Чӑн тӗне мӗнле тупмалла?

1. Чӑн тӗн пӗрре кӑна-и е темиҫе?

Иисус хӑйӗн вӗренекенӗсене чӑн тӗн пӗрре кӑна тесе вӗрентнӗ. Ӑна ӗмӗрлӗх пурнӑҫ патне илсе пыракан ҫулпа танлаштарма пулать. Иисус ҫак ҫула тупакан сахал тенӗ (Матфей 7:14). Турӑ хӑйӗн Сӑмахӗпе, Библипе, килӗшӳллӗ пуҫҫапнине кӑна ырлать. Турра тӗрӗс пуҫҫапакансем пӗр тӗне пуҫтарӑннӑ. (Иоанн 4:23, 24; 14:6; Эфес 4:4, 5 вулӑр.)

«Турӑ пур тӗне те ырлать-и?» видеоролика пӑхӑр.

2. Иисус суя христиансем пирки мӗн каланӑ?

Христиан тӗнне пӑсакан суя пророксем тухӗҫ тесе асӑрхаттарнӑ Иисус. Вӗсене чӑн христиансенчен уйӑрса илме ҫӑмӑлах мар. Вӗт вӗсем хӑйсем пирки Христос хыҫҫӑн пыракансем, хӑйсен чиркӗвӗсем пирки христиансен чиркӗвӗсем теҫҫӗ. Анчах та ҫак ҫынсем чӑн христиансем пулнипе пулманнине уйӑрса илме пулать. Мӗнле? Чӑн тӗн кӑна лайӑх ҫимӗҫсене — христиансен ырӑ ӗҫӗсемпе паха енӗсене — ҫитӗнтерет. (Матфей 7:13—23 вулӑр.)

3. Чӑн Турра пуҫҫапакансене мӗнле уйӑрса илмелле?

Чӑн христиансене уйӑрса илме пулӑшакан пилӗк паллӑна пӑхса тухӑпӑр.

• Чӑн христиансем Библи Туррӑн Сӑмахӗ пулнине ӗненеҫҫӗ. Вӗсем Библи принципӗсем тӑрӑх пурӑнма тӑрӑшаҫҫӗ. Ҫавӑнпа та чӑн тӗн ҫынсем шухӑшласа кӑларнӑ вӗрентӳсем ҫинче никӗсленсе тӑракан тӗнсенчен тӗпрен уйрӑлса тӑрать (Матфей 15:7—9). Чӑн христиансем хӑйсем мӗне вӗрентнипе килӗшӳллӗ пурӑнаҫҫӗ. (Иоанн 17:17; 2 Тимофей 3:16, 17 вулӑр.)

• 

  Христосӑн чӑн вӗренекенӗсем Туррӑн ятне, Иегова ята, мухтава кӑлараҫҫӗ. Иисус ҫынсемпе калаҫнӑ чухне Туррӑн ячӗпе час-часах усӑ курнӑ. Ҫапла вӑл Ашшӗн ятне мухтава кӑларнӑ. Вӑл ҫынсене Турӑ ҫинчен пӗлтернӗ тата Туррӑн ячӗ хисеплентӗр, е сӑваплӑ пултӑр, тесе кӗлтума вӗрентнӗ (Матфей 6:9). Эсир пурӑнакан вырӑнта кам Туррӑн ячӗ ҫинчен пӗлтерет? (Иоанн 17:26; Рим 10:13, 14 вулӑр.)

• Чӑн христиансем Турӑ Патшалӑхӗ ҫинчен пӗлтереҫҫӗ. Турӑ Иисуса Патшалӑх ҫинчен ырӑ хыпар пӗлтерме янӑ. Туррӑн Патшалӑхӗ кӑна этемлӗхӗн йывӑрлӑхӗсене татса пама пултарать. Иисус ҫак Патшалӑх ҫинчен мӗн виличченех пӗлтернӗ (Лука 4:43; 8:1; 23:42, 43). Вӑл хӑйӗн вӗренекенӗсем ҫак ӗҫех тӑвӗҫ тенӗ. Хӑш тӗне тытса тӑракансем ҫынсемпе Турӑ Патшалӑхӗ ҫинчен калаҫаҫҫӗ? (Матфей 24:14 вулӑр.)

• Иисусӑн вӗренекенӗсем ҫак усал тӗнче ӗҫӗсене хутшӑнмаҫҫӗ. Вӗсене политикӑпа обществӑри хирӗҫӳсене хутшӑнманнинчен уйӑрса илме пулать (Иоанн 17:16; 18:36). Ҫавӑн пекех вӗсем хӑйсене нравственность енчен таса тытаҫҫӗ тата ҫак тӗнчери анлӑ сарӑлнӑ йӗркесӗр ӗҫсенчен пӑрӑнаҫҫӗ. (Иаков 4:4 вулӑр.)

• Чӑн христиансем пӗр-пӗрне чун-чӗререн юратаҫҫӗ. Туррӑн Сӑмахӗ вӗсене пур халӑхри ҫынсене хисеплеме вӗрентнӗ. Суя тӗнри ҫынсем час-часах вӑрҫӑсемпе халӑхсен хушшинчи хирӗҫӳсене хутшӑнаҫҫӗ, чӑн христиансем вара ҫакна тумаҫҫӗ (Михей 4:1—3). Пачах урӑхла, вӗсем ҫынсене пулӑшас тата хавхалантарас тесе хӑйсен мӗн пуррипе тата вӑхӑчӗпе усӑ кураҫҫӗ. (Иоанн 13:34, 35; 1 Иоанн 4:20 вулӑр.)

4. Чӑн тӗне мӗнле уйӑрса илмелле?

Хӑш тӗн Турӑ Сӑмахӗ тӑрӑх вӗрентет, Туррӑн ятне мухтава кӑларать тата этемлӗхӗн йывӑрлӑхӗсене Турӑ Патшалӑхӗ кӑна татса парать тесе вӗрентет? Мӗнле тӗн ушкӑнӗ пирки вӗсем пӗр-пӗрне тӑванла юратаҫҫӗ тата вӑрҫӑсене хутшӑнмаҫҫӗ теме пулать? Хӑш тӗн пирки ҫапла калама пулать? (1 Иоанн 3:10—12 вулӑр.)