Tsaʼ toj sajti c pusicʼal chaʼan jiñi wem bʌ jacʼbal muʼ bʌ i yʌcʼ jiñi Biblia

BAJCHEʼ QUILAL TI WAJALI.

Tsaʼ coliyon ti Székesfehérvár, jumpʼejl tejclum am bʌ ti Hungría. Cheʼ mij cʼajtesan tsaʼ bʌ ujti ti Segunda Guerra Mundial miʼ yʌqʼueñon c chʼijyemlel.

Tsaʼ coliyon quicʼot c welitojob. Mic wen cʼajtesañob, ñumento jiñi c welita Elisabeth. Tsiʼ cʌntesayon chaʼan yom mic ñop Dios. Uxpʼejl jaxto c jabilel tsiʼ teche i cʌntesañon chaʼan mi cʌl jiñi oración chaʼan Padrenuestro ti jujumpʼejl acʼʌlel. Pero jinto cheʼ añix lʌcʼʌ 30 c jabilel tsaʼ cʼoti c chʼʌmben i sujm chuqui yom i yʌl.

Jiñi c welitojob tsiʼ cʌntayoñob cheʼ bʌ alʌlonto, come jiñi c papá c mamá ti qʼuiñil ti acʼʌlel miʼ chaʼleñob eʼtel chaʼan miʼ tempʌbeñob i tojol bej wem bʌ lon cotot. Pero ti chaʼchaʼpʼejl semana miʼ tempañob i bʌ pejtelel jiñi c familia chaʼan mij comol cʼux lon c waj. I jiñi mic wen cʼajtesan.

Ti 1958 jiñi c papá c mamá tsiʼ mʌñʌyob jiñi otot yomoʼ bʌ. Tsaʼix mejliyon ti ajñel yicʼotob, ¡wen tijicñayon! Pero jiñi tijicñʌyel maʼañic tsaʼ jalʼa, cheʼ an jaxto 6 uw i ñumel, jiñi c papá tsaʼ chʌmi tiʼ caj cáncer.

Wen chʼijyem tsaʼ cubi c bʌ. Cʼajal c chaʼan tsaʼ c sube Dios: «Tsaʼ c lon cʼajtibeyet chaʼan maʼ coltan c papá. ¡Wen i cʼʌjñibal c chaʼan! ¿Chucoch maʼañic tsaʼ jacʼbeyon?». Come com c ñaʼtan baqui an jiñi c papá, tsaʼ j cʼajtibe c bʌ: «¿Tsaʼ ba majli ti panchan o tsaʼix junyajl jili?». Cheʼ mij qʼuel yicʼotob i papá jiñi yambʌ alobob com chaʼan quicʼotic c papá jaʼel.

Lʌcʼʌ jujumpʼejl qʼuin mi cajñel ti panteón, i cabʌl jab cheʼʌch tsaʼ c mele. Mic ñoctʌl yaʼ baqui mucul jiñi c papá i mic mel oración: «A wocolic Dios, com c ñaʼtan baqui an c papá». Mij cʼajtiben jaʼel chaʼan miʼ coltañon c chʼʌmben i sujm chucoch tsiʼ meleyonla.

Cheʼ bʌ 13 c jabilel tsaʼ c teche j cʌn alemán come tsaʼ c ñaʼta chaʼan jiñi i jacʼbal jiñi j cʼajtiya tac yaʼʌch mi caj c taj yaʼ ti libro tac am bʌ ti alemán. Ti1967 tsaʼ majliyon ti clase ti Jena, jumpʼejl tejclum am bʌ ti Alemania oriental ti wajali. Tsaʼ c pejca pejtelel i libro jiñi filósofojob ti Alemania, ñumento jiñi muʼ bʌ i tsictesan chucoch añonla. Anquese añʌch chuqui wen tac bʌ miʼ tsictesan, maʼañic tsaʼ c tajbe i jacʼbal jiñi j cʼajtiya tac. Jin chaʼan tsaʼ c bej cʼajtibe i coltaya Dios.

BAJCHEʼQUI TSIʼ QʼUEXTA C PENSAR JIÑI BIBLIA.

Ti 1970 tsaʼ chaʼ majliyon ti Hungría i yaʼi tsaʼ cʼoti j cʌn Rose, tsaʼ bʌ sujti ti quijñam. Ti jimbʌ ora, wen an wocol yaʼ ti Hungría tiʼ tojlel jiñi yumʌlob. Jin chaʼan, cheʼ bʌ maxto wen jalic lon c ñujpuñel, tsaʼ majliyon lon ti Austria. Tsaʼ lon c ñaʼta chaʼan cheʼ yaʼañon lon yaʼi, mi lon c majlel ti Australia, ti Sydney, come yaʼʌch chumul juntiquil c tío.

Yaʼ ti Austria mach jalic tsaʼ c taja queʼtel. Ti jumpʼejl bʌ qʼuin, juntiquil c piʼʌl ti eʼtel tiʼ subeyon chaʼan yaʼ ti Biblia miʼ mejlel c taj pejtelel i jacʼbal jiñi j cʼajtiya i tsiʼ yʌqʼueyon chaʼpʼejl libro. Ti orajach tsaʼ c luʼ pejca. Pero comto c ñumen ñaʼtan tsaʼ cubi, jin chaʼan tsaʼ c tsʼijbubeyob majlel jiñi i testigojob Jehová, muʼ bʌ i melob jiñi libro, i tsaʼ c ñumen cʼajtibeyob yambʌ jun tac.

Ti jiñi bʌ qʼuin cheʼ bʌ mi caj i tsʼʌctiyel jumpʼejl jab lon c ñujpuñel tsaʼ cʼoti juntiquil Testigo ti lon cotot. Tsiʼ chʼʌmbeyon cʼotel jiñi jun tac tsaʼ bʌ j cʼajti i tiʼ subeyon jumpʼejl estudio loqʼuem bʌ ti Biblia. Ti orajach tsaʼ c jacʼʌ. Come wen com j cʌn, tsaʼ cajiyon ti estudio chaʼyajl ti jumpʼejl semana, ¡i jujumpʼejl estudio miʼ jalʼan chʌmpʼejl ora!

Tsaʼ caji c wen mulan woli bʌ j cʌn yaʼ ti Biblia. Cheʼ bʌ tsiʼ pʌsbeyoñob jiñi i cʼabaʼ Dios tic Biblia ti húngaro, tsaʼ toj sajti c pusicʼal. Añix 27 jab j cajñel ti misa, pero mi junyajic tsaʼ cubi jiñi cʼabaʼ «Jehová». Tsaʼ toj sajti c pusicʼal chaʼan jiñi wem bʌ jacʼbal muʼ bʌ i yʌcʼ jiñi Biblia. Tsaʼ cʼoti j cʌn chaʼan jiñi chʌmeñoʼ bʌ maʼañix chuqui yujilob, lajal bajcheʼ wen wʌyʌlob (Eclesiastés 9:5, 10; Juan 11:11-15). Cheʼ jaʼel, tsaʼ cʼoti j cʌn chaʼan miʼ cajel jumpʼejl tsijiʼ bʌ pañimil baqui «maʼañix miʼ cajel chʌmel» (Apocalipsis 21:3, 4). Wʌle cujil chaʼan yaʼ ti tsijiʼ bʌ pañimil «mi caj i chaʼ chʼojyelob» jiñi chʌmeñoʼ bʌ, i chaʼan mi caj c chaʼ qʼuel jiñi c papá (Hechos 24:15).

Rose tsaʼʌch i wen coltayon. Tsaʼ caji c ñumen chaʼlen lon wersa, i ti chaʼpʼejl jach uw tsaʼ cujtesa lojon jiñi estudio. Tsaʼ c teche lon majlel tiʼ pejtelel jiñi tempa bʌ tac. I tsiʼ yʌcʼʌ ti toj sajtel lon c pusicʼal cheʼ tsaʼ lon j qʼuele chaʼan miʼ wen cʼuxbiñob i bʌ yicʼot juntemelob (Juan 13:34, 35).

Ti 1976 tsaʼ majliyon lojon ti chumtʌl ti Australia. Cheʼ bʌ tsaʼ cʼotiyon lojon, tsaʼ lon c sʌcla jiñi Testigojob, i tsiʼ yʌqʼueyon lon cubin chaʼan añon lojon ti cotot. Ti 1978 tsaʼ sujtiyon lojon tiʼ testigo Jehová.

WENLEL TAC TAJBIL BɅ C CHAʼAN.

Tsaʼix c tajbe i jacʼbal jiñi j cʼajtiya tac tsaʼ bʌ c wen sʌcla. Cheʼ jaʼel tsaʼ c taja jiñi ñumen wem bʌ Tatʌl: Jehová (Santiago 4:8). I wʌle an c pijtaya chaʼan miʼ mejlel c chaʼ qʼuel jiñi c papá yaʼ ti paraíso muʼ bʌ caj i chʼʌm tilel Dios (Juan 5:28, 29).

Ti 1989 tsaʼ chaʼ majliyon lojon ti Hungría chaʼan mic suben lojon jiñi lon c familia, lon camigojob yicʼot yambʌ lac piʼʌlob jiñi ñopol bʌ lon c chaʼan. An lon j cʌntesa cabʌl lac piʼʌlob, i ñumen ti 70 sujtemob tiʼ testigo Jehová, yaʼ ochem jaʼel jiñi c mamá.

Diecisiete jab tsaʼ j cʼajtibe Dios chaʼan miʼ coltañon c tajben i jacʼbal jiñi j cʼajtiya tac. I añix 39 jab tsiʼ jacʼbeyon. Cʼʌlʌl ili ora mic suben Jehová ti oración: «Wen wocolix a wʌlʌ c Tat, come tsaʼ jacʼbeyon jiñi coración tac tsaʼ bʌ c mele cheʼ bʌ chʼitoñonto».