Cʌntesʌntel 12

Jini winicob xʼixicob tsiʼ meleyob chan bʌ qʼueloñib

TSAʼ ñumi cabʌl jabil. Jini i yalobilob Noé tsaʼ pʼojliyob cabʌl i yalobilob. Jini i yalobilob tsaʼ coliyob i tsaʼ pʼojliyob jaʼel cabʌl i yalobilob. Mach jalic tsaʼ pʼojliyob cabʌl winicob xʼixicob ti Pañimil.

Ili juntiquil jiñʌch i buts i yalobil jini Noé i cʼabaʼ Nemrod. Jiñʌch juntiquil jontol bʌ winic muʼ bʌ i yajñesan bʌteʼel chaʼan miʼ tsʌnsan, yicʼot miʼ tsʌnsan winicob. Cheʼ jaʼel Nemrod tsaʼ ochi ti rey chaʼan mi chaʼlen yumʌntel tiʼ tojlel yambʌ winicob xʼixicob. Dios maʼanic tsiʼ mula Nemrod.

Pejtelel jini winicob xʼixicob cheʼ bʌ ora jini junchajp jach bʌ tʼan yujilob. Nemrod yom yʌcʼ ti junmujchʼ jach jini winicob xʼixicob chaʼan miʼ yumañob. Jini chaʼan, ¿awujil ba chuqui tsiʼ mele? Tsiʼ sube jini winicob xʼixicob chaʼan miʼ melob jumpʼejl colem tejclum yicʼot chaʼan miʼ melob jumpʼejl chan bʌ qʼueloñib. Ila ti dibujo maʼ qʼuel chaʼan woli i melob ladrillo tac.

Jioba Dios mach utsʼatic tsiʼ qʼuele ili qʼueloñib. Jioba tsiʼ ñaʼta chaʼan miʼ loqʼuelob majlel jini winicob xʼixicob yaʼi chaʼan mi majlelob ti chumtʌl ti petol ili Pañimil. Pero jiniyob tsaʼ yʌlʌyob: ‹¡Laʼ lac mel! Jumpʼejl colem bʌ tejclum yicʼot chan bʌ qʼueloñib muʼ bʌ i taj panchan. ¡Cheʼ jini mi caj lac ñuqʼuesan laj cʼabaʼ!› Yomob i bajñel ñuclel, i mach i chaʼanic i ñuclel Dios.

Jini chaʼan Dios tsiʼ yʌqʼue i cʌy i melob chan bʌ qʼueloñib jini winicob xʼixicob. ¿Awujil ba bajcheʼ tsiʼ mele? Tsiʼ bʌcʼ qʼuextʌbeyob i tʼan jini winicob xʼixicob, chaʼan mach junchajpic jach. Maʼanix tsaʼ caji i ñaʼtʌbeñob i bʌ i tʼan. Jini chaʼan i tejclumob tsaʼ otsʌbenti i cʼabaʼ Babel, o Babilonia, yom bʌ i yʌl «Tsaʼ yʌmbentiyob i tʼan».

Wʌle ora jini winicob xʼixicob tsaʼix cajiyob ti loqʼuel majlel yaʼ ti Babel. Jini junmojt lajal bʌ yujilob tʼan tsaʼ majliyob ti tem chumtʌl ti yambʌ parte ila ti Pañimil.

Génesis 10:1, 8-10; 11:1-9.