Yom wen maʼ tsictesan jiñi texto tac

Hechos 17:2, 3

YOM BɅ MIʼ CɅJÑEL: Mach a toʼol pejcan jumpʼejl texto i yambʌ chuqui maʼ waʼ tech a wʌl. Wen qʼuele mi jiñi woli bʌ i ñʌchʼtañetob wolʌch i ñaʼtañob bajcheʼ woliʼ taj i bʌ jiñi texto yicʼot jiñi woli bʌ a tsictesan.

¿BAJCHEʼ MI LAC MEL?

• Alʌ jiñi tʼan tac ñuc bʌ i cʼʌjñibal. Cheʼ bʌ tsaʼix a pejca jumpʼejl texto, alʌ jiñi muʼ bʌ i taj i bʌ yicʼot jiñi a wom bʌ a pʌs. Miʼ mejlel a mel iliyi cheʼ bʌ maʼ chaʼ al jiñi tʼan tac tsaʼix bʌ a pejca o maʼ mel cʼajtiya tac muʼ bʌ i coltañob i cʌn baqui bʌ jiñi ñuc tac bʌ i cʼʌjñibal.

• Acʼʌ ti cʌjñel jiñi a wom bʌ miʼ cʼajtesañob. Mi woli a wʌl chucoch mi caj a pejcan jumpʼejl texto, tsictesan bajcheʼ miʼ taj i bʌ jiñi woli bʌ a wʌl yicʼot jiñi tʼan tac ñuc bʌ i cʼʌjñibal ti jiñi texto.

• Mach wocolic yom maʼ tsictesan. Mach a wʌl tʼan tac maʼañix bʌ miʼ taj i bʌ yicʼot jiñi ñuc bʌ i cʼʌjñibal. Chʼʌmʌ ti ñuc chuqui cʌñʌlobix i chaʼan ti jiñi temaj i ñaʼtan bajcheʼ cʼamel mi caj a tsictesʌbeñob chaʼan miʼ chʼʌmbeñob isujm jiñi woli bʌ a wʌl.