¿Bajcheʼ miʼ mejlel laj cʌntan lac bʌ chaʼan maʼañic mi lac lotintel?
Ili ora baqui jachix miʼ mejlel lac taj información mi an chuqui la com laj cʌn. Jiñi miʼ mejlel i coltañonla chaʼan cʼocʼ mi la cajñel o chaʼan maʼañic chuqui mi lac chaʼlen. ¡Pero yomʌch mi laj cʌntan lac bʌ! Come an cabʌl información, miʼ mejlel lac taj jaʼel ili tac:
Noticia tac mach bʌ luʼ i sujmic chuqui miʼ yʌl
Lot tac
Jumpʼejl ejemplo, cheʼ ti pandemia chaʼan COVID-19, jiñi secretario chaʼan Naciones Unidas tsiʼ yʌlʌ chaʼan woliʼ loqʼuel jumpʼejl lot woli bʌ i pam pujquel bajcheʼ jumpʼejl cʼamʌjel. Tsiʼ yʌlʌ chaʼan cabʌlix tsʼac muʼ bʌ i poj cʼoqʼuesañonla yicʼot chuqui tac miʼ mejlel lac mel chaʼan cʼocʼ mi la cajñel yicʼot chaʼan cabʌlix lot ti noticia tac i ti yan tac bʌ. Cheʼ jaʼel tsiʼ yʌlʌ: «Yaʼ ti internet cabʌl chuqui miʼ yʌjlel chaʼan miʼ ticʼlʌntel yambʌlob, cabʌlix tsʼaʼlentel, i tiʼ caj jiñi, woliʼ yʌjlel lot tac tiʼ tojlel juntiquil lac piʼʌl o tiʼ tojlel junmojt lac piʼʌlob».
Cʼʌlʌl ti wajali añʌch mach bʌ i sujmic información. Pero jiñi Biblia tsiʼ wʌn alʌ chaʼan jiñi jontoloʼ bʌ yicʼot jiñi xlotob «mi caj i ñumen asiyelob majlel, mi caj i chaʼleñob lot yicʼot mi caj i ñumen lotintelob» (2 Timoteo 3:1, 13). Ti ili ora yaʼ ti internet orajach miʼ mejlel lac taj jiñi información mach bʌ i sujmic i miʼ mejlel lac choc majlel cheʼ bʌ mach yʌlolic lac chaʼan. Jin chaʼan, ti laj correo, ti lac redes sociales o ti yan tac bʌ miʼ mejlel lac chocbentel tilel informaión mach bʌ i sujmic chuqui miʼ yʌl o mach bʌ tsʼʌcʌlic
¿Chuqui miʼ mejlel a mel chaʼan maʼañic maʼ wʌcʼ a bʌ ti lotintel? Ilayi mi caj a taj wen tac bʌ ticʼojel muʼ bʌ i mejlel i coltañet.
Mach a ñop pejtelel muʼ bʌ a qʼuel yicʼot muʼ bʌ a wubin
Muʼ bʌ i yʌl jiñi Biblia: «Jini mach bʌ cʌntesʌbilic miʼ ñop pejtel chuqui miʼ yʌlob winicob. Jini cʌntesʌbil bʌ miʼ wen tsajin i bijlel» (Proverbios 14:15).
Mi maʼañic mi laj cʌntan lac bʌ, ora jach miʼ mejlel laj cʌcʼ lac bʌ ti lotintel. Jumpʼejl ejemplo, ñaʼtancu ti jiñi video tac mach bʌ wen tamic o ti jiñi dibujo o foto tac am bʌ chuqui tac miʼ yʌl muʼ bʌ i wen cʌjñel yaʼ ti internet, woli cʌl jiñi muʼ bʌ i subentel ti meme tac. Ili miʼ mejlel chaʼan miʼ wen locʼsʌben i tseʼñal jiñi lac piʼʌlob. Pero jiñi dibujo, foto tac o video tac mucʼ jach i mejlel ti asintel o an chuqui miʼ tsʼitaʼ qʼuextʌbeñob. I an video tac baqui miʼ loqʼuel jiñi lac piʼʌlob chaʼan an chuqui woliʼ yʌlob o i melob anquese mach cheʼic tsiʼ chaʼleyob tʼan o tsiʼ meleyob bajcheʼ jiñi.
“«Cheʼ bʌ an mejli investigación tsaʼ qʼuejli chaʼan baqui miʼ ñumen tajtʌl mach bʌ weñic información yaʼʌch ti meme, muʼ bʌ i wen qʼuextañob chuqui miʼ yʌjlel» (Axios Media).
Cʼajtiben a bʌ: «¿I sujmʌch ba woli bʌ i yʌl jiñi noticia o meme jach?».
Wen qʼuele baqui tilem yicʼot chuqui miʼ yʌl
Muʼ bʌ i yʌl jiñi Biblia: «Wen qʼuelela miʼ sujmʌch pejtelel chuqui an» (1 Tesalonicenses 5:21).
Tajol jiñi woli bʌ i yʌjlel mach jaysujtelic jach woliʼ ñumel ti noticia tac, pero chaʼan maʼ ñop o maʼ chaʼ choc majlel ñaxan wen qʼuele miʼ sujmʌch. ¿Bajcheʼ?
Qʼuele mi cʌmbilʌch chaʼan mucʼʌch i yʌl tiʼ pejtelel ora chuqui i sujm yaʼ baqui woliʼ loqʼuel jiñi información. Tajol yaʼ baqui woliʼ loqʼuel jiñi noticia muqʼuix i tsʼitaʼ qʼuextañob chaʼan yomob taqʼuin o tiʼ caj política, jin chaʼan laja jiñi informaión yicʼot bajcheʼ woliʼ yʌjlel ti yan tac bʌ. Jinto jaʼel jiñi amigojob miʼ mejlel i chocbeñob i bʌ cʼotel mach bʌ weñic información ti correo o ti redes sociales. Jin chaʼan, mach a ñop jumpʼejl noticia mi maxto a wen qʼuele miʼ sujmʌch baqui woliʼ tilel.
Wen qʼuele mi tsijibto yicʼot tsʼʌcʌlʌch chuqui woliʼ yʌjlel. Qʼuele jiñi tsic yicʼot yan tac bʌ muʼ bʌ i mejlel i pʌsbeñet chaʼan i sujmʌch. Cheʼ jaʼel, qʼuele mi añʌch chuqui yambʌ miʼ pʌs chaʼan i sujmʌch jiñi. Pero ñumento yom maʼ cʌntan a bʌ mi jiñi información tsaʼix tsʼitaʼ locʼsʌbenti tʼan tac chaʼan orajach miʼ chʼʌmbentel i sujm o miʼ tsaʼ mejli chaʼan an bajcheʼ yom miʼ yubin i bʌ jiñi lac piʼʌlob.
«Miʼ mejlel cʌl chaʼan ñucʌch i cʼʌjñibal chaʼan mi lac wen qʼuel miʼ i sujmʌch jiñi woli bʌ i yʌjlel cheʼ bajcheʼ ñuc i cʼʌjñibal mi lac poc laj cʼʌb» (Sridhar Dharmapuri, oficial superior de inocuidad alimentaria y nutrición de las Naciones Unidas).
Cʼajtiben a bʌ: «¿Lajal ba bajcheʼ tsaʼix ñoj ujti jiñi woli bʌ i yʌl jiñi noticia? ¿Tsʼʌcʌlʌch ba chuqui woliʼ yʌl?».
Chʼʌmʌ ti ñuc miʼ sujmʌch i mach jiñic jach tiʼ caj chuqui maʼ bajñel ñaʼtan
Muʼ bʌ i yʌl jiñi Biblia: «Tonto jini muʼ bʌ i bajñel ñaʼtan xucʼul i pusicʼal. Jini muʼ bʌ i mel chuqui utsʼat miʼ caj ti colel» (Proverbios 28:26).
Lʌcʼʌ tiʼ pejtelel ora jiñi lac piʼʌlob miʼ ñop jiñi información muʼ bʌ i taj i bʌ yicʼot jiñi muʼ bʌ i ñop. Cheʼ jaʼel, jiñi compañía tac chaʼan internet miʼ qʼuelob chuqui tac mi lac sʌclan, mi lac mulan chaʼan miʼ chocbeñoñobla cʼotel noticia tac yicʼot yan tac bʌ mensaje. Pero tiʼ pejtelel ora tajol jiñi muʼ bʌ la cubin mach jiñic la com bʌ la cubin.
«Ti lac pejtelel an lac ñaʼtʌbal yicʼot mi lac chʼʌmben i sujm, pero tajol jiñi la com bʌ, woli bʌ lac pijtan, lac bʌqʼuen yicʼot am bʌ ti lac pusicʼal an i tajol jiñʌch miʼ yʌcʼ chaʼan mi lac ñop jumpʼejl información mi mucʼʌch i taj i bʌ yicʼot jiñi yambʌ» (Peter Ditto, psicólogo social).
Cʼajtiben a bʌ: «¿Muʼ ba c ñop ili información come jiñʌch com bʌ c ñop?».
Mach a puc información mach bʌ i sujmic
Muʼ bʌ i yʌl jiñi Biblia: «Mach maʼ pʼojlesan tʼan cheʼ mach a wujilic mi isujm» (Éxodo 23:1).
Cʼajtesan chaʼan jiñi yañoʼ bʌ añʌch bajcheʼ mi caj i ñaʼtañob yicʼot chuqui tac mi caj i melob chaʼan jiñi información muʼ bʌ a puc. Mi maʼ choc mejlel información mach bʌ i sujmic anquese mach yʌlolic a chaʼan miʼ mejlel a tajben i wocolel.
«Jiñi ñaxam bʌ yom mi lac mel jiñʌch chaʼan mach ti orajic chuqui yom mi lac ñaʼtan, laʼ laj cʼajtiben la bʌ: ‹¿Wen cujil ba chaʼan i sujmʌch iliyi chaʼan miʼ mejlel c choc majlel?›. mi ti lac pejtelel mucʼʌch lac mel iliyi mach cabʌlic información mach bʌ i sujmic mi caj i tajtʌl ti internet» (Peter Adams, vicepresidente sénior del News Literacy Project).
Cʼajtiben a bʌ: «¿Mi caj c choc majlel ili información come cujilix chaʼan i sujmʌch?».