Jumpʼejl i sujm bʌ pijtaya chaʼan miʼ tojʼan ili pañimil

¿Bajcheʼ yilal maʼ qʼuel jiñi talto bʌ qʼuin? Anquese cabʌl lac wocol ti ili qʼuin, an muʼ bʌ i chaʼleñob wersa chaʼan weñʌch chuqui miʼ ñaʼtañob. ¿Pero muʼ ba i mejlel lac pijtan chaʼan mi caj i tojʼan ili pañimil? Mucʼʌch: Jiñi Biblia miʼ yʌqʼueñonla i sujm bʌ pijtaya.

¿Chuqui lac pijtaya miʼ yʌqʼueñonla jiñi Biblia?

Jiñi Biblia maʼañic miʼ mucbeñonla jiñi wocol am bʌ ili ora, pero miʼ yʌl chaʼan jiñi wocol mucʼʌch caj i jilel. Laʼ laj qʼuel chuqui tac mi caj i jilel.

Wocol: Cheʼ maʼañic ototʌl tac

Muʼ bʌ i yʌl jiñi Biblia: «Winicob mi caj i waʼchocoñob i yotot. Yaʼi mi caj i chumtʌlob» (Isaías 65:21).

Muʼ bʌ caj i yujtel: Pejtelel lac piʼʌlob añob i yotot miʼ cajelob.
Wocol: Maʼañic eʼtel yicʼot an pʼumpʼuñiyel

Muʼ bʌ i yʌl jiñi Biblia: «Tijicñayob jini yajcʌbiloʼ bʌ c chaʼan, come i chaʼañobʌch pejtelel i wut i yeʼtel» (Isaías 65:22).

Muʼ bʌ caj i yujtel: Pejtelel lac piʼʌlob mi caj i yʌqʼuentelob eʼtel muʼ bʌ i mulañob i muʼ bʌ i yʌqʼueñob i yubin chaʼan añobʌch i cʼʌjñibal.
Wocol: Jiñi toʼol ticʼlʌntel

Muʼ bʌ i yʌl jiñi Biblia: «Toj jaʼel mi caj i chaʼleñob yumʌl jini ñucoʼ bʌ añoʼ bʌ i yeʼtel» (Isaías 32:1).

Muʼ bʌ caj i yujtel: Toj chuqui mi caj i melbentel pejtelel lac piʼʌlob. Maʼañix majqui mi caj i ñusan pʼumpʼuñiyel, mi toʼol ticʼlʌntel tiʼ caj i colorlel i pʌchʌlel o tiʼ caj chuqui an i chaʼañob.
Wocol: Jiñi desnutrición yicʼot wiʼñal

Muʼ bʌ i yʌl jiñi Biblia: «Mi caj i yʌcʼ cabʌl i cuch jini cholel yaʼ ti joctʌl cʼʌlʌl ti pam tac jini wits» (Salmo 72:16).

Muʼ bʌ caj i yujtel: Mi caj lac taj cabʌl i bʌl lac ñʌcʼ ti lac pejtelel. Mach wiñalic mi caj lac majlel ti wʌyel i maʼañix jiñi desnutrición.
Wocol: Jiñi jontolil tac

Muʼ bʌ i yʌl jiñi Biblia: «Jujuntiquil mi caj i yajñel tiʼ yotot tiʼ ñʌchʼtʌlel i pusicʼal. Maʼanic majch mi caj i bʌcʼtesan» (Miqueas 4:4).

Muʼ bʌ caj i yujtel: Maʼañix majqui mi caj i chaʼlen bʌqʼuen come mi caj i jisʌntelob jiñi jontoloʼ bʌ, jini tojoʼ bʌ «mi caj i yʌqʼuentelob jini pañimil» (Salmo 37:10, 29).
Wocol: Jiñi guerra tac

Muʼ bʌ i yʌl jiñi Biblia: «Maʼanix mi caj i chʌn chaʼlen contra jumpʼejl tejclum tiʼ tojlel yambʌ. Maʼanix mi caj i chʌn ñopob guerra» (Isaías 2:4).

Muʼ bʌ caj i yujtel: Miʼ cajel ñʌchʼtʌlel tiʼ pejtelel Pañimil (Salmo 72:7). Maʼañix majqui mi caj i yubin wocol chaʼan jiñi guerra, maʼañix majqui miʼ caj ti putsʼel ti yambʌ país mi jiñicto uqʼuel tiʼ caj chaʼan an majqui tsaʼ chʌmiyob i chaʼan.
Wocol: Jiñi cʼamʌjel tac

Muʼ bʌ i yʌl jiñi Biblia: «Maʼanix mi juntiquilic muʼ bʌ caj i yʌl: ‹Cʼamon›» (Isaías 33:24).

Muʼ bʌ caj i yujtel: Maʼañix mi caj lac chʌn qʼuelob jiñi discapacitadojob yicʼot jiñi cʼamoʼ bʌ (Isaías 35:5, 6). Jiñi Biblia miʼ yʌl chaʼan «maʼañix miʼ cajel chʌmel» (Apocalipsis 21:4).
Wocol: I bibʼesʌntel ili Pañimil

Muʼ bʌ i yʌl jiñi Biblia: «Ti jim bʌ ora jini tiquin bʌ lum mi caj i yubin i tijicñʌyel. Miʼ caj ti nich yaʼ baʼ jochol jini lum» (Isaías 35:1).

Muʼ bʌ caj i yujtel: Tiʼ pejtelel ili Pañimil mi caj i sujtel ti paraíso chaʼan miʼ chumtʌlob jiñi quixtañujob cheʼ bajcheʼ yom Dios ti ñaxan (Génesis 2:15; Isaías 45:18).

¿Wocol ba maʼ wubin chaʼan maʼ ñop chaʼan mi caj ti tsʼʌctiyel muʼ bʌ i yʌl jiñi Biblia?

Mach mulilic cheʼ maʼ ñaʼtan bajcheʼ jiñi. Pero ¿chucoch maʼañic maʼ wen tsajin chuqui muʼ bʌ i yʌl jiñi Biblia chaʼan ti talto bʌ qʼuin? Muʼ bʌ i yʌl jiñi Biblia mach lajalic cheʼ bajcheʼ miʼ ñaʼtañob jiñi quixtañujob ti pañimil. Muʼ bʌ i yʌl jiñi Biblia tilemʌch ti Dios. ¿Chucoch qʼuexel muʼ bʌ i yʌl jiñi Biblia cheʼ bajcheʼ miʼ ñaʼtañob jiñi quixtañujob? Laʼ laj qʼuel chaʼchajp chucoch:

Miʼ mejlel lac ñop chuqui miʼ yʌl Dios. Jiñi Biblia miʼ yʌl chaʼan Dios mach mejlic ti lot (Tito 1:2). Yicʼot jaʼel, cojach Dios miʼ mejlel i yʌl chuqui mi caj ti ujtel (Isaías 46:10). Yaʼ ti Biblia an cabʌl ejemplo muʼ bʌ i pʌs chaʼan Dios miʼ tsʼʌctesan muʼ bʌ i wʌn al. Mi a womto a ñumen cʌn iliyi, qʼuele jiñi video ¿Bajcheʼ mi lac ñaʼtan chaʼan isujmʌch muʼ bʌ i yʌl jiñi Biblia?
Dios miʼ mejlel i jisan jiñi lac wocol tac. Jiñi Biblia miʼ yʌl chaʼan Dios an i pʼʌtʌlel chaʼan «miʼ mel pejtel chuqui yom i pusicʼal» (Salmo 135:5, 6). Dios maʼañic chuqui miʼ mʌctan chaʼan miʼ tsʼʌctesan i tʼan. Yom i coltañonla come miʼ cʼuxbiñonla (Juan 3:16).

Anquese i sujmʌch iliyi tajol maʼ cʼajtiben a bʌ: «Mi Dios miʼ mejlel i coltañonla i mi mucʼʌch mejlel i mel, ¿chucoch anto cabʌl wocol tac?». Mi a wom a tajben i jacʼbal ili cʼajtiya, qʼuele jiñi video ¿Chucoch Dios woliʼ yʌcʼ ti ujtel jiñi wocol?

¿Bajcheʼ mi caj i tsʼʌctiyel muʼ bʌ i yʌl jiñi Biblia?

Chaʼan miʼ tsʼʌctiyel i tʼan, Dios mi caj i cʼʌn jiñi i Yumʌntel am bʌ ti panchan. Muʼ bʌ caj i mel i yeʼtel chaʼan ili Yumʌl jiñʌch Jesucristo, Dios tsiʼ yʌqʼue tiʼ wenta chaʼan miʼ cʌntan ili Lum yicʼot jiñi muʼ bʌ caj i chumtʌlob. Cheʼ bʌ Jesús wʌʼan ti Pañimil tiʼ tsʼʌca jiñi cʼamoʼ bʌ, tsiʼ yʌqʼueyob i bʌl i ñʌcʼ jiñi wiʼñaloʼ bʌ, tsiʼ ñʌjchʼesa chuqui am bʌ ti pañimil i tsaʼto i techeyob chʼojyel jiñi chʌmeñoʼ bʌ (Marcos 4:39; 6:41-44; Lucas 4:40; Juan 11:43, 44). Ili jiñʌch tsaʼ bʌ i wʌn pʌsʌ chaʼan chuqui mi caj i mel jiñi i Yumʌntel Dios.

Mi a wom a ñumen cʌn chuqui mi caj i mel i Yumʌntel Dios ti a tojlel, qʼuele jiñi video ¿Chuqui jiñi i Yumʌntel Dios?

¿Jala mi caj i tsʼʌctiyel muʼ bʌ i yʌl jiñi Biblia?

Wen lʌcʼʌlix. ¿Chucoch mucʼʌch lac wen ñop iliyi? Come jiñi Biblia tsiʼ wʌn alʌ chuqui tac mi caj i yujtel chaʼan miʼ pʌs chaʼan jiñi i Yumʌntel Dios lʌcʼʌlix mi caj i mel i yeʼtel ila ti Pañimil (Lucas 21:10, 11). Wʌle woli laj qʼuel bajcheʼ woliʼ tsʼʌctiyel tsaʼ bʌ i wʌn alʌ jiñi Biblia.

Mi a wom a ñumen cʌn, pejcan jiñi tema «¿Jala mi caj i chʼʌm tiʼ wenta ili Pañimil jiñi i Yumʌntel Dios?».

¿Bajcheʼ miʼ mejlel i coltañet ili ora muʼ bʌ i yʌl jiñi Biblia?

Juntiquil tsaʼ bʌ i tsʼijbu jiñi Biblia tsiʼ yʌlʌ chaʼan jiñi lac pijtaya lajalʌch bajcheʼ «jumpʼejl ancla chaʼan laj cuxtʌlel» (Hebreos 6:19). Cheʼ bajcheʼ jumpʼejl ancla muʼ bʌ i mejlel i xucʼchocon juncojt barco cheʼ miʼ ñusan tsʌts bʌ icʼ yaʼ ti mar, jiñi lac pijtaya miʼ mejlel i coltañonla jaʼel chaʼan mi lac ñop chaʼan mi caj i tojʼan ili pañimil yicʼot chaʼan mi laj cuch jiñi wocol tac. I jiñi lac pijtaya muʼ bʌ i yʌqʼueñonla jiñi Biblia miʼ xucʼchocon lac pensar, miʼ coltañonla chaʼan bajcheʼ yubil mi la cubin lac bʌ i chaʼan cʼocʼ mi la cajñel (1 Tesalonicenses 5:8).