Турӑ пире Иеремия урлӑ мӗн калать
1. 2010 ҫулхи область конгресӗнче эпир мӗнле публикаци илтӗмӗр тата эпир унпа мӗнле усӑ курӑпӑр?
1 2010 ҫулхи «Иеговӑпа хӑвӑр хушӑри туслӑха хаклӑр!» область конгресӗнче ҫакӑн ятлӑ ҫӗнӗ кӗнеке илсе эпир питӗ савӑнтӑмӑр! Унта Иеремийӑпа Иеремия хӳхлевӗ кӗнекесенче ҫырса панисемпе кулленхи пурнӑҫра епле усӑ курма пулнине сӳтсе явнӑ (Рим 15:4). Ӑна пухура Библи вӗреннӗ чух сӳтсе явма палӑртнӑ, эпир ӑна 2012 ҫулхи ноябрӗн 5-мӗшӗнче пуҫланакан эрнере вӗренме тытӑнӑпӑр.
2. Иеремийӑпа Иеремия хӳхлевӗ кӗнекесене тишкерни пирӗншӗн мӗншӗн усӑллӑ пулӗ?
2 Паян усӑллӑ. Библин ҫак пайне Турӑ хавхалантарнипе ҫырнӑ Иеремия Иудӑра лӑпкӑ мар пулнӑ вӑхӑтра пророкла каланӑ. Вӑл хӑйне шанса панӑ ӗҫе тума пултараймастӑп тесе шухӑшланӑ малтан (Иер. 1:6). Унсӑр пуҫне вӑл Анафофӑра, тӑван хулинче, пурӑнакан пӗлӗшӗсем тата, тен, хурӑнташӗсем те хӗсӗрленипе тӗл пулнӑ (Иер. 11:21, 22). Ҫавӑнпа вӑл хӑш-пӗр чухне хуйха ӳкнинчен тӗлӗнме кирлӗ мар (Иер. 20:14). Пур халӑхра та вӗренекенсене хатӗрлес ӗҫе тунӑ чухне эпир час-часах йывӑрлӑхсемпе тӗл пулатпӑр тата Иеремия хӑйне мӗнле туйнӑ, хамӑра ҫавӑн пекрех туятпӑр (Матф. 28:19). Вӑл ҫырнӑ кӗнекесене тишкерни пире сӑваплӑ ӗҫе хӑюллӑн тата хастарлӑн тума пулӑшӗ.
3. «Иеремия» кӗнекен хӑш-пӗр уйрӑмлӑхӗсемпе эпир мӗнле усӑ курӑпӑр?
3 Уйрӑмлӑхӗсем. Сӳтсе явнӑ чухне вуламалли тӗп сӑвӑ йӗркисене тайӑлтарнӑ. Кашни эрнере вӗренме палӑртнӑ материал вӗҫӗнче хулӑн шрифтпа пӗр е икӗ тарӑн ыйтӑва палӑртнӑ, вӗсем ҫак сыпӑкӑн тӗп шухӑшӗсене палӑртаҫҫӗ. Вӗсене вӗреннине аса илме памалла. Кӗнекере илемлӗ ӳкерчӗксем нумай, итлекенсем, паллах, вӗсем пирки хӑйсен шухӑшӗсене калас тейӗҫ.
4. «Иеремия» кӗнекене вӗренни пире чи пысӑк усӑ патӑр тесен мӗн тумалла?
4 Чи пысӑк усӑ илес тесен вӗренӗве маларах хатӗрленӗр. Пурнӑҫра тата сӑваплӑ ӗҫе тунӑ чухне усӑ курма пулнине тупма тӑрӑшӑр. Сӳтсе явнӑ чухне активлӑ хутшӑнӑр. Иегова Иеремийӑна пилленӗ, ҫавӑнпа вӑл Турӑ ӗҫне тунӑ чухне савӑнӑҫ илнӗ тата кӑмӑлне тултарнӑ (Иер. 15:16). Ҫак публикацие вӗренни пире хамӑрӑн сӑваплӑ ӗҫе ун евӗрлех туса тӑма пулӑштӑр.