Иеговӑна юратни сире шыва кӗме хавхалантартӑр

1, 2. Апостолсен ӗҫӗсем 8:27—31, 35, 36, 38 тӑрӑх, Эфиопи улпутне шыва кӗме мӗн хавхалантарнӑ?

СИРӖН шыва кӗрсе Христосӑн вӗренекенӗ пулса тӑрас килет-и? Нумайӑшне ҫак утӑма тума Турра юратни тата ӑна пархатарлӑ пулни хавхалантарнӑ. Айтӑр Эфиопири хӗрарӑм патшан улпучӗн тӗслӗхне пӑхса тухар.

² Эфиоп ҫынни Сӑваплӑ Ҫырура мӗн ҫинчен каланине ӑнлансан тӳрех шыва кӗнӗ. (Ап. ӗҫ. 8:27—31, 35, 36, 38 вуласа парӑр.) Ҫакна тума ӑна мӗн хавхалантарнӑ? Вӑл Турӑ Сӑмахне хакланӑ. Ҫакӑ вӑл урапа ҫинче ларса пынӑ чухне Исаия пророк кӗнекин пӗр сыпӑкне вуласа ларнинчен курӑнать. Филиппа калаҫса вӑл Иисус Христос уншӑн мӗн тунине пӗлнӗ, вара ҫакӑншӑн пархатарлӑ пулнӑ. Ҫак улпут Иерусалима мӗншӗн кайнӑ-ши? Мӗншӗн тесен вӑл Иеговӑна юратнӑ. Эпир ҫакна ӑҫтан пӗлетпӗр? Вӑл Иерусалима Иеговӑна пуҫҫапма кайнӑ пулнӑ. Тен, ҫак улпут хӑйӗн тӗнне улӑштарнӑ та чӑн Турра пуҫҫапакан пӗртен-пӗр халӑхпа пӗрлешнӗ. Иеговӑна юратни ӑна тепӗр утӑм тума хавхалантарнӑ: вӑл шыва кӗрсе Христосӑн вӗренекенӗ пулса тӑнӑ (Матф. 28:19).

3. Шыва кӗме мӗн чӑрмантарма пултарать? («Сирӗн чӗрене мӗнле ҫӗрпе танлаштарма пулать?» рамкӑна пӑхӑр.)

³ Иеговӑна юратни сире те шыва кӗме хавхалантарма пултарать. Анчах та юрату шыва кӗме чӑрмантарма та пултарӗ. Ҫакӑ мӗнле пулма пултарать? Тен, эсир Иеговӑшӑн ӗҫлемен туссене е хурӑнташсене питӗ юрататӑр. Вара эсир ҫапла шухӑшлама пултаратӑр: «Эпӗ шыва кӗрсен вӗсем манпа хутшӑнма пӑрахӗҫ» (Матф. 10:37). Е, тен, сире Иегова курайман йӑласене пӑрахма тата унӑн нормисемпе килӗшӳллӗ пурӑнма йывӑр (Пс. 96:10). Е, эсир суя тӗнпе ҫыхӑннӑ уявсемпе йӑла-йӗркесене мӗн ачаранах юрататӑр. Эсир ҫав самантсене ӑшшӑн аса илетӗр пулӗ. Ҫавӑнпа ҫав уявсем Иеговӑна килӗшменнине пӗлетӗр пулин те, вӗсене уявлама пӑрахма сире питӗ йывӑр (1 Кор. 10:20, 21). Вара сирӗн суйласа илме тивет: «Эпӗ кама е мӗне ытларах юрататӑп?»

КАМА ПУРИНЧЕН ЫТЛА ЮРАТМАЛЛА?

4. Шыва кӗме чи малтан мӗн хавхалантармалла?

⁴ Эпир нумай мӗне юратма тата хаклама пултаратпӑр. Тен, эсир Иегова Свидетелӗсене тӗл пуличченех Библие питӗ хакланӑ тата Иисуса та юратнӑ пулӗ. Иегова Свидетелӗсемпе паллашсассӑн вара сире вӗсемпе хутшӑнма питӗ килӗшрӗ пулӗ. Анчах та ҫакӑ веҫех хӑвӑра Иеговӑна халаллама тата шыва кӗме хавхалантармасан та пултарать. Ҫак йышӑнӑва тума чи малтан Иеговӑна юратни хавхалантармалла. Эсир пуринчен ытла Иеговӑна юрататӑр пулсан, эсир никама та, ниме те уншӑн ӗҫлеме хӑвӑра чӑрмантарма памӑр. Иеговӑна юратни сире шыва кӗме хавхалантарӗ тата шыва кӗнӗ хыҫҫӑн та ӑна шанчӑклӑ тӑрса юлма пулӑшӗ.

5. Ҫак статьяран эпир мӗн пӗлӗпӗр?

⁵ Иисус Иеговӑна пӗтӗм чӗрепе, пӗтӗм чунпа, пӗтӗм ӑспа, пӗтӗм вӑй-халпа юратмалла тенӗ (Марк 12:30). Иеговӑна ҫавӑн пек хытӑ юратма тата хисеплеме вӗренме мӗн пулӑшӗ? Иегова пире мӗн тери хытӑ юратни пирки шухӑшлатпӑр пулсан, эпир те ӑна юратма пуҫлӑпӑр (1 Иоанн 4:19). Ҫак статьяран эпир Иеговӑна юратма пуҫлас тесен тата шыва кӗрес тесен мӗн тумаллине пӗлӗпӗр.

6. Рим 1:20 тӑрӑх, эпир Иегова ҫинчен мӗнле пӗлме пултаратпӑр?

⁶ Иегова ҫинчен вӑл тунӑ япаласене сӑнаса ытларах пӗлӗр. (Рим 1:20 вуласа парӑр; Ӳлӗм. 4:11.) Иегова тунӑ ӳсен-тӑранпа чӗрчунсене сӑнаса унӑн ӑслӑлӑхне курма вӗренӗр. Пирӗн кӗлеткене мӗнле тӗлӗнмелле йӗркелени ҫинчен пӗлме тӑрӑшӑр (Пс. 138:14). Пирӗн хӗвел ытти миллиард ҫӑлтӑрпа танлаштарсан пысӑках мар пулсан та, Иегова ӑна мӗн тери хӑват пани ҫинчен шухӑшласа пӑхӑр-ха (Ис. 40:26)b. Ҫапла тусан вара эсир Иеговӑна хытӑрах та хытӑрах хисеплеме пуҫлӑр. Анчах та Иегова ӑслӑ-тӑнлӑ та хӑватлӑ пулнине пӗлни ҫителӗксӗр. Иеговӑна ытларах юратма пуҫлас тесен тата унӑн тусӗ пулса тӑрас тесен унӑн ытти енӗсене те пӗлсе пымалла.

7. Иеговӑна хытӑрах юратас тесен мӗн курма тӑрӑшмалла?

⁷ Иегова кашни ҫынна, ҫав шутрах сире те, юратать. Ҫакна сирӗн курма тӑрӑшмалла. Ҫӗрпе тӳпене Тӑваканӗ сирӗн ҫинчен пӗлни пирки тата сире юратни пирки иккӗленетӗр пулсан ҫакна асра тытӑр: Иегова «пирӗн ҫывӑхрах, кашнийӗ ҫывӑхӗнчех» (Ап. ӗҫ. 17:26—28). Вӑл «пур чӗрене те тӗрӗслесех тӑрать». Давид Соломона: «Ӑна [Турра] шыратӑн пулсассӑн, тупӑн Ӑна»,— тесе каланӑ (1 Ҫулс. 28:9). Сирӗн пирки те ҫавнах калама пулать. Шутласа пӑхӑр-ха, Иегова сире хӑй патне ертсе пынӑ, ҫавӑнпа эсир халӗ Библи вӗренетӗр (Иоанн 6:44). Иегова сирӗншӗн мӗн-мӗн тунине мӗн чухлӗ ытларах курса тӑратӑр, ҫавӑн чухлӗ хытӑрах ӑна юратма пуҫлӑр.

8. Иегова сире юратнӑшӑн пархатарлӑ пулнине эсир мӗнле кӑтартма пултаратӑр?

⁸ Иегова сире юратнӑшӑн пархатарлӑ пулнине эсир мӗнле кӑтартма пултаратӑр? Майсенчен пӗри вӑл — кӗлтуни. Хӑвӑра мӗн пӑшӑрхантарнине ӑна каласа тӑрсан тата вӑл сирӗншӗн мӗн тунӑшӑн ялан тав тусан эсир Иеговӑна тата хытӑрах юратма пуҫлӑр. Иегова сирӗн кӗлӗсем ҫине хуравланине курсан хӑвӑрпа унӑн хушшинчи туслӑх ҫирӗпленсех пырӗ (Пс. 114:1). Вара вӑл сире ӑнланнине уҫҫӑн курӑр. Анчах та Иеговӑпа ҫывӑхланас тесен сирӗн вӑл мӗнле шухӑшланине те ӑнланмалла. Унсӑр пуҫне, Иегова сирӗнтен мӗн кӗтнине те пӗлмелле. Ҫакна веҫех унӑн Сӑмахне, Библие, вӗренсе ҫеҫ пӗлме пулать.

9. Библие хакланине эсир мӗнле кӑтартма пултаратӑр?

⁹ Турӑ Сӑмахне, Библие, хаклама вӗренӗр. Библире ҫеҫ чӑнлӑх ҫинчен тата Иегова сирӗн пирки мӗн шутласа хуни ҫинчен ҫырса панӑ. Библие хакланине мӗнле кӑтартма пулать? Ӑна кашни кун вулӑр. Сирӗнпе Свидетельсенчен пӗри Библи вӗренет пулсассӑн, Библи вӗренме кашнинчех хатӗрленӗр тата мӗн пӗлнипе пурнӑҫра усӑ курӑр (Пс. 118:97, 99; Иоанн 17:17). Сирӗн Библи вуламалли график пур-и? Пур пулсан эсир ҫав графика тытса тӑратӑр-и? Библие сирӗн кашни кун вулама май килет-и?

10. Библи ытти кӗнекесенчен мӗнпе уйрӑлса тӑрать?

¹⁰ Ҫавӑн пекех Библире Иисус Христоса курнӑ ҫынсем мӗн каласа панине ҫырса хунӑ. Иисус пирӗншӗн мӗн тунине унта ҫеҫ тӗп-тӗрӗс ҫырса панӑ. Иисус мӗн каланине тата мӗн тунине вуласа пӗлсен эсир, тен, унӑн тусӗ пулас тейӗр.

11. Иеговӑна юратма вӗренес тесен мӗн тумалла?

¹¹ Иисуса юратма вӗренӗр, вара эсир Иеговӑна хытӑрах юратма пуҫлатӑр. Иисус пур тӗлӗшрен те Ашшӗ пекех пулнӑ (Иоанн 14:9). Ҫавӑнпа мӗн чухлӗ ытларах эсир Иисус ҫинчен пӗлсе пыратӑр, ҫавӑн чухлӗ лайӑхрах Иегова мӗнле шухӑшланине ӑнланса пыратӑр тата ӑна хытӑрах юратма пуҫлатӑр. Иисус мӗскӗнсене — чухӑн, чирлӗ тата хавшак ҫынсене — мӗнле хӗрхеннине аса илӗр. Унсӑр пуҫне, вӑл панӑ усӑллӑ канашсем ҫинчен тата ҫав канашсене итлесен сирӗн пурнӑҫ мӗнле лайӑхланни ҫинчен шухӑшласа пӑхӑр (Матф. 5:1—11; 7:24—27).

12. Иисус ҫинчен пӗлсе пыни сире мӗн тума хавхалантарма пултарать?

¹² Иисуса тата хытӑрах юратма пуҫлас тесен унӑн тӳлесе илме панӑ парни сирӗн ҫылӑхсене каҫарттарма пултарни ҫинчен тарӑн шухӑшлӑр (Матф. 20:28). Вӑл хатӗр пулсах хӑйӗн пурнӑҫне сирӗншӗн панине ӑнланса илсен сирӗн ӳкӗнме тата Иеговӑран каҫару ыйтма кӑмӑл ҫуралма пултарӗ (Ап. ӗҫ. 3:19, 20; 1 Иоанн 1:9). Ҫавӑн пекех Иеговӑпа Иисуса юратма пуҫласан сирӗн вӗсене юратакансемпе хутшӑнас килсе кайӗ.

13. Иегова сире мӗн панӑ?

¹³ Иегова кама юратать, ҫавсене юратма вӗренӗр. Тен, Иеговӑна ӗненмен хурӑнташсемпе унчченхи туссем эсир хӑвӑрӑн пурнӑҫа мӗншӗн ӑна халалласшӑн пулнине ӑнланмаҫҫӗ. Вӗсем сире хирӗҫ тӑма та пултараҫҫӗ. Анчах Иегова сире урӑх ҫемье — пухури тӑвансене — панӑ. Эсир пухури тӑвансемпе туслӑ пурӑнатӑр пулсан хӑвӑра юратнине туйса тӑрӑр тата пулӑшусӑр тӑрса юлмӑр (Марк 10:29, 30; Евр. 10:24, 25). Тен, вӑхӑт иртнӗҫемӗн сирӗн хурӑнташсем те Иеговӑшӑн ӗҫлеме тытӑнӗҫ тата ӑна итлесе пурӑнма пуҫлӗҫ (1 Петр 2:12).

14. 1 Иоанн 5:3-мӗшӗнчи сӑмахсем тӗрӗс пулнине курма сире мӗн пулӑшрӗ?

¹⁴ Иеговӑн нормисене хисеплесе вӗсене тытса тӑма вӗренӗр. Иеговӑна пӗличчен эсир хӑвӑр пӗлнӗ пек пурӑннӑ, халӗ вара Туррӑн нормисем тӑрӑх пурӑнма пуҫласан, ҫакӑ чылай лайӑхрах пулнине куратӑр (Пс. 1:1—3; 1 Иоанн 5:3 вуласа парӑр). Библире упӑшкасене, арӑмсене, ашшӗ-амӑшӗсене тата ачасене панӑ канашсем ҫинчен шухӑшласа пӑхӑр-ха (Эф. 5:22—6:4). Ҫав канашсене тытса тӑнине пула сирӗн ҫемьери хутшӑнусем лайӑхланмарӗҫ-и? Туссене суйласа илес тӗлӗшрен Иегова панӑ канаша итлени сире лайӑхрах ҫын пулса тӑма пулӑшмарӗ-и? Эсир телейлӗрех пулса тӑмарӑр-и? (Ытар. 13:21; 1 Кор. 15:33.)

15. Библири принципсемпе пурнӑҫра мӗнле усӑ курмаллине ӑнланас тесен мӗн тума пулать?

¹⁵ Хӑш-пӗр чухне сире Библири принципсемпе пурнӑҫра мӗнле усӑ курмаллине ӑнланма йывӑр пулма пултарать. Иегова ҫакна пӗлет, ҫавӑнпа хӑйӗн организаци урлӑ сире Библие ӑнлантарса паракан публикацисемпе видеороликсене парса тӑрать, вӗсем вара «ырӑпа усала уйӑрма» пулӑшаҫҫӗ (Евр. 5:13, 14). Ҫак материалсене тӗпченӗ май эсир Библири принципсем мӗн тери усӑллӑ пулнине тата хӑвӑрӑн пурнӑҫра вӗсемпе мӗнле усӑ курмаллине курӑр, вара сирӗн Иеговӑн халӑхӗ хушшинче пулас килсе кайӗ.

16. Иегова хӑйӗн халӑхӗ хушшинче мӗнле йӗрке хунӑ?

¹⁶ Иеговӑн организацине юратма тата ӑна пӑхӑнса тӑма вӗренӗр. Иегова хӑйӗн халӑхӗ валли пухусем йӗркеленӗ. Хӑйӗн Ывӑлне, Иисус Христоса, вара ҫак пухусен пуҫлӑхӗ пулма лартнӑ (Эф. 1:22; 5:23). Иисус хальхи вӑхӑтра ертсе пырас ӗҫе святой сывлӑшпа суйласа илнӗ христиансен пысӑках мар ушкӑнне шанса панӑ. Вӑл ҫак ушкӑн пирки «шанчӑклӑ та ӑслӑ чура» тенӗ. Ун шутне кӗрекен арҫын тӑвансем сире Иеговӑпа ҫывӑхланма тата унпа хӑвӑр хушӑри хутшӑнусене хӳтӗлеме пулӑшаҫҫӗ (Матф. 24:45—47). Сӑмахран, вӗсем сирӗншӗн старейшинӑсем урлӑ тӑрӑшаҫҫӗ, старейшинӑсем вара сире вӗрентсе, хӳтӗлесе тӑраҫҫӗ. (Ис. 32:1, 2; 1 Петр 5:2, 3; Евр. 13:17). Старейшинӑсем сире йӑпатас тесе тата Иеговӑн ҫывӑх тусӗсем пулса тӑма пулӑшас тесе мӗн тума пултарнине веҫех тӑваҫҫӗ. Чи кирли вара — вӗсем сире Иегова ҫинчен ыттисене каласа пама пулӑшаҫҫӗ (Эф. 4:11—13).

17. Рим 10:9, 10, 13, 14 сӑвӑ йӗркисем тӑрӑх, мӗншӗн эпир ыттисене Иегова ҫинчен каласа паратпӑр?

¹⁷ Ыттисене Иеговӑна юратма вӗрентӗр. Иисус хӑй хыҫҫӑн пыракансене ытти ҫынсене Иегова ҫинчен каласа ҫӳреме хушса хӑварнӑ (Матф. 28:19, 20). Паллах ӗнтӗ, ҫак ӗҫе тумалла тенӗрен ҫеҫ тума пулать, анчах Иеговӑна хытӑрах та хытӑрах юратса пынӑҫемӗн сирӗн шухӑш-кӑмӑл Петрпа Иоанӑнни пекех пулса пырӗ. Вӗсем ҫапла каланӑ: «Эпир хамӑр мӗн курнине, мӗн илтнине каламасӑр тӑраймастпӑр» (Ап. ӗҫ. 4:20). Эпир пулӑшнипе пӗр-пӗр ҫын Иеговӑна юратма пуҫласан, ҫакӑ пире ҫав тери савӑнтарать, ҫапла мар-и? Эфиопи улпутне чӑнлӑха пӗлме тата шыва кӗме пулӑшсан ырӑ хыпар саракан Филипп мӗн тери савӑннӑ пулӗ! Филипран тӗслӗх илсен тата Иисус хушнӑ ӗҫе туса тӑрсан эсир Иегова Свидетелӗ пуласшӑн пулнине ҫирӗплетсе паратӑр. (Рим 10:9, 10, 13, 14 вуласа парӑр.) Вара сирӗн Эфиопи улпучӗн пекех, тен, ҫапла калас килсе кайӗ: «Шыва кӗме мана мӗн чарать?» (Ап. ӗҫ. 8:36, ҪТ.)

18. Тепӗр статьяра эпир мӗн пӑхса тухӑпӑр?

¹⁸ Эсир тӑвакан йышӑнусенчен чи пӗлтерӗшли вӑл — шыва кӗме шут тытни. Ҫавӑнпа та чи малтан ҫак ыйтусем ҫинчен шухӑшласа пӑхӑр: шыва кӗресси ҫинчен мӗн пӗлмелле? Шыва кӗрес умӗн тата шыва кӗнӗ хыҫҫӑн мӗн тумалла? Ҫак ыйтусене эпир тепӗр статьяра пӑхса тухӑпӑр.