CɅNTESɅNTEL 28
Pʌsʌ chaʼan maʼ qʼuel ti ñuc tsaʼ bʌ i mele Jehová yicʼot Jesús ti a tojlel
¿Bajcheʼ yubil maʼ wubin a bʌ cheʼ bʌ juntiquil a wamigo miʼ yʌqʼueñet jumpʼejl utsʼatax bʌ majtañʌl? Tajol tijicña maʼ wen ubin a bʌ i a wom a pʌsben jiñi a wamigo chaʼan maʼ qʼuel ti ñuc jiñi majtañʌl. Jehová yicʼot Jesús tsiʼ yʌqʼueyonla jumpʼejl ñuc bʌ lac majtan: Jiñʌch i tojol laj coltʌntel. Laʼ laj qʼuel bajcheʼ miʼ mejlel lac pʌs chaʼan mi laj qʼuel ti ñuc jiñi tsaʼ bʌ i meleyob.
1. ¿Bajcheʼ mi lac pʌs chaʼan mi laj qʼuel ti ñuc tsaʼ bʌ i mele Dios yicʼot Cristo ti lac tojlel?
Jiñi Biblia miʼ yʌl chaʼan jiñi «muʼ bʌ i pʌs chaʼan miʼ ñop tiʼ tojlel [Jesús]» miʼ mejlel ti chumtʌl tiʼ pejtelel ora (Juan 3:16). ¿Bajcheʼ mi lac pʌs chaʼan mucʼʌch lac ñop Jesús? Mach cojach yom mi la cʌl chaʼan mucʼʌch lac ñop Jesús, yom mi lac pʌs ti chuqui mi lac mel jaʼel (Santiago 2:17). Cheʼ mi lac pʌs ti lac melbal (chaʼlibal) yicʼot ti lac tʼan chaʼan mucʼʌch lac ñop, Jehová yicʼot Jesús miʼ sujtelob ti wem bʌ la camigojob (pejcan Juan 14:21).
2. ¿Baqui ora miʼ mejlel lac pʌsben Jehová yicʼot Jesús chaʼan mi laj qʼuel ti ñuc tsaʼ bʌ i meleyob?
Cheʼ bʌ jumpʼejl jachix acʼʌlel yom chaʼan miʼ chʌmel (sajtel) Jesús, tiʼ pʌsbe jiñi xcʌntʼañob i chaʼan yambʌ bajcheʼ miʼ mejlel i pʌsob chaʼan miʼ qʼuelob ti ñuc jiñi i cuxtʌlel muʼ bʌ caj i yʌcʼ. Tsiʼ yʌlʌ chaʼan yom miʼ mejlel «jiñi i Cena lac Yum», muʼ bʌ i cʌjñel jaʼel bajcheʼ i Cʼajtesʌntel i chʌmel Cristo (1 Corintios 11:20). Jesús tsiʼ mele jiñi chaʼan jiñi i yapóstolob yicʼot pejtelel jiñi i sujm bʌ xñoptʼañob miʼ chʌn cʼajtesañob jiñi i cuxtʌlel tsaʼ bʌ i yʌcʼʌ. Jesús tsiʼ yʌlʌ: «Chʌn melela iliyi chaʼan mi laʼ cʼajtesañon» (Lucas 22:19). Cheʼ bʌ maʼ cʼotel tiʼ Cʼajtesʌntel i chʌmel Jesús, maʼ pʌs chaʼan maʼ qʼuel ti ñuc bajcheʼ Jehová yicʼot Jesús tsiʼ pʌsbeyetob i cʼuxbiya.
LAʼ LAC ÑUMEN ÑAʼTAN
Laʼ laj qʼuel bajcheʼ tac yambʌ miʼ mejlel a pʌs chaʼan maʼ qʼuel ti ñuc jiñi ñuc bʌ i cʼuxbiya Jehová yicʼot Jesús. I mi caj laj qʼuel chucoch ñuc i cʼʌjñibal cheʼ mi laj cʼajtesan i chʌmel Cristo.
3. Cheʼ bʌ an chuqui mi laj qʼuel ti ñuc an chuqui mi lac mel
Laʼcu lac ñaʼtan chaʼan woli (choncol) a sujpʼel ti jaʼ i an majqui miʼ cʼotel i coltañet. ¿Muʼ ba caj i ñajʌyel a chaʼan jiñi tsaʼ bʌ i mele ti a tojlel? ¿O mi caj a ñaʼtan bajcheʼ miʼ mejlel a pʌsben chaʼan maʼ qʼuel ti ñuc jiñi tsaʼ bʌ i mele?
Joñonla an lac bet tiʼ tojlel Jehová come tsiʼ coltayonla. Pejcanla 1 Juan 4:8-10 i tem alʌla iliyi:
¿Chucoch jumpʼejlʌch ñuc bʌ lac majtan jiñi i cuxtʌlel tsaʼ bʌ i yʌcʼʌ Jesús?
¿Bajcheʼ yubil maʼ wubin a bʌ cheʼ a wujil chuqui tsiʼ mele Jehová yicʼot Jesús ti a tojlel?
¿Bajcheʼ miʼ mejlel lac pʌs chaʼan mi laj qʼuel ti ñuc jiñi tsaʼ bʌ i mele Jehová yicʼot Jesús ti lac tojlel? Pejcanla 2 Corintios 5:15 yicʼot 1 Juan 4:11; 5:3. Cheʼ bʌ tsaʼix laʼ pejca jiñi versículo tac, tem alʌla iliyi:
¿Bajcheʼ miʼ mejlel lac pʌs chaʼan mi la cʌqʼuen wocolix i yʌlʌ Jehová yicʼot Jesús?
4. Laʼ lac lajin Jesús
Yambʌ bajcheʼ miʼ mejlel lac pʌs chaʼan mi laj qʼuel ti ñuc tsaʼ bʌ i meleyob jiñʌch cheʼ mi lac lajin Jesús. Pejcanla 1 Pedro 2:21 i tem alʌla iliyi:
¿Bajcheʼ miʼ mejlel a tsajcʌben i melbal Jesús yicʼot a xucʼtʌlel?
Jesús tsiʼ cʼuxbi jiñi i Tʼan Dios, tsiʼ chaʼle subtʼan yicʼot tsiʼ colta jiñi lac piʼʌlob.
5. Mi lon j cʼajtesan cheʼ tsaʼ chʌmi Cristo
Chaʼan mi laʼ ñaʼtan chuqui tsaʼ ujti cheʼ bʌ cojaxto tsaʼ mejli jiñi i Cena lac Yum, pejcanla Lucas 22:14, 19, 20. Cheʼ jiñi tem alʌla iliyi:
¿Chuqui tsaʼ ujti ti jiñi i Cena lac Yum?
¿Chuqui yom i yʌl jiñi pan yicʼot jiñi vino? (Qʼuelela jiñi versículo 19 yicʼot 20).
Jesús yom chaʼan jiñi xcʌntʼañob i chaʼan miʼ melob jiñi i Cena lac Yum junyajl ti jujumpʼejl jab, ti jiñi tsic cheʼ bʌ tsaʼ chʌmi. Jin chaʼan, jiñi i testigojonbʌlon Jehová mic tempan lon c bʌ ti jujumpʼejl jab chaʼan mi lon j cʼajtesan jiñi i chʌmel Cristo, i cheʼ mi lon c mel cheʼ bajcheʼ tsiʼ pʌsʌ. Chaʼan maʼ ñaʼtan bajcheʼ yilal ili tempa bʌ wen ñuc bʌ i cʼʌjñibal, qʼuelela jiñi VIDEO. Cheʼ jiñi tem alʌla iliyi:
¿Chuqui miʼ mejlel ti jiñi tempa bʌ chaʼan i Cʼajtesʌntel i chʌmel Cristo?
Jiñi pan yicʼot jiñi vino an chuqui yom i yʌl. Jiñi pan yom i yʌl jiñi toj bʌ i bʌcʼtal Jesús tsaʼ bʌ i yʌcʼʌ chaʼañonla. I jiñi vino yom i yʌl jiñi i chʼichʼel.
AN MUʼ BɅ I YɅLOB: «Chaʼan maʼ taj a coltʌntel jasʌl yom maʼ ñop Jesús».
¿Bajcheʼ miʼ mejlel a cʼʌn Juan 3:16 yicʼot Santiago 2:17 chaʼan maʼ tsictesan chaʼan añʌch chuqui tac yambʌ yom mi lac mel jaʼel?
TSAʼ BɅ LAJ CɅÑɅ
Mi la cʌqʼuen wocolix i yʌlʌ Jesús chaʼan jiñi tsaʼ bʌ i mele cheʼ bʌ mi lac pʌs chaʼan mucʼʌch lac ñop tiʼ tojlel yicʼot cheʼ bʌ mucʼʌch laj cʼotel tiʼ cʼajtesʌntel i chʌmel.
¿Chuqui tsaʼ cʌñʌ?
¿Bajcheʼ mi lac pʌs chaʼan mucʼʌch lac ñop Jesús?
¿A wom baʼ pʌsben Jehová yicʼot Jesús chaʼan maʼ qʼuel ti ñuc jiñi tsaʼ bʌ i meleyob ti a tojlel? ¿Bajcheʼ a wom a mel?
¿Chucoch ñuc i cʼʌjñibal cheʼ maʼ cʼotel ti jiñi tempa bʌ chaʼan i Cʼajtesʌntel i chʌmel Cristo?
CɅÑɅ YAN TAC BɅ
Ñʌchʼtan chuqui miʼ ñijcañonla lac mel cheʼ bʌ tsaʼ chʌmi Cristo.
Jesús tsiʼ yʌqʼue i ñuclel Jehová cheʼ bajcheʼ tsiʼ cʼʌñʌ i bʌcʼtal (9:28)
Ñumen cʌñʌ chaʼan jiñi ñopoñel yicʼot bajcheʼ miʼ mejlel lac pʌs.
Juntiquil xʼixic tsiʼ wen colta tiʼ cuxtʌlel cheʼ bʌ tsiʼ chʼʌmbe i sujm chucoch tsaʼ chʌmi Jesús. Pejcan jiñi tema «Wʌle tijicñayoñix mi cubin c bʌ».
«Jiñi Biblia tsiʼ qʼuextʌbeyob i pensar» (Lac Tsictesʌbentel, 1 i chaʼan agosto, 2011)
Qʼuele chucoch mach cabʌlobic jiñi muʼ bʌ i cʼuxob jiñi pan yicʼot miʼ japob jiñi vino cheʼ tiʼ Cʼajtesʌntel i chʌmel Cristo.