БИБЛИ МӖН КАЛАТЬ

Турӑ мӗн ятлӑ?

Пирӗн ҫемьере кашнин ят пур. Килти чӗрчунсен те ят пур. Шухӑшласа пӑхсан, Туррӑн та ят пулмалла мар-и вара? Библире ҫырнӑ тӑрӑх, Туррӑн титулсем нумай, сӑмахран, Пурне те Тытса Тӑракан, Саваоф Турӑ, Ҫӳлхуҫа тата Пултаракан. Анчах унӑн ят та пур. (Осия 12:5 вуласа пар.)

Нумай Библи куҫарӑвӗнче, тӗслӗхрен, «Сӑваплӑ Ҫыру — Ҫӗнӗ тӗнче куҫарӑвӗнче» Туррӑн ячӗ Псалом 83:18-мӗшӗнче тӗл пулать. Унта ҫапла каланӑ: «Эсӗ, Иегова ятлӑскер, пӗр эсӗ анчах пӗтӗм ҫӗрпе Ҫӳлти Турӑ пулнине ҫынсем пӗлсе тӑччӑр».

Мӗншӗн Турра ятран чӗнмелле?

Турӑ хӑйне ятран чӗнтересшӗн. Эпир кама юрататпӑр, ҫавсене час-часах ятран чӗнетпӗр, сӑмахран, ҫывӑх туссене. Апла пулсан, пирӗн Турра та ятран чӗнмелле мар-и? Унсӑр пуҫне, Иисус Христос та ҫынсене Турра ятран чӗнме хавхалантарнӑ. (Матфей 6:9; Иоанн 17:26 вуласа пар.)

Анчах Туррӑн тусӗ пулас тесен унӑн ятне пӗлни ҫеҫ ҫителӗксӗр, пирӗн ун ҫинчен нумайрах пӗлмелле. Тӗслӗхрен, унӑн мӗнле паха енсем пур тата ун патне ҫывхарма пулать-и? Ҫак ыйтусен хуравӗсене эсир Библире тупма пултаратӑр.