-
¿Chuqui jiñi i Yumʌntel Dios?¡Ubin a tijicñʌyel tiʼ pejtelel ora! Estudio loqʼuem bʌ ti Biblia
-
-
CɅNTESɅNTEL 31
¿Chuqui jiñi i Yumʌntel Dios?
Jiñi ñumen ñuc bʌ i cʼʌjñibal miʼ taj ti tʼan jiñi Biblia jiñʌch jiñi i Yumʌntel Dios. Jehová mi caj i cʼʌn jiñi i Yumʌntel chaʼan miʼ sujtel ti jumpʼejl paraíso ili Pañimil, cheʼ bajcheʼ tsiʼ mulaj ti ñaxan. ¿Chuqui jiñi i Yumʌntel Dios? ¿Bajcheʼ la cujil chaʼan wolix (choncolix) ti yumʌntel? ¿Chuqui añix i mele cʼʌlʌl ili ora? ¿I chuqui miʼ cajel i mel ti talto bʌ qʼuin? Ili cʼajtiya tac mi caj i yʌqʼuentel i jacʼbal ti ili cʌntesʌntel yicʼot jaʼel yaʼ ti cʌntesʌntel 32 yicʼot 33.
1. ¿Chuqui jiñi i Yumʌntel Dios, i majqui jiñi i Rey?
Jiñi i Yumʌntel Dios jiñʌch tsaʼ bʌ i waʼchoco Jehová. Jiñʌch Jesucristo am bʌ bajcheʼ i Rey i woli (yʌquel) ti yumʌntel yaʼ ti panchan (Mateo 4:17; Juan 18:36). Jiñi Biblia miʼ yʌl tiʼ tojlel Jesús: «Mi caj i chaʼlen yumʌntel [...] tiʼ pejtelel ora» (Lucas 1:32, 33). Come jiñʌch jiñi Rey tiʼ Yumʌntel Dios mi caj i yuman pejtelel jiñi chumuloʼ bʌ wʌʼ ti Pañimil.
2. ¿Majquiyob mi caj i chaʼleñob yumʌntel yicʼot Jesús?
Jesús mach i bajñelic miʼ cajel ti yumʌntel. «Quixtañujob tilemoʼ bʌ tiʼ pejtelel pʼolbalʌl, tʼan tac, alʌ tejclum yicʼot colem tejclum tac» miʼ cajelob ti yumʌntel (Apocalipsis 5:9, 10). ¿Jaytiquil mi caj i chaʼleñob yumʌntel yicʼot jiñi Cristo? Cʼʌlʌl cheʼ bʌ Jesús tsajñi wʌʼ ti Pañimil, yonlel lac piʼʌlob an i tsajcayob, an sujtiyob ti xñoptʼañob. Pero cojach 144 mil mi caj i majlelob ti panchan chaʼan miʼ chaʼleñob yumʌntel yicʼot Jesús (pejcan Apocalipsis 14:1-4). Pejtelel jiñi yambʌ xñoptʼañob mi caj i chumtʌlob ila ti Pañimil i mi caj i coltañob jiñi i Yumʌntel Dios (Salmo 37:29).
3. ¿Chucoch jiñi i Yumʌntel Dios ñumen wen bajcheʼ jiñi wiñicob muʼ bʌ i chaʼleñob yumʌntel?
Anquese an yumʌlob yomo’ bʌ i mel chuqui wen, maʼañic miʼ mejlel i melob pejtelel chuqui yomob. I cheʼ bʌ miʼ ñumel majlel jiñi jabil miʼ yochelob i qʼuexol, pero tajol jiñʌch miʼ bajñel ñaʼtañob i bʌ i mach yomob i coltañoñobla. Pero Jesús, jiñi Rey tiʼ Yumʌntel Dios, maʼañic baʼ ora an majqui mi caj i yochel tiʼ qʼuexol. Dios tsiʼ waʼchoco jumpʼejl «Yumʌl, mach bʌ yujilic jilel» (Daniel 2:44). Jesús mi caj i yuman pejtelel ili Pañimil i junlajal mi caj i qʼuelonla. Jesús yujil cʼuxbiya, uts yicʼot miʼ mel chuqui toj i mi caj i pʌsbeñonla chaʼan cheʼ yomonla jaʼel tiʼ tojlel yambʌlob (pejcan Isaías 11:9, TNM).
LAʼ LAC ÑUMEN ÑAʼTAN
La lac ñumen qʼuel chucoch jiñi i Yumʌntel Dios ñumen wen bajcheʼ jiñi wiñicob muʼ bʌ i chaʼleñob yumʌntel.
4. Jumpʼejl pʼʌtʌl bʌ Yumʌntel muʼ bʌ caj i yuman pejtelel jiñi Pañimil
Jesucristo ñumen pʼʌtʌl yicʼot ñumen yujil bajcheʼ yom miʼ chaʼlen yumʌntel. Pejcanla Mateo 28:18 i tem alʌla iliyi:
¿Chucoch Jesús ñumen ñuc i yeʼtel bajcheʼ jiñi yambʌ yumʌlob ila ti Pañimil?
Jiñi yumʌlob ila ti Pañimil an jach baqui jaxʌl miʼ chaʼleñob yumʌntel i miʼ jilelob jiñi i yumʌntel. ¿Cheʼ ba miʼ cajel jaʼel jiñi i Yumʌntel Dios? Pejcanla Daniel 7:14 i tem alʌla iliyi:
¿Bajcheʼ miʼ coltañonla cheʼ jiñi i Yumʌntel Dios maʼañic miʼ caj i jilel?
¿Bajcheʼ miʼ coltañonla cheʼ mi caj i yuman pejtelel jiñi Pañimil?
5. Jiñi yumʌlob añoʼ bʌ ila ti Pañimil yomix miʼ jisʌntelob
¿Chucoch jiñi i Yumʌntel Dios yomix miʼ jisan pejtelel jiñi yumʌlob añoʼ bʌ ila ti Pañimil? Qʼuelela jiñi VIDEO i tem alʌla iliyi:
¿Chuqui ti wocol an i techeyob jiñi yumʌlob?
Pejcanla Eclesiastés 8:9 i tem alʌla iliyi:
¿Yomix ba miʼ jisan maʼ wʌl jiñi i Yumʌntel Dios jiñi yumʌlob añoʼ bʌ ila ti Pañimil? ¿Chucoch?
6. Jiñi yumʌlob tiʼ Yumʌntel Dios miʼ chʼʌmbeñoñobla i sujm
Come Jesús, jiñi lac Rey, tsaʼ chumle bajcheʼ wiñic ila ti Lum miʼ mejlel «i pʼuntañonla chaʼan laj cʼunlel» (Hebreos 4:15). Jehová an i yajca 144 mil xucʼul bʌ wiñicob yicʼot xʼixicob chaʼan miʼ chaʼleñob yumʌntel yicʼot Jesús. Iliyob tilemob «tiʼ pejtelel pʼolbalʌl, tʼan tac, alʌ tejclum yicʼot colem tejclum tac» (Apocalipsis 5:9).
¿Muʼ ba i ñuqʼuesan a pusicʼal cheʼ bʌ maʼ ñaʼtan chaʼan Jesús yicʼot jiñi muʼ bʌ caj i chaʼleñob yumʌntel yicʼot miʼ chʼʌmbeñob i sujm bajcheʼ yilal chumulonla? ¿Chucoch?
Jehová an i yajca wiñicob xʼixicob mach bʌ junlajalobic chaʼan miʼ chaʼleñob yumʌntel yicʼot Jesús.
7. Jiñi i Yumʌntel Dios ñumen wen jiñi i mandar tac
Jiñi yumʌlob miʼ yʌcʼob mandar tac chaʼan poj yom i coltañob yicʼot i cʌntañob jiñi ochemoʼ bʌ tiʼ wenta. Cheʼ jaʼel, jiñi i Yumʌntel Dios an i mandar tac, i jiñi ochemoʼ bʌ tiʼ wenta yom miʼ jacʼob. Pejcanla 1 Corintios 6:9-11 i tem alʌla iliyi:
¿Bajcheʼ yilal ili pañimil maʼ wʌl cheʼ ti lac pejtelelic mi lac jacʼben i mandar tac Dios?a
Jehová miʼ cʼajtiben jiñi muʼ bʌ i tsajcañob jiñi i Yumʌntel chaʼan miʼ jacʼbeñob i mandar, ¿bajcheʼ yilal maʼ qʼuel jiñi? ¿Chucoch?
¿Bajcheʼ la cujil chaʼan jiñi maʼañic bʌ woliʼ jacʼbeñob i tʼan Dios mejlʌch i qʼuextañob i melbal? (Qʼuelela jiñi versículo 11).
Jiñi yumʌlob miʼ yʌcʼob mandar tac chaʼan poj yom i coltan yicʼot i cʌntañob jiñi ochemoʼ bʌ tiʼ wenta. Jiñi i Yumʌntel Dios ñumen wen jiñi i mandar tac bajcheʼ i chaʼan jiñi yumʌlob ila ti Pañimil i miʼ cʌntañonla yicʼot miʼ coltañonla.
AN MUʼ BɅ I YɅLOB: «Jiñi i Yumʌntel Dios jiñʌch am bʌ ti lac pusicʼal».
¿Bajcheʼ mi caj a jacʼ?
TSAʼ BɅ LAJ CɅÑɅ
Jiñi i Yumʌntel Dios jiñʌch jumpʼejl yumʌntel am bʌ yaʼ tiʼ panchan i mi caj i yuman pejtelel jiñi Pañimil.
¿Chuqui tsaʼ cʌñʌ?
¿Majquiyob miʼ cajelob ti yumʌntel yaʼ tiʼ Yumʌntel Dios?
¿Chucoch jiñi i Yumʌntel Dios ñumen wen bajcheʼ jiñi wiñicob muʼ bʌ i chaʼleñob yumʌntel?
¿Chuqui miʼ cʼajtiben Jehová jiñi muʼ bʌ i tsajcʌbeñob i Yumʌntel?
CɅÑɅ YAN TAC BɅ
Qʼuele chuqui tsiʼ yʌlʌ Jesús chaʼan baqui an jiñi i Yumʌntel Dios.
«¿Am ba ti lac pusicʼal jiñi i Yumʌntel Dios?» (Tema am bʌ ti jw.org)
¿Chucoch jiñi i testigojob Jehová xucʼul miʼ yajñelob tiʼ Yumʌntel Dios?
Qʼuele chuqui miʼ yʌl jiñi Biblia tiʼ tojlel jiñi 144 mil muʼ bʌ i yajcʌntelob ti Jehová chaʼan miʼ chaʼleñob yumʌntel yicʼot Jesús.
«¿Majquiyob mi caj i majlelob ti panchan?» (Tema am bʌ ti jw.org)
¿Chuqui tsiʼ colta juntiquil xʼixic chaʼan miʼ ñop chaʼan cojach Dios miʼ mejlel i tojʼesan ili pañimil?
«Tsaʼ j cʌñʌ bajcheʼ mi caj i tojʼan jiñi wocol tac» (¡Jamʌx a wut!, noviembre i chaʼan 2011)
-
-
¡Jiñi i Yumʌntel Dios wolix ti yumʌntel!¡Ubin a tijicñʌyel tiʼ pejtelel ora! Estudio loqʼuem bʌ ti Biblia
-
-
CɅNTESɅNTEL 32
¡Jiñi i Yumʌntel Dios wolix ti yumʌntel!
Jiñi i Yumʌntel Dios tsiʼ teche yumʌntel yaʼ ti panchan cheʼ ti 1914. Ti jiñi jach bʌ jabil tsaʼ tejchi jiñi cojix tac bʌ qʼuin chaʼan jiñi yumʌlob. ¿Bajcheʼ la cujil? Wʌle mi caj a qʼuel chuqui tsiʼ yʌlʌ jiñi Biblia, chuqui tsaʼ caji ti ujtel ila ti Pañimil yicʼot bajcheʼ yilal i melbal (chaʼlibal) jiñi lac piʼʌlob cʼʌlʌl ti 1914.
1. ¿Chuqui tsiʼ yʌlʌ jiñi Biblia?
Jiñi libro i chaʼan Daniel miʼ yʌl chaʼan jiñi i Yumʌntel Dios mi caj i tech i chaʼlen yumʌntel cheʼ bʌ tsaʼix ñumi «wucpʼejl [7] jab» (Daniel 4:16, 17). Cheʼ bʌ ñumeñix cabʌl jab, Jesús tsiʼ taja ti tʼan jaʼel jiñi jach bʌ 7 jab bajcheʼ «jiñi i yorajlel jiñi tejclum tac», i tsiʼ pʌsʌ chaʼan jiñi i yorajlel jiñi tejclum tac maxto añic jilem (Lucas 21:24). Cheʼ bajcheʼ mi caj laj qʼuel, jiñi 7 jab tsaʼ ujti ti 1914.
2. ¿Chuqui tsaʼ caji ti ujtel ila ti Pañimil yicʼot bajcheʼ yilal i melbal jiñi lac piʼʌlob cʼʌlʌl ti 1914?
Jiñi xcʌntʼañob i chaʼan Jesús tsiʼ cʼajtibeyob: «¿Chuqui tac mi caj i yʌcʼ ti cʌñol chaʼan wʌʼix añet yicʼot chaʼan lʌcʼʌlix i yorajlel i jilibal pañimil?» (Mateo 24:3). Jesús tsiʼ yʌlʌ chaʼan cabʌl chuqui miʼ caj ti ujtel cheʼ bʌ tsaʼix i teche yumʌntel yaʼ ti panchan bajcheʼ Rey yaʼ tiʼ Yumʌntel Dios. Jumpʼejl ejemplo, tsiʼ yʌlʌ chaʼan miʼ cajel guerra tac, wiʼñal yicʼot yujquel lum (pejcan Mateo 24:7). Cheʼ jaʼel, jiñi Biblia tsiʼ yʌlʌ chaʼan i melbal jiñi lac piʼʌlob ti «jiñi cojix tac bʌ qʼuin» «bʌbʌqʼuen» miʼ cajel (2 Timoteo 3:1-5). Cʼʌlʌl cheʼ ti 1914, jamʌ tsiquil tsaʼ caji ti ujtel pejtelel iliyi.
3. ¿Chucoch mach ñumen weñix chuqui tsaʼ caji ti ujtel ila ti Pañimil cheʼ bʌ tsaʼix i teche yumʌntel jiñi i Yumʌntel Dios?
Cheʼ bʌ Jesús sujtemix ti Rey chaʼan jiñi i Yumʌntel Dios, tsaʼ caji guerra yaʼ ti panchan, Jesús tsiʼ contraji Satanás yicʼot jiñi i xibajob. Satanás tiʼ sʌtʌ jiñi guerra, i cheʼ bajcheʼ miʼ yʌl jiñi Biblia, «tsaʼ chojqui jubel ti pañimil, i jiñi i yángelob tsaʼ chojquiyob jubel yicʼot» (Apocalipsis 12:9, 10, 12). Satanás wen michʼ come yujil chaʼan mach jalix mi caj i jisʌntel. Jin chaʼan woli (choncol) i yʌcʼ wocol tiʼ pejtelel Pañimil. ¡Jiñʌch tiʼ caj mach weñic chuqui tac woli (yʌquel) i yujtel ila ti Pañimil! Pero jiñi i Yumʌntel Dios mi caj i jisan pejtelel ili wocol tac.
LAʼ LAC ÑUMEN ÑAʼTAN
La laj qʼuel chuqui tac miʼ pʌs chaʼan jiñi i Yumʌntel Dios tsaʼ tejchi ti 1914 yicʼot bajcheʼ miʼ mejlel i coltañonla.
4. Jiñi profecía tac miʼ pʌs chaʼan jiñi i Yumʌntel Dios tsaʼ tejchi ti 1914
Dios an chuqui tsiʼ yʌqʼue i ñajlen jiñi Nabucodonosor, juntiquil rey ti Babilonia ti wajali. Jiñi tsaʼ bʌ i yʌlʌ Daniel chaʼan jiñi i ñajal Nabucodonosor miʼ pʌs chaʼan jumpʼejlʌch profecía chaʼan bʌ jiñi i yumʌntel Nabucodonosor yicʼot chaʼan jiñi i Yumʌntel Dios (pejcanla Daniel 4:17).a
Pejcanla Daniel 4:20-26. Cheʼ jiñi, cʼʌñʌla jiñi recuadro chaʼan mi laʼ jacʼ ili cʼajtiya tac:
A) ¿Chuqui tsiʼ qʼuele Nabucodonosor tiʼ ñajal? (Qʼuelela jiñi versículo 20 yicʼot 21).
B) ¿Chuqui mi caj i chaʼlen jiñi colem teʼ? (Qʼuelela jiñi versículo 23).
C) ¿Chuqui miʼ caj ti ujtel cheʼ bʌ tsaʼix ñumi jiñi 7 jab? (Qʼuelela jiñi versículo 26).
Jiñi colem teʼ tsaʼ bʌ i ñajle Nabucodonosor yicʼot jiñi i Yumʌntel Dios
JIÑI PROFECÍA (Daniel 4:20-36)
Yumʌntel
A) Juntejc colem teʼ
Maʼañic majqui miʼ chaʼlen Yumʌntel
B) «Seqʼuela jini teʼ» i laʼ ñumic 7 jab
Miʼ chaʼ tejchel jiñi Yumʌntel
C) «Mi caj a chaʼ chʼʌm a yumʌntel»
Ñaxam bʌ bajcheʼ ti tsʼʌctiyi:
D) ¿Majqui jiñi colem teʼ? (Qʼuelela jiñi versículo 22).
E) ¿Jalaqui tsiʼ cʌyʌ yumʌntel? (Pejcanla Daniel 4:29-33).
F) ¿Chuqui tsiʼ chaʼle cheʼ bʌ tsaʼix ñumi 7 jab? (Pejcanla Daniel 4:34-36).
ÑAXAM BɅ BAJCHEʼ TI TSʼɅCTIYI
Yumʌntel
D) Nabucodonosor, i rey Babilonia
Maʼañic majqui miʼ chaʼlen Yumʌntel
E) Cheʼ ñumeñix jiñi jabil 606 m.t.C.b Nabucodonosor miʼ sojquel i miʼ cʌy i chaʼlen yumʌntel 7 jab
Miʼ chaʼ tejchel jiñi Yumʌntel
F) Nabucodonosor miʼ chaʼ tojʼan i miʼ chaʼ tech yumʌntel
I chaʼpʼejlel bajcheʼ ti tsʼʌctiyi:
G) ¿Majquiyob jiñi colem teʼ? (Pejcanla 1 Crónicas 29:23).
H) ¿Jalaqui tsiʼ cʌyʌyob yumʌntel? ¿Bajcheʼ la cujil chaʼan maʼañic tsiʼ chaʼleyob yumʌntel cheʼ bʌ Jesús tsajñi ila ti Lum? (Pejcanla Lucas 21:24).
I) ¿Baqui yicʼot jalaqui tsaʼ chaʼ waʼchoconti ili yumʌntel?
I CHAʼPʼEJLEL BAJCHEʼ TI TSʼɅCTIYI
Yumʌntel
G) Jiñi israelitajob tsaʼ bʌ ochiyob bajcheʼ rey chaʼan miʼ yumañob i tejclum Dios
Maʼañic majqui miʼ chaʼlen Yumʌntel
H) Cheʼ ti jabil 607 m.t.C. Jerusalén miʼ jisʌntel, cheʼ bʌ 2,520 jab maʼañic juntiquil israelita tsaʼ bʌ ochi bajcheʼ rey
Miʼ chaʼ tejchel jiñi Yumʌntel
I) Jesús miʼ tech yumʌntel yaʼ ti panchan ti 1914
¿Jaypʼejl miʼ jalʼan jiñi 7 jab?
An parte tac yaʼ ti Biblia muʼ bʌ i coltañonla lac chʼʌmben i sujm jiñi yan tac bʌ parte. Jumpʼejl ejemplo, jiñi Apocalipsis miʼ yʌl chaʼan uxpʼejl jab yicʼot ojlil jiñʌch 1,260 qʼuin (Apocalipsis 12:6, 14). Cheʼ chaʼ sujtel mi lac tsic jiñi uxpʼejl jab yicʼot ojlil mi lac taj 7 jab, yom i yʌl, 2,520 qʼuin. An i tajol jiñi Biblia miʼ yʌl chaʼan jumpʼejl qʼuin jumpʼejlʌch jab (Ezequiel 4:6). Jin chaʼan, jiñi 7 jab muʼ bʌ i taj ti tʼan jiñi libro i chaʼan Daniel, 2,520 jab.
5. Cheʼ ti 1914 tsaʼ qʼuextʌyi jiñi pañimil
Jesús tsiʼ yʌlʌ bajcheʼ yilal miʼ cajel ili pañimil cheʼ bʌ tsaʼix i teche yumʌntel. Pejcanla Lucas 21:9-11 i tem alʌla iliyi:
Ti jiñi woli bʌ i taj ti tʼan ili profecía, ¿baqui bʌ an a qʼuele o an a wubi ti alol?
Jiñi apóstol Pablo tsiʼ yʌlʌ bajcheʼ yilal miʼ cajelob jiñi lac piʼʌlob ti jiñi cojix tac bʌ qʼuin che’ woliyob ti yumʌntel jiñi yumʌlob ila ti Pañimil. Pejcanla 2 Timoteo 3:1-5 i tem alʌla iliyi:
Ti jiñi melbal tac woli bʌ i yʌl ili texto, ¿baqui bʌ an a qʼuele jatet?
6. Añʌch chuqui yom mi lac mel cheʼ la cujil chaʼan jiñi i Yumʌntel Dios wolix ti yumʌntel
Pejcanla Mateo 24:3, 14 i tem alʌla iliyi:
¿Chuqui ti eʼtel miʼ pʌs chaʼan jiñi i Yumʌntel Dios wolix ti yumʌntel?
¿Bajcheʼ miʼ mejlel a chaʼlen coltaya ti ili eʼtel?
Jiñi i Yumʌntel Dios wolix ti yumʌntel, i tsʼitaʼ jachix yom chaʼan miʼ chʼʌm tiʼ wenta pejtelel jiñi Pañimil. Pejcanla Hebreos 10:24, 25 i tem alʌla iliyi:
¿Chuqui yom mi lac mel ti lac pejtelel «cheʼ woli laj qʼuel chaʼan woliʼ lʌcʼtiyel jiñi qʼuin»?
Mi an chuqui maʼ cʌn i a wujil chaʼan miʼ mejlel i coltan yambʌlob, ¿chuqui mi caj a mel?
AN MUʼ BɅ I CAJTIBEÑOÑOBLA: «¿Chucoch miʼ wen alob jiñi i testigojob Jehová jiñi jabil 1914?».
¿Bajcheʼ mi caj a jacʼ?
TSAʼ BɅ LAJ CɅÑɅ
Jiñi profecía tac yicʼot jiñi woli bʌ i yujtel tiʼ pejtelel pañimil miʼ pʌs chaʼan jiñi i Yumʌntel Dios wolix ti yumʌntel. I joñonla mi lac pʌs chaʼan mucʼʌch lac ñop cheʼ bʌ mi lac sub jiñi i Yumʌntel Dios yicʼot cheʼ bʌ mi la cajñel ti tempa bʌ tac.
¿Chuqui tsaʼ cʌñʌ?
¿Chuqui tsaʼ ujti cheʼ bʌ tsaʼix ujti jiñi 7 jab muʼ bʌ i taj ti tʼan jiñi libro i chaʼan Daniel?
¿Chuqui miʼ yʌqʼueñet a ñop chaʼan jiñi i Yumʌntel Dios tsaʼ tejchi ti 1914?
¿Bajcheʼ miʼ mejlel a pʌs chaʼan maʼ ñop chaʼan jiñi i Yumʌntel Dios wolix ti yumʌntel?
CɅÑɅ YAN TAC BɅ
Qʼuele bajcheʼ miʼ yʌlob jiñi am bʌ i wen qʼueleyob jun bajcheʼ an wen qʼuextʌyi jiñi pañimil cʼʌlʌl ti 1914.
«Jiñi i melbal lac piʼʌlob tsaʼ wen qʼuextʌyi» (¡Jamʌx a wut!, abril i chaʼan 2007)
Qʼuele bajcheʼ tsiʼ qʼuextʌbe i cuxtʌlel juntiquil wiñic jiñi profecía chaʼan Mateo 24:14.
«Mic wen mulan jiñi béisbol» (Tema am bʌ ti Lac Tsictesʌbentel)
¿Bajcheʼ la cujil chaʼan jiñi profecía ti jiñi capítulo 4 chaʼan Daniel woliʼ taj ti tʼan jiñi i Yumʌntel Dios?
¿Chuqui miʼ pʌs chaʼan jiñi 7 jab muʼ bʌ i yʌl jiñi capítulo 4 chaʼan Daniel tsaʼ ujti ti 1914?
a Mi laj cʼʌn m.t.C. chaʼan mi la cʌl cheʼ bʌ maxto tilemic Cristo. Yicʼot mi laj cʼʌn t.C. chaʼan mi la cʌl cheʼ bʌ tilemix Cristo.
b Pejcan jiñi tema «¿Baqui ora tsaʼ tejchi jiñi i Yumʌntel Dios?» parte 1 yicʼot parte 2, muʼ bʌ i tilel ti ili cʌntesʌntel yaʼ ti parte «Cʌñʌ yan tac bʌ».
-
-
Jiñi muʼ bʌ caj i mel jiñi i Yumʌntel Dios¡Ubin a tijicñʌyel tiʼ pejtelel ora! Estudio loqʼuem bʌ ti Biblia
-
-
CɅNTESɅNTEL 33
Jiñi muʼ bʌ caj i mel jiñi i Yumʌntel Dios
Jiñi i Yumʌntel Dios wolix (choncolix) ti yumʌntel. Tsʼitaʼ jachix yom chaʼan cabʌl chuqui mi caj i qʼuextan ila ti Pañimil. Laʼ laj qʼuel chuqui tac wem bʌ mi caj i mel ili yumʌntel yicʼot chucoch mucʼʌch mejlel a pijtan chaʼan miʼ tsʼʌctiyel.
1. ¿Chuqui miʼ cajel i mel jiñi i Yumʌntel Dios chaʼan chaʼ añix ñʌchʼtʌlel yicʼot miʼ chaʼ mejlel chuqui toj ila ti Pañimil?
Ti jiñi guerra chaʼan Armagedón, Jesús, jiñi Rey tiʼ Yumʌntel Dios, mi caj i jisan jiñi jontoloʼ bʌ (mañajoʼ bʌ) yicʼot jiñi yumʌlob (Apocalipsis 16:14, 16). Ti jiñi bʌ ora mi caj i tsʼʌctiyel muʼ bʌ i yʌl jiñi Biblia: «Mach jalix mi caj i jilel [...] jini xjontolil» (Salmo 37:10). Jesús mi caj i cʼʌn ili yumʌntel chaʼan miʼ chaʼ chʼʌm tilel jiñi ñʌchʼtʌlel yicʼot chaʼan muqʼuix i mejlel chuqui toj tiʼ pejtelel Pañimil (pejcan Isaías 11:4).
2. ¿Bajcheʼ yilal mi caj lac chumtʌl cheʼ baʼ ora miʼ mejlel chuqui yom Dios ila ti Pañimil?
Cheʼ bʌ jiñʌchix i Yumʌntel Dios woli (yʌquel) i yuman ili Pañimil, «mi caj i yʌqʼuentelob jini pañimil jini tojoʼ bʌ. Mi caj i yajñelob tiʼ pejtelel ora» (Salmo 37:29). ¡Ñaʼtancu bajcheʼ yilal mi caj lac chumtʌl cheʼ bʌ cojach cuxul mi caj i yajñelob jiñi weñoʼ bʌ i pusicʼal, jiñi muʼ bʌ i cʼuxbiñob Jehová yicʼot jiñi muʼ bʌ i cʼuxbiñob i piʼʌlob! ¡Wen utsʼatax miʼ cajel! Maʼañix majqui mi caj i cʼamʼan i ti lac pejtelel mi caj lac chumtʌl tiʼ pejtelel ora.
3. ¿Chuqui mi caj i mejlel i mel jiñi i Yumʌntel Dios cheʼ bʌ tsaʼix i jisa jiñi jontoloʼ bʌ?
Cheʼ bʌ Jesús tsaʼix i jisa jiñi jontoloʼ bʌ mi caj i chaʼlen eʼtel bajcheʼ Rey Mil jab. Ti jimbʌ ora, Jesús yicʼot jiñi 144 mil muʼ bʌ caj i chaʼlen yumʌntel yicʼotob mi caj i coltañoñobla chaʼan mi lac loqʼuel tiʼ pʼʌtʌlel jiñi mulil i chaʼan mi lac sujtel ti toj. Cheʼ bʌ miʼ yujtel jiñi Mil jab, ili Pañimil sujtemix ti jumpʼejl utsʼatax bʌ paraíso, i tijicñayix mi caj lac chumtʌl come mi lac jacʼben i mandar tac Jehová. Cheʼ jiñi, Jesús mi caj i chaʼ sutqʼuiben i Tat jiñi yumʌntel. I jiñi i cʼabaʼ Dios mi caj i junyaj sʌqʼuesʌntel (Mateo 6:9, 10). Cheʼ jiñi, tsiquil mi caj i qʼuejlel chaʼan Jehová juntiquilʌch wem bʌ yumʌl yicʼot chaʼan miʼ cʌntan i tejclum. Ti wiʼil, Jehová mi caj i jisan Satanás, jiñi xibajob yicʼot jiñi muʼ bʌ i chanʼesañob i bʌ tiʼ contra i yumʌntel (Apocalipsis 20:7-10). Pejtelel jiñi wen tac bʌ muʼ bʌ caj i mel jiñi i Yumʌntel Dios maʼañic baʼ ora mi caj i jilel.
LAʼ LAC ÑUMEN ÑAʼTAN
Laʼ laj qʼuel chucoch miʼ mejlel lac ñop chaʼan Dios mi caj i cʼʌn jiñi i Yumʌntel chaʼan miʼ tsʼʌctesan pejtelel chuqui albil i chaʼan chaʼan jiñi talto bʌ qʼuin.
4. Jiñi i Yumʌntel Dios mi caj i jisan jiñi yumʌlob
Eclesiastés 8:9 miʼ yʌl chaʼan jiñi wiñicob miʼ «cʼʌñob i pʼʌtʌlel chaʼan miʼ jisañob i piʼʌlob». Jehová mi caj i cʼʌn i Yumʌntel chaʼan miʼ tojʼesan ili wocol.
Pejcanla Daniel 2:44 yicʼot 2 Tesalonicenses 1:6-8, i tem alʌla iliyi:
¿Chuqui mi caj i tumbeñob Jehová yicʼot Jesús jiñi yumʌlob yicʼot jiñi muʼ bʌ i coltañob?
¿Bajcheʼ miʼ coltañet jiñi a cʌñʌyix bʌ tiʼ tojlel Jehová yicʼot Jesús chaʼan maʼ ñop chaʼan tojʌch chuqui mi caj i melob yicʼot junlajal mi caj i qʼueloñobla?
5. Jesús jiñʌch wem bʌ lac Rey
Come Jesús jiñʌch jiñi Rey tiʼ Yumʌntel Dios cabʌl chuqui mi caj i mel chaʼan ti lac pejtelel wen mi la cajñel. Qʼuelela jiñi VIDEO chaʼan mi laʼ qʼuel bajcheʼ tsiʼ pʌsʌ Jesús chaʼan yomʌch i coltañonla yicʼot chaʼan Dios tsiʼ yʌqʼue i pʼʌtʌlel chaʼan mucʼʌch mejlel i mel.
Jiñi tsaʼ tac bʌ i mele Jesús cheʼ bʌ tsajñi ila ti Lum miʼ pʌs muʼ bʌ caj i mel jiñi i Yumʌntel Dios. Ti jiñi muʼ tac bʌ i yʌl jiñi Biblia, ¿baqui bʌ a wom a ñumen qʼuel chaʼan miʼ tsʼʌctiyel? Pejcanla tiʼ pejtelel jiñi texto.
CHEʼ BɅ JESÚS TSAJÑI ILA TI PAÑIMIL...
YAʼ TI PANCHAN, JESÚS...
tsiʼ tiqʼui jiñi icʼ (Marcos 4:36-41)
mi caj i tojʼesan pejtelel jiñi am bʌ melbenti ili lum (Isaías 35:1, 2)
tsiʼ mele jumpʼejl milagro chaʼan miʼ yʌqʼuen i bʌl i ñʌcʼ cabʌl lac piʼʌlob (Mateo 14:17-21)
mi caj i jisan jiñi wiʼñal am bʌ tiʼ pejtelel pañimil (Salmo 72:16)
tiʼ tsʼʌca jiñi cʼamoʼ bʌ (Lucas 18:35-43)
mi caj i coltañonla chaʼan ti lac pejtelel cʼoqʼuix mi la cajñel (Isaías 33:24)
tsiʼ cuxtesa jiñi chʌmeñoʼ bʌ (Lucas 8:49-55)
mi caj i jisan jiñi chʌmel (Apocalipsis 21:3, 4)
6. Wocolix i yʌlʌ jiñi i Yumʌntel Dios utsʼatax mi caj lac chumtʌl
Jiñi i Yumʌntel Dios mi caj i mel jiñi yom bʌ Jehová chaʼañonla ti ñaxan. Mi caj lac chumtʌl tiʼ pejtelel ora ila ti Pañimil cheʼ bʌ sujtemix ti jumpʼejl paraíso. Qʼuelela jiñi VIDEO chaʼan mi la’ ñaʼtan bajcheʼ Jehová woliʼ cʼʌn Jesús chaʼan miʼ mel chuqui yom bʌ chaʼañonla.
Pejcanla Salmo 37:4 i tem alʌla iliyi:
¿Bajcheʼ yubil maʼ wubin a bʌ cheʼ bʌ a wujil chaʼan Jehová «mi caj i yʌqʼueñet chuqui yom a pusicʼal»?
AN MUʼ BɅ I YɅLOB: «Mi ti lac pejtelel mi lac chaʼlen wersa miʼ mejlel lac tojʼesan jiñi wocol tac am bʌ ila ti Pañimil».
¿Chuqui ti wocol tac mi caj i tojʼesan jiñi i Yumʌntel Dios maʼañic bʌ miʼ mejlel i tojʼesan jiñi yumʌlob?
TSAʼ BɅ LAJ CɅÑɅ
Jiñi i Yumʌntel Dios mi caj i mel chuqui yom. Mi caj i sujtesan tiʼ pejtelel ili Pañimil ti jumpʼejl paraíso i cojach mi caj i chumtʌlob jiñi muʼ bʌ i chʼujutesañob Jehová tiʼ pejtelel ora.
¿Chuqui tsaʼ cʌñʌ?
¿Chuqui mi caj i mel jiñi i Yumʌntel Dios chaʼan miʼ sʌqʼuesan i cʼabaʼ Jehová?
¿Chucoch la cujil chaʼan jiñi i Yumʌntel Dios mi caj i tsʼʌctesan jiñi albil bʌ i chaʼan Jehová?
Ti jiñi muʼ bʌ cajel i mel jiñi i Yumʌntel Dios, ¿baqui bʌ jiñi a wom bʌ a ñumen qʼuel?
CɅÑɅ YAN TAC BɅ
Qʼuele chuquiyes jiñi Armagedón.
Qʼuele chuqui tac mi caj i yujtel cheʼ bʌ wolix jiñi cabʌl wocol (Mateo 24:21).
¿Bajcheʼ miʼ mejlel i ñaʼtañob i bʌ jiñi familiajob cheʼ bʌ yaʼix añob ti Paraíso wocolix i yʌlʌ chaʼan muʼ bʌ caj i mel jiñi i Yumʌntel Dios?
Pejcan jiñi tema «Tsaʼ c melbe c bʌ cabʌl cʼajtiya tac» chaʼan maʼ qʼuel bajcheʼ juntiquil wiñic tsiʼ taja jiñi muʼ bʌ caj i tojʼesʌben i wocol.
«Jiñi Biblia tsiʼ qʼuextʌbeyob i pensar» (Lac Tsictesʌbentel, 1 i chaʼan enero, 2012)
-