Ccangkunaw ccang 10
Pachia nynh a hua paw zia zae hae
Pachia nynh hoi khyh aci paw miakaw nang pawte mou na tua? (1)
Paw te ung kheih i kheih naw mou sei naw athua? (2)
lingku naw (3) phuate zuenaw (3) runaw (3) hoi khyhnaw (4) setan thya haw naw (5) samaw nia lue naw hae blyng kha kriccaw lu kheih nynh pawte mou muih lang accang? (6)
hoi lei naw ziazae kya te pawte mou lue kho lang? (7)
1. Pachia see hae tuh ahoi paw kha nynh ary hae. Thua sla mah ahoi lei paw o zia kha hua thya aho. (Sam 97:10) Tuh e nynh ahoi lei paw zia zae kha si hae ku lang ci paw ahory. Ahoi lei paw o zia abang tuh paw mou?
2. Nohpi pihse seinaw: Chia pya kumaw ze ung kheih naw, mih lae zu. Mih lae vawte seinaw, rang sawte seinaw, chisaw eih nae kuh ungpaw te ung kheih naw, pih sete pihse seinaw miakaw blyng tuh seinaw le paw cci nynh athua hae. (Levitekas 18:6; Rom 1:26, 27; 1 Korin 6:9-10) Chia pya ty lei te ung kheih lang ze mih ming tuh phiaku lang accang (or) kuih kyng kulang accang.—Hebru 13:4.
3. Lingku naw, phuate zuenaw, runaw: Zahova Pachia tuh a hyng kho lei paw. (Titas 1:2) Pachia kya mae hoinaw mue ary paw nynh hyng bya holang a sung kuh cih. (Phungthlukbia 6:16-19; Kolose 3:9, 10) Phuate zuepaw miakaw blyng karang kute mih lae uccaw dua naw Kriccaw hae tuh thi, marang cci ku te khung tae naw, bingte zuenaw, phua te zue naw miakaw kya zue bue khyh hae. (Efesa 5:3-5) Tuh apia ze Kriccaw hae tuh ruh boikhyh hae. Ru paw uccaw mah are khyh hae hawte a hung kaw leite uccaw mah law kuh hua taw khyh hae.—Exodus 20:15; Efesa 4:28.
4. Thin ria naw, ziaku naw: ngae sang kho khyh naw nynh ahoi lei paw lang yn tang. (Genesis 4:5-8) Arearo paw lu kheih tuh Pachia vaeccaw thua kho khyh. (Sam 11:5; Phungthlukbia 22:24-25) Mih lae nynh yn cisei haeze, bua lia ru paw tuh sei naw.—Phungthlukbia 24:29; Rom 12:17-21.
5. Puimaw thya naw, setan thya naw: Abang ccung ccaw nynh a ccih paw dang sah naw lang muih saw thaw sae naw kha angia hae. Abang tuh a raw ae kha, ccih ae sah, chih hae sah cite anaw sah hae. Erya law thaw zung pya tu paw tuh setan nynh thua tuh kei ccu Kriccaw nynh tuh cih haw paw cibua lei lang. (Deuteronomy 18:9-13) Ae ning kha ccung ccaw hae nynh yn naw bahsi hae ze, ahoi hua paw khung kunaw tuh Zahova te vae ccaw ku naw rou nynh thua.—Phungthlukbia 18:10.
6. A rah nia naw: Samaw, beer or accang paw hoi sah naw ccah pyh mang tuh seinaw thua khyh. (Sam 104:15; 1 Timote 5:23) Thua sla mah nia lue naw tuh Pachia mah lang seinaw. (1 Korin 5:11-13; 1 Timote 3:8) A rah nia luenaw tuh pyng mah yn roh zah inn byng mah aroh thya. Ccung ccaw tou ku paw bya kha mah arang te azui kuh sei thya kho.—Phungthlukbia 23:20, 21, 29-35.
7. Pachia nynh hoi khyh ci paw miakaw a zuilei paw tuh Pachia penaw ro ccou kho lang khyh. (Kalati 5:19-21) Pachia kha thang ccangte sung sah ry zah, a lung tung ary paw tuh e ozia kya te alue kho. (1 Zan 5:3) Pachia nynh hoi khyh aci paw miakaw kyate lue naw zuakuh. (Rom 12:9) Pahia Ozia a hoi aaepaw Ccungccaw aae ryte mungkuh oh. (Phungthlukbia 13:20) A tang paw Kriccawte mung ku tuh yn bung tu nynh thua. (Zeim 5:14) Tuh e lae ze Pachia klang saw sang kha do lia kuh hua.—Filipe 4:6, 7, 13.
[manthlak biu 20, 21]
Pachia nynh arah nia lue naw, runaw, phuate zuenaw, ruro naw ozia blyng ahua