʌ cʌntesʌntel am bʌ ti Números
8:25, 26. Jiñi wiñicob levitajoʼ bʌ añobix bʌ i jabilel maʼañix miʼ yʌqʼuentelob i mel jiñi eʼtel añoʼ bʌ tiʼ wenta tiʼ caj jiñi i jabilelob yicʼot chaʼan miʼ ñaʼtʌntel chuqui ti eʼtel mi caj i melob. Pero cheʼ bʌ yomob, miʼ mejlel i coltañob jiñi yambʌ levitajob. Ti ili ora, maʼañic majqui miʼ chaʼlen i bʌ ti jubilar bajcheʼ xsubtʼan, pero añʌch chuqui mi laj cʌn ti jiñi i Mandar Moisés. Juntiquil hermano añix bʌ i jabilel mach bʌ muqʼuix i wen mejlel i melben i yeʼtel Jehová, miʼ mejlel i sʌclan yambʌ bajcheʼ miʼ mejlel i melben i yeʼtel Jehová.
Laʼ lac sʌclan ñuc tac bʌ i cʼʌjñibal
it-2 717 párr. 3
Ascuñʌl bʌ
Come jiñi ñaxam bʌ i yalobilob jiñi israelitajob jiñʌch tsaʼ bʌ ochiyob tiʼ jol cabʌl familia tac, jiñʌch tsaʼ bʌ i chaʼleyob tʼan tiʼ wenta jiñi tejclum. Jehová tsiʼ yʌlʌ chaʼan jiñi tejclum Israel jiñʌch ascuñʌl bʌ i yalobil come tsiʼ mele jumpʼejl trato yicʼot Abrahán (Éx. 4:22). Come Jehová maʼañic tsiʼ tsʌnsʌbeyob jiñi ñaxam bʌ i yalobilob jiñi israelitajob, jin chaʼan tsiʼ yʌlʌ: «Aqʼueñon pejtel jini yʌx alʌloʼ bʌ tiʼ tojlel israelob. C chaʼañob yicʼot i yʌxʼal laʼ wʌlacʼ» (Éx. 13:1, 2). Jin chaʼan, pejtelel jiñi ñaxam bʌ i yalobilob jiñi israelitajob tsaʼʌch i yʌqʼueyob Dios.
8-14 I CHAʼAN MARZO
ÑUC TAC BɅ I CʼɅJÑIBAL TI BIBLIA | NÚMEROS 9, 10
«¿Bajcheʼ woliʼ cʌntan Jehová jiñi i tejclum?»
it-1 403 párr. 6
Tejclum Israel
Cheʼ bʌ jiñi tejclum Israel mi laj tempañob i chubʌʼan chaʼan miʼ majlelob ti chumtʌl ti yambʌ lum, wen chajpʌbil bajcheʼ miʼ melob (yaʼ ti Números capítulo 33, Moisés tsiʼ taja ti tʼan 40 tejclum baqui tsajñiyob ti chumtʌl). Cheʼ bʌ jiñi tocal miʼ cʌlel tiʼ pam jiñi tabernáculo, jiñi tejclum Israel yaʼ miʼ jijlelob yaʼ baqui añob. Pero cheʼ bʌ jiñi tocal miʼ tejchel, jiñi tejclum miʼ tech i tempañob chuqui añob i chaʼan, i miʼ techob xʌmbal. «Tiʼ mandar lac Yum tsaʼ jalʼayob [o jijliyob]. Cheʼ jaʼel tiʼ mandar lac Yum tsaʼ cajiyob ti xʌmbal» (Nm. 9:15-23). Jehová tsiʼ yʌcʼʌ ti melol chaʼpʼejl trompeta ti plata jatsʼbil bʌ ti martillo chaʼan miʼ ñaʼtañob jiñi israelitajob chaʼan yom miʼ tempañob chuqui añob i chaʼan (Nm. 10:1, 2, 5, 6). Jiñi trompeta tac qʼuexel bajcheʼ yom miʼ wustʌl chaʼan jiñi israelitajob miʼ ñaʼtañob chuqui yom miʼ melob. I cheʼ ti 1512, cheʼ bʌ maxto tilemic Cristo, jiñʌch baqui cojaxto tsaʼ wusli jiñi trompeta tac. Cheʼ bʌ jiñi sacerdotejob tsaʼix i teche i chʼʌmob majlel jiñi arca chaʼan trato, miʼ techob xʌmbal jaʼel jiñi i pʼolbal Judá, Isacar yicʼot Zabulón, i yaʼ majlelob jaʼel jiñi guersonitajob yicʼot jiñi meraritajob woliʼ bʌ i chʼʌmob majlel lamital am bʌ yaʼ ti tabernáculo am bʌ tiʼ wenta i chʼʌmob majlel. Ti wiʼil, yaʼʌch miʼ majlelob jaʼel jiñi i pʼolbal Rubén, Simeón yicʼot Gad. I yaʼ majlelob jaʼel jiñi cohatitajob am bʌ tiʼ wenta i chʼʌmob majlel jiñi chʼujul bʌ ajñibʌl. Pero yaʼ tilel jaʼel jiñi i pʼolbal Efraín, Manasés yicʼot Benjamín. I jiñi cojix bʌ yaʼ bʌ tilelob jiñʌch i pʼolbal Dan, Aser yicʼot Neftalí. Jin chaʼan, jiñi ñaxam bʌ tribu yaʼ bʌ majlel yicʼot jiñi cojix bʌ, jiñʌch jiñi ñumen pʼʌtʌloʼ bʌ yicʼot jiñi ñumen oñoʼ bʌ (Nm. 10:11-28).
w11 15/4 4 párr. 4, 5
¿Majqui woliʼ cʼʌn Dios ili ora chaʼan miʼ cʌntañonla?
¿Bajcheʼ miʼ mejlel lac pʌs chaʼan mucʼʌch laj qʼuel ti ñuc cheʼ bajcheʼ miʼ cʌntesañonla Jehová? Jiñi Apóstol Pablo miʼ subeñonla: «Jacʼbenla i tʼan xcʌntayajob laʼ chaʼan. Otsan laʼ bʌ tiʼ wenta» (He. 13:17). Ili mach cʼuñic ti melol. Laʼcu lac ñaʼtan chaʼan juntiquilet israelita cheʼ tiʼ yorajlel Moisés. Añix cabʌl qʼuin cajel laʼ tsajcan majlel jiñi tocal yaʼ ti tiquin bʌ lum, i cheʼ jiñi miʼ waʼtʌl jiñi tocal. Tajol maʼ tech a ñaʼtan: «¿Jaypʼejl qʼuin mi caj i cʌlel jiñi tocal ilayi? ¿Jumpʼejl qʼuin? ¿Jumpʼejl semana? ¿Cabʌl uw?». Cheʼ jiñi maʼ tech a ñaʼtan miʼ yom maʼ laj locʼsan a cuch come mach a wujilic jaypʼejl qʼuin mi caj laʼ cʌytʌl. Pero cojach maʼ locʼsan jiñi i cʼʌjñibal bʌ a chaʼan. Miʼ ñumel majlel jiñi qʼuin i miʼ cʼojyel a locʼ jiñi muʼ bʌ caj a cʼʌn ti jujumpʼejl qʼuin, jin chaʼan maʼ laj locʼsan jiñi a chubʌʼan. Pero cheʼ wolix i yujtel a laj locʼsan a chubʌʼan, jiñi tocal miʼ chaʼ tech xʌmbal. I wʌle yomix maʼ chaʼ lot pejtelel a cuch, ¿bajcheʼ yubil mi caj a wubin a bʌ? Anquese mach a wom maʼ wubin, yom ti ora maʼ tech pejtelel a cuch cheʼ bajcheʼ woliʼ melob jiñi yambʌlob (Nm. 9:17-22).
¿Bajcheʼ yilal woli laj qʼuel majlel ili ora jiñi i cʌntesa tac Jehová? ¿Mucʼʌch ba lac jacʼ ti ora o cheʼ jach mi lac mel cheʼ bajcheʼ ñʌmʌlonla lac mel? ¿Wolʌch ba lac tech lac mel cheʼ bajcheʼ miʼ yʌl jiñi tsijib cʌntesa tac woli bʌ la cʌqʼuentel majlel? ¿Tsaʼix ba laj qʼuexta cheʼ bajcheʼ yom mi la cʌcʼ estudio, bajcheʼ yom mi lac subeñob wen tʼan jiñi tilemoʼ bʌ ti yambʌ país, bajcheʼ yom mi lac mel jiñi lac chʼujutesaya ti familia, bajcheʼ yom lac melbal cheʼ bʌ añonla ti jiñi colem tempa bʌ tac yicʼot wolʌch ba lac jacʼ muʼ bʌ i yʌlob jiñi Comité am bʌ tiʼ wenta chaʼan miʼ pejcan doctorob ti hospital tac? ¿Bajcheʼ yambʌ mi lac pʌs chaʼan mucʼʌch lac jacʼ jiñi cʌntesa tac? Jiñʌch cheʼ mi lac chʼʌm ti ñuc jiñi ticʼojel muʼ bʌ la cʌqʼuentel. Jin chaʼan, cheʼ bʌ an chuqui mi lac ñaʼtan lac mel ñuc bʌ i cʼʌjñibal, mach cojach mi lac bajñel ñaʼtan lac bʌ, mucʼʌch lac chʼʌm ti ñuc muʼ bʌ i subeñonla Jehová yicʼot i yorganización. Laʼcu lac ñaʼtan iliyi, cheʼ bʌ juntiquil alʌ chʼiton miʼ yubin chaʼan wen tsʌts woli jaʼal, tsel teqʼuel miʼ majlel baqui an i papá o i mamá. Cheʼʌch yom mi lac mel jaʼel cheʼ bʌ mi lac ñusan wocol tac, yom mi lac sʌclan laj coltʌntel ti jiñi congregación.
Laʼ lac sʌclan ñuc tac bʌ i cʼʌjñibal
it-1 226 párr. 4
Colem tempa bʌ
Ñuc i cʼʌjñibal jiñi tempa bʌ. Cheʼ bʌ tsaʼ mejli jiñi Pascua tsaʼʌch qʼuejli chaʼan wen ñuc i cʼʌjñibal jiñi tempa bʌ tac chaʼan miʼ colelob tiʼ chaʼan bʌ Dios. Mi an juntiquil israelita muʼ bʌ i toʼo cʌy i bʌ cheʼ ti Pascua anquese sʌcʌch o maʼañic baqui tsaʼ majli, i tiʼ cajach mach yomic i mel jiñi qʼuiñilel wersa yom miʼ tsʌnsʌntel (Nm. 9:9-14.) Cheʼ bʌ jiñi rey Ezequías tsiʼ tempa jiñi wiñicob xʼixicob chumuloʼ bʌ ti Judá yicʼot ti Israel chaʼan miʼ melob jiñi Pascua yaʼ ti Jerusalén, jiñi tʼan tsaʼ bʌ subentiyob miʼ yʌl: «Israelob, chaʼ sutqʼuin laʼ bʌ ti lac Yum [...]. Mach laʼ tsʌtsʼesan laʼ pusicʼal cheʼ bajcheʼ laʼ ñojteʼelob. Acʼʌ laʼ bʌ tiʼ wenta lac Yum. Yom mi laʼ tilel ti jini chʼujul bʌ Templo i chaʼan tiʼ pejtelel ora. Chʼujutesanla lac Yum Dios chaʼan miʼ lajmel i michʼajel ti laʼ tojlel. [...] Come wen uts i pusicʼal lac Yum Dios. Jal miʼ michʼan. Maʼanic mi caj i junyajlel choquetla mi tsaʼ laʼ sutqʼui laʼ bʌ tiʼ tojlel» (2 Cr. 30:6-9.) Mi an mach bʌ añic miʼ majlel ti jiñi tempa bʌ tiʼ caj bajñel cheʼ jach yom, miʼ pʌs chaʼan miʼ contrajin Dios. Ili ora, jiñi xñoptʼañonbʌla maʼañix mi lac mel jiñi qʼuiñijel chaʼan Pascua, pero Pablo tsaʼʌch i yʌlʌ chaʼan mach yomic mi laj cʌy jiñi tempa bʌ muʼ bʌ i mel jiñi i tejclum Dios cheʼ bʌ tsiʼ yʌlʌ: «Laʼ laj coltan lac bʌ tiʼ pejtelel chuqui wen, chaʼan mi laj cʼuxbin lac bʌ bajcheʼ yom yicʼot wen bʌ lac melbal. Mach yomic mi laj cʌy lac tempan lac bʌ cheʼ bajcheʼ miʼ bixel melob lamital. Laʼ lac chʼejlʼesan lac bʌ. Cojcoj wʌle cheʼ woli ti lʌcʼtiyel jini cojix bʌ qʼuin cheʼ bajcheʼ woli laʼ qʼuel» (He. 10:24, 25).
15-21 I CHAʼAN MARZO
ÑUC TAC BɅ I CʼɅJÑIBAL TI BIBLIA | NÚMEROS 11, 12
«¿Chucoch mach yomic mi lac chaʼlen wulwul tʼan?»
w01 15/6 17 párr. 20
Mach yomic miʼ ñajʌyel lac chaʼan jiñi muʼ bʌ lac ñʌchʼtan
20 Cabʌl xñoptʼañob maʼañic miʼ yajlelob tiʼ melol tsʼiʼlel. Pero yom mi laj cʌntan lac bʌ chaʼan maʼañic mi lac chaʼlen wulwul tʼan come mi tsaʼ lac mele mach weñic mi caj laj qʼuejlel ti Dios. Pablo miʼ yʌqʼueñonla ili ticʼojel: «Mach yomic mi la quilʌben i pusicʼal lac Yum cheʼ bajcheʼ tsiʼ chaʼleyob lamital. Tsaʼ jisʌntiyob ti lucum tac. Mach laʼ chaʼlen wulwul tʼan ti laʼ pusicʼal cheʼ bajcheʼ tsiʼ chaʼleyob jini tsaʼ bʌ jisʌntiyob chaʼan jini Angel yujil bʌ tsʌnsa» (1 Corintios 10:9, 10). Jiñi israelitajob tsiʼ yʌlʌyob mach bʌ weñic tiʼ tojlel Moisés, Aarón yicʼot Jehová, i tsiʼ yʌlʌyob chaʼan tsaʼix cʼojyi i cʼuxob jiñi maná (Números 16:41; 21:5). ¿Tsaʼ ba i ñumen michʼesa Jehová jiñi tsʼiʼlel i jiñi wulwul tʼan maʼañic? Jiñi Biblia miʼ yʌl chaʼan cabʌlob tsaʼ cʼuxleyob ti lucum tiʼ caj tsiʼ chaʼleyob wulwul tʼan (Números 21:6). Ti jumpʼejl bʌ qʼuin tsaʼ chʌmiyob 14 mil 700 tsaʼ bʌ i chaʼleyob wulwul tʼan (Números 16:49). Jin chaʼan, mach la cʌcʼ ti michʼan Jehová cheʼ bʌ maʼañic mi laj qʼuel ti ñuc jiñi muʼ bʌ i yʌqʼueñonla.
¿Chucoch yom mi la cʌqʼuen wocolix i yʌlʌ yambʌlob?
12 Jiñi israelob an cabʌl chucoch tsaʼ mejli i pʌsob chaʼan miʼ qʼuelob ti ñuc chuqui aqʼuebilob. Chaʼan miʼ coltʌntelob loqʼuel bajcheʼ mozojob, Jehová tsiʼ yʌqʼue lujunchajp wocol jiñi egiptojob. I cheʼ bʌ maxto jali i loqʼuelob, tsaʼ coltʌntiyob yaʼ ti Chʌchʌc bʌ mar cheʼ tsaʼ tsʌnsʌntiyob jiñi egiptojob. Tsiʼ wen qʼueleyob ti ñuc tsaʼ bʌ i mele Dios tiʼ tojlelob i tsaʼto i melbeyob jumpʼejl cʼay. Pero ¿tsaʼ ba jalʼa jiñi?
13 Cheʼ tsiʼ tajayob tsijiʼ bʌ wocol, tsiʼ ñajʌtesayob pejtel tsaʼ bʌ i mele Dios tiʼ tojlelob i maʼañic tsiʼ qʼueleyob ti ñuc (Sal. 106:7). Jiñi Biblia miʼ yʌl chaʼan «pejtelel jini israelob ti mojt ti mojt tsiʼ letsayob i tʼan tiʼ contra Moisés yicʼot Aarón», yom i yʌl, chaʼan tsiʼ letsayob i tʼan tiʼ tojlel Jehová (Éx. 16:2, 8). Jehová maʼañic tsiʼ mulaj tsaʼ bʌ i meleyob, jin chaʼan tsiʼ yʌlʌ ti wiʼil chaʼan mi caj i chʌmelob (sajtelob) yaʼ ti tiquiñal bʌ lum, cojach Josué yicʼot Caleb maʼañic (Núm. 14:22-24; 26:65). ¿Chuqui yom mi lac mel chaʼan mach cheʼic mi laj cujtel cheʼ bajcheʼob i mi lac lajin jiñi weñoʼ bʌ i melbal? Laʼ laj qʼuel.
it-2 855 párr. 2
Leto
Wulwul tʼan. Jiñi wulwul tʼan miʼ yʌcʼ chʼijyemlel yicʼot miʼ tech cabʌl wocol. Jiñi israelitajob tsiʼ chaʼleyob wulwul tʼan tiʼ contra Jehová cheʼ bʌ maxto jali tsaʼ loqʼuiyob ti Egipto, tsiʼ yʌlʌyob chaʼan Moisés yicʼot Aarón mach weñic woliʼ melob i yeʼtel (Éx. 16:2, 7). Jiñi tsaʼ bʌ i yʌlʌyob tsiʼ yʌqʼue cabʌl i chʼijyemlel Moisés, i tsaʼto i cʼajti chʌmel (Nm. 11:13-15). Jiñi muʼ bʌ i chaʼlen wulwul tʼan miʼ mejlel i cʼotel i chʌmel. Jehová tsiʼ yʌlʌ chaʼan jiñi wulwul tʼan tiʼ tojlel Moisés, jiñʌch wulwul tʼan tiʼ tojlel jaʼel (Nm. 14:26-30). Cabʌl tsaʼ chʌmiyob tiʼ caj tsiʼ chaʼleyob wulwul tʼan.
Laʼ lac sʌclan ñuc tac bʌ i cʼʌjñibal
it-2 288
Maná
¿Chuqui jiñi maná? «Jini maná cheʼ ya wojwoxtʌl cheʼ bajcheʼ i bʌcʼ xculanta», i cheʼ yilal bajcheʼ jiñi i yetsel teʼ. «Lajalʌch i tsajel bajcheʼ waj melbil bʌ yicʼot chab» o «bajcheʼ pan xʌbʌl bʌ ti aceite». Cheʼ bʌ jiñi maná tsaʼix ujti i jujchʼel ti ñaʼatun o ti molino, o ti molcajete, miʼ chʼʌxtʌl o miʼ melob ti waj i cheʼ jiñi miʼ pojpoñob (Éx. 16:23, 31; Nm. 11:7, 8).
22-28 I CHAʼAN MARZO
ÑUC TAC BɅ I CʼɅJÑIBAL TI BIBLIA | NÚMEROS 13, 14
«Jiñi lac ñopoñel miʼ pʼʌtʼesañonla»
w06 1/10 17 párr. 5, 6
Jiñi lac ñopoñel yicʼot cheʼ mi lac bʌcʼñan Dios miʼ yʌqʼueñonla lac chʼejlel
5 Josué yicʼot Caleb, yomobix ochel ti jiñi Lum tsaʼ bʌ wʌn subentiyob, jin chaʼan tsiʼ yʌlʌyob: «[Jiñi cananeojob] lajalob jax yilal bajcheʼ waj muʼ bʌ laj cʼux, come lac Yum woliʼ cʌntañonla. Lac Yum tsaʼix i cʌyʌ jini añoʼ bʌ ti Canaán. Mach mi laʼ bʌcʼñañob» (Números 14:9). ¿Woli ba i ñumel ti pʼis jiñi tsaʼ bʌ i yʌlʌyob? Maʼañic. Come Josué, Caleb yicʼot pejtelel jiñi israelitajob tsiʼ qʼueleyob bajcheʼ tsiʼ cʼʌñʌ Jehová jiñi 10 wocol chaʼan miʼ yʌcʼ ti quisin jiñi pʼʌtʌl bʌ tejclum Egipto yicʼot jiñi i diosob. I tsiʼ qʼueleyob bajcheʼ Jehová tiʼ tsʌnsa Faraón yicʼot i soldadojob yaʼ ti Chʌchʌc bʌ mar (Salmo 136:15). Maʼañic i sujmlel cheʼ bʌ tsiʼ chaʼleyob bʌqʼuen jiñi 10 wiñicob tsajñiyoʼ bʌ i qʼuelob jiñi lum yicʼot jiñi israelitajob tsaʼ bʌ i jacʼbeyob i tʼan. Jehová wen cʼux tsiʼ yubi jiñi tsaʼ bʌ i meleyob, tsiʼ yʌlʌ: «¿Jaypʼejl to ora mi caj i michʼleñoñob ili winicob? ¿Jaypʼejl to ora maʼanic mi caj i pʼisob ti wenta jini ñuc tac bʌ c pʼʌtʌlel tsaʼ bʌ c pʌsbeyob?» (Números 14:11).
6 Jehová tsiʼ yʌlʌ chaʼan jiñi israelitajob maʼañobic i ñopoñel, jin chaʼan tsiʼ chaʼleyob bʌqʼuen. Jiñi lac ñopoñel yicʼot jiñi lac chʼejlel lajal ñuc i cʼʌjñibal. Jin chaʼan jiñi apóstol Juan tiʼ tsʼijbube jiñi congregación tac: «Jiñʌch i tʼuchtʌntel pañimil cheʼ mi lac ñop Dios» (1 Juan 5:4). Ti ili ora, jiñi i testigojonbʌla Jehová an lac pʌsʌ lac ñopoñel cheʼ bajcheʼ i chaʼan Josué yicʼot Caleb, jin chaʼan an mejli lac sub jiñi wen tʼan chaʼan i Yumʌntel Dios i mach yʌlʌyic mi xcolelontola o ñoxoñixla, mi pʼʌtʌlonla o cʼuñonla. Maʼañic mi juntiquilic laj contra muʼ bʌ mejlel i ñʌchʼchocoñonla (Romanos 8:31).
Laʼ lac sʌclan ñuc tac bʌ i cʼʌjñibal
it-1 740
Jiñi lum tsaʼ bʌ i yʌqʼue Dios jiñi israelitajob
JIÑI lum tsaʼ bʌ i yʌqʼue Dios jiñi israelitajob jiñʌch wem bʌ lum. Cheʼ bʌ Moisés tsiʼ choco majlel jiñi 12 wiñicob chaʼan miʼ qʼuelob jiñi Lum tsaʼ bʌ wʌn subentiyob yicʼot chaʼan miʼ chʼʌmob tilel jiñi i wut pʌcʼʌbʌl tac, jiñi wiñicob tsiʼ chʼʌmʌyob sujtel higo, granada yicʼot junpajl tsʼusub wen colem bʌ. Come wen al jiñi tsaʼ bʌ i chʼʌmʌyob sujtel, wersa chaʼtiquil wiñicob tsiʼ qʼuecheyob majlel ti juntsʼijt teʼ. Anquese tsiʼ chaʼleyob bʌqʼuen come maʼañobic i ñopoñel Dios, tsaʼʌch i yʌlʌyob chaʼan jiñi lum «miʼ yʌcʼ leche, yicʼot chab» (Nm. 13:23, 27.)
29 I CHAʼAN MARZO- 4 I CHAʼAN ABRIL
ÑUC TAC BɅ I CʼɅJÑIBAL TI BIBLIA | NÚMEROS 15, 16
«Cʌntan a bʌ chaʼan maʼañic maʼ chañʼesan a bʌ»
w11 15/9 27 párr. 12
¿I cʌñʌyon ba Jehová?
12 Cheʼ woliyobix ti xʌmbal jiñi israelitajob chaʼan miʼ cʼotelob ti jiñi Lum tsaʼ bʌ wʌn subentiyob, Coré tsiʼ poj ñaʼta chaʼan mach weñic bajcheʼ woliʼ cʌntʌntel majlel jiñi israelitajob. Jin chaʼan, Coré yicʼot 250 wiñicob ñucoʼ bʌ i yeʼtel ti jiñi tejclum, an chuqui tsiʼ ñopo i qʼuextañob. Tsiʼ poj ñaʼtayob chaʼan Jehová an yicʼotob, jin chaʼan tsiʼ contrajiyob Moisés. Tiʼ subeyob Moisés yicʼot Aarón: «Jasʌlix chuqui woli laʼ mel [...]. Come laj chʼujulonla ti Israel. Junlajalonla. Baqui jach añonla yaʼan lac Yum la quicʼot» (Nm. 16:1-3). ¡Tsiʼ wen chanʼesayob i bʌ! Moisés cojach tsiʼ yʌlʌ: «Mi caj i tsictesan lac Yum [Jehová] majqui i chaʼañoʼ bʌ» (pejcan Números 16:4, 5). Cheʼ tiʼ yijcʼʌlel, Coré yicʼot jiñi tsaʼ bʌ i coltayob tsaʼ chʌmiyob (Nm. 16:31-35).
w11 15/9 27 párr. 11
¿I cʌñʌyon ba Jehová?
11 Jehová mach lajalic tsiʼ qʼuele Moisés yicʼot Coré. ¿Chucoch? Come mach lajalic tsiʼ pʌsʌyob i melbal ti jiñi mandar tac tsaʼ bʌ i waʼchoco Jehová. Laʼ laj qʼuel jiñi tsaʼ tac bʌ i ñusa Coré, juntiquil levita am bʌ ti jiñi familia i chaʼan Cohat. Cabʌlʌch chuqui wem bʌ tsiʼ mele o tsiʼ taja i qʼuel. Jumpʼejl ejemplo, tajol tsiʼ qʼuele cheʼ bʌ jiñi tejclum Israel tsaʼ cʼaxi yaʼ ti Chʌchʌc bʌ mar, tsiʼ yʌcʼʌ i coltaya cheʼ bʌ Jehová tsiʼ yʌcʼʌ tiʼ tsʌnsʌntel pejtelel jiñi tsaʼ bʌ i ñusʌbeyob i tʼan yaʼ ti wits i cʼabaʼ Sinaí yicʼot tsiʼ chaʼle coltaya chaʼan miʼ chʼʌjmel majlel jiñi arca chaʼan trato (Éx. 32:26-29; Nm. 3:30, 31, TNM). Xucʼulʌch tsaʼ ajñi tiʼ tojlel Jehová ti cabʌl jab, jin chaʼan an cabʌl israelitajob tsaʼ bʌ caji i qʼuelob ti ñuc.
Laʼ lac sʌclan ñuc tac bʌ i cʼʌjñibal
w98 1/9 20 párr. 1, 2
Acʼʌ ti ñaxan jiñi ñuc bʌ i cʼʌjñibal
Jehová tsiʼ qʼuele chaʼan mach tojic cheʼ bʌ jiñi wiñic woliʼ lot i siʼ ti sábado. Jiñi Biblia miʼ yʌl: «Lac Yum tsiʼ sube Moisés: Wersa miʼ tsʌnsʌntel jini winic» (Números 15:35). ¿Chucoch tsiʼ qʼuele Jehová chaʼan mach weñic jiñi tsaʼ bʌ i mele jiñi wiñic?
Jiñi tejclum an i chaʼañob 6 qʼuin chaʼan miʼ lotob i siʼ yicʼot chaʼan miʼ sʌclañob chuqui i cʼʌjñibal bʌ i chaʼañob bajcheʼ jiñi i bʌlob i ñʌcʼ, i pislelob yicʼot chuqui miʼ cʼʌñob chaʼan miʼ qʼuixñesañob i bʌ. Pero jiñi sábado cojach yom miʼ cʼʌjñel chaʼan miʼ chʼujutesʌntel Jehová. Maʼañic i wocolel cheʼ an majqui miʼ lot i siʼ, pero mach yomic miʼ mel cheʼ bʌ i qʼuiñilel yom miʼ chʼujutesʌntel Jehová. Anquese ili ora jiñi xñoptʼañonbʌla mach chuculoñixla tiʼ Mandar Moisés, ¿mach ba muqʼuic i cʌntesañonla jiñi tsaʼ bʌ ujti tiʼ tojlel jiñi wiñic chaʼan ñuc i cʼʌjñibal cheʼ bʌ mi lac ñaʼtan baqui bʌ jiñi ñaxam bʌ yom mi la cʌcʼ ti la cuxtʌlel? (Filipenses 1:10, TNM).
5-11 I CHAʼAN ABRIL
ÑUC TAC BɅ I CʼɅJÑIBAL TI BIBLIA | NÚMEROS 17-19
«Joñon laʼ chaʼañon»
w11 15/9 13 párr. 9
¿Woli ba laj qʼuel Jehová bajcheʼ lac majtan?
9 Laʼ lac chaʼ al tiʼ tojlel jiñi tribu Leví. Maʼañic tsaʼ aqʼuentiyob lum. Jiñi i yeʼtelob jiñʌch cheʼ miʼ chaʼleñob eʼtel yaʼ ti yotot Jehová, pero yujilobʌch chaʼan mucʼʌch caj i cʌntʌntelob come Jehová tiʼ subeyob: «Joñon laʼ chaʼañon. Muqʼuix laʼ taj i tijicñʌyel laʼ pusicʼal tic tojlel» (Nm. 18:20). Anquese ili ora, maʼañix mi lac melben i yeʼtel Jehová ti jumpʼejl templo, yomʌch mi lac lajibeñob i melbal jiñi sacerdotejob yicʼot jiñi levitajob, i yom mi lac ñop chaʼan Jehová mi caj i yʌqʼueñonla jiñi i cʼʌjñibal bʌ lac chaʼan. Cheʼ wolix i lʌcʼtiyel tilel jiñi i jilibal, jiñi lac ñopoñel jiñʌch ñumen ñuc bʌ i cʼʌjñibal (Ap. 13:17).
w11 15/9 7 párr. 4
Jehová jiñʌch lac majtan
4 Jiñi Levitajob maʼañic tsaʼ aqʼuentiyob jumpʼejlic lum come «jini eʼtel ti motomaj [sacerdote] jiñʌch tsaʼ bʌ aqʼuentiyob ti lac Yum» (Jos. 18:7). Jin chaʼan Jehová tsiʼ yʌlʌ ti Números 18:20: «Joñon laʼ chaʼañon». ¿Yom ba i yʌl ili chaʼan jiñi levitajob yom miʼ ñusañob pʼumpʼuñiyel come maʼañobic i lum? Maʼañic (pejcan Números 18:19, 21, 24). Come jiñi levitajob miʼ chaʼleñob ‹eʼtel› yaʼ ti tabernáculo miʼ chʼʌmob ‹pejtelel jini diezmo tac muʼ bʌ i chʼʌmob cʼotel jini israelob›, yom bʌ i yʌl, jiñi i diezmojlel jiñi i pʌcʼʌbob yicʼot jiñi añimal tac muʼ bʌ i yilan pañimil. I ti jiñi majtañʌl muʼ bʌ i yʌqʼuentelob jiñi levitajob, yom miʼ locʼsʌbeñob jaʼel jiñi i diezmojlel chaʼan miʼ yʌqʼueñob jiñi sacerdotejob i jiñʌch ñumen wem bʌ yom miʼ yʌqʼueñob (Nm. 18:25-29). Jiñi sacerdotejob miʼ chʼʌmob jaʼel «pejtelel jini chʼujul tac bʌ majtañʌl» muʼ bʌ i chʼʌmob cʼotel jiñi israelitajob yaʼ ti tabernáculo. Jin chaʼan, jiñi sacerdotejob yujilob chaʼan Jehová miʼ caj i yʌqʼueñob pejtelel i cʼʌjñibal bʌ i chaʼañob.
Laʼ lac sʌclan ñuc tac bʌ i cʼʌjñibal
g02 8/6 14 párr. 2
Jiñi atsʼam wen ñuc i cʼʌjñibal
Ti wajali, jiñi atsʼam tsaʼ cʼʌjñibʌyi chaʼan miʼ yʌjqʼuel ti ñaʼtʌntel chaʼan an chuqui maʼañic mi caj i jejmel. Jin chaʼan, yaʼ ti Biblia, cheʼ bʌ miʼ mejlel jumpʼejl trato muʼ bʌ i jalijel tiʼ pejtelel ora miʼ subentel bajcheʼ «jumpʼejl trato ti atsʼam». I chaʼan miʼ waʼchocontel jiñi trato yom miʼ cʼuxob jiñi i bʌl i ñʌcʼ yicʼot atsʼam (Números 18:19, TNM). Yaʼ tiʼ Mandar Moisés, jiñi majtañʌl tac muʼ bʌ i yʌjqʼuel yaʼ ti pulʌntib yom miʼ yotsʌbentel atsʼam chaʼan miʼ yʌjqʼuel ti ñaʼtʌntel chaʼan sʌcʌch jiñi majtañʌl.
12-18 I CHAʼAN ABRIL
ÑUC TAC BɅ I CʼɅJÑIBAL TI BIBLIA | NÚMEROS 20, 21
«Laʼ lac pʌs la cutslel cheʼ bʌ miʼ yujtel wocol»
Laʼ lac pʌs la cutslel yicʼot chaʼan utsʼat miʼ qʼuelonla Jehová
19 Come maʼañic mi caj lac wen mel chuqui mach weñic. Laʼ lac chaʼ ñaʼtan tiʼ tojlel Moisés. Cabʌl jab tsiʼ pʌsʌ i yutslel yicʼot wen tsaʼ qʼuejli ti Jehová. Pero cheʼ muqʼuix caj i jilel jiñi 40 jab i xʌñob yaʼ ti tiquin bʌ lum, maʼañic tsiʼ pʌsʌ i yutslel. Jiñi i chich, tajol tsaʼ bʌ i coltʌbe i cuxtʌlel yaʼ ti Egipto, maxto wen jalic i chʌmel i tsaʼ mujqui yaʼ ti Qadés. Cheʼ jiñi, jiñi israelob tsaʼ chaʼ cajiyob ti wulwul tʼan chaʼan maʼañic chuqui añob i chaʼan. Jiñi Biblia miʼ yʌl chaʼan «tsaʼ cajiyob ti aʼleya» tiʼ contra Moisés tiʼ caj jaʼ. Anquese Jehová tsiʼ cʼʌñʌ Moisés chaʼan miʼ mel milagro tac i añix cabʌl jab i caj i coltañob, tsiʼ bej chanʼesayob i bʌ. I tsiʼ yʌlʌyob mach tac bʌ weñic tiʼ tojlel Moisés, cheʼ bajcheʼ jin i mul yubil cheʼ maʼañic jaʼ (Nm. 20:1-5, 9-11).
Laʼ lac pʌs la cutslel yicʼot chaʼan utsʼat miʼ qʼuelonla Jehová
20 Jiñi wocol tsiʼ yʌcʼʌ chaʼan miʼ wen michʼan Moisés. Maʼañic tsiʼ pʌsʌ i ñopoñel (chʼujbiya) come maʼañic tsiʼ pejca jiñi xajlel cheʼ bajcheʼ tsaʼ subenti ti Jehová, wen michʼ tsiʼ pejca jiñi israelob i tiʼ subeyob chaʼan jin mi caj i mel jumpʼejl milagro. Jin chaʼan, chaʼyajl tsiʼ jatsʼʌ jiñi xajlel i tsaʼ loqʼui cabʌl jaʼ. Tsiʼ mele mach bʌ weñic come tsiʼ chanʼesa i bʌ yicʼot tsaʼ wen michʼa (Sal. 106:32, 33). Come tsiʼ jumucʼ sʌtʌ i yutslel, Jehová maʼañix tsiʼ yʌcʼʌ ochel ti jiñi Lum tsaʼ bʌ wʌn subentiyob (Nm. 20:12).
21 ¿Chuqui tac miʼ cʌntesañonla jiñi tsaʼ bʌ ujti tiʼ tojlel Moisés? Ñaxam bʌ, chaʼan yom mi lac chaʼlen wersa chaʼan mi lac bej pʌs la cutslel. Mi maʼañic mi laj cʌntan lac bʌ, ti orajach miʼ mejlel lac chanʼesan lac bʌ i jiñʌch muʼ bʌ i yʌqʼueñonla la cʌl yicʼot lac mel mach bʌ weñic. I chaʼpʼejlel, jiñi cʌlʌx pensar miʼ mejlel i cʼuñʼesañonla, jin chaʼan yom mi lac pʌs la cutslel anquese woli lac ñusan tsʌts bʌ wocol tac.
¿Woli ba a wʌcʼ a wut tiʼ tojlel Jehová?
12 Tajol anto yambʌ chucoch tsaʼ michʼa Jehová yicʼot Moisés yicʼot Aarón. Laʼ laj qʼuel chuqui tiʼ sube Moisés jiñi israelob: «Wʌle mi caj c locʼsʌbeñetla jaʼ ila ti colem xajlel». Cheʼ bʌ tsaʼ yʌlʌ mic «locʼsʌbeñetla», miʼ mejlel i yʌcʼ ti ñaʼtʌntel Moisés yicʼot Aarón. Jiñi i tʼan tsiʼ pʌsʌ chaʼan maʼañic tsiʼ qʼuele ti ñuc Jehová, come jiñʌch tsaʼ bʌ i mele jiñi milagro. Ili cheʼʌch miʼ yʌcʼ ti ñaʼtʌntel muʼ bʌ i yʌl jiñi Salmo 106:32, 33, TNM: «Tsiʼ techbeyob i michʼajel ti jiñi jaʼ i chaʼan Meribá, i mach weñic tsaʼ ujti Moisés tiʼ cajob. Tsiʼ michʼesayob, i maʼañic tsiʼ cʌnta chuqui tsiʼ yʌlʌ» (Nm. 27:14). Jiñi tsaʼ bʌ i mele Moisés maʼañic tsaʼ yʌqʼue i ñuclel Jehová. Tiʼ sube Moisés yicʼot Aarón: «Tsaʼ laʼ ñusʌbeyon c tʼan» (Nm. 20:24). Tiʼ sujm, tsiʼ meleyob wen tsʌts bʌ mulil.
13 Moisés yicʼot Aarón jiñʌch añoʼ bʌ tiʼ wenta jiñi i tejclum Dios, jin chaʼan wen ñucobʌch i yeʼtel (troñel) (Lc. 12:48). Ti ñaxan, Jehová maʼañic tsaʼ yʌcʼʌyob ochel junmojt i pʼolbal jiñi Israelob yaʼ ti Canaán come tsiʼ ñusʌbeyob i tʼan (Nm. 14:26-30, 34). Jin chaʼan cheʼʌch yom miʼ melbentel Moisés jaʼel cheʼ tsiʼ ñusatʼan: Maʼañic miʼ caj i yochel yaʼ ti Lum tsaʼ bʌ wʌn Subentiyob.
Laʼ lac sʌclan ñuc tac bʌ i cʼʌjñibal
w14 15/6 26 párr. 12
¿Cheʼ ba mi laj qʼuel jiñi muʼ bʌ i tajob i cʼunlel cheʼ bajcheʼ miʼ qʼuel Jehová?
12 Cheʼ yomic Jehová, orajach tsiʼ yʌqʼue i toj i mul Aarón chaʼan tiʼ pejtelel jiñi tsaʼ bʌ i mele. Anquese Aarón tsiʼ mele mach tac bʌ weñic, Jehová tsiʼ qʼuele chaʼan mach jontolic. Tajol tsiʼ mele mach bʌ weñic tiʼ caj jiñi wocol woli bʌ i yujtel o tiʼ caj jiñi yambʌlob tsiʼ xiqʼuiyob i mel. Pero cheʼ bʌ tsaʼ subenti chaʼan mach weñic tsaʼ bʌ i mele, orajach tsiʼ yʌlʌ chaʼan machʌch weñic, i tsiʼ mele chuqui yom bʌ Jehová (Éx. 32:26; Nm. 12:11; 20:23-27). Jehová mach yaʼic tsiʼ xucʼchoco i pensar ti jiñi mulil tsaʼ bʌ i mele Aarón, tsaʼʌch i qʼuelbe i ñopoñel yicʼot chaʼan tsaʼʌch i cʌyʌ i mul. Cheʼ wen ñumeñix cabʌl jab, tsaʼto bej ajli chaʼan Aarón yicʼot i pʼolbal tsiʼ bʌcʼñayob Dios (Sal. 115:10-12; 135:19, 20).
19-25 I CHAʼAN ABRIL
ÑUC TAC BɅ I CʼɅJÑIBAL TI BIBLIA | NÚMEROS 22-24
«Jehová miʼ sujtesan jiñi wocol ti jumpʼejl bendición»
bt 53 párr. 5
«Tsaʼ caji i suben jini wen tʼan chaʼan Jesús»
5 Cʼʌlʌl ili ora jiñi laj contrajob maʼañic an mejli i mʌctañob jiñi subtʼan. Anquese miʼ yotsʌntelob ti cárcel jiñi xñoptʼañob o miʼ chojquelob loqʼuel ti jumpʼejl tejclum, an jach i coltayob chaʼan miʼ ñumen sujbel jiñi wen tʼan. Jumpʼejl ejemplo, ti jiñi Segunda Guerra Mundial jiñi hermanojob tsiʼ wen chaʼleyob subtʼan yaʼ ti campo i chaʼan nazijob. Juntiquil judío tsaʼ bʌ i cʌñʌ jiñi i sujmlel tiʼ campo nazijob, tsiʼ yʌlʌ: «Jiñi i chʼejlel jiñi i testigojob Jehová yaʼ ti cárcel tsiʼ pʌsbeyon chaʼan jiñi muʼ bʌ i ñopob loqʼuemʌch ti Biblia, jin chaʼan tsaʼ sujtiyon ti testigo jaʼel».
it-2 250
Tontojlel
Tonto jax cheʼ mi laj contrajin Jehová. Jiñi xʼaltʼan Balaam tsiʼ pʌsʌ i tontojlel cheʼ bʌ tsiʼ ñopo i chʼʌc jiñi israelitajob come yom chaʼan Balac, jiñi rey chaʼan Moab, miʼ yʌqʼuen taqʼuin. Pero Jehová maʼañic tsiʼ yʌcʼʌ chaʼan miʼ mel. Jiñi apóstol Pedro tiʼ tsʼijbu iliyi tiʼ tojlel Balaam: «Jini burro mach bʌ yujilic tʼan tsaʼ caji ti tʼan cheʼ bajcheʼ winic. Tsiʼ ticʼbe i tontojlel jini xʼaltʼan». Chaʼan miʼ taj ti tʼan jiñi i tontojlel Balaam, jiñi apóstol Pedro tsiʼ cʼʌñʌ jiñi tʼan am bʌ ti griego muʼ bʌ i yʌjlel bajcheʼ pa·ra·fro·ní·a, muʼ bʌ i yʌcʼ ti ñaʼtʌntel chaʼan «maʼañic miʼ ñaʼtan pañimil» (2 P. 2:15, 16; Nm. 22:26-31.)
Laʼ lac sʌclan ñuc tac bʌ i cʼʌjñibal
w04 1/8 27 párr. 2
Ñuc tac bʌ cʌntesʌntel am bʌ ti Números
22:20-22. ¿Chucoch Jehová tsaʼ wen michʼa yicʼot Balaam? Jehová tiʼ sube jiñi xʼaltʼan Balaam chaʼan mach yomic miʼ chʼʌc jiñi israelitajob (Números 22:12). Pero Balaam maʼañic tsiʼ jacʼʌ tʼan, i tsaʼ majli yicʼot jiñi i wiñicob Balac come yom chaʼan jiñi rey Moab wen miʼ qʼuel yicʼot miʼ yʌqʼuen taqʼuin (2 Pedro 2:15, 16; Judas 11). Anquese Jehová tsiʼ wersa xiqʼui Balaam chaʼan miʼ chaʼlen ti bendecir jiñi israelitajob, Balaam tsiʼ sube jiñi rey Balac chaʼan miʼ choc majlel xʼixicob chaʼan miʼ subeñob i mel tsʼiʼlel jiñi israelitajob come yom chaʼan wen miʼ qʼuejlel ti jiñi rey (Números 31:15, 16). Come tsiʼ wen mulaj taqʼuin, jin chaʼan Jehová tsaʼ wen michʼa yicʼot Balaam.
26 I CHAʼAN ABRIL- 2 I CHAʼAN MAYO
ÑUC TAC BɅ I CʼɅJÑIBAL TI BIBLIA | NÚMEROS 25, 26
«¿Mejl ba i pʌs juntiquil chaʼan mach lajalic bajcheʼ jiñi muʼ bʌ i melob mach tac bʌ weñic?»
«Putsʼtanla tsʼiʼlel»
JIÑI xchuc chʌy miʼ majlel ti lucbʌl yaʼ baqui ñʌmʌl i chuc jiñi chʌy muʼ bʌ i mulan. Miʼ wen yajcan chuqui ti weʼel mi caj i cʼʌn, cheʼ jiñi miʼ choc ochel i lucojib yaʼ ti jaʼ. Cheʼ bʌ miʼ qʼuel chaʼan jiñi chʌy wolix (choncolix) i tujcʼan jiñi lucojib, ti ora jach miʼ tujcʼan loqʼuel chaʼan miʼ chuc jiñi chʌy. Tiʼ tijicñʌyel miʼ suben i bʌ chaʼan weñʌch tsiʼ yajcʌbe i weʼel jiñi chʌy.
2 Cheʼ ti jabil 1473 cheʼ bʌ maxto tilem Cristo, an juntiquil wiñic tsaʼ bʌ i wen yajca jaʼel jiñi weʼelʌl pero mach chaʼañic miʼ chuc chʌy. I cʼabaʼ Balaam, yom tsiʼ yʌlʌ chaʼan jiñi i tejclum Dios, yaʼ bʌ jijlemob ti jiñi joctʌl i cʼabaʼ Moab lʌcʼʌl bʌ an ti jiñi Lum tsaʼ bʌ wʌn Subentiyob, miʼ yajlelob jaʼel ti jiñi yac. Anquese tsiʼ ñaʼta ochel ti xʼaltʼan i chaʼan Jehová, pero jiñʌch juntiquil xlot tsaʼ bʌ i wen mulaj chuqui yom tiʼ bajñelil i tsaʼ bʌ tojle chaʼan miʼ pʼaj jiñi israelob. Balaam chʼijiyem tsiʼ yubi i bʌ, come Jehová tsiʼ mʌcta yicʼot tsiʼ sube chaʼan yom miʼ yʌqʼuen i bendición jiñi israelob. Pero maʼañic tsiʼ jacʼʌ come tsiʼ ñaʼta i tojol tsaʼ bʌ subenti. Tsiʼ ñaʼta chaʼan mi tsiʼ yʌcʼʌyob ti yajlel ti tsʌts bʌ mulil, Dios mi caj i cʌyob. ¿Chuqui ti yac tsiʼ cʼʌñʌ? Jiñi lecax bʌ xchʼocob yaʼ ti Moab (Números 22:1-7; 31:15, 16; Apocalipsis 2:14).
«Putsʼtanla tsʼiʼlel»
4 ¿Chucoch tsaʼ ujti bajcheʼ jiñi? Tiʼ caj chaʼan bajcheʼ añob i pusicʼal cabʌl israelob. Mach weñic chuqui tsaʼ caji i melob cheʼ bʌ tsiʼ ñajtʼesayob i bʌ ti Jehová, tsaʼ ñajʌyi i chaʼañob bajcheʼ tsaʼ coltʌntiyob loqʼuel ti Egipto, cheʼ tsaʼ aqʼuentiyob i bʌl i ñʌcʼ yaʼ tiʼ tiquiñal lum i maʼañic chuqui tsiʼ chaʼleyob cʼʌlʌl cheʼ bʌ tsaʼ cʼotiyob ti jiñi Lum tsaʼ bʌ wʌn Subentiyob (Hebreos 3:12). Jiñi apóstol Pablo wen cʼajal i chaʼan jiñi cheʼ bʌ tiʼ tsʼijbu ili tʼan: «Mach yomic mi laʼ chaʼlen tsʼiʼlel cheʼ bajcheʼ tsiʼ chaʼleyob lamital. Tsaʼ chʌmiyob uxpʼejl i chaʼcʼal ti mil [23,000] ti jumpʼejl jach qʼuin» (1 Corintios 10:8).
Laʼ lac sʌclan ñuc tac bʌ i cʼʌjñibal
it-2 238 párr. 1, 2
Yaʼ baqui jaxʌl jiñi lum
Chaʼan miʼ ñaʼtʌntel bajcheʼ yilal yom miʼ tʼoxbentelob jiñi lum jiñi israelitajob, tsiʼ chaʼleyob yajcaya ti alas yicʼot tsaʼ qʼuejli bajcheʼ cʼamel i yonlelob. Ti jiñi yajcaya ti alas tsaʼ ñaʼtʌnti baqui bʌ lum mi caj i chʼʌmob jiñi tribu tac, mi ti norte, mi ti sur, mi ti este o mi ti oeste, miʼ yaʼ tiʼ tʼejl mar o yaʼ baqui an cabʌl bujtʌl. Jehová tsiʼ cʼʌñʌ jiñi yajcaya ti alas chaʼan miʼ yajcan baqui bʌ lum mi caj i chʼʌmob jujumpʼejl tribu, jin chaʼan maʼañic tsaʼ michʼayob jiñi israelitajob yicʼot maʼañic tsiʼ techeyob leto (Pr. 16:33). I ti jiñi yajcaya ti alas, Dios tsaʼ mejli i qʼuel chaʼan jiñi lum muʼ bʌ caj i chʼʌm jujumpʼejl tribu jiñʌch tsaʼ bʌ i yʌlʌ Jacob cheʼ bʌ wolix i chʌmel, i muʼ bʌ lac taj Génesis 49:1-33.
Cheʼ bʌ ti jiñi yajcaya alas tsaʼix ñaʼtʌnti baqui an i tojel jiñi lum muʼ bʌ caj i chʼʌm jujumpʼejl tribu, yom miʼ ñaʼtʌntel bajcheʼ yilal i colemlel jiñi tribu tac chaʼan miʼ ñaʼtʌntel baqui jaxʌl i lum miʼ cajel jiñi israelitajob come Jehová tsiʼ yʌlʌ: «Yom mi laʼ tʼoxben laʼ bʌ jini lum muʼ bʌ caj laʼ taj. Yom mi laʼ chaʼlen yajcaya ti alas chaʼan miʼ tsictiyel majqui i yum ti pejt ti pejt. Jini cabʌloʼ bʌ, ñuc yom miʼ yʌqʼuentelob i lum. Jini mach bʌ cabʌlobic, i pʼisol jach miʼ yʌqʼuentelob i lum. Yaʼ baʼ mi caj laʼ taj laʼ lum, mi caj laʼ chumtʌl ti mojt ti mojt cheʼ bajcheʼ jaymojt añetla» (Nm. 33:54). Anquese miʼ mejlel i qʼuextʌbentel bajcheʼ cʼamel i colemlel jiñi lum muʼ bʌ caj i chʼʌm jujumpʼejl tribu, maʼañic miʼ qʼuextʌyel baqui an i tojel jiñi lum tsaʼ bʌ i tajayob ti jiñi yajcaya alas. Jin chaʼan, cheʼ bʌ tsaʼ qʼuejli chaʼan colem jiñi lum tsaʼ bʌ i taja jiñi i tribu Judá, tsaʼ tsʼitaʼ chilbenti chaʼan miʼ yʌqʼuentel jiñi i tribu Simeón (Jos. 19:9).