¿Bajcheʼ miʼ mejlel lac lʌcʼtesan lac bʌ ti Dios?
Dios mach cojach an i pʼʌtʌlel, añʌch wen utsʼatax bʌ i melbal (chaʼlibal) jaʼel. Come yom chaʼan mi laj cʌn yicʼot mi lac sujtel tiʼ yamigo, an cabʌl chuqui an i subeyonla tiʼ tojlel (Juan 17:3; Santiago 4:8).
Dios an i cʼabaʼ
«Laʼ i cʌñob chaʼan a cʼabaʼ jiñʌch Jehová, come jatet jach jiñi Cʼax ñuquet bʌ tiʼ pejtelel Pañimil» (SALMO 83:18, TNM).
Jiñi Biblia miʼ yʌl chaʼan Jehová jiñʌch jiñi cojach bʌ i sujm bʌ Dios i chaʼan jiñʌch tsiʼ mele (pʌtʌ) pejtelel chuqui an. Jin chaʼan cojach jin yom mi lac chʼujutesan (Apocalipsis 4:11).
Jehová juntiquil Dios cʼuxbiyajʌch bʌ
«Dios cʼuxbiyajʌch» (1 JUAN 4:8).
Jehová miʼ cʼʌn jiñi Biblia yicʼot pejtelel chuqui an i mele chaʼan miʼ cʌntesañonla bajcheʼ yilal i melbal. I junchajp muʼ bʌ lac ñumen taj laj qʼuel jiñʌch i cʼuxbiya come yicʼotʌch i cʼuxbiya miʼ mel tiʼ pejtelel. Cheʼ bʌ mi lac ñumen cʌn Jehová ñumento miʼ cʼotel laj cʼuxbin.
Jehová miʼ ñusan lac mul
«A wujil i ñusʌntel mulil» (NEHEMÍAS 9:17).
Jehová yujil chaʼan xmulilonla, jin chaʼan mucʼʌch i ñusan lac mul. Mi tsaʼ laj cʼajtibe chaʼan miʼ ñusʌbeñonla i mi lac chaʼlen wersa chaʼan maʼañix mi lac chaʼ mel jiñi mach bʌ añic miʼ mulan, mi caj i ñusʌbeñonla i maʼañic mi caj i yʌqʼueñonla lac toj lac mul (Salmo 103:12, 13).
Jehová yom chaʼan mi lac pejcan ti oración
«Lʌcʼʌl an lac Yum tiʼ tojlel pejtel muʼ bʌ i pejcañob tiʼ pejtelel i pusicʼal. Miʼ yubibeñob i tʼan cheʼ miʼ pejcañob» (SALMO 145:18, 19).
Jehová mach yomic cheʼ mi lac mel leco tac jax bʌ qʼuiñijel o cheʼ mi laj cʼʌn imagen o yan tac bʌ chaʼan mi lac chʼujutesan. Mucʼʌch i ñʌchʼtan la coración lajal bajcheʼ juntiquil tatʌl muʼ bʌ i wen cʼuxbin i yalobil miʼ ñʌchʼtan chuqui miʼ yʌl.