Ccangkunaw ccang 11

Pachia nynh ary lei paw phungte zae hae

Pawte cih paw zynnaw te phung zae mou seinaw? (1)

Pachia tuh luh thung py paw cite kriccaw nynh zyn lang ccang tou? (2)

Kriccaw ame paw nynh christmas, thopuai (or) puinin hynh amang khyh hae? (3, 4)

A chih vae paw nynh ahing paw hynh vaw saw pya kho tou? (5)

Zisu hynh vaelang tung kya khe chih tou? (6)

Pachia lungry tunglang paw cih mou azi ci? (7)

1. Zyn naw te phung zae hae hynh hoi khyh ci paw thua khyh. Thuasla zema ame lei paw beih naw kyate yn thua paw (or) Baebute aloku khyh zetuh Pachia nynh ry lang khyh.—Matu 15:6.

2. Lu thungpy lu kheih: Zahova tuh lu thungpy paw Pachia ccang kheih thua tou? Thua khyh. Zahova tuh ame paw Pachia lukheih nynh a thua. (Zan 17:3; Marka 12:29) Zisu tuh Pachia ccahtaw ccaw thua zah Pachia zakaw ung paw nynh thua. (1 Korin 11:3) A paw tuh accah paw lae ze ale hua. (Zan 14:28) Thya muih saw tuh pyng lu kheih thua khyh. Pachia thaw saenaw huhang nynh thua.—Genesis 1:2; Zuitu 2:18.

3. Christmas te thopuai: Zisu tuh December 25 nin pui khyh. Tuu ring hae nynh rang kaw khua zi tuu a ring kho lya hae october nin 1 nin hang nynh apui. (Luka 2:8-12) Zisu nynh apui nin lung lang, vae kheih sang mah ho boi khyh. Achi nin thang nynh ning khyh naw lang, tua thui naw lang na rae cih oh cite aho sya. (Luka 22:19, 20) Christmas phung zae hae hynh khui khu rynlya e beih nawa melei paw kyate nynh yn thua. Tho puai kya ze awtui hang khe kheih, saveih hae mang paw mah tuh e kyate nynh yn thua mah ming. Atakaw e Kri­ccaw hae nynh christmas thopuai atua khyh hae hawte atu nin e kriccaw ame hae pawmah tua bua khyh hae.

4. Puinin Baebu kya puinin lung puai hynh Pachia beih lei hae paw nynh ala tua boi hae. (Genesis 40:20-22; Marka 6:21, 22, 24-27) Atakawlya e Kriccaw hae nynh puinin lung boi khyh hae. Puinin lung tuh ame lei paw beih naw kyate yn thua paw. Ame paw Kri­ccaw hae nynh kum kheih lung khu lasung pya ku. Lung tua naw ccyh mah ahoi klang hae.

5. Michi hae rinaw: Michi ae nynh paw paw mah cih kho vae khyh. Vaw sawnaw mah yn pya kho khyh hae. Bung mah yn bung kho khyh hae. (Sam 146:4; Phungchimtu 9:5, 10) Muih saw tuh or soul tuh achih. Accang lang sang kha kheih kya hing kho lae vae khyh. (Ezekiel 18:4) Muih saw hoi li hae paw nynh achih paw muih saw lang sah lah cite leih tang hae. Achi paw ri beih cih paw tuh mah zi me khyh.—Isaiah 8:19.

6. Vaelangtung: Zisu tuh vaelangtung kya chih khyh. Thing saepaw, thing tungkya nynh achi. Baebu kya vaelangtung cite aleih hae paw kha ­Greek­ bya thingtung nynh thua. Vaelangtung nynh khui lang maw lya ame lei paw beih naw kyate yn thua paw. Ata kaw e Kri­ccaw hae tuh vaelangtung mang khyh hae, beih khyh hae. Tu kei cce ze beih naw kya ­vaelang­tung mang paw hynh me ngaw tou?—Deuteronomy 7:26; 1 Korin 10:14.

7. Abang ccung ccaw tuh phung zae ryng paw vua lang aru sah ngaw, pui zia te vae ccaw hae nynh ame lei paw zyn naw vua nang sah cite a zua kuh cih hae. Thua sla ze mah ccung ccaw lung ry tung lae ze Pachia lungry tung ahoi hua.—Phungthlukbia 29:25; Matu 10:36, 37.

[manthlak biu 22]

Pachia tuh lu thungpy lu kheih thua khyh

[manthlak biu 22]

Christmas te thopuai tuh ame lei paw beih naw kyate yn thua paw

[manthlak biu 22]

Michi hae ri beih tuh a suilang ung khyh