¿Chuqui miʼ mejlel c mel chaʼan maʼañic mij cʌlʌx chaʼlen pensar?
Cheʼ mi lac wen chaʼlen pensar miʼ mejlel i ticʼlañonla. Miʼ mejlel i ñumen aqʼueñonla wocol cheʼ bajcheʼ jiñi am bʌ lac chaʼan ti ñaxan.
Muʼ bʌ i mejlel lac mel chaʼan maʼañic mi laj cʌlʌx chaʼlen pensar
Mach a wen aqʼuen i yorajlel chaʼan maʼ qʼuel, maʼ pejcan o maʼ ñʌchʼtan mach bʌ weñic noticia. Mach wersajic chaʼan maʼ luʼ ñaʼtan chuqui tac miʼ yujtel. Cheʼ mi lac ñumen aqʼuen i yorajlel mucʼ jach i yʌcʼonla ti pensar yicʼot chaʼan mi lac wen chaʼlen bʌqʼuen.
Texto: «I chʼijiyemlel lac pusicʼal miʼ tiquesan lac bʌcʼtal» (Proverbios 17:22).
«Mach wocolic chaʼan mi lac tech laj cʌlʌx qʼuel noticia tac, pero mach weñic jiñi. Maʼañic mic wen chaʼlen pensar cheʼ bʌ maʼañic mic wen qʼuel noticia» (John).
Ñaʼtan iliyi: ¿Jayajl yom maʼ qʼuel jiñi noticia chaʼan maʼ ñaʼtan chuqui woliʼ yujtel ti jujumpʼejl qʼuin?
Aqʼuen i yorajlel chuqui maʼ mel. Chaʼlen wersa chaʼan an jach i yorajlel chaʼan maʼ tejchel, maʼ chaʼlen uchʼel, maʼ mel a weʼtel ti a wotot yicʼot chaʼan maʼ wʌyel. Mi mucʼʌch a mel cheʼ bajcheʼ an ti a horario mi caj i coltañet yicʼot maʼañic mi caj a wen chaʼlen pensar.
Texto: «Jini bʌx bʌ ti eʼtel muʼ bʌ i ñaʼtan chuqui yom i mel miʼ yʌcʼ ti pʼojlel i chubʌʼan» (Proverbios 21:5).
«Cheʼ bʌ tsaʼ tejchi jiñi COVID-19 jiñi ñʌmʌl bʌ c mel ti ñaxan mach cheʼix tsaʼ caji c mel. I tsaʼ jach c wen ñusaqʼuin c mel mach bʌ añic miʼ coltañon. Come com j cʼʌn ti wen jiñi hora am bʌ c chaʼan, tsaʼ c chaʼ mele jumpʼejl horario chaʼan chuqui yom bʌ mic mel ti jujumpʼejl qʼuin» (Joseph).
Ñaʼtan iliyi: ¿Am ba jumpʼejl a horario? Cheʼ miʼ yujtel jiñi qʼuin, ¿tsaʼ ba i coltayet chaʼan maʼ wubin a tijicñʌyel come tsaʼʌch a tsʼʌctesa?
Ñaʼtan chuqui wen. Mi cojach maʼ ñaʼtan chuqui jiñi wem bʌ tsaʼ mejli a mel i wentʌlel, o chuqui tac mach bʌ weñic miʼ mejlel ti ujtel mucʼ jach cajel a ñumen chaʼlen pensar. Ñopo jach a cʼajtesan chaʼpʼej uxp’ejl muʼ bʌ a qʼuel ti ñuc.
Texto: «Pʌsʌla chaʼan mucʼʌch laʼ wʌcʼ wocolix laʼ wʌlʌ» (Colosenses 3:15).
«Cheʼ bʌ mic pejcan jiñi Biblia maʼañic mij cʌy tic jol mach bʌ weñic noticia, jin jach mij cʌy chuqui wem bʌ. I mucʼʌch i coltañon» (Lisa).
Ñaʼtan iliyi: ¿Jin jach ba maʼ chʌn ñaʼtan jiñi mach bʌ weñic miʼ yujtel ti a tojlel, i maʼ ñajʌtesan pejtelel chuqui wem bʌ an ti a cuxtʌlel?
Ñaʼtan yambʌlob. Mach a ñajtʼesan a bʌ tiʼ tojlel yambʌlob cheʼ bʌ an chuqui maʼ wen pensarin, ñaʼtan bajcheʼ tac miʼ mejlel a coltañob jiñi i cʼʌjñibal bʌ i chaʼañob.
Texto: «Mach bajñel laʼ wenlelic mi laʼ sʌclan, mi laʼ sʌclan i chaʼan yambʌlob jaʼel» (Filipenses 2:4).
«Cheʼ bʌ an chuqui maʼ mel tiʼ tojlel yañoʼ bʌ miʼ yʌqʼueñet a tijicñʌyel. An chuqui wem bʌ maʼ cʌybeñob tiʼ jol i cheʼ jaʼel maʼañic maʼ wen pensarin jiñi a wocol cheʼ bʌ yaʼan a wicʼotob» (María).
Ñaʼtan iliyi: Ti jiñi a cʌñʌyoʼ bʌ, ¿am ba majqui yom coltʌntel? ¿Chuqui miʼ mejlel a mel tiʼ tojlel?
Cʌntan a bʌ. Mele ejercicio yicʼot cʼaja a wo ti wen. Yom wen maʼ cʼux a waj. Mi mucʼʌch a cʌntan a bʌ mi caj i ñumen coltañet chaʼan wen jach bajcheʼ maʼ qʼuel jiñi a cuxtʌlel i chaʼan maʼañic maʼ cʌlʌx chaʼlen pensar.
Texto: «Jiñi ejercicio mucʼʌch i tsʼitaʼ aqʼueñonla lac wenlel» (1 Timoteo 4:8).
«Joñon quicʼot calobil maʼañic mi lon c wen mejlel ti loqʼuel ti ejercicio, jin chaʼan tsaʼix j qʼuele lojon bajcheʼ hora miʼ mejlel lon c mel ti lon cotot. Jiñi an i coltayon lojon chaʼan wen mi cubin lon c bʌ yicʼot chaʼan ñumen wen mic pejcan lon c bʌ (Catherine).
Ñaʼtan iliyi: ¿Yomto ba maʼ ñumen cʼux ti wen jiñi a waj yicʼot maʼ ñumen mel ejercicio chaʼan cʼocʼ maʼ wajñel?
Ili ticʼojel tac an i colta cabʌlob chaʼan maʼañic chuqui miʼ wen pensariñob. ¿I chuqui yambʌ an i coltayob? Jiñʌch cheʼ an i cʌñʌyob jiñi wʌn albil tac bʌ i chaʼan jiñi Biblia chaʼan jiñi talto bʌ qʼuin, tʼan tac mucʼʌch bʌ i mejlel lac ñop. Pejcan jiñi tema, «¿Chuqui mi caj i mel jiñi i Yumʌntel Dios?».