Parte 1 bibliagi ibmar durdaglesad

Jehova sordaganbo Biblia durdasadbali nabir be Bab igar sunsoged durdasmogad. Aagala, nabir be Bab Dummad aigala gusmogad, degsoggu nabir be yoogidse sadegu gudi gumogoed, Bab Dummad anmarga neg idumai guder. Biblia durdasadbali emidi bibbisaar be bensurmogad, Biblia, Bab Dummad Garda. Bad be Jehova sordaganba aggasmosoggua, emidi be nue dagdimogad igi Jehova na e sordagan bendagmai (Zac. 8:23).

Be bautizar saed iduale, gwenagan idudimalad bebo sunmagmaloed, Bibliagi be ibmar durdasadgi (Heb. 6:1-3). Jehova be bendagmai gusan gadin nabbi bur bule be e igar durdagmai guega, yoogidse be nabir bendaglemogaga (Juan 17:3).

1. ¿Ibiga be bautizar sabimoga?

2. ¿Doagi Jehova?

   • “Jehova, Bab Dummad gued. Nibneggi Bab dummad gued. Nabneggi Bab Dummad gubalid. Bab Jehovayobid Bab Dummad baid sadded” (Deut. 4:39).

   • “Bebi Bab Jehova gued, weyobi be nugad. Na wisgumala, nabneggine, bebi unnila Bab Dummad bur birigined gued” (Sal. 83:18).

3. ¿Ibiga be Bab Dummadse e nugba goled abelege?

   • “Weyob Bab Dummadse be gormalo: ‘Anmar Bab nibneggi maid, be nug swilidig obariledii gusun’” (Mat. 6:9).

   • “Bela dulemar Jehovase e nugba gormaladi bendaglemaloed” (Rom. 10:13, TNM).

4. Bibliagine, ¿igi Jehova bilenadabali?

   • “Jehova Bab Dummad degi sadeguadid, nabneg bibbirmagnaid bela obinnisadid ” (Is. 40:28).

   • “Anmar Bab nibneggi maid” (Mat. 6:9).

   • “Bab Dummad bela bela dulemar sabgumaid ” (1 Juan 4:8).

5. ¿Igi be Jehovaga arbadi gued abelege?

   • “Bab Dummad be dummad, bela belad be gwagegi, be san burbagi, be binsaedgi, degi, be ganguedgi be sabgue” (Mar. 12:30).

   • “Bab Dummad be dummad e nug be odummodii nanao. Unnila aagarbi be ibmar imaggo” (Luc. 4:8).

6. ¿Ibig be Jehovagi bangubisurmoga?

   • “Massi, dule binsaed niggaa be dae, weligwar be an imagge. Adi, an deebali, mesagwar an imagnanaid gayamaggoed” (Prov. 27:11).

7. ¿Doas be gordaoe? ¿Doa nuggine?

   • Jesus sogsad: “Nabbira an bemarga soged, bemar an nuggi Babse ibu egisbimardibe, Bab bega uggoed” (Juan 16:23).

8. Be Jehovas goddele, ¿ibu ibmar nabir be ese egissale?

   • “Bemar weyob Bab Dummadse gormalo: ‘Anmar Bab nibneggi maid, be nug swilidig obariledii gusun. Be neg dagmaid anmarse be sedage. Igi nibneggi be sogedba be ibmar imagge, deyob, we nabneggi be imagdamo. Emi ibagi mas unniddibali anmarga be udage. Igi dulemar anmargi nosale, anmargi nossuliyob anmar dagdae, deyobi, anmar begi isgusad begi isgussuliyob be anmar dagmo. Isguedgi wilub daglegedse mer warmagged be anmar imag. Bur isguedgi obined be anmar sae’” (Mat. 6:9-13).

   • “Ar anmar weyob Bab Dummadgi bensulid: Ar anmar e sogedba ese ibmar egissidele, Bab Dummad anmar iddoged” (1 Juan 5:14).

9. ¿Doamar ese gornairdina Jehova abin imassurdae?

   • “Bemar [...] Jehovase goddemaloed, edina bemar abin imaggosulid. Ar bemar dogdar isgus gudiidba [...] bemar idu banguoed” (Miq. 3:4).

   • “Bab Dummad dule gwage swilidiggid nue aggwedaed, wemar ese goled nue iddodaed. Ar dule ibmar isgana imagmaladgindina, egi yoleged” (1 Ped. 3:12).

10. ¿Doagi Jesucristo?

    • “Simón Pedro Jesus abin sogded: Be Cristo, [...] Bab Dummad Dula Maid E Massi sunnad” (Mat. 16:16).

11. ¿Ibu saegala Jesus nabbanegse arbi?

    • “Ani dule massi [...], mai nigguega an nonisulid. Maiyob dulemar bendaggega an noniggid [...], dule isgudimalad anar burgwega an noniggid” (Mat. 20:28).

    • Jesus sogded: “Neggwebur baiganse Bab Dummad neg dagmaid e gaya burba nuedgi an sunmagnabalir gebed, ar aa ular an barmilealid” (Luc. 4:43).

12. ¿Igi mag daglegoe Jesus be bendasad be yeer iddomoga?

    • “Cristo bela dulemarga burgwisad, adi, [...] melle bar na ega gudigumalagar. Adi, dule ega burgwisadga, ega durgusadga, dula gudigumalagar” (2 Cor. 5:15).

13. ¿Jesus bule dungussii?

    • “We nabneggi negdaggega, degine, nibneggi negdaggega, Bab Dummad bela gangued anga ugsad” (Mat. 28:18).

    • “Bab Dummad, Cristo Jesus dulemar baiganba bur bule dummadga imagsasunnad. Ega bur dule baiganba nug dummarba gued ugsasunnad” (Filip. 2:9).

14. ¿Igi be wisi, mergi neggi anmar idubugmaladi nue “mai nued binsaed nigga daedi”?

    • “Ar degiide, ¿doa mai nuedi, binsaed nigga daed, e dummad sogedba gudii? Mai deyob daedi, e dummad, e neguya aggwega onugsaed. Adi, mai baiganga wassi seggalaa mas daggegar” (Mat. 24:45).

15. Bab Dummad gangued, ¿dulemoga?

    • Angel, Mariaga sogded: “Bab Dummad burba isligwaled begi agdenoniggoed. Bab Dummad bur birigined e gangued be edunoniggoed. Degisoggu, dule gwage islidiggid gwalulegoedi, Bab Dummad massiye soglenoniggoed” (Luc. 1:35).

    • “Ar bemarde, dule isganamar inigwale, be mimmiganga ibmar nuegan ugged be wismalad. Ar be Bab nibneggi maid bursunna, dulemar ese egismaladga e burba isligwaled uggodo” (Luc. 11:13).

16. ¿Ibu ibmar imaggegala Jehova e gangued ebusdae?

    • “Bab Jehova na e sunmaggedginbi nibneg nasigsad, na e bunnogedginbi bela niisgwamar nasigsad” (Sal. 33:6).

    • “Bab Dummad burba isligwaled bemargi agdenoniggile, bemar [...] gangudmaloed, [...] nabneg naid ugaggase, an gayaburbagi bemar sunmagdemaloed” (Gus. 1:8).

    • “Yooedse ibmar guoed narmaggaled geg dule na ebi wargwen e iddollegedba oduloged. [...] Ar ade, Bab Dummad gaya burba barsogmalad, [...] na e iddollegedba sogsasurmalad. [...] Bab Dummad burba isligwaled sogedba sunmagsagusmalad” (2 Ped. 1:20, 21).

17. Bab Dummad gobiernogi sunmagledele, ¿ibu obardae?

    • “We reymar ibagangine, Bab Dummad nibneggi maid, na rey wargwen degi sadegu reyga megoed barmidagoed. We reygi, dule baid bibbisaar obinosulid. Ar we rey bur yarbamalad obelogoed. We rey, degi sadegu reyga megoed” (Dan. 2:44).

18. Bab Dummad gobierno, ¿ibu ibmar beg imaggoe?

    • “Bab Dummad we dulemarga bela ibyanis elioed. We dulemar bar burgosurmalad. Bab Dummad, boed ega obelobaloed, buggib iddoged ega obelobaloed. Deginbali, we dulemar nunmagged bar iddogosurmarbalid, ar ade, bela ibmar iduarmalad bergusad” (Apoc. 21:4).

19. ¿Igi be wisi, Bab gobierno anmarga neg onudagged owarmasa?

    • “Jesus Olivos yarse naded. Aagi sii, e sabbingan bassiggii ese nonimalad, ese egisnonimalad: [...] Neg duggumosar, ¿igi neg gudagosunna? Anmarga be soge. Jesus e sabbingan abin sogded: [...] Dulemar bila ononanai gudamaloed, [...] uelemalad buggidar agnidagoed, uggud dummad nagudabaloed, nagabandur dummagan nagumai gudabaloed. Bela dulemar yar baid baidgi bugmalad Bab Dummad e negdamaid gaya burba nued wisgunonimalale, geb aagi neg bergunoniggoed” (Mat. 24:3, 4, 7, 14).

    • “Neg duggumosale, iba bulegan nagunoniggoed. Ar ade, dulemar weyobid noniggoed: Duggin e sanginbi binsamalad. Maniginbi binsamalad. Sunmaggedgi na san dummarba imagmalad. [...] Bab Dummadgi dodoar sunmagmalad. E babgan sogedba dasurmalad. Dule ega ibmar imagsar dog nuedye gwen sogsurmalad. Bab Dummadgi gwen binsasurmalad. Dule sabed gwen nigsurmalad. Dulemar egi yolesar, geg na san bargamalad. Gadi gaggan berbemalad. [...] Sabsur aimar imagmalad. Ibmar nuegan isdar dagmalad. [...] Dagge daggesur ibmar imagmalad. [...] Unnila bur bule na duggin san yeer iddogedgi binsamalad, Bab Dummadgindi binsasurmalad. Yamo Bab Dummad igar maidba daeyob damalad. Deginigwale binsa asgi gordidimalad, Bab igar sunsogedba nanasurmalad” (2 Tim. 3:1-5).

20. ¿Be ibu ibmar imagdaele mag daglegoe be nue Bab Dummad gobiernoba namoga?

    • “Bab Dummad e neg dagmaid inse be amimar, e igar nabbiragwad imagged inse be amimar” (Mat. 6:33).

    • “Jesus e sabbinganga sogded: Ar dule wargwen an sabbinga gubiele, na duggin san ieger gebed, [...] aa dule anba dagodo, geb an sabbinga guodo” (Mat. 16:24).

21. ¿Nia dule igi daedi? ¿Bia niamar danisunna?

    • “Ar nia saila bemar babad. [...] Ar gusgu, gebe saglaunni nia saila dule gindaggedid” (Juan 8:44).

    • “We nia sagla Satanas, dulemar bela nabneg naidgi yardagdiid duled. We assu simudubaled we nabnegse egwallenonisunnad, e baliwiddurmar [angelmar] bela eba egwallenonimarmosunnad” (Apoc. 12:9).

22. ¿Igi Nia Jehova nig sogsa? ¿Igi dulemar nig sogsamoga?

    • “Ome naibe abin sogded: Ar igiid sabbi e san anmar we nagnu nuedgi gunbimala, sunna bela anmar gunmalad. Unnila [...] sabbi wargwen gwissid e sanbi geg anmar gunned. Bab Dummad anmarga sogsado: ‘Melle aa sabbi e sandi be gunmaloye, degine, melle be ebumarbaloye. Ar bemar gudsale, bemar burgwemaloye’. Ar naibedi omega sogded: Suli, degisuli. Bemar gwen burgosuli. Ar Bab Dummad nue wisid [...] bemar Bab Dummadyob ibmar wisi gudmaloed, ibi ib nuedi, ibi ib isganabali” (Gén. 3:2-5).

    • “Satanas, Bab Jehova abin sogdebalid: Ar dule e san bendaggegala, na e ibmar niggad bela ugdaed” (Job 2:4).

23. ¿Igi be Jehovaga arbadiile be Niaga sognaiyob guoe, be gaggansadiye?

    • “Bab Dummad be mag dagge nanaer gebed. Inniggigwadba ega be arbaer gebed” (1 Crón. 28:9).

    • “Anba an dula gudiidgine an ibmar oaggalossurye an sogoed” (Job 27:5).

24. ¿Ibig dulemar burgwedae?

    • “Degisoggu, isgued dule wargwengi we nabnegse dognoniggid. Degine, isguedba burgwed igar nonibalid, degiidbali, bela dulemar burgwedbi gunonisunnad. Ar ade bela isgusmaladbiid” (Rom. 5:12).

25. ¿Dule burgwisar igi gusdae?

    • “Dula gudimaladdi, e burgwemaloed na wismalad. Dule burgwismaladdina bar ibmar abemaisurmalad, ar bar iddomaisurmalad” (Ecl. 9:5).

26. ¿Burgwismalad yoogidse igi gumaloe?

    • “Dule nuegan burgwismaladi, dule isganamar burgwismaladi, gannar ega durgued ibagan noniggoed” (Gus. 24:15).

27. ¿Ebigwa dulemar Jesusbo Bab negse arbanamaloe?

    • “Sibad Wawaad Mimmi Sion yargi gwissi an dagded. Dulemar mili dula gugle gaggabagge (144.000) eba gwissimalad. We dulemar, e bebegine, Sibad Wawaad Mimmi nuga, degi, e Bab Dummad nuga, narmaggar naimalad” (Apoc. 14:1).