Эсир пӗлетӗр-и?

Авалхи вӑхӑтра ҫул ҫӳренӗ чухне мӗнле майпа вут чӗртме пултарнӑ?

ПУЛТАРНИ 22:6-мӗшӗнче каланӑ тӑрӑх, Турра «пӗтӗмӗшпе ҫунтарса парне кӳмешкӗн» ҫула тухас умӗн Авраам «вутӑ илсе, ӑна Исаакӑн, хӑйӗн ывӑлӗн, хулпуҫҫийӗ ҫине хунӑ; аллине вутчуль тата ҫӗҫӗ тытнӑ та, иккӗшӗ пӗрле кайнӑ».

Авалхи вӑхӑтра мӗнле майпа вут чӗртни ҫинчен Библире ҫырса паман. Ҫак сӑвӑ йӗрки пирки пӗр ученӑй Авраампа Исаак «ҫав вӑрӑм ҫула утса тухнӑ май шӗл кӑвара упраса хӑварма пултарайман пулӗ» тесе ҫырнӑ. Апла пулсан, ку сӑвӑ йӗркинче вут чӗртмелли темле хатӗр ҫинчен сӑмах пырать пулас.

Анчах та, ытти учӗнӑйсем каланӑ тӑрӑх, авалхи вӑхӑтра вут кӑларасси ҫӑмӑл ӗҫ пулман. Кашни хӑй вут кӑларма хӑтланса лариччен кӳршӗсем патне кайса вӗри кӑвар илсе килесси чылай ҫӑмӑлтарах пулнӑ. Ҫавӑнпа та хӑш-пӗр тӗпчевҫӗсем Авраам хӑйпе пӗрле шӗл кӑварпа е хӗртнӗ ҫӗр кӑмрӑкӗпе тултарнӑ пӗр-пӗр савӑта (тен, сӑнчӑр ҫине ҫакнӑ куршака) илнӗ тесе шутлаҫҫӗ (Ис. 30:14). Ҫав кӑварпа усӑ курса вӗсем типӗ вутта тивертсе кирек хӑҫан та кӑвайт чӗртме пултарнӑ.