Ccangkunaw ccang 5
Lae phi hynh Pachia nynh paw cih te mou a ee?
Paw cce mou lae phi hynh Pachia nynh arae? (1, 2)
Lae phi hynh paw cce mou paradise lang atang khyh? (3)
Ccung ccah hoi lei hae paw, paw lang mou tang cih hae? (4)
Adang lei paw, atawpaw, achih hae paw hang lang a mah lang Zisu nynh pawte mou yn ci pya ngaw? (5, 6)
Mah lang hy thua naw mue nary ze paw rya mou law na ho? (7)
1. Pachia nynh e lae phi arae thenaw paw tuh lae vaw lang ccung ccaw hae nynh hoisah nawte ung hae sah cite a ding paw miakaw elae phi kya zungzae ung hae sah, cih yn ry. (Sam 115:16; Isaiah 45:18) Lae phi tuh paw paw te mah roh lang khyh. Zung zae atyn cih.—Sam 104:5; Phungchimtu 1:4.
2. Pachia nynh ccung ccaw a la rae maw ze laephi vaw sang kheih kya khe apui thya paw paradise lang atang sah. Tuh etuh Edin kho khu cite min a phu. Tuh ekya tuh noh pi te pihse Adam te Evua kha ala ung sah hae. Mih ming hang lang Pachia ee naw tuh ccahnung ccah paw patae sah te laephi bia lang. Lae phi pyngpi paradise lang byabya tang sah lang.—Genesis 1:28; 2:8, 15.
3. Adam te Evua nynh Pachia kaw bya kha rou rou te ei hae zah la sei hae. Tu kei ccu Zahova nynh Edin kho khu kya te alah de hae. Paradise tuh phela zo vae. (Genesis 3:1-6; 23) Thua sla mah e lae phi hynh Pachia pa ccyng naw roh lae khyh. Paradise lang pung tang sah te ccung ccaw hae nynh zungzae a ung cih hae cite bya aking ku. Paw cihte mou yn rae pathui cih?—Sam 37:29.
4. E lae phi hynh paradise lang tang kho naw lang ccung ccah hoi lei paw miakaw pung thya sah lang. (Sam 37:38) Amagedon tuh Pachia nynh ccungccah hoi lei paw miakaw aro ninte athya sah nin. Tukoute setan akum 1000 thung ccah cih. Ou e nynh lae phe roh tuhae ccung ccah hoi lei paw ung vae lang khyh hae cipaw alang sah. Pachia min phun hae rou nynh hoi te aung vae cih hae.—Biathlam 16:14,16; 20:1-3.
5. Tuh kou te Zisukri siangpahrang nynh e lae phi hynh akum 1000 yn uh cih. (Biathlam 20:6) Amaw nynh alungthin te apyng seinaw kha bya byate yn thye sah pah cih. Ae ning mah Adam te Evua hawte a ccing paw lang thua lang vae. Tetuh cci haw naw, tawnaw, chinaw ung vaelang khyh. Adang lei paw yn dang cih zah ataw paw blyng yn no thui vae cih.—Job 33:25; Isaiah 33:24; Biathlam 21:3, 4.
6. Zisu kum 1000 yn uh lung khu zyntyn ccung ccaw hae nynh lae phi pynpi paradise lang tang sakho naw thawte yn zua kuh cih hae. (Luka 23:43) Ria tae lei achih hae paw mah lae vawlang hing bua yn tho thui cih hae. (Zuitu 24:15) Pachia nynh anaw hae hawte rya alaw hae zetuh e lae vaw lang hing zungzae aung vae cih hae. Athua khyh ze zung zae ronaw amue cih hae.—Zan 5:28, 29; Biathlam 20:11-15.
7. Ou hynh cih hynh te nynh Pachia nynh lae phi alah ee naw hawte yn ccing sah cih. Mahlang hy thua naw mue nary tou? Na ry ze Zahova akong pei ccang kuh lah ae ngia paw miakaw rae aho. Nae khua Zahova ccae ccei hae apung kunaw hae kya napung ku bua naw nynh, arya law lang nangkha solei ae bung cih.—Isaiah 11:9; Hebru 10:24, 25.
[Hmanthlak biu 10]
Paradise phe zo
[Hmanthlak biu 11]
Armegedom koutu e lae phi tuh paradise lang so lei yn tang cih