Ccangkunaw ccang 12
Hingnaw te chi tung vaw sawtua lang sah naw
Hing naw hynh paw cihte mou muih lang accang? (1) Vue kya e ccaw chia soh pawte mou muih lang? (1)
Kriccaw nynh lungthin pawte mou thya saku lang? (2)
Rang saw chia soh sei tou? (3)
Hing naw hy saw tua naw zia zae abang soh paw mou? (4)
Tuh e kya chi ruin ku pa bua tou? (6)
1. Zahova tuh hing naw leih baw thah rui nynh thua. Hing naw miakaw Pachia kyate nynh amuech. (Sam 36:9) Hing naw tuh Pachia hanglang aphu mya rya ate. Anung vue kya e apui loh lei paw imua hingnaw mah aphu mya rya ate sah. Ale thung haepaw imua rou rou chia tuh paw cih mou asei cih.—Exodus 21:22, 23; Sam 127:3.
2. Amepaw kriccaw ae nynh vaw saw naw kyate luenaw pe aki kuh hae. Mih inn mih maw taw hae kha hoi te acyih sei hae. (Deuteronomy 22:8) Pachia see hae nynh lungtua naw, lungthonaw elang aho lei paw vuakunaw rae khyh hae. Ccung ccaw vaw saw pya lang paw zuenaw puai kya pa bua khyh hae. Vaw saw pya thya paw zue paw kha asi hae ku hae.—Sam 11:5; Zan 13:35.
3. Rang saw hingnaw mah Pachia nynh aphu te sah. Kriccaw lu kheih nynh ae nia lang, uccaw muenaw lang, ccinaw haw naw te lue kho naw lang rang saw sung saw chia kho athua. (Genesis 3:21; 9:3; Exodus 21:28) Thua sla mah zuenaw langte rourou chia tuh sei naw.—Phungthlukbia 12:10.
4. Hoisanaw langte mae zu naw, kue khae naw, Rui mangpaw samaw mangpaw tuh hoikhyh. Emang paw tuh seinaw, akong tuh (1) mih see lang yn tang sah, (2) pyng vaw saw yn pya, (3) ae ning kha yn thu sah kei ccu. (Rom 6:19; 12:1; 2 Korin 7:1) E hae sung tuh rusla zemah Zahova lungry tung lang sung ku aho.
5. Chi mah Pachia muih naw kya aphu koute Pachia nynh soul or hingnaw tuh chi kya nynh aung aci. Tuh kei ccu chi ae tuh sei naw. Chi atoi kuh lei paw saw ae tuh seinaw. Nging o, kang kae te achih paw saw mia kaw ae lang ccang khyh. Ccuai te chia paw maethe te kaw paw aery lang ze arangte chi kha lae lang.—Genesis 9:3, 4; Levitikas 17:13, 14; Zuitu 15:28, 29.
6. Chi ruin ku sei tou? Zahova nynh chi sung kuh oh aci paw ning nang. Amaw chi thua sah, ming hae chi thua sah ruin ku kho thua khyh. (Zuitu 21:25) Tu keiccu ame paw kriccaw nynh chi ruin ku leh khan lang khyh. Mih ming nynh chipa lei paw te si ku ku khah nynh leh akhan cih hae. Chih ry khyh hae sle zema Pachia kaw bya ei te hing naw khung ku lang zua kuh lang khyh hae.—Matu 16:25.
[manthlak biu 25]
Ae ning tuh Pachia lungry tung khy lang athu naang paw phungzae ahoi lei paw vue kunaw blyng si hae ku lang