Chan bʌ Qʼueloñib ti Babel

Cheʼ tsaʼix ñumi jiñi But’ja’, i yalobilob Noé tsiʼ pʼoloyob i bʌ. Tsaʼ coliyob i familia i tsaʼ majliyob ti chumtʌl ti yan tac bʌ lum, cheʼ bajcheʼ Jehová tiʼ subeyob.

Pero an familiajob maʼañic bʌ tsiʼ jacʼbeyob i tʼan Jehová. Tsiʼ yʌlʌyob: «Laʼ laj cʌytʌl ilayi, laʼ lac mel jumpʼejl tejclum yicʼot chan bʌ qʼueloñib muʼ bʌ i cʼotel cʼʌlʌl ti panchan. Cheʼ jiñi mi caj lac wen cʌjñel».

Jehová maʼañic tsiʼ mulaj bajcheʼ woli (choncol) i chaʼleñob, jin chaʼan tsiʼ waʼchoco jiñi eʼtel (troñel). ¿A wujil ba bajcheʼ? Tsiʼ yʌmbeyob i tʼan. Babel tsiʼ yotsʌbeyob i cʼabaʼ jiñi tejclum, yom bʌ i yʌl «tsaʼ bʌ yʌmbetiyob i tʼan». Maʼañix tsaʼ joloñi jiñi troñel come mach lajalobix i tʼan i tsaʼ majliyob ti chumtʌl ti yambʌ lum tac. Pero tsaʼ caji i chʌn chaʼleñob mach bʌ tojic yaʼ baqui tsaʼ majliyob. ¿Anto ba tsaʼ bʌ i cʼuxbi Jehová maʼ wʌl? Ti yan to bʌ cʌntesʌntel mi caj laj qʼuel.