Пирӗн брошюрӑсем — тӗрлӗрен ҫын валли
1. Павел апотол пекех, шанчӑклӑ та ӑслӑ чура мӗн тума тӑрӑшать?
1 Павел апостол пур тӗрлӗ ҫынна ҫӑлма тӑрӑшса, ҫын мӗн пӗлни-ӗненнине шута илсе ырӑ хыпара каланӑ пекех, шанчӑклӑ та ӑслӑ чура хамӑр брошюрӑсемпе усӑ курса тӗрлӗ халӑхри тата тӗнри ҫынсем патне чӑнлӑха ҫитерме тӑрӑшать (1 Кор. 9:22, 23). Ҫавӑнпа та хамӑрӑн брошюрӑсемпе тӗрӗс усӑ курас тесен, пирӗн вӗсем вулакансен хӑш ушкӑнӗ валли пулнине шута илмелле.
2. Пирӗн хӑш-пӗр брошюрӑна мӗнле ҫынсем валли кӑларнӑ?
2 Павел Афинӑра мӗнле ҫынсемпе калаҫнӑ, пирӗн брошюрӑсенчен хӑшӗ-пӗри — ҫавӑн пек ҫынсем валли (Ап. ӗҫ. 17:22). Ҫав ҫынсем христиансен вӗрентӗвӗсем ҫинчен нимӗн те илтмен тата Сӑваплӑ Ҫырусене пӗлсех кайман. Ҫак брошюрӑсене чи малтанах Библи ҫинчен сахал пӗлекен ҫынсем валли кӑларнӑ. Ҫак ҫынсем, тен, христиансен вӗрентӗвӗсем ҫинчен илтмен, тӗнсене шанмаҫҫӗ, е Библи усӑллӑ мар тесе шухӑшлаҫҫӗ. Вулакансен анлӑ йышӗ валли кӑларнӑ ҫак брошюрӑсен тӗллевӗ — чӑн Турӑ пурри ҫинчен ӗнентересси. Вӗсем ҫавӑн пекех Библие шанма пулӑшаҫҫӗ тата Иегова Свидетелӗсем ытти тӗн ушкӑнӗсенчен уйрӑлса тӑнине ҫынсене ӑнланма пулӑшаҫҫӗ.
3. Икӗ тӗрлӗ, тепӗр брошюрӑсене кам валли ҫырнӑ?
3 Кам кӑшт та пулин Турра хисеплет тата Библие шанать, ҫавсем валли урӑх, сӗнмелли брошюрӑсем пур. Ҫав ҫынсем Библи ҫинчен мӗн те пулин пӗлеҫҫӗ, анчах та вӑл мӗне-мӗне вӗрентнине тӗрӗс ӑнлансах каймаҫҫӗ. Вӗсем Павел «Турӑран хӑраса тӑракансем» тенӗ ҫынсем евӗрлӗ (Ап. ӗҫ. 13:14—16). Вӗренмелли брошюрӑсене чи малтанах Иегова Свидетелӗсем валли ҫырнӑ. Павел пухусене ҫырнӑ ҫырӑвӗсенче Сӑваплӑ Ҫырусемпе паллашнӑ тата чӑнлӑха пӗлсе ҫитнӗ ҫынсене чӗнсе каланӑ (1 Кор. 1:1, 2). Вӗренмелли брошюрӑсенчи статьясене те пухӑва ҫӳрекен, теократи терминӗсене пӗлекен тата ӑнланакан ҫынсем валли ҫырнӑ.
4. Сӑваплӑ ӗҫре усӑ куракан кашни брошюрӑна пирӗн мӗншӗн тимлӗн вуласа тухмалла?
4 Ытларах чухне эпир ҫынсене тӳрех икӗ брошюра сӗнетпӗр пулин те, калаҫнӑ чухне пӗрин ҫине кӑна тимлеттеретпӗр. Кашни брошюрӑна тимлӗн вуласа тухма тӑрӑш. Ун чухне сана ҫынна мӗн хумхантарни ҫинчен калаҫма ҫӑмӑлтарах пулӗ.