Мӗнрен пуҫламалла?

Библи вулани савӑнӑҫ тата усӑ патӑр тесе мӗн тума пулать? Акӑ нумайӑшне пулӑшнӑ пилӗк канаш.

Кӑмӑла каякан майсем тӑвӑр. Лӑпкӑ та шӑп вырӑн тупӑр. Вулама чӑрмантарма пултаракан япаласем ан пулччӑр тесе тӑрӑшӑр. Ҫутӑ вырӑн тата уҫӑ сывлӑш тимлӗн вулама пулӑшӗ.

Тӗрӗс шухӑш-кӑмӑлпа вулӑр. Библи вӑл — пире Атте Турӑ панӑ кӗнеке. Ҫавӑнпа та пӗчӗк арҫын ача хӑйӗн юратакан ашшӗне мӗнле кӑмӑлпа итлет, эсир те ҫавӑн пек кӑмӑлпа вулани нумай усӑ панӑ пулӗччӗ. Библие сирӗн сивлес-хурлас кӑмӑл пур пулсан, Турӑ сире мӗне пулин вӗрентме пултартӑр тесе ҫавӑн пек тиркес шухӑша пуҫран кӑларса пӑрахма тӑрӑшӑр (Псалом 24:4).

Вулас умӗн кӗлтӑвӑр. Библире Туррӑн шухӑшӗсене ҫырса хунӑ, ҫавӑнпа та ӑна ӑнланма Турӑ пулӑшни кирлӗ. Турӑ «Хӑйӗнчен ыйтакансене Святой Сывлӑшне» пама сӑмах парать (Лука 11:13, ҪХ). Ҫавна пула эсир Турӑ мӗнле шухӑшланине ӑнланма пултаратӑр. Вӑхӑт иртнӗҫемӗн унӑн святой сывлӑшӗ сире «Туррӑн тарӑн шухӑшӗсене» пӗлсе ҫитме пулӑшӗ (1 Коринф 2:10).

Ӑнланас тесе вулӑр. Нумайрах вуласа тухас тесе ҫеҫ ан вулӑр. Мӗн вуласа тухни ҫинчен шухӑшлӑр. Хӑвӑра ҫакӑн пек ыйтусем пама пултаратӑр: «Эпӗ кам ҫинчен вуларӑм, ҫав ҫыннӑн тӗслӗхӗнчен мӗне вӗренме пултаратӑп? Ҫакна хамӑн пурнӑҫра мӗнле тытса тӑма пулать?»

Хӑвӑр ума ятарлӑ тӗллевсем лартӑр. Вулани усӑ патӑр тесен Библире хӑвӑр пурнӑҫа чӑннипех лайӑхлатма пулӑшакан шухӑшсене тупас тесе вулӑр. Сӑмахран, эсир хӑвӑр ума ҫакӑн пек тӗллевсем лартма пултаратӑр: Турӑ ҫинчен нумайрах пӗлмелле, характера улӑштармалла е лайӑх упӑшка (арӑм) пулмалла. Унтан Библире ҫак тӗллевсене пурнӑҫа кӗртме пулӑшакан сӑвӑ йӗркисене шырӑрa.

Ҫак пилӗк канаш сире мӗнрен пуҫламаллине курма пулӑшӗ. Анчах та Библи вулама интереслӗ пултӑр тесе эсир мӗн тума пултаратӑр? Ҫакӑн ҫинчен тепӗр статьяра каланӑ.