Cʌntesʌntel 10
Bajcheʼ ti tajol i sujmlel bʌ ñopbalʌl
Mi la com cheʼ la camigo Dios, yom mi la cajñel ti jini ñopbalʌl muʼ bʌ i mulan Dios. Jesús tsiʼ yʌlʌ chaʼan jini «xchʼujutesayajob ti isujm» mi caj i chʼujutesañob jini Dios tiʼ «isujm» (Juan 4:23, 24). Junchajp jach toj bʌ tiʼ chʼujutesʌntel jini Dios (Efesios 4:4-6). Jini ñopbalʌl i sujmlel bʌ miʼ pʌyonla majlel baʼan laj cuxtʌlel mach bʌ anic miʼ jilel, i jini mach bʌ i sujmlelic ñopbalʌl miʼ pʌyonla majlel yaʼ ti i jilibal (Mateo 7:13, 14).
Miʼ mejlel lac ñaʼtan baqui bʌ jini isujm bʌ ñopbalʌl, cheʼ mi laj qʼuel jini muʼ bʌ i majlelob yaʼi. Come Jehová weñʌch, jini i sujmlel bʌ xchʼujutesayajob yom chaʼan weñob jaʼel. Lajal bajcheʼ juntejc alaxax wem bʌ, mi yʌcʼ wem bʌ i wut, cheʼ jaʼel i sumjlel bʌ ñopbalʌl miʼ pʼol wem bʌ winicob xʼixicob (Mateo 7:15-20).
Jini yamigojob Jehová miʼ wen chʼʌmob ti ñuc jini Biblia. Yujilob chaʼan jini Biblia tilem ti Dios. Jini chaʼan, chumulob cheʼ bajcheʼ mi yʌl jini Biblia, chaʼan mi tojʼesañob i wocol yicʼot mi coltañob tiʼ ñumen cʌñol majlel jini Dios (2 Timoteo 3:16). Yicʼot jaʼel, miʼ ñop i melob chuqui miʼ subob ñumel.
Jini yamigojob Jehová miʼ cʼuxbiñob i bʌ. Jesús tsiʼ pʌsʌ chaʼan mucʼʌch i cʼuxbin winicob xʼixicob cheʼ bʌ tsiʼ cʌntesayob chaʼan Dios, yicʼot tsiʼ lajmesa jini xcʼamʌjelob. Jini añoʼ bʌ ti sujmlel bʌ ñopbalʌl miʼ cʼuxbiñob jaʼel jini yañoʼ bʌ. Lajal bajcheʼ Jesús, maʼanic miʼ chanʼesañob i bʌ ti tojlel jini pʼumpʼuñoʼ bʌ mi jinic añoʼ bʌ ti yambʌ tejclum. Jesús tsiʼ yʌlʌ chaʼan mi caj i cʌñob winicob xʼixicob, majquiyob jini xcʌntʼañob i chaʼan cheʼ miʼ cʼuxbiñob i bʌ (Juan 13:35).
Jini yamigojob Dios miʼ ñucʼesabeñob I cʼabaʼ: Jehová. Mi an juntiquil mach bʌ yomic i cʼʌn laj cʼabaʼ, ¿muʼ ba mejlel laj cʌl ti la camigo wen lʌcʼʌl bʌ an la quicʼot cheʼ jini? Mach cheʼiqui. Cheʼ an juntiquil la camigo mi lac pejcan tiʼ cʼabaʼ, i wen mi la cʌl tiʼ tojlel yañoʼ bʌ. Jini chaʼan, jini yomoʼ bʌ sujtel ti yamigo Dios, yom miʼ cʼʌmbeñob I cʼabaʼ i mi subeñob yañoʼ bʌ. Jehová cheʼʌch yom mi lac mel bajcheʼ jini (Mateo 6:9; Romanos 10:13, 14).
Cheʼ bajcheʼ Jesús, jini yamigojob Dios miʼ cʌntesan winicob xʼixicob chaʼan i Yumʌntel Dios. Jini Yumʌntel Dios jiñʌch jini yumʌl am bʌ ti panchan, muʼ bʌ caj i sujtesan ili Lum ti jumpʼejl paraíso. Jini yamigojob Dios mi yʌcʼob ti cʌjñel ti yañoʼ bʌ jini wen tac bʌ tʼan chaʼan i Yumʌntel Dios (Mateo 24:14).
Jini testigojob Jehová miʼ ñopob sujtel tiʼ yamigo Dios. Miʼ chʼʌmob ti ñuc jini Biblia yicʼot jaʼel miʼ cʼuxbiñob i bʌ. Yicʼot jaʼel miʼ cʼʌñob, i miʼ ñucʼesabeñob i cʼabaʼ Dios, i miʼ cʌntesañob yañoʼ bʌ chaʼan i Yumʌntel Dios. Wʌle jini i testigojob Jehová añob ti sujmlel bʌ ñopbalʌl ila ti Lum.