CɅNTESɅNTEL 17

Yom tsiquil bajcheʼ maʼ tsictesan

1 Corintios 14:9

YOM BɅ MIʼ CɅJÑEL: Coltan jiñi woli bʌ i ñʌchʼtañetob chaʼan miʼ ñaʼtañob woli bʌ a pʌs.

Wen chajpan muʼ bʌ caj a cʼʌn ti cʌntesa. Yom maʼ wen chʼʌmben isujm jiñi temaj chaʼan mach wocolic bajcheʼ maʼ tsictesan yicʼot ti a bajñel tʼan maʼ mel.
Cʼʌñʌ pʼots tac bʌ tʼan yicʼot mach bʌ wocolic. Anquese mach lecojic cheʼ maʼ cʼʌn tam tac bʌ tʼan, ñumen wen cheʼ mach cabʌlic maʼ cʼʌn chaʼan maʼ tsictesan jiñi ñuc tac bʌ i cʼʌjñibal.

Mach a wʌl mach bʌ ñoj ñuquic i cʼʌjñibal chaʼan maʼañic miʼ cʼojyelob jiñi woli bʌ i ñʌchʼtañetob. Mach a wʌl wocol tac bʌ tʼan. Ñumen wen cheʼ maʼ cʼʌn mach bʌ wocolic ti chʼʌmbentel isujm.
Tsictesan tʼan tac mach bʌ cʌmbilic. Chaʼlen wersa chaʼan maʼañic maʼ cʼʌn tʼan tac wocol bʌ ti ñaʼtʌntel, cheʼ maʼ wʌl jumpʼejl tʼan wocol bʌ, juntiquil quixtañu muʼ bʌ i yʌjlel ti Biblia, jumpʼejl costumbre mach bʌ cʌmbilic o bajcheʼ miʼ chaʼleñob pʼisoñel ti wajali, yom maʼ tsictesan.