CɅNTESɅNTEL 10

Yʌñʌ bajcheʼ tac maʼ chaʼlen tʼan

Mateo 10:27

YOM BɅ MIʼ CɅJÑEL: Yʌñʌ majlel a tʼan chaʼan tsiquil chuqui maʼ wʌl yicʼot maʼ ñijcʌbeñob i pusicʼal.

Letsan o juʼsan a tʼan. Letsan a tʼan cheʼ maʼ wʌl ñuc tac bʌ i cʼʌjñibal yicʼot chaʼan miʼ ñijcʌben i pusicʼal woli bʌ i ñʌchʼtañetob. Cheʼ yom maʼ mel jaʼel cheʼ maʼ pejcan jiñi texto tac muʼ bʌ i taj ti tʼan meloñel, jumpʼejl ejemplo, cheʼ bajcheʼ muʼ bʌ i mel Jehová tiʼ tojlel quixtañujob. Juʼsan a tʼan chaʼan miʼ mulañob i ñaʼtan jiñi muʼto bʌ caj a wʌl, cheʼ mi caj a tsictesan chuqui tac bʌbʌqʼuen o muʼ bʌ i yʌcʼonla ti pensal.

Mach yomic jujumujcʼ maʼ letsan a tʼan chaʼan jiñi woli bʌ i ñʌchʼtañetob mach wolic i yʌʼlentelob miʼ yubin. Mach yomic maʼ wʌcʼ a bʌ ti wen qʼuejlel tiʼ caj lecojix bajcheʼ woliyet ti tʼan.
Qʼuexe majlel a tʼan. Mi cheʼʌch ñʌmʌl ti melol, qʼuexe a tʼan chaʼan maʼ pʌs tijicñʌyel, chaʼan maʼ wʌl chuqui chut o colem, chaʼan maʼ wʌl chuqui ñajt o lʌcʼʌl yicʼot chaʼan maʼ pʌs chʼijiyemlel o cʌlʌx pensal.
An i tajol yom ora o cʼunteʼ maʼ chaʼlen tʼan. Chaʼan maʼ pʌs tijicñʌyel ñumen ora yom maʼ chaʼlen tʼan. Cheʼ mi caj a wʌl ñuc tac bʌ i cʼʌjñibal yom cʼunteʼ maʼ chaʼlen tʼan.

Chaʼan mach toj sajtelob i pusicʼal jiñi woli bʌ i ñʌchʼtañetob mach ti orajic yom maʼ qʼuextan a tʼan. Mach cʌlʌx orajic yom maʼ chaʼlen tʼan chaʼan miʼ ñaʼtʌntel jiñi muʼ bʌ a wʌl.