Babganga

Mimmigan nigmalad abedamalad e mimmigan Jehova sogedba igar imagged, Jehovaga arbamarmogad. Igi bemar nabir na mimmigan bendasarsunna, bautizar samarmogaga. ¿Sana be mimmi nabir bautizar imasale?

Jesus e sabbinganga sogsad, bela neg dirbimaggar anga sordagan aminamaloye, bautizar imagmarbaloye (Mat. 28:19). Degsoggu, dule bautizar sabimogale, Cristo sordaga gumogar gebed. Auggi, unnila binsa Jesus ibmar sogsad wisguedbi unnisurbalid, eba nueggwa igar imagbalir gebed. Eba igar imaggega undarsursoggua, burwiganse baggar nabir eba igar imagged.

Na be mimmigan odurdaggo nueggwa Jehova sogedba igar imagdii gumarmogaga (Deut. 6:6-9). Jehova igargi be mimmigan odurdaggegala we libro ebugo: ¡Nabir be sadegu yeer iddodi gusaled! Degiile be mimmigan Jehova sogedba igar imadmarmogoed. Odurdagbalo, Bibliagi ibmar durdagnaid igi nabir dule bamaladga sogsamogale (1 Ped. 3:15). We ibmarmar be mimmigan bendagbaloed nabir bautizar imagmarmogaga: Biblia durdagged, neguyagi Bab igar durdagged, igar iddogedse nanaed, aimar nuegan amied. Na mimmiganga sognadabbi samarbalo we ibmar be nabir imasbalirye.

Proverbios 20:11 gi soglenaid: “Massigwa ibmar imaggedba magar dagleged, e daed inniggigwadid, degi, nuedbalid”. ¿Igi be wisgusarsunna, be mimmi bad Jesucristoba igar imagnamodibe, nabir bautizar imasardibe?

Bibliag soglenaid, Jesus 12 año niggua e sergan sogedba igar imagdi gusye (Luc. 2:51). Degsoggu, burwigan bautizar sabimogale e serganba igar imagmogar gebed (Gus. 5:29; Col. 3:20). Be mimmi inniggidi ibmar imaggosur inigwale Jesus sogedba igar imaggeddi abelemogad, degiile, bamalad mag dagmogoed, be mimmi bemarba biir biir dae.

Mag daglebalir gebed be mimmi nue Biblia durdagbimoga (Luc. 2:46). Degsoggu, be we ibmargi binsaer gebed: “¿Bule be mimmi igar iddogedse nabidae, bule ibmar sogbidamoga? ¿Bule Biblia absoged yeer iddodae?” (Sal. 122:1; Mat. 4:4).

Mimmi nue bautizar sabiele, nueggwa Jehovaga ibmar imaggedgi binsamogoed (Mat. 6:33). Mag iddobaloed, Bab igargi sunmagged nue abelege. Bia gudisundibe Bab igargi sunmagbidaoed. Binge e profesormarga sogosulid, an Jehovagi sunmaggedye, e sordaganga binge we igargi sunmaggosurbalid. Igar iddogedgi ega arbaed soggwen uglesale, nueggwa imagbidabaloed.

Ibmar isgana imagbiosurbalid. Aimar nuegan amidaoed, musica isganagan iddogosurbalid, pelicula isganagan daggosurbalid, videojuegomar isganagangi dodogosurbalid, Internetgi ibmar isganagan daggosurbalid (Prov. 13:20; 1 Cor. 15:33).

Babgan na mimmigan bendasdaedbali nabir burwigan bautizar imasdamarmogad. Jehova bemar bendagmai gusan gadin, bemar na mimmigan bendaggega, nabir be mimmigan bautizar imagmarmogaga.

Yoo bautizar sae Bab igargi sunmagdiidga

Biblia durdagged be bendasad, nueggwa be Jehova igar wisguega, yoogidse Jehova ibmar nuegan imaggoed mer be bengubaliga, Bab igargi be sunmagbi gudabaliga. Mer siggirmaggo, be igar nued imagnaid (Juan 17:3; Heb. 11:6).

Anmarbo Bab igar durdagged idu be onmagged negse nanamogandibe, bamalad iglesiamarsedibe. Sun be ibmar isgana imagdi gusar gusad. Auggi, mag na be iddossoggua be igar nued imassuli, mag dagledo emidi be nue Bab bensuli. Emidi bar be idualeyob ibmar imagdi gubisursoggua, aagala bur be Jehova sogedba igar imagbimogad (Gus. 3:19).

Be anba bibbigwale, sun be sergan bibbigwa Bab igargi be odurdaggarmalaled. Degsoggu, sun be doggus Bab igargi yoledi gussulir gussulid (2 Timoteo 3:15). Degisundibe, bad be dagsad igi be imagdaoe, mer be be sordaganse binsaed galegega, mer be Jehova igargi yolebaliga. Mag daglebalid be nue Jehova bensuli, ar be Jehova igar durdagnaidgi emarga sunmasdamogad. Be sergan be odurdasadbali emidi be binsaarmogad, bautizar saed idu anmarba Jehova igargi sunmagdi gumogadgi.

Bibbigwa be Jehova igar durdasdibe, seredgindibe, auggi, emidi be Jehovaga sogedgi binsaed, an begarbi arbadi guoye, bautizar saedgi be binsabalid. Be Jehovaga sogbiele an begarbi arbadi guoye, be ese goloed ega sogega, unnila an begarbi arbadi gubimoye (Mat. 16:24). Be baurizar saoedgine mag daglegoed bad be Jehovaga we ibmar sogsa (Mat. 28:19, 20). We ibmar sogbo imaggoedba be onugsalemogoed, Jehovaga arbaedye. ¡Jehovaga arbaed igar nuedid!

Bibliagi soglenaid, Jesus bautizar sasad sorbali “Bab Dummad Burba isligwaled, Jesus nia saglase wilub daglegega, nega dule sulidganba Jesus ses[ye]” (Mat. 4:1). Degsoggu, be bautizar sasad sorba sun be wilub dagledamogoed (Juan 15:20). Sun be gwenadgana, be sordagan arbaedgindibe, be aimarga gusmaladdibe isdar be dagdamaloed (Mat. 10:36). Deyob be daggarmalale, ebinsao Jesus sogsad: “Ar dule an nug ular, degi, an gaya burba nued ular, na e neg, e gwenadgan, e bunmar, e nan, e ome, e mimmigan, degi, e nagnu meddele, we nabneggi we dule duladdaledba bur bule we ibmarmar abingaoed: Negmar, gwenadgan, bunmar, nangan, mimmigan, degine, nagnugan. Ar mesagwar we nabneggi gudi guo inigwale” yoogidsedi sadegu gudi guoed (Marcos 10:29, 30). Degsoggu, igi beg neg guarsundibe, mer siggirmaggo, Jehova sogedba igar imaggo.

Be bautizar sabi gualile, idudimaladga igar amidiidbo sunmaggo. Idudimalad daggega be bautizar saedga bad guaggwamodibe, we gardagi ibmar egislenanaid bebo dagmaloed. Bebo sunmagmalad idu nabir be na walagwen we garda durdagged.

Bibliagi absogoye soglenanaid bela nueggwa absogo, absosar binsabalo, ibu igargi be odurdasa. Be ibmar narmagbiele, aggarsulid. Idudimalad bebo sunmaggalile, nabir be ibmar narmasad dagsii gued, nabir be garda argaar gani sigbalid. Soggwen be aggu iddogele, be odurdagnaidse egiso, idudimaladsedibe.

Mer binsao, bes ibmar egissarmalar be issesur ibmar soge soge saoye. Bur nuediled bes ibmar egislenaidbii be abin soged, be iddogedba be sogbalid. Bur nuedbaliled, Bibliagi soglenaidba be soged.

Be anba Bibliag ibmar soglenaid aggusaar iddogele, gwenagan idudimalad igar amimaloed be bendagmalaga. Be nabbi nueggwa Biblia durdaggega, be ibmar durdasadba nabir ibmar sogmogaga; nabir be sorba bautizar samogaga.

[Idudimaladga: Pagina 54-59 gi soglenaid bautizar sabimaladbo sunmaglegega igi ibmar imaglegoe].