JIÑI XCOLELOB MIʼ CʼAJTIÑOB
¿Mulil ba cheʼ bʌ juntiquil wiñic miʼ chaʼ mulan yambʌ wiñic o juntiquil xʼixic miʼ mulan yambʌ xʼixic?
«Cheʼ bʌ tsaʼ cajiyon ti colel majlel tsaʼ caji c mulan yambʌ chʼitoñob i tsaʼ c lon ñaʼta chaʼan mach jalic cheʼ mi caj cubin bajcheʼ jiñi, pero cʼʌlʌl ili ora cheʼto mic bej ubin» (David, 23 bʌ i jabilel).
David juntiquil xñoptʼan i yom i tsʼʌctesʌben i tʼan Dios, cheʼ bʌ bajcheʼ David, ¿muʼ ba i mejlel juntiquil i tsʼʌctesʌben i mandar Dios? ¿Wem ba miʼ qʼuel Dios cheʼ bʌ juntiquil wiñic miʼ mulan yambʌ wiñic o juntiquil xʼixic miʼ mulan yambʌ xʼixic?
¿Chuqui miʼ yʌl jiñi Biblia?
Jiñi lac piʼʌlob yʌñʌlʌch bajcheʼ miʼ qʼuelob ti wajali cheʼ bʌ juntiquil wiñic miʼ piʼlen yambʌ wiñic o cheʼ bʌ juntiquil xʼixic miʼ piʼlen yambʌ xʼixic, pero joñonla maʼañic mi lac tsajcan cheʼ bajcheʼ miʼ ñaʼtan yonlel lac piʼʌlob. Joñonla «mach la cʌcʼ lac bʌ ti ñijcʌntel yicʼot ti pʌjyel majlel tiʼ pejtelel jiñi cʌntesa tac lajal bʌ bajcheʼ icʼ» cheʼ bajcheʼ miʼ yʌl Efesios 4:14. Jiñi Biblia miʼ pʌs chaʼan mach weñic cheʼ juntiquil wiñic miʼ wʌlʌc piʼlen yambʌ wiñic.
Jamʌ tsiquil chuqui miʼ yʌl jiñi Biblia cheʼ bʌ miʼ taj ti tʼan chaʼan jiñi muʼ bʌ i wʌlʌc piʼleyob i bʌ. Laʼ laj qʼuel chuqui miʼ yʌl.
«Jini winicob mach yomic miʼ wʌlʌc piʼleñob i bʌ. Cheʼ jaʼel xʼixicob mach yomic miʼ laj bʌ piʼleñob i bʌ» (Levítico 18:22).
«Cheʼ bajcheʼ yomob tiʼ pusicʼal, [...] Dios tsiʼ cʌyʌyob i tsiʼ yʌqʼueyob i mel jiñi tsʼiʼlel tac yomoʼ bʌ i mel come jiñi xʼixicob mach yomobic ajñel yicʼot wiñicob, yomob jach i wʌlʌc piʼleñob i bʌ» (Romanos 1:24, 26).
«Mach laʼ bajñel lotin laʼ bʌ. Jiñi xtsʼiʼleloʼ bʌ, jiñi muʼ bʌ i chʼujutesañob jiñi melbil tac jach bʌ dios, jiñi muʼ bʌ i piʼleñob yambʌ mach bʌ i piʼʌlobic, jiñi wiñicob muʼ bʌ i yʌcʼob i bʌ ti piʼlentel tiʼ tojlel yambʌ wiñicob, jiñi wiñicob muʼ bʌ i piʼleñob yambʌ wiñic, jiñi xujchʼob, jiñi muʼ bʌ i cʌlʌx mulañob chuqui an, jiñi xyʌcʼʌjelob, jiñi muʼ bʌ i ticʼlañob yambʌlob tiʼ tʼan yicʼot jiñi muʼ bʌ i chaʼleñob lot chaʼan miʼ chʼʌmbeñob i chubʌʼan yambʌlob maʼañic mi caj i yʌqʼuentelob jiñi i Yumʌntel Dios» (1 Corintios 6:9, 10).
Jiñi i mandar tac Dios miʼ luʼ cʼʌjñibʌyel lac chaʼan, mach yʌlʌyic bajcheʼ yubil mi la cubin, yomʌch mi lac luʼ ticʼ lac bʌ chaʼan maʼañic mi lac mel maʼan bʌ miʼ mulan Dios (Colosenses 3:5).
¿Yom ba i yʌl chaʼan...?
¿Yom ba i yʌl chaʼan jiñi Biblia miʼ yʌl chaʼan mach yomic mi lac ñochtan cheʼ bʌ yilal i melbalob bajcheʼ jiñi?
Maʼañic. Jiñi Biblia miʼ cʌntesañonla chaʼan maʼañic majqui yom mi lac tsʼaʼlen, i miʼ yʌl jaʼel chaʼan mi lac sʌclan ñʌchʼtʌlel la quicʼot pejtelel lac piʼʌlob, mach yʌlʌyic bajcheʼ yilal i melbalob (Hebreos 12:14). Jin chaʼan mach yomic mi lac tsʼaʼleñob o mi lac ticʼlañob muʼ bʌ i wʌlʌc piʼleñob i bʌ.
¿Yom ba i yʌl iliyi chaʼan jiñi i testigojonbʌla Jehová yom mi laj contrajin jiñi mandar baqui miʼ yʌl chaʼan jiñi muʼ bʌ i wʌlʌc piʼleñob i bʌ wen chaʼan miʼ ñujpuñelob?
Jiñi Biblia miʼ yʌl chaʼan Dios jin jach wen miʼ qʼuel cheʼ bʌ juntiquil wiñic yicʼot juntiquil xʼixic miʼ ñujpuñelob (Mateo 19:4-6). Joñonla maʼañic mi laj contrajin mi muqʼuicto laj coltan jiñi mandar baqui miʼ yʌl chaʼan miʼ mejlelob ti ñujpuñel lajal wiñicob o lajal xʼixicob. Jiñi mandar tac yaʼʌch ochem ti jiñi política i cheʼ bajcheʼ miʼ yʌl jiñi Biblia maʼañic mi la cotsan lac bʌ (Juan 18:36).
Pero ¿ixcu...?
Pero ¿ixcu mi añʌch juntiquil cheʼ bʌ i melbal bajcheʼ jiñi, muʼ ba i mejlel i qʼuextan i bʌ?
Mucʼʌch. Jiñi Biblia miʼ yʌl chaʼan cheʼ ti ñaxam bʌ siglo añʌch tsaʼ bʌ i qʼuextayob i melbal. Jiñi carta tsaʼ bʌ i tsʼijbubeyob jiñi corintojob, Pablo tsiʼ jamʌ alʌ chaʼan jiñi muʼ bʌ i wʌlʌc piʼleñob i bʌ maʼañic mi caj i yʌqʼuentelob jiñi i Yumʌntel Dios i cheʼ jaʼel tsiʼ yʌlʌ: «Ti ñaxan, an cheʼetbʌla bajcheʼ jiñi» (1 Corintios 6:11).
¿Yom ba i yʌl chaʼan maʼañix ba ora miʼ cajel i yubiñob i bʌ bajcheʼ jiñi anquese tsaʼix i cʌyʌyob? Maʼañic. Jiñi Biblia miʼ yʌl: «Lʌpʌla tsijiʼ bʌ laʼ melbal, muʼ bʌ i yʌqʼueñonla Dios cheʼ bʌ mi lac ñumen cʌn. Cheʼ bajcheʼ jiñi miʼ tsijibʌyel jiñi lac melbal tac» (Colosenses 3:10). Chaʼan mi laj qʼuextan lac melbal xucʼu xucʼul miʼ mejlel lac mel i mach orajic.
Pero ¿ixcu mi an juntiquil yom bʌ i jacʼben i mandar Dios pero añixto bajcheʼ yubil miʼ bej ubin i bʌ ti pusicʼal?
Jujuntiquil mi caj i ñaʼtan mi yom i mel o yom i tic i bʌ. Pero ¿bajcheʼ mi mejlel i tic i bʌ? Jiñi Biblia miʼ yʌl: «Chʌn ajñenla cheʼ bajcheʼ yom jiñi espíritu i cheʼ bajcheʼ jiñi maʼañic mi caj laʼ wis mel chuqui yom laʼ bʌcʼtal» (Gálatas 5:16).
Ili versículo maʼañic woliʼ yʌl chaʼan maʼañix miʼ cajel i wis tilel ti lac ñaʼtʌbal, yom bʌ i yʌl jiñʌch chaʼan mi mucʼʌch lac pejcan jiñi Biblia yicʼot mi lac chaʼlen oración mi caj i coltañonla chaʼan maʼañix mi lac mel yom bʌ lac bʌcʼtal.
David tsaʼʌch i taja i pʼʌtʌlel chaʼan miʼ mʌjlel i chaʼan i ñumento cheʼ bʌ tiʼ sube i tatob bajcheʼ yilal woliʼ ñusan. David miʼ yʌl: «Cheʼ tsaʼicto c toj sube c papá yicʼot c mamá woli bʌ c ñusan tajol ñumen tijicña tsaʼ c ñusa».
Cheʼ mi lac jacʼben i mandar Dios ñumen tijicñayonla come tojʌch i mi tijicñesan lac pusicʼal, i mi mucʼʌch lac jacʼ mi caj lac taj lac wenlel (Salmo 19:8, 11).